June

Jobo ke mo a na le senghana sa gabutši ka matla le Jehova. Fote ne a na le mutši wo mogolo wa gore wo kwana ka matla fote a ghannye. (Jobo 1:​1-5) Mara o f’lo loba dilo tsage ka mokana ga tsona ka letšatši ka lloši. Sa mathomo, tso ne a ghannye ka tsona di f’lo ya le noka. (Jobo 1:​13-17) Ke mokane bana bage ba gore o ba nyaka ka matla ba f’lo kgwa ka mokana ga bona. O fo nagana gore Jobo le mosadi wage ke mo di ba kgahleletsiye go segela kaye, ba kwa go baba fote ba sa tšibi pelo le nthago mo ba di kwelela gore lesome la bana ba bona ba f’lo psyitlanya ke lepharo ke mokane gwa napa go le moka. A di makatse mo Jobo a yye a tlerola dikobo tsage ke mokane a re giri ho fase! (Jobo 1:​18-20) Ka nthago Sathane o yye a hlasela Jobo ka bolwele fote a mo tseyela serithi sage. (Jobo 2:​6-8) Mathomisong batho ba mo Jobo a dulang ke mo ba mo hlompa. Ke mo ba fela ba tla gage gore a ba yeletse. (Jobo 31:18) Gana byalo ba kwa a nkga nkare ke neketšane. Bobhuti bage, banghana bage ba thina ka matla le mong malata ya ma mmerekelang ke mo ba keketlela ku kgole naye!—Jobo 19:​13, 14, 16. w22.06 21 ¶5-6

Ka nthago ga mo re kolobetsiwe ka mokana ga rune di nyaka re tseyela hlogong tso Pawulo a yeletsiyeng Makreste ya ku Efeso gore ma di make. O ma hlohletsele gore go be Makreste ya gore ma “gudiye.” (Maef. 4:13) Phela gabutšibutši ne a rela gore di nyaka re ‘Gole re sa fetsi.’ Phela wene o šele o mo nyaka ka matla ga Jehova. Mara o ka yeketsa ga taba yonone. Ka mokgo mang? Pawulo wa lepostola o hlayye so re ka se makang ga Mafilipi 1:9. Pawulo o yye a rapelela gore ‘yi ye mahlong yi yeketsega’ taba ya gore Mafilipi ma mo nyake ka matla ga Jehova. Byalo, di ya kgonega gore le ga rune taba ya go mo nyaka ka matla yi yeketsege. Tsotsone re ka di maka mo re ka ‘tšiba tso Modimo a di nyakang, fote re boya re di kwisisa.’ Mo ga Jehova re kene re mo tšiba re nyoko napa re ro mo nyaka tsa nkare ke moka fote re tseyela gedimo mekgwa yage ya go bafala le ka mokgo a makang dilo. Re nyoko wa re tsoga ga taba ya go nyaka go mo jabodisa fote re ka sa liketse le ka gonyana re maka selo sa go mo tšebisa. Re karakara ka matla gore re kwisise tso a di nyakang re boye re nyake le go tšiba gore re ka di segelela ka mokgo mang tsotsone. w22.08 2-3 ¶3-4

Tso ba di ngwadiyeng ga puku ya Kutullo a ba di ngwalela batho ka mokana ga bona mara ba di ngwalele rune malata ya Modimo ya gore ma tineyele. Ka taba la gore ke rune batho ba Modimo, di nyaka di sa re makatse mo re kraya gore le rune re tšhela letsogo mo diporofeto tsone di leng ka hone pukung yone di makega. Johane wa lepostola wa gore o šele a gudiye o hlayye gore diporofeto tsone di nyoko makega leng. O yitseri: “Moya wa go hlawolega wo nšupetsiye tso ne di nyoko makega ka letšatši la Morena.” (Kut. 1:10) Nakwela Johane a ngwala mantsu yawa gana hala ga bo 96 C.E., “letšatši la Morena” ne le soko segela. (Mat. 25:​14, 19; Luk. 19:12) Mara seporofeto sa Bhayibele se šupetsa gore letšatši lone le thomme ka 1914 nakwela Jeso ba mmeya gore go be Kgoši ku legedimong. Go tlugisela ka mongwaga wonone diporofeto tsa Kutullo tso di bolabolang ka batho ba Modimo di yye dya thomisa go makega. Nnete ke gore re phela ga dinako tsa “letšatši la Morena”!—Kut. 1:3. w22.05 2 ¶2-3

Mo phoolwane ya go tshosa ya hlaga le moporofeta wa matsaka ba kene ba sa phela ba ba lahlela ka ledhamong la mollo wa gore wo na le matlapa ya go dura nkare ke magala. Mo manaba yawa ya Modimo go leng mmušo wa dipolotiki ma kene ma ya mahlong ma tshwere, Modimo o nyoko napa a ma psyitlanya a fetsa ka wona. Dilo tsowa di re yama ka mokgo mang? Ka taba la gore ke rune Makreste, di nyaka re tshepega ga Modimo le ga Mmušo wage. (Joh. 18:36) Di nyaka re sa kenakene le ka gonyana ga dipolotiki tsa lefase lowa. Mara go kganela kgole le dipolotiki go ka thathafa ka matla ka taba la gore mmušo wa lefase lowa wo gapeletsa gore re wo thege ka tso re di bolabolang le ka tso re di makang. Bo ba wo yikelang gore wo ba kenise ka hlogo ba nyoko tikraya ba na le setwaba sa phoolwane ya hlaga. (Kut. 13:​16, 17) Ye mongwana le ye mongwana ye a nang le setwaba sone o nyoko tihloyisa ka Jehova fote a ka sa ro le bona lephelo la go ya go yye. (Kut. 14:​9, 10; 20:4) Byalo, go ko ba go le taba ya go bafala ka matla mo ka mokana ga rune re kganela kgole le taba ya dipolotiki fote re sa yi lebelele le go yi lebelela taba ya gore ba re gapeletsa ka mokgo mang! w22.05 10-11 ¶12-13

