February

Temanyana ya lekgono yi ra gore king? Jeso o yye mahlong a hlatolla gore, ke go nyaka ba bangwana go phala ka mokgo re tinyakang kela tsela tsa gore Mokreste ye mongwana a ka kgwela mogagabo mo go hlokega. Lentsu la Modimo le re tšhutisa gore go nyakanana ke selo se segolo ka matla. Mo re beyisa, ba go tlala ba jabodisa ke ditemanyana tsowa tsa gore: “Mo ba bolabola ka go nyakanana ba ra Modimo.” (1 Joh. 4:8) “O nyake moyagelane wago ka mokgo o tinyakang ka gona.” (Mat. 22:39) “Go nyakanana hone go nyoko phiphetsa dilo ka mokana ga tsona tsa go sinya.” (1 Pet. 4:8) “Mo o mo nyaka wa mo nyaka.” (1 Makor. 13:8) Ditemanyana tsowa le tse dingwana di napa di maka gore taba yowa ya gore di gabutši ka matla gore re šupetsane mokgwa wowa wa go bafala yi re yelele. Jehova ke yene a šupetsang go nyakanana tsa mannete fote bo a ba rufiyeng ka moya wage wa go hlawolega ba nyakanana tsa mannete. (1 Joh. 4:7) Byalo, di ro napa di kwagala gore ke ntaba Jeso a hlayye gore malata yage ya mannete ma nyoko šupetsana gore maa nyakanana. Jeso o hlayye botala gore ba go tlala ba šele ba di bonne gore malata yage ya mannete maa nyakanana. w23.03 27-28 ¶5-8

Ayitsano di nyaka o tšhuta go tshwarela ba bangwana? O ka thomisa ka go bala le go ghayela ka mešupetso yo yi leng ka ho Bhayibeleng ya batho ba gore ba yye ba tshwarela ba bangwana di tšwa pelong le ba gore a sanka ba maka ka mokgonone. Lebelela mošupetso wa Jeso. O yye a tshwarela ba bangwana di tšwa pelong. (Luk. 7:47) Fote a sanka a beya lihlo ga tso ba bangwana ba kekemisiyeng ga tsona mara o f’lo ya mahlong a lebelela tsa gabutši tso ba kgonang go di maka. Mara Mafaraseyi ya dinako tsa Jeso wona “ke mo ma tseya ba bangwana go se selo.” (Luk. 18:9) Mo o fetsiye go ghayela ka mešupetso yowa, tiputsise gore: ‘Batho ba bangwana ke ba tseya byang? Ke mekgwa yifeng ya gabutši yo ke yi lebelelang ga bona?’ Mo nkare di ya go phukulusa go tshwarela motho ye mongwana, liketsa go ngwala mekgwa ka mokana ga yona ya gabutši yo o yi bonang gage. Ke mokane o tiputsise gore: ‘Jeso yene o re king ka motho yewa? Ayitsano ne a ka mo tshwarela?’ Go tšhuta ka dilo tsa mošaga wonone di ka go gelepa gore o tšhentšhe ka mokgo o naganang. Mathomisong, o ka kraya di nyaka gore re bereke re šwennye gore re tshwarele motho ye a re kwisiyeng go baba. Mara mo re ka fo ya mahlong re kene re garagara, re nyoko šinya re di tlwayela tsa go tshwarela ba bangwana di tšwa pelong. w22.04 23 ¶6

Ga puku ya Kutullo, manaba ya Modimo ba ma hlatolla ka mokgwa wa go tshwanisela. Fote temanyana yone yi bolabola ka diphoolwane tsa go tshosa tsa hlaga. Mo re beyisa, yi re “phoolwane ya go tshosa ya hlaga yi yinuga yi tšwa lewatleng.” Yi na le “lesome la manaka fote yi na le kašupa ya dihlogo.” (Kut. 13:1) Phoolwane yone yi šele nthago ke “phoolwane ye nngwana ya hlaga ya gore yi tshosa ka matla yi yinuga yi tšwa lefaseng.” Phoolwane yone yi bolabola go tshwana le noga ye kgolo ya go tshosa fote yi maka gore “mollo wo tšwe legedimong.” (Kut. 13:11-13) Ke mokane go nyarela ye nngwana phoolwane, “phoolwane ya hlaga ya khala ye khubedu ya nkare ke madi,” ya gore yi kalamme ke nghwahla. Diphoolwane tsowa ka ditharo di yemela manaba ya botala ya Jehova Modimo le Mmušo wage. Byalo di nyaka re yi tseyela gedimo taba ya gore re tšibe gore manaba yane ke bomang. (Kut. 17:1, 3) Di nyaka re thomisa ka go kwisisa gore tso ba tshwanisang ka tsona di rela ying. Gore re thogo kwisisa di nyaka re lisetse Bhayibele yi re hlatollele. Dilo tsa go tlala tso ba tshwanisiyeng ka tsona tsa gore di nyarela ga puku ya Kutullo ba šele ba di hlatolliye ga dipuku tse dingwana tsa Bhayibele. w22.05 8-9 ¶3-4

