August

Lebelela dilo ka dipedi tsa gore o ka di tseyela gedimo ga Pisalema yowa yi leng ka ho kgakala, ke tsowa: (1) Mehlupego ya batho ba go loka yi tlele ka matla. (2) Jehova o re phonisa ga mathatha ya rune. Jehova o re phonisa ka mokgo mang mara? Mokgwa wo mongwana ke gore o re gelepa gore re thogo tseya lephelo gabutši ga lefase lolowa. Mo Jehova a re tshepisa gore re nyoko jabola mo re kene re mmerekela, aa rele gore re ko phela re sa tlele ke mathatha. (Jes. 66:14) O re hlohletsela gore re beye menagano ya rune ga tsa ku mahlong—ga gore o nyaka gore re tikwise ka lephelo go ya go yye. (2 Makor. 4:16-18) Tsa gana byalo wa re gelepa mo re kene re totoba letšatši le lengwana le le lengwana. (Dillo 3:22-24) King tso re ka di tšhutang ga mešupetso ya malata ya go tshepega ya Jehova ya ka Bhayibeleng le ya dinako tsa rune? Mathatha ma ka fo re juma. Mara mo re tshepela ga Jehova, o nyoko dula a na le rune.—Pis. 55:22. w23.04 14-15 ¶3-4

Re ka tšhuta ga mošupetso wa Josefa le Mariya ba gore ne ba tikemisele go theetsela bo ba yetang mahlong ba mmušo le mo ne di thathafa go maka ka mokgonone. (Luk. 2:1-6) Mo Mariya a na le gana hala ga nkokwane ya dikgwedi a yimme, yene le Josefa ba yye ba lebana le ntshitshire ya go liketsa taba ya bona ya gore baa theetsela. Aghostosi wa gore ne a lawola Roma ka mokana ga yona o yye a beya molawo wa gore batho ba tshwanele ba ye mo ba goleleng gore ba ba ngwadise. Ke mo di nyaka gore Josefa le Mariya ba ye Bhetlelehema, ga gore ke leyeto la go lekana 150 ya dikhilomitha ba kene ba kalama dithaba ba di phologa. Phela a di nyake ba ro re hlayisela gore ga Mariya leyeto lone ne go nyoko ba mong ntshitshire. Di ka makega gore ne ba šekedisa ke taba ya Mariya le ngwane wa gore aa soko belegiwa. Gore ba nyoko bona ba makiye byang bana ba tšhuwana mo a ka fo tshwara ke lešoko ba sa le tseleng? Phela re sa lebale gore o rwele Mesiya wa gore o tshepisiwwe. Ayitsano tsotsone ne di ka maka gore ba tshile molawo wa mmušo? Josefa le Mariya a sanka ba lisetsa seyemo sa bona se ba kutšetsela gore ba sa theetsele molawo. Jehova o yye a yi rufa la go sa hlayisegi taba ya bona ya go theetsela. Mariya o yye a segela Bhetlelehema a le gabutši, a belega ngwana wa gore o philegiye gabutši fote tsotsone di yye dya gelepa gore go makege seporofeto sa Bhayibele!—Mmik. 5:2. w23.10 8 ¶9; 9 ¶11-12

O ka maka byang mo o fo kwa o rurumela mo di nyaka o fetole mo o le megahlanong? O ka gelepa ke go lukiselela gabutši. (Diy. 21:5) Mo o šele o kwisisa tso di nyoko tšhutiwang, o nyoko tikwa o lukulugiye gore o fetole. Fote o sa lefisi mo o fetola. (Diy. 15:23; 17:27) O ka sa nape o tšhoga ka matla mo o fetola tsa gore a dya lefa. Mo o fetola phetolo ya go sa lefa o berekisa mantsu yago, o ko ba o šupetsa gore o lukiselele gabutši fote taba yo go tšhutiwang ka yona o yi kwisisa gabutši. Re ka re king mo nkare o liketsa tse dingwana tsa dilo tsowa mara o sa na o kwa o tšhoga gore o ka fetola go feta gateya kela gabedi? O sa kamake gore Jehova o di tseyela gedimo dilo tso o karakarang go di makang. (Luk. 21:1-4) Phela go maka tso o ka di kgonang a go rele gore o nape o tiyimetse. (Mafil. 4:5) Lebelela gore ke difeng tso o ka di kgonang, tipotse gore o nyoko di segelela ke mokane o rapelele taba ya gore o fo kwa o kgibiye. Mathomisong, o ka nyaka go segelela taba ya go maka gore phetolo yago yi fo ba ye kopana. w23.04 21 ¶6-8