So re ka se segelelang ke gore re tšhute mebereko ye mengwana. Mo nkare re karakara ka matla gore re tšhute mebereko ye mengwana, tsotsone di nyoko re gelepa gore re yeketse tso re di makang ga mmereko wa Jehova. Phela mo go yagiwa meyago ya Bethele, Diholo tsa go tshwarela Megahlano ye Megolonyana le Diholo Tsa Mmušo, go nyakega dibereki tsa go tlala. Ba go tlala ga bo ba berekang hone ba tšhutiye mebereko yone mo ba kene ba bereka le magageru ya gore ke digele. Lekgono, magageru ya banna le ya basadi ma tšhuta mebereko yo yi ko ma gelepang gore ma thogo pasopa Diholo Tsa Megahlano le Diholo Tsa Mmušo. Ka mokgonone, Jehova Modimo, yene “Kgoši ya go tlugisela,” le Kreste Jeso, yene “Kgoši ya . . . magoši,” ba segelela dilo tse dikgolo tsa go bafala ba berekisa tsona dibereki tsone. (1 Thim. 1:17; 6:15) Re nyoko karakara ka matla re boya re berekisa tso re neyiwweng tsona gore re thogo thanakisa Jehova, go seng rune beng.—Joh. 8:54. w22.04 24 ¶7; 25 ¶11

Solomoni ke mo a ghannye ka matla fote a phela ga mabešebeše. (1 Mag. 10:​7, 14, 15) Ka nthoko ye nngwana Jeso ke mo a se na dilo tsa go tlala le mong ntlo a se nayo. (Mat. 8:20) Mara banna bowa ba le ka babedi ke mo ba di tseya gabutši dilo tso ba nang natso ka taba la gore Ye a makiyeng gore ba hlalefe ke Jehova Modimo. Solomoni aa yi phigisi taba ya gore tšheleta yi re gelepa gore re thogo kraya dilo tso re di gayelang le tso re di nyakang. Le mo yi le gore Solomoni ne a na le lebotha, ne a di tšiba gore go na le dilo tsa gore di phala tšheleta. Mo re beyisa, o ngwadiye gore: “Go kawone go kgeta go ba le lebitso la gabutši go phala go kgeta go ghanya.” (Diy. 22:1) Fote Solomoni o di bonne tsa gore batho ba gore ba kwana ka matla le tšheleta a baa jabola le ka gonyana. (Mmo. 5:​10, 12) Fote o re pasopisa gore re sa tshepele ga tšheleta ka taba la gore di ka makega gore yi fo tikela le noka.—Diy. 23:​4, 5. w22.05 21 ¶4-5

Mo re ghayela ka tsa gore a yi botala ba re rufiye ka tsona, re napa re tiyisa senghana sa rune le Jehova. Fote mo re nagana ka tsa gabutši tso Jehova a re tshepisang gore o nyoko re neya tsona ku mahlong, re napa re maka taba ya go mmerekela go ya go yye yi ba ya mannete ho ga rune. Tsotsone ka mokana ga tsona di nyoko re gelepa gore re berekele Jehova re kene re jabodiye gana byalo. Jehova “o nyoko tlogamela” a yemela rune, mo a fetsa ka batho ba lefase lowa ba dipelo tse diphifadu. A re kamake gore Jehova “ke Modimo wa go maka dilo gabutši” fote a ka sa lisetse lefase la Sathane le napa le nama mawoto nako ya go lefa. (Jes. 25:9) Re yemme re kene re lefisiye dipelo gore letšatši lone la gore Jehova a re phonise le segele. Mo re sa yemme ka mokgonone, re tikemisele go ya mahlong re kene re tseyela gedimo taba ya go rapela, go bala Lentsu la Modimo re boya re maka tso le di hlayang fote re ghayela ka tso re rufiwang ka tsona. Tsotsone di nyoko maka gore Jehova a re gelepe re tiyisele re kene re jabodiye mo re mmerekela. w22.11 13 ¶18-19

Le mo Bhayibele yi sa hlaye gore go makegiye ying nakwela Thimothi a kolobetsiwa, di šupa nkare mmane wage Yunisi ke mo a jabodiye ka matla ka tšatši lolone. (Diy. 23:25) Yunisi o phomelele ga taba ya go karakara ka matla gore a tšhutise morwayi wage gore ga Jehova le ga Morwayi wage Jeso Kreste, a kwane nabo ka matla. Thimothi o gudisiye ke babelegi ba gore a ba tshwane ka sedumedi. Papage ke mo go le Legerika, mara mmane wage le kokwane wage ke mo go le Majuda. (Meber. 16:1) Di ka makega gore Thimothi ne go sa le ye monyana nakwela Yunisi le Luwisa go ba Makreste. Le mo go le ka mokgonone, papa wa Thimothi a sanka gwa ba Mokreste. Mara Thimothi o nyoko fetsa a makiye byang? Bommane bo go leng Makreste ba kwana ka matla le ba mitši ya bona. So se ba hlupang ka matla ke gore ba nyaka go gelepa bana ba bona gore ba be le senghana sa thina ka matla le Jehova. Fote taba yone ya gore baa karakara, Modimo aa yi tseyi ka gonyana. (Diy. 1:​8, 9) Jehova o yetetsiye bommane ba go tlala mo ba kene ba gelepa bana ba bona gore ba yamogele nnete. w22.04 16 ¶1-3