Le malata ya Jehova ma kena ke malwele kela go gongwana o kraya ba thomisa go kgalabyela kela go kgekolela, byalo ba bangwana ba kwa di thathafa ka matla go yamogela gore tse dingwana ba ka sa sa di kgona. Mo nkare o fela o kgongwetsa ke taba ya gore go na le tsa go go kgerela, tiputsise gore, ‘Jehova o nyaka ying ho gaka?’ O nyaka gore o make so o ka se kgonang—so wene o ka se kgonang ga seyemo so o leng ga sona gana byalo. Lebelela mošupetso ke wowa: Mogageru wa mosadi wa gore o na le gana hala ga 80 ya mengwaga, o kwa a kgongwela ka taba la gore aa sa kgona go maka tsa go tlala ga mmereko wa go tšhomayela, go fo tshwana le nakwela a sa na le gana hala ga 40 ya mengwaga. O kwa nkare Jehova aa jabole le mo yene a kene a tigoga a liketsa go mo jabodisa. Ayitsano wa resa? Lebelela taba yowa gabutši ša. Mo nkare mogageru yewa wa mosadi o yye a karakara ka matla gore a make so a ka se kgonang mo a sa na le gana hala ga 40 ya mengwaga, a boya a ya mahlong a kene a karakara gana byalo mo a šele a na le 80 ya mengwaga, di ra gore a sanka a lisetsa le ka gonyana go maka so a ka se kgonang. Mo re maka tsa go segela mo rune re kgerang gona, Jehova o nyoko re: “O berekiye!” (Tshwanisa le Matewu 25:20-23.) Mo re ka tihlupa ka tso re kgonang go di maka re lisetsa go šekela ka matla ka tso di re šitang, re nyoko dula re jabodiye. w22.04 10 ¶2; 11 ¶4-6

Kutullo tema 21 yi tshwanisa bo ba 144 000 le mutši wa go bafala ka matla wo ba reng ke “Jerusalema ya nyuwane.” Mutši wone ke mo ba wo yagiye gedimo ga 12 ya matlapa ya fandhiši ga matlapa yane ba ngwadiye “12 ya mabitso ya mapostola ya Nku.” (Kut. 21:10-14; Maef. 2:20) Mutši wone wo tshwana wo le ntoši. Pata ye kgolo ya mutši wone ke mo go le gholdi fote digheyiti 12 ya tsona ke mo go le makolwane, mapharo le di fandhiši ke mo ba di kgabisiye ka matlapa ya go tseyediwa gedimo fote mutši wone ke mo wo lekana mahlaya ka moka. (Kut. 21:15-21) Mara ke mo go na le se sengwana sa gore nkare a se gahlane gabutši! Lebelela gore ka nthago Johane o re botsa ying: “A ke ya bona go na le tempele ka taba la gore Jehova Modimo wa Matšhika ka moka ke yene tempele ya gona fote le Nku ke yene tempele ya gona. Byalo, mutši wone ke mo wo sa nyake letšatši kela ngwedi gore di wo khanyisele ka taba la gore wo khanyisa ke go gadima ga Modimo fote Nku ke yona llampa la gona.” (Kut. 21:22, 23) Bo go leng Jerusalema ya Nyuwane ba nyoko bona Jehova ka maahlo.—Maheb. 7:27; Kut. 22:3, 4. w22.05 17-18 ¶14-15

Jehova ke yene ye a re Makiyeng, ye a re neyang Molawo, fote ke wa go Yahlula, re sa lebale le taba ya gore ke Papa wa rune wa ku legedimong wa gore o re nyaka ka matla. (Pis. 100:3; Jes. 33:22) Mara mo re mo sinyela ke mokane re šupetsa gore re tisola tsa mannete, wa re tshwarela ka taba la gore o dula a tikemisele go re tshwarela. (Pis. 86:5) Jehova o yye a hlohletsela moporofeta wage ye ba reng ke Jesaya gore a hlaye mantsu yawa ya go kgomoletsa: “Le mo tso le di sinnyeng di ka kgubala go tshwana le madi, di nyoko tšhwewufala go tshwana le kapoko.” (Jes. 1:18) Ka taba la gore a re ya yenela, ka mokana ga rune re fela re kwisa ba bangwana go baba ka tso re di bolabolang le tso re di makang. (Jak. 3:2) Mara tsotsone a di nape di re tapa matšhika ya go ya mahlong re nghanelana nabo. Re nyoko phomelela mo re ka tšhuta go tshwarelana. (Diy. 17:9; 19:11; Mat. 18:21, 22) Jehova o nyaka gore re tshwarelane le mo re f’lo ghulana ka gonyana. Ka taba la gore Jehova o tshwarelana “a sa fetsi” tsotsone di re tšhofa gore le rune re make ka mokgonone.—Jes. 55:7. w22.06 8 ¶1-2

Di nyaka re kganela kgole le taba ya go titshwanisa le ba bangwana, mara di ka re berekela ka matla go tšhuta ga taba ya gore baa tshepega. Tla re beyiseneng ka Jeso. Ke mo a yenele, mara re ka tšhuta ga mekgwa yage ya go bafala le ka mokgo ne a maka dilo. (1 Pet. 2:21) Mo re ka maka so re ka se kgonang gore re kopisele gage ka matla, re nyoko ba malata ya gabutši ya Jehova. Ga Lentsu la Modimo, re kraya mešupetso ya banna le basadi ba go tshepega ba gore re ka tšhuta tsa go tlala ga bona, le mo yi le gore le bona ne ba sa yenela ho mmeleng. Tseya ka Kgoši Dafita, wa gore Jehova mo a bolabola ka yene o yitseri “ke monna wa gore pelo yaka yi kwana naye.” (Meber. 13:22) Mara Dafita gabutšibutši, ga tse dingwana o yye a kekemisa ka matla. Le mo go le ka mokgonone, ke mošupetso wa gabutši ga rune. Ke ntaba? Ka taba la gore a sanka a liketsa go wutama ka lehlokwa. Mara o yye a fo beyelela mo ba mo tšapola a kene a kwa go baba fote ne a tisola ka matla ka tso a di makiyeng. Tsotsone ke tsona di makiyeng gore Jehova a mo tshwarele.—Pis. 51:3, 4, 10-12. w22.04 13 ¶11-12