Pawulo wa lepostola o re tshwanisa le masole ya gore ma hlahlamme ya gore fote ma yaparele go ya ntweng. Batho ba yemele gore lesole le dule le tilukiselele go lwa ka nako ye nngwana le ye nngwana mo go na le ntwa. Go fo ba ka mokgonone le ga rune. Re dula re tilukiselele letšatši la Jehova ka go yapara sephemo sa ho sekgubeng go leng go nyakanana le tumelo ya rune re boye re yapare lekarapo la gore ke tshepo ya rune. Sephemo sa ho sekgubeng ke mo se tšhireletsa pelo ya lesole. Tumelo le go nyakanana di tšhireletsa pelo ya rune ya go tshwanisela. Di nyoko re gelepa gore re dule re berekela Modimo re boye re latelele Jeso. Tumelo yi maka gore re sa kamake gore Jehova o nyoko re rufa mo re mo nyaka ka dipelo tsa rune ka moka. (Maheb. 11:6) Yi nyoko re tšhofa gore re dule re tshepega ga Moyetamahlong wa rune, Jeso, le mo di nyaka gore re tiyisele dintshitshire. Re ka tiyisa tumelo ya rune gore re thogo tiyisela dintshitshire ka go tšhuta ga mešupetso ya matšatši yawa ya bo ba gore ne ba dula ba tshepega le mo ba kene ba hlorisiwa kela ba gayela sekwetše. Fote re ka kganela kgole le molabo wa go kwana ka matla le tšheleta le go ba le dilo tsa majabajaba mo re ka kopisela bo ba gore ba yye ba phela lephelo la lula gore ba thogo yetisa tsa Mmušo wa Modimo mahlong. w23.06 10 ¶8-9

Go titshwara ke go kgona lawola ka mokgo o tikwang le tso o di makang. Di nyaka re titshware gore re thogo segelela tso re di nyakang, ka matlamatla mo taba yone yi se lula go yi segelela kela mo re fo kwa re se na so se re tšhofang. O sa lebale gore go titshwara ke se sengwana sa diyengwa tsa moya wa go hlawolega, byalo mo kgopele ga Jehova gore a go neye moya wa go hlawolega gore o thogo ba le mokgwa wone wa gabutši. (Luk. 11:13; Magal. 5:22, 23) O sa yemele mo dilo di thelela. Ga lefase lowa, di ka makega gore re sa tsoge re be le nako ya gore dilo di fo thelela. Mo re ka ya ka tsona, di ka makega gore re sa segelele tso re di nyakang. Mo tso re di nyakang di šupetsa nkare dya thathafa go di segelela, tsotsone di ka re tapa matšhika. Mo nkare le wene o tikwa ka mokgonone, ayitsano o ka hafola tso o nyakang go di segelela gore go be tse dinyana? Mo nkare o nyaka go segelela taba ya go ba le mokgwa wa gabutši, ke ntaba o sa thomisi ka go wo šupetsa ka gonyana ka gonyana? Mo nkare so o nyakang go se segelela ke go bala Bhayibele ka mokana ga yona, ayitsano o ka thomisa ka go yi bala ka gonyana ka gonyana? w23.05 29 ¶11-13

Ka dinako tso tsa mafelelo, Jehova o berekisa mokgahlo wage gore wo re yetetse ka Lentsu Lage gore le re gelepe ka mokana ga rune gore re thogo sepela ga “pata ya go hlawolega.” (Jes. 35:8; 48:17; 60:17) Re ka fo tseya gore mo motho a yamogela go tšhuta Bhayibele, o thulegele ke lešuba la gore a sepele ga “pata ya go hlawolega.” Ba bangwana ba sepela ho ga yona tsa senakonyana ke mokane ba lisetsa go sepela ga pata ye kgolo. Hala ba bangwana ba tikemisele go fo sepela mo ga yona go segela mo ba yang gona. Anthe ba ya kaye? Bo ba nang le tshepo ya go ye phela legedimong, “pata ya go hlawolega” yi ba yisa “pharadeyising ya Modimo” ku legedimong. (Kut. 2:7) Bo ba nang le tshepo ya go phela ho lefaseng, pata yone ye kgolo yi ba yisa ga lephelo la gore le yenele ka nthago ga 1000 ya mengwaga. Mo nkare o kene o sepela ga pata ye kgolo lekgono, o sa sologe. Ye na, o sa ro yi lisetsa, sepela ga yona go segela o kena ga lefase la nyuwane! w23.05 17 ¶15; 19 ¶16-18