Go se botala, Jehova o nyoko hlohletsela magoši yane gore “ma nagane go maka tso yene a di nyakang.” Go nyoko makega ying mara? Memmušo yone ya dipolotiki go leng, “lesome la magoši,” yi nyoko jikela mekgahlo ya dikereke ke mokane ya fetsa ka yona. (Kut. 17:​1, 2, 12, 16) Re di tšibela kaye gore go se botala Bhabhilona ye Mogolo go nyoko fela ka yene? Gore re thogo kraya phetolo di nyoko re gelepa ka matla mo re ka gopola taba ya gore mutši wa Bhabhilona ya ku botala ke mo wo tšhireletsiye ke meetši ya Noka ye kgolo ya Eforate. Puku ya Kutullo yi tshwanisa dimiliyone tsa batho bo ba thegang Bhabhilona ye Mogolo le “meetši.” (Kut. 17:15) Mara fote yi nyaretsa taba ya gore meetši yane ma nyoko ‘pshya,’ ke mokane tsotsone di rela gore dikereke tsa matsaka di nyoko šala di yitsa di se na wa go di thega. (Kut. 16:12) Seporofeto sone re se bona se makega lekgono ka taba la gore batho ba go tlala ba kene baa hlomogetsela ho dikerekeng ke mokane ba tinyakela diphetolo go gongwana. w22.07 5-6 ¶14-15

Mo re tshwarelana re šupetsa gore re ya leboga. Jeso o yye a berekisa mošupetso wa gore o tshwanisa Jehova le motho wa go hira wa gore lelata lage ne le mo kolota tšheleta ya go tlala ke mokane a fo sula sekoloto sone ka taba la gore ne a šitega go se patela. Mara lona lelata lone la gore ba yye ba le tshwarela le yye la sa kwele ye mongwana wa gore ne a le kolota tšheleta ye nyana. (Mat. 18:​23-35) Mara taba yone ya Jeso yi re tšhutisa ying? Mo nkare taba ya gore Jehova o re kwela go baba re yi tseyela gedimo, tsotsone di nyoko re tšhofa gore re tshwarele ba bangwana. (Pis. 103:9) Mengwaga ya go fela Sewokamelo se yye sa yi beya ka mokgo taba yowa: “Le mo re ka tshwarela ba bangwana gatleletlele tsotsone di ka sa tsoge di phadiye mokgwa wa Jehova wa go tshwarela a boya a šupetsa gore o re kwela go baba a berekisa sehlabelo sa Kreste.” Mo le tshwarela ba bangwana le lune ba nyoko le tshwarela. Jehova o ba kwela go baba ba gore le bona ba kwela ba bangwana go baba. (Mat. 5:7) Taba yonone Jeso o yye a maka gore yi be lekgwaying nakwela a tšhutisa bo ba mo latelelang gore ba rapele ka mokgo mang.—Mat. 6:​14, 15. w22.06 10 ¶8-9

Jeso o tlile ho lefaseng go le motho. Fote a tla a re šupetsa gore Papage ke motho wa mošaga mang. (Joh. 14:9) Byalo tsotsone di re gelepiye gore re tšibe Jehova Modimo fote re mo nyake ka matla. Tso Jeso a di tšhutisiyeng le ka mokgo a yetetsang phutego ya Sekreste lekgono di re berekela ka matla. O re tšhutisiye gore maphelelo ya rune ma tshwanele ma be ka mokgo mang gore Jehova a thogo re yamogela. Fote taba ya gore Jeso o yye a kgwa. Mo Jeso a tsusiwa o yye a neyela ka madi yage go le sehlabelo sa gore se yenele ke mokane “ma re hlatswa ga tso re di sinnyeng.” (1 Joh. 1:7) Gana byalo wa gadimisiwa go le Kgoši ya gore a yi kgwi. Go se botala, Jeso o nyoko psyitlanyana hlogo ya noga. (Gen. 3:15) Taba ya gore Sathane go nyoko fela ka yene yi ro napa yi yimulla batho ka matla! Mara mo re sa litiye tla re sa šepisineng barena. Modimo wa rune wa tshepega. O nyoko berekisa pewu ya mosadi gore yi leyele batho ba “ditšhaba ka mokana ga tsona ho lefaseng” dilo tsa go bafala.” w22.07 18 ¶13; 19 ¶19