Bhayibele yi re likgu ke lenaba. (1 Makor. 15:25, 26) A di makatse mo re hlagasedisa ke taba ya likgu ka matlamatla mo re lwalela ke lešaga. Ke ntaba re tšhaba likgu ka mokgo? Nka taba la gore Jehova o makiye gore re fo nabela go phela go ya go yye. (Mmo. 3:11) Mara mo re yi tseya gabutši taba yowa ya likgu yi ka re gelepa gore re tšhireletse maphelo ya rune. Yi ka re hlohletsela gore re segelele sepheto sa gabutši ga taba ya tsa go ja, go tiwolola le gore re ye ga togotela mo re sa tikwe gabutši fote di nyoko re gelepa gore re kganele kgole le taba ya go beya maphelo ya rune kotsing. Sathane wa di tšiba tsa gore lephelo re le tseyela gedimo. O re hlayela matsaka a re rune re ka maka se sengwana le se sengwana le mong taba ya go lahla senghana sa rune le Jehova re makela go fo re re tšhireletse lephelo la rune. (Jobo 2:5) Mo go le ga yowa taba Sathane o pumutsiye wa tšiba! Ke “wa gore o na le matšhika ya go baka likgu,” Sathane o berekisa taba yowa ya gore re tšhaba likgu gore a thogo re tlosa ga Jehova.—Maheb. 2:14, 15. w22.06 18 ¶15-16

Mo ba sa re rakele, a re ya tshwanela go gahlana re tlele le magageru. Byalo, di ko ba di le gabutši ka matla gore re dule re kwana. Re lwe le Sathane, go seng go lwa ka borune beng. O sa nape o gorolela maahlo ka matla ga tso magageru ma di kekemisang mara liketsa go lukisa ditaba ka go yakgoswa. (Diy. 19:11) Tikemisele go gelepa ba bangwana ka go di nyaka. (Tito 3:14) Ka mokgo mogoba wo mongwana wa tšhomo wo yyeng wa gelepa mogageru yela wa mosadi wa gore ne a nyaka go gelepiwa, di tikisiye mogoba wone ka moka wa tšhomo. Ba yye ba mamarelana tsa nkare ke bana ba motho. (Pis. 133:1) Magageru ya go tlala ka matla ma berekela Jehova le mo ba mmušo ba ma rakela. Ba bangwana ba gona ba ba hlahlele le jele ka taba la tumelo ya bona. Magageru yane re ka ma rapelela, ra rapelela ba mitši ya wona ra boya ra rapelela le bo ba go šupetsa gore ba šišimele ka go thega magageru ya gore ba ma tshwere le go ma gelepa ga tso tsa Modimo, tso ma di hlokang ba boya ba ma yemelela ga tsa di khota. (Makol. 4:3, 18) O sa tseyi nkare merapelo yago yi hlašiye!—2 Mathes. 3:1, 2; 1 Thim. 2:1, 2. w22.12 26-27 ¶15-16

Bana ba kopisela babelegi ba bona. A re yi gane taba ya gore aa šiyo mmelegi wa gore o yenele. (Marom. 3:23) Le mo go le ka mokgonone, babelegi ba gore ba hlalefiye ba nyoko liketsa go maka so ba ka se kgonang gore ba beyisele bana ba bona. Pape mongwana o yitseri: “Ba fo tshwana le sepontše sa gore se moma selo se sengwana le sengwana sa meetši.” O tokegele ka gore: “Ba nyoko re botsa mo nkare tso re di makang a di yelane le tso re di tšhutisang.” Byalo, mo nkare re ya resa gore re ya di nyaka tsa gore bana ba rune ba mo nyake ka matla ga Jehova, di nyaka le rune re make di bonale gore re ya resa re mo nyaka ka matla. Di tlele tso babelegi ba ka di makang gore ba tšhutise bana ba bona gore ba nyake Jehova ka matla. Mogageru ye ba reng ke Andrew wa gore o na le 17 ya mengwaga o re king: “Babelegi baka ke mo ba dula ba šihlela taba ya gore go rapela ke mong selo se segolo. Ka moka matšatši ka malobana papa ke mo a dula a rapela le nna le mo yi le gore ke šele ke rapele. . . . Gana byalo ke kwana natso ka matla tsa go rapela Jehova ke boya ke mo tseya go le Papa wa gore o nnyaka ka matla.” Lune babelegi, le sa yi tseyi ka gonyana taba ya gore mo lune le mo nyaka ka matla ga Jehova bana ba lune ba nyoko tseyela ga lune. w22.05 28 ¶7-8