Mo o nagana ka dilo ka mokana ga tsona tso Jehova a go makeleng tsona, o nyoko fo kwa di go tšhofa gore o tineyele gage. (Pis. 116:12-14.) A go runi mo Bhayibele yi re “dilo ka mokana ga tsona tsa gore di gabutši le tsa gore di felegelele” re di neya ke Jehova. (Jak. 1:17) Ga dilo tso a re neyyeng tsona, se segolo sa gona ke sehlabelo sa Morwayi wage, Jeso. O fo nagana nje! Sehlabelo sone se makiye gore wene o kgone go ba le senghananghana le Jehova. Fote yene o makiye gore o thulegele ke lešuba la go phela go ya go yye. (1 Joh. 4:9, 10) Mo o tineyela ga Jehova, wone ke mokgwa wa go yi phala ka mokana ga yona wa go mo šupetsa gore o leboga tso a go makeleng tsona mo a go šupetsa gore o go nyaka ka matla, le ka dilo ka mokana ga tsona tso Jehova a go rufiyeng ka tsona.—Dot. 16:17; 2 Makor. 5:15. w24.03 5 ¶8

Mo re bona ka mokgo lefase lekgono le kutšetselang mokgwa wa go titshwara wa gore a wa hlamatsega, re fo napa re tikwa ka mokgo Llota ne a tikwa ka gona. Ke “mo a kgongwetsa ke dilo tsa go sa loka tso batho ba go ba le tšhinghi ne ba di maka,” ka taba la gore ne a di tšiba tsa gore Papa wa rune wa legedimong o di hloyye mo batho ba maka dilo tsa go sa hlamatsega. (2 Pet. 2:7, 8) Ka taba la gore Llota ke mo a tšhaba Modimo fote a mo nyaka ka matla, ke mo a hloyye mekgwa ya go sa hlamatsega ya batho bo ne a yagelanne nabo. Le rune re phela le batho ba gore a ba yisi felo kela a ba hlompe melawo ya Jehova ya go titshwara. Le mo go na go yitsa, re ka dula re yediye ga taba ya go titshwara mo re ka fo dula re nyaka Modimo ka matla re boya re tšhuta go mo hlompa ka matla. Jehova o re gelepa gore re thogo maka ka mokgonone a berekisa puku ya Diyema gore yi thogo re tiyisa le go re hlohletsela. Makreste ka mokana ga wona ya banna le ya basadi, ya gore ma sa gola le ya gore ma šele ma gudiye, ma ka berekela ke taba ya go lebelela mayele ya go hlalefa ya gore ma krayega ga puku yone. Mo re tšhaba Jehova, re dula re pasopa gore re sa nghanelane le batho ba go maka dilo tsa go befa. w23.06 20 ¶1-2; 21 ¶5

O ka kraya o šele o fitiye ga tsa go phigisa ke mašaga kela o ka kraya o tikonne tse dingwana tsa majabajaba gore o yetise tsa Mmušo mahlong. (Mat. 6:33) Mo nkare go ka mokgonone, o sa kamake gore Jehova o di bonne ka moka tso o di makiyeng go šupetsa gore wa tshepega. (Maheb. 6:10) Di ka makega gore o šele o di bonne gore Jeso ne a resa mo a re: “Ye a šiyyeng ntlo kela bobhuti kela bosesi kela mmane kela papa kela bana kela mašemo ka taba laka, kela ka taba la ditaba tsa go bafala, motho yene o nyoko kraya dilo tsowa ka mokana ga tsona ga 100 gana byalo, o nyoko kraya dintlo, bobhuti, bosesi, bommane, bana, le mašemo a kene a hlupegisiwa, fote o tl’le kraya le lephelo la go ya go yye ga lefase lo le sa ga tla.” (Mar. 10:29, 30) Nnete tso o rufegiyeng ka tsona di feta mong kgole tso o tikonneng tsona.—Pis. 37:4. w24.03 9 ¶5