Di nyaka re temeka mo re kgeta tso re nyakang go di segelela. Ke ntaba? Ka taba la gore a re di kgone go lawola seyemo gore se sa tšhentšhi. Mošupetso ke wowa: Pawulo wa lepostola o yye a gelepa go thomisa phutego ya nyuwane ku toropong ya Thesalonika. Mara bo ba go phigisa ba yye ba gapeletsa Pawulo gore a tloge hone toropong. (Meber. 17:​1-5, 10) Hala Pawulo a yye a fo dula ka tšhinghi, ne a nyoko bolayisa magagabo. Mara Pawulo a sanka a lahla tewu. O yye a yamogela mo seyemo se tšhentšha. Ka nthagonyana, o yye a romela Thimothi gore a ye a pasope Makreste yawa ya nyuwane ya ku Thesalonika ka tso ma di gayelang ga tso tsa Modimo. (1 Mathes. 3:​1, 2) Makreste ya Mathesalonika di ba jabodisiye ka matla. Re ka tšhuta ga tso Pawulo a yyeng a gahlana natso ku Thesalonika. Di ka makega gore go na le mmereko wo re nabelang gore re wo make ga tso tsa Modimo mara re šitega go wo segelela ka taba la seyemo. (Mmo. 9:11) Mo nkare go ka mokgonone le gago, tikemisele go kgeta se sengwana sa gore gwa kgonega go se segelela. w22.04 25-26 ¶14-15

Jehova o re tiyisa ka tshepo yo a re neyang yona ya dilo tsa ku mahlong. Lebelela tse dingwana tso di tšwang ka Bhayibeleng tsa gore di ka re tiyisa mo re gahlana le dintshitshire. Ka Mangwalong, Jehova o re tshepisa gore le mong dintshitshire tsa go tla di lategetsanne “di ka sa ro re yahluganya le Modimo wa rune.” (Marom. 8:​38, 39) Fote o re tshepisa gore “o thina le batho ka mokana ga bona bo ba mmitsang” ka thapelo. (Pis. 145:18) Jehova o re botsa gore mo re ka tikokotlela ka yene re nyoko tiyisela ntshitshire ye nngwana le ye nngwana re kene re jabodiye le mo di sasamela. (1 Makor. 10:13; Jak. 1:2) Fote Lentsu la Modimo le re gopotsa gore dintshitshire tso re gahlanang natso ke tsa senakonyana mo re di likanisa le lephelo la go ya go yye lo a re tshepisang lona. (2 Makor. 4:​16-18) Jehova o re neya tshepo ya mannete ya gore o nyoko tlosa dilo ka mokana ga tsona tso di re leyelang dintshitshire go leng Sathane Diyabolo le bo ba kopiselang tsa go befa tso a di makang. (Pis. 37:10) Ayitsano go na le mangwalo ya ka Bhayibeleng ya gore o ma tshwere ka hlogo ya gore ma nyoko go gelepa gore o tiyisele dintshitshire ku mahlong? w22.08 11 ¶11

Taba ya gore ayitsano o ko di kgoneng go ya mahlong o kene o berekisa melawo ya Jehova ya go loka ka moka matšatši mengwaga yi kene yi takamela ya go šekedisa? Jehova o re tshepisa gore go loka ga rune go ka “tshwana le meetši ya lewatle.” (Jes. 48:18) O fo nagana o yemme lerophong la lewatle ke mokane o lebelele meetši ma kene ma kakolega ma ya tlase le kgakala ma lategetsana. Ga seyemo sosone sa gore se bebiye, ayitsano o šekela ka taba la gore ka tšatši le lengwana di nyoko makega gore meetši yane ma fo yema ma re tse? Dho! Wa di tšiba tsa gore di ka sa makege gore ma fo yema poleke ka yyoši. Byalo go loka gago go tshwana le meetši yane ya lewatle! Ka mokgo mang mara? Mo di nyaka o segelela sepheto thomisa o tiputsisa so Jehova a nyakang gore o se make. Ke mokane o make ka mokgonone. Le mo di ka thathafa ka matla go segelela sepheto sone Papago wa gore o go nyaka ka matla o nyoko dula a le ho thina gore a thogo go gelepa gore o sa thogathoge fote o ye mahlong o berekisa melawo yage ya go loka mo o kene o phela.—Jes. 40:​29-31. w22.08 30 ¶15-17

Mo go fela 1 000 ya mengwaga ba nyoko mmulela. Ke mokane o nyoko liketsa go fukula batho ba gore ba yenele. Mo a kene a ba liketsa batho bo ba gore ba ko ba ba yenele ho lefaseng ba nyoko thulegela ke lešuba la gore ba šupetse gore ba yemme kaye ga taba ya gore lebitso la Modimo di nyaka le tseyediwe gedimo le gore ke yene ye di mo tshwanelang tsa go lawola. (Kut. 20:​8-10) Tso ba nyoko di kgetang mo Sathane a kene a karakara a ba liketsa ke tsona tso di nyoko hlayang gore ayitsano mabitso ya bona di nyaka ma šihlediwa ka pukung ya lephelo kela dho. Ba bangwana ba gore nombhoro ya bona a yi tšibegi ba nyoko kopisela Adamo le Efa ga taba ya go gana go lawola ke Jehova. Go nyoko makega ying ka bona? Kutullo 20:15 yi re: “Ye mongwana le ye mongwana wa gore lebitso lage a le ya ngwadiwa ka pukung ya lephelo, o bošediwwe ledhamong la mollo.” Eya, bo ba go tiwomisa dihlogo ba nyoko ba psyitlanya go napa go fela ka bona. Mara batho ba go tlala ba gore ba nyoko ba ba yenele ba nyoko pasa mo ba liketsiwa la mafelelo. w22.09 23-24 ¶15-16