Gore o thogo tilukiselela taba ya go kolobetsiwa, sa mathomo ga dilo tso re tshwaneleng re di make ke go tisola ga tso re di sinnyeng. (Meber. 2:37, 38) Mo motho a tisola a resa tsotsone di nyoko maka gore a tšhentšhe tsa mannete. Ayitsano o šele o lisetsiye go maka dilo ka mokana ga tsona tsa gore a di jabodisi Jehova, go tshwana le go phela lephelo la go sa hlamatsega, go kgokga, go bolabola mantsu ya go hlaba kela ya maroga? (1 Makor. 6:9, 10; 2 Makor. 7:1; Maef. 4:29) Barena liketsa ka matla gore o potolla-potolle. Bolabola le ye a go tšhutisang Bhayibele kela kgopela bagolo ba phutego gore ba go gelepe ba boye ba go yeletse. Mo nkare o sa le ye monyana fote o sa dula gagenu o sa lisetse go kgopela babelegi bago gore ba go gelepe o tomole mekgwa ka mokana ga yona ya go befa ya gore yi ka go šitisa gore o kolobetsiwe. Re ko ba re sa yi lahla mo re dula re ngangarele letheto la gabutši ga tso tsa Modimo. Ga tsotsone go kena le taba ya go sa lofe megahlano ya Sekreste re boya re fetola mo re le ga yona. (Maheb. 10:24, 25) Fote se sengwana ke gore mo o ka fo tshwanelega gore o ye tšhomong napa o dula o yi maka taba yone. w23.03 10-11 ¶14-16

Genesi 3:14, 15 yi bolabola ka “noga” le “pewu” ya noga. Noga ya mannete ne yi ka sa di kwisisi tso Jehova a di hlayyeng ku tšhomong ya Edeni. Mara mone Jehova ke mo a yahlula motho wa gore o kwisisa gabutši. Ke mo go le mang yenene? Kutullo 12:9 yi napa yi di beya lekgwaying. Yi re, “noga yone ya botala” yi yemela Sathane Diyabolo. Mo Bhayibele yi bolabola ka pewu ya go tshwanisela yi bolabola ka ba gore ba nagana ba boya ba maka dilo go tshwana le papa wa bona wa go tshwanisela. Byalo mo ba bolabola ka pewu ya noga ba bolabola ka mangeloyi ya go sa theetsele le batho ba gore ba tshwana le Sathane a ba theetsele Jehova Modimo fote ba phigisa batho Bage. Ga batho bone re bolabola ka mangeloyi ya gore ma yye ma lisetsa mmereko ya wona ya ku legedimong ka dinako tsa Nnowa re boya re tšhela le batho ba gore ba kopisela mekgwa ya papa wa bona Diyabolo.—Gen. 6:1, 2; Joh. 8:44; 1 Joh. 5:19; Juda 6. w22.07 14-15 ¶4-5

Pawulo wa lepostola ke mo a ma nyaka ka matla magagabo. Ka taba la gore le yene o yye a gahlana le mathatha ya go sa fele, ke mo a di kgona go šupetsa magagabo gore o ma kwela go baba mo ma gahlana le mathatha. Ka nako ye nngwana Pawulo o yye a hloka le mong peni ya lešidi ke mokane dya nyaka gore a tikrayele letogonyana gore a thogo tipasopa a boye a pasope le banghana bage. (Meber. 20:34) Mmereko wage ke mo go le wa go maka matente. Mo a segela Korente o thomisiye a bereka le Akhwila le Phrisilla ga mmereko wonone wa go maka matente. Mara ka “sabatha ye nngwana le ye nngwana” ke mo a ye tšhomayelela Majuda le Magerika. Ke mokane mo Silase le Thimothi ba segela, “Pawulo o yye a napa a tshwaragana ka mmereko wone.” (Meber. 18:2-5) Pawulo a sanka a lisetsa go ba le so se mo šitisang go maka mmereko wo ne a tshwanele go wo maka go leng go berekela Jehova. Ka taba la gore Pawulo ke mo a karakara ga mmereko wa go tšhomayela a boya a karakara ka matla ga mmereko wa go tipasopa ke mo di sa rone mo a tiyisa magagabo. O ba guputsiye gore ba bone gore tsa lephelo le taba ya go nyaka go pasopa ba mutši ka tso ba di gayelang yi sa make gore ba di takise maahlo “tso di tshwaneleng go yeta mahlong”—go leng go berekela Jehova. w22.08 20 ¶3

Lekgono Modimo o nyaka gore ditaba tsowa tsa go bafala tsa Mmušo wage di tšhomayediwe lefaseng ka mokana ga lona. (1 Thim. 2:3, 4) Mmereko wowa ke wa Jehova, ka taba la gore o wo tseyela gedimo o kgetiye gore wo yetetse ke Morwayi wage ye a mo nyakang ka matla. Byalo le rune a re kamake gore mo re yetetsa ke Jeso mmereko wo wa go tšhomayela wo nyoko makega ka mokgo Jehova a nyakang fote go sa le nako. (Mat. 24:14) Mara re di tšibela kaye tsotsone? Nakwela a le thina le go yinugela legedimomg, Jeso o yye a gahlana le malata yage ya go tshepega ku thabeng ya Galeliya. Ke mokane a ma botsa gore: “Ba mpeyye gore ke lawole dilo ka mokana ga tsona legedimong le lefaseng.” Lebelela gore o yitseri king fote: “Ariyeneng le ye maka batho ba ditšhaba ka mokana ga tsona gore go be malata.” (Mat. 28:18, 19) Byalo, ga dilo ka mokana ga tsona Jeso ba mo neyye matšhika ya gore a yetetse mmereko wowa wa go tšhomayela. Fote mmereko wone wa go tšhomayela wo nyoko fo ya mahlong wo yetetsa ke Jeso go segela le lekgono lowa. w22.07 8 ¶1, 3; 9 ¶4