Mo Makreste ya ku Judiya ma wele ke tlala ye kgolo, magageru ya phutego ya ku Anthiyoko ma yye ‘ma kwana ka gore ma ka gelepa byang gore ma yimulle magagabo ya ku Judiya.’ (Meber. 11:27-30) Le mo yi le gore magageru yaa ne ma kenele ke tlala ne ma dula kgole mara Makreste ya ku Anthiyoko ne ma tikemisele go gelepa. (1 Joh. 3:17, 18) Le rune lekgono, re ka šupetsa gore re kwelana go baba mo magageru ma wele ke kotsi. Re ka yakgoswa re gelepa nakwenngwana ka go butsisa bagolo gore ayitsano re ka tšhela letsogo ga mmereko wone ka go neyela ga mmereko wa lefase ka moka kela re ka rapelela bo ba weleng ke kotsi yone. Magageru ma ko nyaka go gelepiwa ga taba ya gore ma kraye dilo tsa gore ma thogo phela. Mo Kgoši ya rune Kreste Jeso a tl’le yahlula batho, re nyaka a re kraye re šupetsa go kwelana go baba fote o re mema gore re tseye “Mmušo wage” go be lefa.—Mat. 25:34-40. w23.07 4 ¶9-10; 6 ¶12

Phela Jeso, tsa go naganelana o yye a di kopisela ga Jehova. Ba mo romele lefaseng gore a tl’le tšhomayelela “dinku tsa gore di lahlegiye tsa ntlo ya Israyele.” Mara o šupetsiye gore wa kwisisa ka go maka mmereko wo ba mo neyyeng wona. Tšatši le lengwana, mosadi ye mongwana wa gore a yi Leisrayele o yye a ro fawa a re a fodise morwediyage wa gore ke mo a “kenne ke ledimona fote le … mo hlupa ka matla.” Jeso o yye a kwela mosadi yela go baba ke mokane a maka ka mokgo a mo kgopeleng, a fodisa morwediya wage. (Mat. 15:21-28) Lebelela mošupetso wo mongwana ke wowa. Nakwela a sa tšwa go thomisa mmereko wage wa go tšhomayela, Jeso o yitseri: “Ye a makang nkare aa ntšibi . . . , le nna nko maka nkare a ke mo tšibi.” (Mat. 10:33) Mara ayitsano Jeso o makiye nkare aa mo tšibi ga Petro, wa gore o mo phigiye gararo? Dho. Jeso ne a di tšiba gore ne a tisola ga tso a di makiyeng le gore ne go le monna wa go ba le tumelo. Ka nthago ga mo Jeso ba mo tsusiye, o nyarele ga Petro ke mokane a mmotsa gore o mo tshwarele fote o sa na a mo nyaka ka matla. (Luk. 24:33, 34) Re šele re di bonne gore Jehova Modimo le Jeso Kreste baa kwisisa kela baa naganelana. Rune gee? Jehova o nyaka gore le rune re kwisise. w23.07 21 ¶6-7

King sa gore re ka se botsa batho ba bangwana sa gore se maka gore rune re tshepe gore Modimo wa resa mo a re o nyoko leya Pharadeyisi? Sa thoko, ye a re tshepisang ke Jehova ka boyene beng. Puku ya Kutullo yi re: “Ye a duling setulong sa go lawola a re: ‘Ke maka dilo ka mokana ga tsona gore go be tsa nyuwane.’” O hlalefiye, o na le matšhika fote o nabela go maka tsotso a di tshepisiyeng. Sa mabedi, tsa gore Jehova o nyoko di maka tso a di tshepisiyeng go ro ba mong nnete la go šinya yene mong a re di šele di makegiye. O kwagala ka matla mo a re: “Ke nnete fote di ya tshepega. . . . Dilo tsowa di nyoko feta!” Sa kararo ke gore mo Jehova a thomisa selo, o se maka se šinye se fele gabutši, ka mokgonola go hlayang mantsu ya gore: “Ke nna Alfa le Omegha.” (Kut. 21:6) Jehova o nyoko napa a di beya lekgwaying gore Sathane o kotsi ka letsaka fote o nyoko tsoga fase. Byalo, mo motho a re: “Ditori le kwana natso wa tšiba,” o ka mmalela Kutullo 21:5, 6 o boye o mo hlatollele yona. Mo šupetse gore Jehova ke mo a sa tshwara ya go kgana mo a re tshepisa, go ro ba nkare o ro šinya a tšeketa, go ro bonala gore go tlwepiye yene.—Jes. 65:16. w23.11 7 ¶18-19