Ba bangwana ka phutegong ya ku botala ke mo ba gapeletsa gore Makreste ya gore a yi Majuda ma bollwe, di ka makega gore ne ba makisa ke taba ya go tšhaba gore Majuda ya mangwana ya gore a yi Makreste ma ka ba solasola. (Magal. 6:12) Pawulo wa lepostola o yi ganne a tiyisiye ka ganong taba yone mara a sanka a fo gapeletsa gore ba make so yene a se nyakang mara o yye a tinyanafatsa ke mokane a kgopela mapostola le bagolo ba ku Jerusalema gore ba tshwaragane nayo taba yone. (Meber. 15:2) Ka taba la gore o yye a bereka dilo ka mokgonone tsotsone di yye dya gelepa Makreste ya ka phutegong gore ma karakare gore ma dule ma jabodiye fote ma kwana. (Meber. 15:​30, 31) Mo go ka nyarela taba ye kgolo ya go maka gore re phigisane re ko šupetsa gore re ya di nyaka tsa gore go bebe mo re kgopela bo Jehova a ba hlawodiyeng gore ba pasope phutego gore ba re gelepe. Ga go tlala dikgatiso tsa rune tsa go bolabola ka Bhayibele di ya re yetetsa kela re gelepa ke tse dingwana tso mokgahlo wo re yetetsang ka tsona. Mo re ka sa di takisi maahlo tso ba re yetetsang ka tsona re lisetsa go fo llela gore dilo di makege ka mokgo rune re nyakang re ko ba re tšhela letsogo ga taba ya gore go dule go bebiye ka ho phutegong. w22.08 22 ¶8-9

Ka dinako tse dingwana ba go tlala ba rune re ya di nyaka go ba le monghana wa gore re ka bolabola naye. Mara ka dinako tse dingwana gwa thathafa go maka ka mokgonone. O ka kraya re sa di tlwayela tsa go botsa ye mongwana tso di re kokonang fote re ka kwa go baba ka matla mo monghana ye re mmutsiyeng ditaba tsa rune a di fitisela le ga ba bangwana. Ka nthoko ye nngwana a yi go natefela ga tsona go fo tšiba gore go na le motho ye re ka mo tshepang wa gore re ka mmotsa ka moka tso di re hlupang! Magageru ma tseya bagolo ba gore baa di kgona go tshwara taba go le “poleke ya go wutama ga yona mo go na le moya, poleke ya go tšhabela ga yona.” (Jes. 32:2) Re ya di tšiba tsa gore re ka botsa banna bowa se sengwana le se sengwana re tshepa gore tso re ba botsang tsona ba ka sa yi ba di botsa ba bangwana. Fote a re ba gapeletse gore ba re botse tsa gore a di re nyake. Go tokegela gana hone, re ba tseyela gedimo basadi ba bagolo ka taba la gore le bona a ba fatafate ditaba ga banna ba bona. A yi go jabodisa ga tsona go fo tšiba gore bagolo a ba botse basadi ba bona ditaba tsa magageru. w22.09 11 ¶10-11

A re kamake gore Jehova o nyoko phonisa malata yage ya go tshepega ga “motšhatšhamelo wo mogolo.” (Mat. 24:21; Dan. 12:1) O nyoko maka ka mokgonone mo ditšhaba tsa go timaka ngata ka yyoši, go leng Ghogho wa Maghogho, di liketsa go hlasela ka bošidi batho ba gore baa tshepega ga Jehova. Le mo yi le gore ga ngata yone go kena le 193 ya dinaga tso di leng ga Ditšhaba tsa go Mamarelana, so se šalang ke gore ba ka sa bone selo ga Ye wa ku Malenghelengheng le masole yage ya ku legedimong! Jehova o tshepisa gore: “Ke nyoko tigadimisa, ke make gore ke hlawolege, ke boye ke make gore ke tšibege ga ditšhaba tsa go tlala; fote ba nyoko di tšiba tsa gore ke nna Jehova.” (Hezek. 38:​14-16, 23) Go kutulugela ke Ghogho go hlohla Aremaghedoni mo Jehova a fetsa ka “magoši ya lefase ka mokana ga lona.” (Kut. 16:​14, 16; 19:​19-21) Gabutšibutši, “ke ba go loka fela ba gore ba nyoko dula ho lefaseng, fote le ba go tshepega ba nyoko phela ga lona.”—Diy. 2:21. w22.10 16-17 ¶16-17

A re di kgone tsa go bona dipelo mara “Jehova o nyakolla gore re tšhofa king.” (Diy. 16:2) O kwana le batho ka mokana ga bona ba go tšwa ga ditšhaba le ditšo tsa mohlobohlobo. Fote Jehova o re hlohletsela gore re ‘re nyakanane ka matla.’ (2 Makor. 6:13) Re di nabela ka matla tsa gore re kwane le batho ka mokana ga bona bo ba leng ka mutšing wa Jehova fote re sa ba yahlule. Fote tsotsone di rela gore le mong batho ba gore a yi ba ka phutegong re sa ba yahlule. Nje o ka bolabola ka lešaga lago la gore a le dumele so o se dumelang o re, “Mo go le morenene yene a ka sa tsoge a yamogele nnete”? Tsone o ka sa di make, ka taba la gore go ko ba go le go phophoroga le go titseya nkare wene o lukiye ka matla. Jehova o sa na a thulele “batho ka mokana ga bona go gongwana le go gongwana lešuba la gore ba sokologe. (Meber. 17:30) O sa lebale gore mo o titseya nkare o lukiye go phala ba bangwana tsotsone ke mokgwa wa go sa loka. Re nabela nkare taba ya go nyaka melawo ya Jehova ya go loka yi ka maka gore re jabole yi boye yi hlohletsele ba bangwana yi ba gelepe gore ba šutele ga rune le ga Modimo wa rune. w22.08 31 ¶20-22