Ba go loka ba gore ke mo ba maka dilo tsa gabutši nakwela ba soko bane ba kgwa ba nyoko “tsusiwa gore ba phele” ka taba la gore mabitso ya bona ke mo ma kene ma ngwadiwwe ka pukung ya lephelo. Tsotsone di rela gore taba yo yi leng ga Johane 5:29 ya gore “bo ba makiyeng tsa go loka” ba nyoko ba tsosa go sa na go le taba ka yyoši le yo yi leng ga Mebereko 24:15 ya gore “ba go loka” ba nyoko ba tsosa. Hlatollo yowa yi kwana gabutši le yo yi leng ga Maroma 6:7, ya gore: “Motho wa gore o kgwile o tshwarediwwe ga tso a di sinnyeng.” Tso bo ba go loka ba yyeng ba di sinya di napiye di sulega nakwela ba kgwa mara tso ba di makiyeng tsa go šupetsa gore baa tshepega di sa na di le gona a di ya sudiwa. (Maheb. 6:10) Nnete ke gore ba go loka ba gore ba ba tsusiye di nyaka ba dula ba tshepega gore mabitso ya bona ma dule ma le gona ka pukung ya lephelo. w22.09 18 ¶13, 15

Moporofeta Daniyele o re makele mošupetso wa gabutši ka matla ga taba yo ya go tshepega. Le mo yi le gore Mabhabhilona ma yye ma mo yisa bobhantiting o yye a tšibega go le motho wa go tshepega. O yye a tšibega ka matla nakwela Jehova a mo gelepa gore a hlatolle meloro ya Kgoši ya ku Bhabhilona ye ba reng ke Nebukhadinezara. (Dan. 4:20-22, 25) Mo go šele go takamele mengwaga ya go tlala, Daniyele o yye a šupetsa gore wa tshepega nakwela di nyaka a hlatolla tso ke mo ba di ngwadiye lepharong la ka ntlong ya mošate ku Bhabhilona. (Dan. 5:5, 25-29) Ka nthagonyana, Dariyase wa Momede le dindhuna tsage ba yye ba di bona tsa gore Daniyele o yetetsa ke “moya wa go sa tlwayelega.” Ba boya ba di bona tsa gore Daniyele ke mo a “tshepega, a sa takisi dilo maahlo kela a se na bošakašakane.” (Dan. 6:3, 4) Di ko ba gabutši ka matla mo re ka tiputsisa gore: ‘Ayitsano ba ntšiba ke le motho wa go tshepega?’ Mo re tshepega re thanakisa Jehova. w22.09 8-9 ¶2-4

Phela go berekisa melawo ya Jehova ga taba ya gore ke sefeng sa gore se lukisa kela sa go sa loka yi gelepa rune. Ayitsano wa yi tshwara taba yowa? O fo nagana gore go ka makega ying mo kontraga kela khampani ya go yaga yi ka fo timakela melawo ya yona yi le ntoši mo yi yaga. Phela tsotsone di ka fo dhunghanya dilo. Fote mo di ka makega gore botogotela le manesi ba sa latelele melawo yo yi beyiwweng mo ba kene ba pasopa bo ba go lwala taba yone yi ka maka gore go be le bo ba kgwang. Byalo re ya di bona tsa gore mo batho ba latelela melawo tsotsone di ya ba tšhireletsa. Byalo le rune mo re theetsela melawo ya Modimo ga taba ya gore ke sefeng sa gore se lukisa le sa gore a se ya loka, di nyoko re tšhireletsa. Jehova o rufa bo ba liketsang ka matla gore ba berekise melawo yage mo ba kene ba phela. O tshepisa gore: “Ba go loka ba nyoko dula ho lefase fote ba nyoko dula ho ga lona go ya go yye.” (Pis. 37:29) Phela mo batho ka mokana ga bona ho lefaseng ba theetsela melawo ya Jehova go nyoko ba selo ka ssoši, go dula go bebiye fote ba dula ba jabodiye? Lone ke mong lona lephelo lo Jehova a nyakang gore re le jabolele. A re kamake gore ye mongwana le ye mongwana ho ga rune o na le so se makang gore a kwane le go loka! w22.08 27-28 ¶6-8

Mo re gahlana le tsa go re kgongwetsa, taba ya go tshepega ga Jehova le ga mokgahlo wage yi ka liketsiwa. Re ka di hlula byang dintshitshire tsa mošaga wonone? Di nyaka re ye mahlong re berekisa monagano wa rune, re sa kobole fote re dule re maka gore tumelo ya rune yi sa tekateki. Re ba re berekisa monagano wa rune mo re dula re kgibiye, re nagana gabutši re boya re liketsa go tseya dilo ka mokgo Jehova a di tseyang. Mo re ka maka ka mokgonone, re ka sa fo lla go tseyatseyega re makisa nka mokgo re tikwang. Nakwenngwana mogageru aa re tshwara gabutši, di ka makega go le mogageru wa gore ke se sengwana ka ho phutegong. Di ka makega gore mogageru ke mo a sa tikemisela go go kwisa go baba. (Marom. 3:23; Jak. 3:2) Mara, tso a di makiyeng di ka fo ba di go thunugiye. O ka boya o tiputsisa le gore, ‘Mo nkare mogageru o kgona go maka dilo tsa mošaga wowa, nje a re titshokanye re re ke mokgahlo wa Modimo wonowa?’ Mo re ka nagana ka mokgonone, ke gona mo Sathane a re nyakang gona. (2 Makor. 2:11) Dilo tsa mošaga wonone di ka maka gore re tikraye re yahluganne le Jehova le mokgahlo wage. Byalo, di nyaka re pasope gore re sa kwate ka matla. w22.11 20 ¶1, 3; 21 ¶4