Taba yowa Jehova o yye a tshepisa Abhrahama wa gore ne a na le 75 ya mengwaga fote a se na ngwana. Ayitsano Abhrahama o di bonne di makega tsotsone ba mo tshepisiyeng? A yi ka mokana ga tsona. Ka nthago ga mo a tshidiye Noka ya Eforate fote a yemme 25 ya mengwaga, Abhrahama o yye a bona mohlolo wa mo morwayi wage Isaka a belegiwa ke mokane ka nthago ga 60 ye nngwana ya mengwaga go yye gwa belegiwa ditlogolwane tsage Esewu le Jakobo. (Maheb. 6:15) Mara Abhrahama a sanka a bona ditlogolwane tsa ditlogolwane tsage go feleletsa go ba setšhaba se segolo le go kena ga Naga yo yi Tshepisiwweng. Le mo go le ka mokgonone, monna yene wa go tshepega o yye a jabolela go ba le senghana sa thina ka matla le ye a mo Makiyeng. (Jak. 2:23) Fote mo Abhrahama a tsusiwa, phela a re kamake gore o nyoko jabola la go sa hlayisegi mo a kwa gore ka taba la tumelo yage le go lefisa pelo, ditšhaba ka mokana ga tsona ho lefaseng di yye dya rufiwa! (Gen. 22:18) Re tšhuta ying? Di ka makega gore re sa bone dilo ka mokana ga tsona tso Jehova a di tshepisiyeng di makega. Mara, mo nkare re lefisa pelo go tshwana le Abhrahama, re ka sa kamake gore Jehova o nyoko re rufa gana byalo fote ka matlamatla ga lefase la nyuwane lo a le tshepisiyeng.—Mar. 10:29, 30. w23.08 24 ¶14

Mo Kgoši Uziya a sa gola, ke mo a tinyanafatsiye. O yye a tšhuta “go tšhaba Modimo wa mannete.” Fote Jehova o mo rufiye gatleletlele ga 68 ya mengwaga yo a yi phidiyeng. (2 Dikor. 26:1-4) Uziya o yye a hlula manaba ya go tlala ya setšhaba fote o yye a di bona gore Jerusalema yi dula yi tšhireletsegiye. (2 Dikor. 26:6-15) A re kamake gore Uziya ne a jabodisa ke dilo ka mokana ga tsona tso Modimo a mo gelepiyeng gore a di make. (Mmo. 3:12, 13) Kgoši Uziya ne a šele a tlwayele go botsa ba bangwana gore ba make ying. Ayitsano tsotsone di makiye gore a tseye gore a ka maka se sengwana le se sengwana so a se nyakang? Wa tšiba, tšatši le lengwana o yye a fo kena ka tempeleng ya Jehova ke mokane a kene a kakudiye magetla a liketsa go tšhuba tsa go nkgela aletareng, mmereko wa gore magoši a maa tshwanela go wo maka. (2 Dikor. 26:16-18) Moprista ye Mogolo ye ba reng ke Azariya o liketsiye go mo wolola, mara Uziya o yye a kwata ka matla. Sa go kwisa go baba ke gore, Uziya a sanka a dula a tshepega fote Jehova o yye a mo teya ka bolwele bya go jega dinama byo ba reng ke lephera. (2 Dikor. 26:19-21) Phela lephelo lage nke le yye la ba kawone ka matla hala a yye a fo dula a tinyanafatsiye! w23.09 10 ¶9-10

Le ka nthago ga mo Petro wa lepostola go le Mokreste wa go tlotsiwa, ke mo a sa kikirisana le tsa go mo phiriketsa. Ka 36 C.E., Petro ke mo a le gona mo Khoneliyase wa gore a yi Lejuda a tlotsiwa ka moya wa go hlawolega, tsotsone ke tsa go šupetsa gore “Modimo aa hlawole motho” fote le ba gore a yi Majuda ba ka ba Makreste ka phutegong. (Meber. 10:34, 44, 45) Ye lune, ka nthago ga gana hone Petro o yye a tikwa a lukulugiye gore a je le ba gore a yi Majuda, phela ke selo sa gore a sanka a se maka lephelong lage. Mara, Makreste ya mangwana ya Majuda ne ma fo kwa nkare Majuda le ba gore a yi Majuda a baa tshwanela go ja ggoši. Mo ba bangwana ba gore ke mo ba tseya dilo ka mokgonone ba segela Anthiyoko, Petro o yye a lisetsa go ja le magagabo ya gore a yi Majuda, a tšhaba gore a ka kwatisa Makreste ya Majuda. Pawulo wa lepostola o yi bonne taba yonone ke mokane a wolola Petro mahlong ga batho. (Magal. 2:13, 14) Le mo Petro a yye a kekemisa, a sanka a lahla tewu. w23.09 22 ¶8