Re yi yemele taba ya gore ba bangwana ba re phigise mo re kene re maka mmereko wa rune wa go tšhomayela. Fote re di tšiba gabutši gore ba nyoko napa ba swaya melala mo goya-goya. (Dan. 11:44; 2 Thim. 3:12; Kut. 16:21) Le mo go le ka mokgonone, a re kamake gore Jehova o nyoko re thega. Ke ntaba re reyane? Phela ke botala Jehova a kene a gelepa malata yage gore ma thogo segelela tso yene a di nyakang le mo di ka thathafa go segela kaye. Lebelela moporefeta Hezekiyele wa gore ke mo a tšhomayelela Majuda ya gore ba ma yisiye bobhantiting ku Bhabhilona. Batho bo Hezekiyele ke mo di nyaka a ba tšhomayelela ke mo go le ba mošaga mang? Jehova mo a ba hlatolla o re, ke “ba dipelo tsa letlapa,” le “ba go tiwomisa dihlogo.” Ke mo ba kwaletsa go tshwana le mutlwa fote ba le kotsi go tshwana le bomangkopelane. A di makatse mo Jehova a yye a botsa Hezekiyele gatleletlele gore: “O sa tšhabe selo”! (Hezek. 2:​3-6) Hezekiyele o di kgonne go maka mmereko wo ba mo neyyeng wona wa go tšhomayela ka taba la gore (1) ke mo a romme ke Jehova, (2) ke mo a tiyisa ke moya wa Modimo fote (3) tumelo yage ke mo yi tiyisa ke lentsu la Modimo. w22.11 2 ¶1-2

Ka mokana ga tsona tso Jehova a di makiyeng ho lefaseng ne di nyoko feleletsa di kgwile, mara mo go le batho ne ba ka sa tsoge ba kgwile. Fote Jehova o re makiye re na le selo sela sa go fo nabela go dula re phela. Mo Bhayibele yi bolabola ka motho yi re, Modimo o “makiye gore dipelo tsa bona di nabele go phela go ya go yye.” (Mmo. 3:11) Sosone ke sona so se makang gore re tseye likgu go le lenaba. (1 Makor. 15:26) Mo re ka tshwaragana le bolwele, ayitsano re napa re fo re di re tlele re nyoko yemela go kgwa? Nikise. Ga go tlala, re ya ga togotela fote ka dinako tse dingwana re kuma le maphilisi gore re thogo yalafa bolwele byone. Gabutšibutši, re ya garagara gore re sa kgwe. Fote mo lešaga la rune la gore ke motho ye monyana kela ye mogolo le hlokofala, di re tseya nako ya go lefa re kene re kwa go baba. (Joh. 11:​32, 33) Ke nnete gore, re nabela go phela go ya go yye ka taba la gore ye a re Makiyeng wa gore o re nyaka ka matla o re makiye re le ka mokgonone, fote o nyoko maka gore tsotsone di kgonege. w22.12 3 ¶5; 4 ¶7

Magageru ya go tlala ma ka fo ba ma lwala, go na le tsa go ma tshosanya kela ma tikwa nkare ma fo ba ntoši ka dinako tso tsa go thathafa. O sa lisetse go bolabola le magageru. Ka taba la go kutulugela ke bolwele, di ka nyaka gore re sa yeme thina le thina le mo re na le bo re rapelang nabo. Ka nako yonone o ka tikwa go tshwana le ka mokgo Johane wa lepostola a yyeng a tikwa ka gona. Ke mo a di nyaka go gahlana le monghanage ye ba reng ke Ghayiyosi ba bonana ka maahlo. (3 Joh. 13, 14) Mara, Johane o di bonne gabutši gore go šele go le nako ya go lefa a sa bone Ghayiyosi. Byalo, Johane o yye a maka so a ka se kgonang ke mokane a ngwalela Ghayiyosi lengwalo. Mo nkare di fela di go kgerela ga taba ya gore o vakašele magageru le bonana ka maahlo, liketsa go bolabola nabo ka mekgwa ye mengwana. Mo o ka ya mahlong o kene o bolabola le magagenu ya Sekreste tsotsone di nyoko maka gore o sa tikwe nkare o fo ba ntoši fote dya maka gore o tikwe o kgibiye. Fowunela bagolo ka matlamatla mo nkare go šekela go go tshwere ka diwašeni fote o yamogele mo ba go tiyisa.—Jes. 32:​1, 2. w22.12 17-18 ¶6-7

Bhayibele yi šupetsa gore mawoto ya Josefa ke mo ba ma tlemme ka diketane tsa senakonyana fote ke mo ba mo tšhokele ka ditshipi ho molaleng. (Pis. 105:​17, 18) Seyemo sa Josefa se yye sa thomisa go gakga ka matla. O tlugiye ga go ba lebhantiti la go tshepega a ba lebhantiti la go tseyediwa fase ka matla. Ayitsano o yye wa tikraya o le ga seyemo sa go thathafa ka matla sa gore se fo ya se tooka le mo o rapela o šwennye? Tsotsone di ka makega. Jehova aa re kogetsi ka se sengwana gore mathatha ya lefase la gore le lawola ke Sathane ma sa re tlele. (1 Joh. 5:19) Le mo go le ka mokgonone o sa kamake taba ya gore: Jehova o di bona gabutši tso o tshwaraganneng natso fote wa tihlupa ka wene. (Mat. 10:​29-31; 1 Pet. 5:​6, 7) Se sengwana fote so a re tshepisiyeng sona ke gore: “Nka sa go lisetse fote nka sa ro go lahla.” (Maheb. 13:5) Jehova a ka go gelepa gore o tiyisele le mo hlasenyana yi sa sa le šiyo ga seyemo sago. w23.01 16 ¶7-8