Jehova re neyye tshepo ya gabutši ka matla ya go phela go ya go yye. Ba bangwana ba nyoko ye phela legedimong go le batho ba moya ba gore ba ka sa sa kgwa. (1 Makor. 15:50, 53) Mara ba go tlala ba na le tshepo ya go phela ho lefaseng ba yenele fote ba jabodiye. (Kut. 21:3, 4) Tshepo yowa ke selo sa gabutši ka matla, di sa yi ka gore o yemele go phela go ya go yye legedimong kela ho lefaseng. Tshepo yo ya rune yi nyoko makega ka taba la gore yi tšwa ga Jehova. (Marom. 15:13) Re ya di tšiba tso a re tshepisiyeng tsona fote re tšiba le gore a ka sa hlaye matsaka. (Dip. 23:19) A re kamake gore Jehova wa di nyaka go maka dilo tsowa fote o na le matšhika ya go segelela tso yene a nyakang gore di makege. Papa wa rune wa ku legedimong, o re nyaka ka matla fote o nyaka gore re mo tshepe. Mo re tshepa Jehova ka matla, re nyoko thogo tiyisela dintshitshire fote re nyoko yemela tsa ku mahlong re kene re šišimele fote re jabodiye. w22.10 24 ¶1-3

Ka taba la gore batho ba ganne go theetsela, Jesaya o hlayye gore Jehova o nyoko ba lisetsa gore ba tlele ke tsa go sasamela. (Jes. 30:5, 17; Jer. 25:8-11) Nnete Mabhabhilona ma yye ma tseya Majuda ma ma yisa bobhantiting. Mara hone ga Majuda yane, ne go na le ba gore baa tshepega fote Jesaya o ba butsiye gore tšatši le lengwana Jehova o nyoko maka gore ba boyele Jerusalema fote. (Jes. 30:18, 19) Fote go f’lo makega ka mokgonone. Jehova o ba ntshiye bobhantiting. Mara, go fitiye mengwagangwaga gore Jehova a ba ntshe bobhantiting. Taba ya gore, “Jehova o yemme a kene a lefisiye pelo gore a makele wene tsa gabutši” yi šupetsa gore ka dinako tse dingwana di ka tseya nako gore batho ba go tshepega ba yakgoswe ba ba gelepa. Gabutšibutši, Maisrayele ma fetsiye 70 ya mengwaga ma le bobhantiting ku Bhabhilona mo ba bangwana ba soko bane ba ba dumelela gore ba boyele Jerusalema. (Jes. 10:21; Jer. 29:10) Mo batho ba šele ba boyele gaye, tsa go llisa ke go kwa go baba di ye dya fela, ke mokane ba llisa ke gore ne ba jabodiye la go sa hlayisege. w22.11 9 ¶4

Lekgono ga naga tsa go tlala magageru ma gahlana le tso mapostola ya ku botala ma yyeng ma di tiyisela nakwela ma hlorisiwa ka taba la go tšhomayela ka Jeso. Ke gatleletlele bo ba go yahlula ba khota ye kgolo ya Majuda “ba ma botsa gore ma lisetse go bolabola ka lebitso la Jeso.” (Meber. 4:18-20; 5:27, 28, 40) Mara ke mo ba di tšiba tsa gore go na le ye mogolo ye a ba yetang mahlong wa gore o yitseri ‘ba tšhomayelele batho’ fote ba bolabole tso ba di tšibang ka Kreste. (Meber. 10:42) Bo ba ba yemelang go leng Petro le Johane ba yye ba šišimala ba hlaya gore bona ba ko theetsela Modimo ba ka sa theetsele bo ba go yahlula fote ba hlayye le gore ba ka sa lisetse go bolabola ka Jeso. (Meber 5:29) Ka nthago ga mo ba ma thuwele ka taba la gore maa tshepega, mapostola ma yye ma tloga hone ga khota ye kgolo ya Majuda “ba jabodiye ka matla, ka gore ne ba tshwanele ba hlupegisiwe ka taba la lebitso lage [Jeso],” fote ma f’lo ya mahlong ma kene ma tšhomayela!—Meber. 5:41, 42. w22.10 12-13 ¶2-4

Mo re sa thomisa go tšhuta ka Jehova, re fo tšhuta dilo tse dinyana ka ho Bhayibeleng. Ga lengwalo lo Pawulo wa lepostola a le ngwaleleng Maheberu, mo a bolabola ka dilo tse dinyana tso di tšhutisiwang o re ke “dilo tso ba le tšhutisiyeng tsona … ku mathomisong.” Ne a sa di tseyele fase tso a di “tšhutiyeng ku mathomisong” mara ne a di tshwanisa le lebese la gore le fepa ngwana. (Maheb. 5:12; 6:1) Fote o hlohletsela Makreste ka mokana ga wona gore ma ye mahlong ma tšhuta tsa go tlala ma boye ma kenelele ga taba ya go tšhuta nnete ya Lentsu la Modimo. Ayitsano o kwa o nabela go tšhuta o kenelela ga tso di leng ka ho Bhayibeleng? Ayitsano o nabela go ya mahlong o gola o boya o tšhuta ka Jehova le tso a nyakang go di segelela? Le mo yi le gore ba go tlala ba rune ke ntshitshire mo di tla ga taba ya go bala. Gago di byang? Ayitsano o tšhutiye mong go bala gabutši ku sekolong? Ayitsano di ya go jabodisa go tšhuta o boya o kwa gore di ya go berekela? Kela o fetsiye le pelo gore wene go tšhuta o berekisa dipuku a yi layini yago? Mo nkare go ka mokgonone, di tšibe gore a o ntoši. Jehova a ka go gelepa. Phela yene o felegelele fote ke mong yona Thitšere ya go di phala ka moka. w23.03 9-10 ¶8-10