Go tinyakolla wene mong go ka maka gore o wunyulle tse dingwana tsa gore a di ya dudisega gabutši, mara di sa nape di go kata fase ka go kgongwela. “Morena o lukiye” fote o nyoko go gelepa gore o potolle ga nkare go potegiye. (1 Pet. 2:3) Petro wa lepostola o makiye gore re sa kamake taba ya gore: “Modimo . . . o nyoko le tšhutisa ka boyene mong. O nyoko le tiyisa.” Petro le yene o thomisiye ka go kwa nkare a yi yene wa selo gore a ka ba thina le Morwayi wa Modimo. (Luk. 5:8) Mara ka taba la gore Jehova le Jeso ne ba mo thega, Petro o yye a sa lahle tewu ga taba ya go latelela Kreste. Phela Petro ba yye ba mo yamogela gore a “kene Mmušong wa Morena wa rune le ye a re phonisiyeng Jeso Kreste.” (2 Pet. 1:11) Ye lune, phela o ro rufiwa ka mokgo! Mo o ka sa lahle tewu go fo tshwana le Petro o boya o lisetsa Jehova gore a go tšhutise, a go jiki le wene o nyoko rufiwa ka lephelo la go ya go yye. O nyoko maka gore ‘tumelo yago yi go phonise.’—1 Pet. 1:9. w23.09 31 ¶16-17

Tabarenakele ke mo yi na le lapa ka lloši—poleke ya go bulega ya gore ba yi yagelele ka trata ga gore maprista ma maka mmereko wa wona. Aletare ye kgolo ya koporo ya go maka dihlabelo tsa go tšhubiwa ke mo ba yi beyye ka lapeng go na le lepolete la go hlapela matsogo la gore le na le meetši la koporo la gore le berekisa ke maprista gore ma tiyedise ma soko bane ma maka mmereko wa go hlawolega. (Ek. 30:17-20; 40:6-8) Lekgono bobhuti ba Jeso bo ba šeleng ba go tlotsiwa ba gore fote baa tshepega, mo ba soko bane ba bereka ba le naye ku legedimong go le maprista, ba thomisiye ba bereka ho lefaseng ga lapa la gore go kena maprista fela ga tempele ya tso tsa Modimo. Taba ya gore go be le lepolete la go hlapela matsogo la gore le na le meetši ne go le ya go ba gopotsa gore Makreste ka mokana ga wona di nyaka ma dule ma yediye, ma hloka selabi. Byalo, “mogoba wo mogolo” wo nyoko berekela Jehova wo le kakaye? Johane wa lepostola o ba bonne “ba yemme mahlong ga setulo sa go lawola,” fote taba yone yi yemela lapa la ho lefaseng, ga gore ga Modimo “ba mo makela mmereko wa go hlawolega motshegare le bošego tempeleng yage.” (Kut. 7:9, 13-15) Phela re ro hlakela go fo tšiba gore Jehova o re thulele lešuba la gore re mo rapele ga tempele yage ye kgolo ya tso tsa Modimo! w23.10 28 ¶15-16