Mangwalo ma re tshepisa gore Modimo wa rune a ka sa ro re lahla mo re fela re kekemisa. Maisrayele ma yye ma sinyela Jehova ga tleletlele; mara mo ma šupetsa gore ma tisola ma resa, Modimo o yye a ma tshwarela. Makreste ya ku botala ke mo ma di tšiba tsa gore Modimo ke mo a ba nyaka ka matla. Modimo o hlohletsele Pawulo wa lepostola gore a botse magagabo gore ma ‘tshwarele fote ma kgomoletse’ motho wa gore o yye a sinya ka matla mara a šupetsa gore o tisola a resa. (2 Makor. 2:​6, 7; 1 Makor. 5:​1-5) Phela di ro jabodisa ka matla gore Jehova aa lahle batho bo ba mo rapelang ka taba la gore ba mo sinyele! Mara, o šupetsiye gore o ba nyaka ka matla ka gore a ba gelepe a sa tšhofe ke motho, ka go ba gelepa gore ba potolle ga gore go kekemme a boya a ro fawa gore ba boyele ba be banghana bage fote. Le lekgono o sa na a tshepisa go maka ka mokgonone ga bo ba gore ba sinnye ke mokane ba tisola ba resa. (Jak. 4:​8-10) Bhayibele yi re wunyullela gore Modimo o hlalefiye, o lukiye fote o nyakanana ka matla. Puku yowa yi šupetsa gabutši gore Jehova o nyaka gore re mo tšibe. O nyaka gore re be banghana bage. w23.02 7 ¶16-17

Go na le tso di makang gore re nyake go tšiba ka mokgo dilo tso di makegang ho lefaseng gana byalo, di šupetsang tso Bhayibele yi diporofitiyeng. Mo re beyisa, Jeso o re butsiye ka dilo tso di nyoko makegang go re gelepa gore re thogo tšiba mo go šutela nako ya gore go fele ka lefase la Sathane. (Mat. 24:​3-14) Petro wa lepostola o re hlohletsele gore re ntshe maahlo dikwakweng mo diporofeto di makega gore tumelo ya rune yi dule yi tiyelele. (2 Pet. 1:​20, 21) O nyaka re likanisele mo re pombhola seporofeto sa Bhayibele. O re hlohletsela gore re be re ‘kene re nagana fote re kene re gopola letšatši la Jehova.’ (2 Pet. 3:​11-13) Ke ntaba mara? A yi taba la gore re nyaka go tšiba gore “dilo tsone di nyoko makega leng” mo Jehova a leya Aremaghedoni, mara nka taba la gore re nyaka go berekisa nako yo yi šeleng gore re thogo maka “tsa go tlalela ga Modimo le … tsa go hlawolega.” (Mat. 24:36; Luk. 12:40) Re nyaka go titshwara gabutši fote le dilo ka mokana ga tsona tso re di makelang Jehova re nyaka go di maka go le ka taba la gore re mo nyaka ka matla. Phela gore re thogo dula re ntshiye maahlo dikwakweng, di nyaka re tipasopeneng barena. w23.02 16 ¶4, 6

Go na le dilo tso bo ba “dinku tse dingwana” di nyakang ba di make gore ba tshwanelege go phela Pharadeyising. Di nyaka re šupetse ka mokgo re tikwang ka Jeso. Mo re beyisa, re šupetsa gore re mo nyaka ka matla ka mokgo re ko bang re tshwara bobhuti bage ba gore ba tlotsiwwe. Jeso o yitseri o nyoko yahlula dinku go ya ka mokgo di tshwarang bobhuti bage. (Mat. 25:​31-40) Re ka thega go maka mmereko wa go tšhomayela ka matšato le go maka batho gore go be malata. (Mat. 28:​18-20) A di nyake re šinya re yemela Pharadeyisi gore re thogo ba mošaga wa motho ye Jehova a mo nyakang Pharadeyising. Gana byalo re ka karakara ga taba ya go tshepega ga tso re di hlayang le ga tso re di makang re boye re lekanisele ka mokgo re makang dilo. Fote di nyaka re tshepege ga Jehova, ga ye re šadhiyeng naye le ga magageru ya Sekreste. Mo re ka theetsela Jehova gana byalo re kene re phela ga lefase lowa la go befa, di nyoko ba lula ga rune gore re mo theetsele mo re šele re le Pharadeyising. Fote re ka tšhuta go maka mebereko le go ba le mekgwa ya gabutši ya go šupetsa gore re tilukiselela go ye phela gona. w22.12 11-12 ¶14-16