Mo nkare re batho ba go temeka, re nyoko lisetsa Lentsu la Modimo le ro naama ka dipelong tsa rune. Mo re ka sa kganele kgole le go kakola magetla, di ka sa be lula gore re kutšetsele ke tso Bhayibele yi di tšhutisang ga taba ya go kwelana go baba le ya go nyakanana. Ka mokgo re tshwarang ba bangwana ka gona ke tsona tso di ka šupetsang gore re lisetsa Lentsu la Modimo le re kutšetsela kela dho. Mafaraseyi a sanka ma dumelela Lentsu la Modimo gore le tikise dipelo tsa wona ke mokane tsotsone dya maka gore ma “sole ba gore a baa sinya selo.” (Mat. 12:7) Byalo, le ga rune ka mokgo re tseyang dilo le ka mokgo re tshwarang ba bangwana ka gona di ko fo ba lekgwaying gore ayitsano re lisetsiye Lentsu la Modimo le re kutšetsela. Mo re beyisa, ayitsano re di tlwayele go hlaya tsa gabutši tso re di bonang ga ba bangwana kela re tiyele go yakgoswela go hlaya tso ba di kekemisang? Ayitsano re kwelana go baba fote re tikemisele go tshwarelana kela re poyilanya ba bangwana re boya re ba tshwara ka pelo? Mo re ka fetola diputsiso tsowa, di nyoko ba lekgwaying gore re lisetsa tso re di balang di kutšetsela ka mokgo re naganang, ka mokgo re tikwang le ka mokgo re makang dilo.—1 Thim. 4:12, 15; Maheb. 4:12. w23.02 12 ¶13-14

.Lebelela mošupetso wa Josefa wa Arimathiya. Ke mo a hlompa ke batho ba Majuda ka matla. Ke mo go le wa mogoba wa Sanhendrini, go leng khota ya Majuda. Mara, nakwela Jeso a tšhomayela ho lefaseng, Josefa ke mo a šišimele. Johane o hlayye gore, “ne a latelela Jeso ka makhukhung ka taba la go tšhaba Majuda.” (Joh. 19:38) Le mo Josefa ne a jabolela molayetsa wa Mmušo, ke mo a wutametsela batho gore yene o na le tumelo ga Jeso. A re kamake gore ne a tšhugela gore batho ba ka sa sa mo hlompa mo ba ka di tšiba gore yene o latelela Jeso. Mara Bhayibele yi re botsa gore ka nthago ga mo Jeso a kgwile, Josefa o yye a feleletsa “a šišimala a ya ga Pilato, a segela a kgopela setopo sa Jeso.” (Mar. 15:42, 43) Ye lune, phela taba ya gore Josefa ke lelata la Jeso ke mo yi šele yi wunyulugiye. Ayitsano le wene o tšhaba batho go tshwana le ka mokgo Josefa ne a ba tšhaba? w23.01 30 ¶13-14

Kgoši ya mosadi yo ba reng ke Šebha, yi yye ya di kwelela tsa gore nakwela go lawola Solomoni, setšhaba sa Israyele ne se bebiye fote se sa gayele selo. Kgoši yone yi yye ya phanakela yi tloga ga poleke ya kgole yi ya Jerusalema gore yi bone seyemo ka boyona beng. (1 Mag. 10:1) Ka nthago ga gore yi pombhole mmušo wa Solomoni, yi hlayye mantsu ya ka ho kgakala. Mara ka mokgo seyemo ne se le ka gona nakwela go lawola Solomoni, ne go le Jehova a re lekisa gore re thogo bona gore king tso a nyoko di makelang batho mo go šele go lawola Morwayi Wage, Jeso. Jeso o mo feta kgole ga Solomoni. Solomoni ke mo go le motho wa gore aa yenela wa gore o yye a kekemisa ka matla fote tsotsone di makiye gore batho ba Modimo ba tlele ke mathatha. Mara Jeso yene, ke wa go Lawola wa gore o yenele fote aa make tsa go kekema. (Luk. 1:32; Maheb. 4:14, 15) Kreste o tišupetsiye gore a ka sa tsoge a sinnye kela go maka selo sa gore se ka kwaletsa malata yage ya go tshepega. Ye lune, phela re na le mong Kgoši ya go di phala ka moka. w22.12 11 ¶9-10