Jeso re mo nyaka ka matla ka taba la gore ke mong yona Kgoši ya rune ya gore yi Lawola gabutši. Jehova ka boyene mong o tšhutisiye Morwayi wage fote o kgetiye yene gore a lawole. (Jes. 50:​4, 5) Le wene o fo nagana ka mokgo Jeso a šupetsiyeng a sa tšhofe ke motho gore wa nyakanana. (Joh. 13:1) Ka taba la gore Jeso ke Kgoši ya rune di ya mo tshwanela gore re mo nyake ka matla. O yi beyye lekgwaying taba ya gore bo ba mo nyakang tsa mannete le bo go leng banghana bage ba nyoko šupetsa gore ba mo nyaka ka matla ka go theetsela melawo yage. (Joh. 14:15; 15:​14, 15) Ye lune, phela a yi taba ya go kgana go ba monghana wa Morwayi wa Jehova! O fo di bona gabutši gore taba ya go tinyanafatsa, Jeso o yi tsere ga Papage. Re tšhutiye gore o yye a neya ba gore ba kwa tlala tsa go ja, a kgomoletsa ba gore ba kgongwele a boya a yalafa ba gore baa lwala. (Mat. 14:​14-21) Re bonne le ka mokgo a yetetsang phutego ka gona lekgono. (Mat. 23:10) Fote re di tšiba gabutši gore o nyoko maka tsa go phala tsotsone ku mahlong mo a šele a lawola go le Kgoši ya Mmušo wa Modimo. O ka šupetsa ka mokgo mang gore mo o re wa mo nyaka a o timakisi? Ka go latelela mošupetso wage. O ka thomisa ka go tineyela ga Jehova ke mokane o kolobetsiwe. w23.03 4 ¶8, 10

Jehova o makiye dilo ka mokana ga tsona tso di leng legedimong le tsa ho lefaseng re ra le mong tsa gore di ka teng ga lewatle fote dilo tsowa ka mokana ga tsona di re tšhutisa ka yene. (Pis. 104:​24, 25) O fo nagana ka mokgo Modimo a re makiyeng. O re makiye gore re thogo jabolela go lebelela dilo tsa go bafala tsa hlago. Fote o makiye gore re thogo bona, go kwa, go tshwara, go leka le go nkgelela—go leng dilo tso di re gelepang gore re thogo tikwisa ka dilo tsa mohlobohlobo tso a di makiyeng. Bhayibele yi re botsa ka taba ye nngwana ye kgolo yo yi makang gore re lebelele hlago. Yi re tšhutisa ka mekgwa ya Jehova. (Marom. 1:20) Mo re beyisa, lebelela dilo tso Jehova a di makiyeng o boye o bone ka mokgo a di makiyeng gabutši ka gona. Nje a di nape di šupetsa ka mokgo Jehova a hlalefiyeng? O fo nagana fote ka tsa go ja tsa mohlobohlobo tso re tikwisang ka tsona. Tsowa di napa di šupetsa gore Jehova o nyaka batho ka matla. Mo re bona mekgwa ya Jehova ga dilo tso a di makiyeng, re napa re mo tšiba gabutši fote go re tšhofa gore re šutele thina gage. w23.03 16 ¶4-5

Seyemo sa lefase lowa se fo ya mahlong se tooka, byalo tsotsone di nyoko maka gore di sa be le lula gore re tshepe Lentsu la Modimo. Batho ba ka liketsa go maka gore re kamake gore Bhayibele yi bolabola nnete kela re kamake taba ya gore Jehova o hlawodiye lelata la go tshepega la gore fote le hlalefiye gore le yetetse bo ba mo rapelang lekgono. Mara mo re tshepa re tiyise gore Lentsu la Jehova go ko dula go le nnete, re ko thogo phagela thoko dilo tsone tsa go re liketsa tumelo. Re ko ba re ‘fetsiye le pelo gore re nyaka go theetsela melawo ya Jehova ka mokana ga yona go segela ga wa mafelelo.’ (Pis. 119:112) Re ka “sa tšebisi” ke go botsa ba bangwana nnete re boya re ba hlohletsela gore ba berekise mayele ya Bhayibele mo ba kene ba phela. (Pis. 119:46) Fote re ko thogo tiyisela seyemo sa go thathafa ka matla go tokegela le go hlorisiwa re ‘kene re lefisiye pelo fote re jabodiye.” (Makol. 1:11; Pis. 119:​143, 157) Nnete yi re gelepa gore re dule re kgibiye, re sa tšhoge selo fote yi re tšhutisa gore re ka phela byang. Nnete yone yi re neya tshepo ya dilo tsa gabutši tsa ku mahlong mo re šele re lawola ke Mmušo wa Modimo. w23.01 7 ¶16-17

Bošego bya mo Jeso a soko kgwa o yye a rapelela malata yage nako ya go lefanyana a kgopela Papage gore a “ba pasope ga ye wa pelo ye phifadu.” (Joh. 17:15) Ye lune, phela Jeso wa resa mo a re wa nyakanana! Ne a di tšiba gore go se botala o nyoko tlela ke tsa go sasamela la go šala a sa sa tšiba gore a ka kena kakaye mara o f’lo ya mahlong a kene a hlupega ka matla ka mapostola yage. Mo re nyaka go kopisela ga Jeso di gabutši ka matla gore re sa fo tinyakela tso di gelepang rune re le ntoši. Mara di nyaka re dula re rapelela magageru. Mo re maka tsotsone re šupetsa gore molawo wo Jeso a re neyyeng wona wa gore re nyakanane re ya wo theetsela fote re šupetsa le Jehova gore re ma nyaka ka matla magageru. Phela taba ya go rapelela magageru a yi go kgana ka nako. Lentsu la Modimo le re botsa gore “mo motho wa go loka a rapela di nyoko gelepa batho bangwana ka matla.” (Jak. 5:16) Magageru maa di nyaka tsa gore re ma rapelele mo ma gahlana le dintshitshire. w22.07 23-24 ¶13-15