King so re tshwaneleng re se make mo nkare bolwele bya go sabalala bo kene bya neyetsela mo re dulang? Di nyaka re theetsele tso ba re yetetsang ka tsona tsa go tshwana le taba ya go hlapa matsogo, go sa šutelelane thina, go yapara sa go thiba nko le molomo le go tikwalela re le ntoši. Mo re ka maka dilo tsone ka mokana ga tsona re ko ba re šupetsa gore re le leboga re sa fetsi lephelo lo Modimo a re neyyeng lona. Mo re kene re le ga seyemo sa gore se re tlele re sa nagana re nyoko kwa dilo tsa go tlala tsa gore a yi nnete tsa go tšwa ga banghana ba rune, bayagelane le ditabeng. A di nyake re theetsela “lentsu le lengwana le le lengwana” mara re ko ba re maka gabutši mo re ka theetsela tsa gore ke nnete tsa go tšwa ga ba mmušo le ga ditogotela. (Diy 14:15) Mogoba wa go Lawola le ba ofisi ya lekala ba maka so ba ka se kgonang gore ba kraye nnete ya taba ba soko bane ba hlaya gore megahlano ya phutego le mmereko wa go tšhomayela di nyoko makiwa byang. Mo re latelela tso ba re yetetsang ka tsona, re ba re titšhireletsa runebeng re boya re tšhireletsa le ba bangwana gore ba sa kwalele. Fote re gelepa ba bangwana gore ba tseye Dihlatse Tsa Jehova gabutši.—1 Pet. 2:12. w23.02 23 ¶11-12

Mo Maisrayele ma kena ga Naga yo yi Tshepisiwweng, ma yye ma tlalagana, ma sa duli ga poleke ka yyoši ma le ka mokana ga wona. Ke nnete gore taba ya gore Maisrayele ne ma sa duli ga poleke ka yyoši ne yi ka maka gore ma sa tihlupi ka Maisrayele ya gore ma ga poleke ye nngwana. Mara Jehova o yye a lukiselela gore Maisrayele ma fele ma gahlana ggoši gore ma thogo kwa mo ba bala Lentsu lage ba boya ba le hlatolla. (Dot. 31:10-12; Neh. 8:2, 8, 18) O fo nagana gore Leisrayele le yye la tikwa ka mokgo mang mo le segela Jerusalema ke mokane le bona dimiliyoni tsa batho bo le rapelang nabo ba gore ba tšwa lefaseng ka mokana ga lona! Jehova o gelepiye batho bage gore ba ro napa ba mamarelana. Ka nthago ga mo phutego ya Sekreste yi sa tšwa go thomisa, ke mo go na le banna le basadi ba go bolabola mebolabolo ya go sa tshwane fote ke mo ba sa ba gudisa go tshwana, ba bangwana ke mo ba tseyediwa gedimo ka matla, ba bangwana ke mo ba tinyanafatsiye fote ba bangwana ke mo ba ghannye hala ba bangwana ba tihlupegela. Mara ba yye ba ba selo ka ssoši ga taba ya go rapela Modimo wa mannete. Bo ba yyeng ba dumela ne ba kwisisa Lentsu la Modimo ba gelepa ke bo ba rapelang nabo le taba ya go gahlana ggoši.—Meber. 2:42; 8:30, 31. w23.02 3 ¶7

Jehova o tshepisa bo ba gore baa mo theetsela gore ba nyoko kraya “lephelo la go ya go yye.” (Marom. 6:23) Mo re ghayela ka tso Jehova a re neyang tsona, taba ya go mo nyaka ka matla yi napa yi fo ya yi hluhlutela. O fo nagana ka taba ke yowa: Papa wa rune wa legedimong o re nyaka ka matla la gore a se šiyo sa gore se ka re mamarollanya naye. Taba ya go phela go ya go yye yo Modimo a re tshepisiyeng yona yi re gelepa gore re tiyisele dintshitshire tso re gahlanang natso gana byalo. Le mo manaba ya rune ma re tshosetsa ka gore ma nyoko re bolaya, tsotsone a di re make selo le ka gonyana. Ke ntaba mara? Ka taba la gore re ya di tšiba gore mo re ka kgwa re kene re tshepega ga Jehova, o nyoko re tsosa re na le tshepo ya gore le ka tšatši la mohlolo re ka sa sa tsoga re kgwile. (Joh. 5:28, 29; 1 Makor. 15:55-58; Maheb. 2:15) Re ya di tšiba gore Jehova a ka sa šitegi go maka gore re phele go ya go yye, ka taba la gore ke yene a Makiyeng lephelo fote ke wa go ya go yye. (Pis. 36:9) Bhayibele yi šupetsa gore Jehova ke mo a kene a le gona fote o nyoko fo dula a le gona.—Pis. 90:2; 102:12, 24, 27. w22.12 2 ¶1-3

Batho ba Jehova, a di ba makatse mo ba tlela ke mathatha. Bhayibele yi re, “Re tshwanele re hlupegisiwe ka matla mo re soko kena Mmušong wa Modimo.” (Meber. 14:22) Re ya di tšiba tsa gore mathatha ya rune ya mangwana ma ka sa ro napa ma fela go segela ka dinako tsa mo re phela ga lefase la nyuwane la Modimo, ga gore “malikgu ma ko ba ma sa sa le šiyo, le go lla kela go gotla kela go kwa go baba.” (Kut. 21:4) Jehova aa re kugetsi ka se sengwana gore re sa tlele ke mathatha. Mara o re gelepa gore re ma tiyisele. Lebelela tso Pawulo wa lepostola a di hlayyeng ga Makreste ya gore ke mo ma dula Roma. Sa mathomo o bolabodiye ka dintshitshire tsa go tlala tsa gore yene le magagabo ke mo ba ghulana natso. Ke mokane a ngwala gore: “Re hludiye ga dilo tsowa ka mokana ga tsona ka taba la matšhika ya ye wa gore o re nyaka ka matla.” (Marom. 8:36, 37) Tsone di rela gore Jehova a ka go gelepa gore o phomelele le mo o kene o tiyisele mathatha. w23.01 14 ¶1-2