Mokgwa wo mongwana wo Jehova a re neyang matšhika, ke mo a berekisa bagolo. (Jes. 32:1, 2) Byalo, mo o kwa o šekela, thuletsela bagolo dilo tso di go hlupang. O nape o ro di yamogela ka matsogo ka mabedi mo bagolo ba go gelepa. Jehova a ka go tiyisa a berekisa bona. Dilo tso Bhayibele yi re tshepisang tsa lephelo la go ya go yye—go ka ba go phela lefaseng la gore ke Pharadeyisi kela Mmušong wa magedimong—tsotsone di ka re neya matšhika. (Marom. 4:3, 18, 19) Tshepo yowa, yi re neya matšhika ya gore re thogo tiyisela dintshitshire, re tšhomayele ditaba tsa go bafala fote re make mebereko ya mohlobohlobo ya ka ho phutegong. (1 Mathes. 1:3) Pawulo wa lepostola le yene o yye a tiyisa ke tshepo ya go tshwana le yowa. Ke mo go na le tsa go mo “kgahleletsa,” a ‘sa tšibi gore a make byang,’ ba mo “hlorisa,” fote a “kgongwetsa ke dilo tsa go tlala.” Gabutšibutši, ka dinako tse dingwana lephelo lage ke mo le le kotsing. (2 Makor. 4:8-10) Pawulo o yye a ba le matšhika ka go dula a nagana ka tshepo yo a nang nayo. (2 Makor. 4:16-18) Pawulo ne a lebelele tshepo yage ya ku mahlong ya lephelo la go ya go yye ku legedimong. Pawulo o yye a ghayela ka tshepo yone, ke mokane tsotsone dya maka gore a kraye “matšhika ya nyuwane letšatši le lengwana le le lengwana.” w23.10 15-16 ¶14-17

Mo o rapela, lebelela gore ayitsano ke yona nako ya gore Jehova a go neye so o se kgopelang. Re ka fo kwa nkare re nyaka ba re fetola ka nako yonone ga tso re di rapelelang. Mara gabutši Jehova o tšiba nako ya gore ke mong yona ya gore a re gelepe. (Maheb. 4:16) Mo re bona re sa yakgoswe re kraya so re se kgopeleng, re ka tseya nkare Jehova wa gana go re neya selo sone. Mara o kraya gabutšibutši a fo ba a re ‘O fo tšwa o yemmenyana.’ Mo re beyisa, mogageru ye mongwana o kgopele gore ba mo yalafe bolwele. Mara a sanka a kawonega. Hala Jehova a yye a fo maka mohlolo wa gore a mo yalafe, Sathane ke mo a ka fo re nka ssoši selo so se makiyeng gore mogageru yewa a ye mahlong a berekela Jehova, ke gore o yye a mo yalafa. (Jobo 1:9-11; 2:4) Go tokegela gana hone, Jehova o šele a beyye nako ya gore a tle a yalafe malwele ka mokana ga wona. (Jes. 33:24; Kut. 21:3, 4) Re sa na re yemele nako yone, gana byalo a re ya yemela gore re yalafege ka mohlolo. Byalo, mogageru yewa a ka kgopela Jehova gore a mo neye matšhika fote a make gore a kgibe gore a thogo tiyisela bolwele byage a boye a ye mahlong a berekela yene Modimo ka go tshepega. w23.11 24 ¶13

Samsoni o yye a kekemisa ka matla mara a sanka a lahla tewu. O yye a nyakana le lešuba la gore a thogo maka tso Modimo a di nyakang tsa gore a lwe le Mafilisita. (Bay. 16:28-30) Samsoni o yye a kgopela Jehova a re: “Llisetse ke busetse ga Mafilisita.” Modimo wa mannete o yye a mo fetola ga Samsoni mo a mo llela fote a maka mohlolo wa gore a boyele a be le matšhika fote. Phela Samsoni o yye a phomelela ka matla la go šinya a gagara Mafilisita ya go tlala go phala ku nthago. Le mo Samsoni a yye a gahlana le tsa go sasamela ka matla ka taba la tso a yyeng a di kekemisa mara a sanka a lisetsa go maka tso Jehova a di nyakang. Phela le rune re ka kekemisa go gongwana fote di nyaka gore ba re wolole kela re sa sa maka mmereko wo ne re wo maka, re sa lahle tewu. Re sa lebale gore Jehova le ka tšatši la mohlolo a ka sa hlaye ga rune gore le fo napa le lisetsa ka gore di le šitiye. (Pis. 103:8, 9) Phela le mo re ka ba re kekemisiye go segela kaye, Jehova a ka sa re ngalele ka taba la gore le ga Samsoni a sanka a di maka tsotsone. w23.09 6 ¶15-16

Byalo, mo o tiyisela, Jehova wa go yamogela. Phela tsotsone a di rele gore Jehova o ro hlakela mo wene o gahlana le tsa go go phiriketsa kela mathatha. Mara wa jabola ka taba la gore wene o tiyisela o kene o tshepega. Di re tiyisa ka matla go tšiba gore mo re tiyisela re jabodisa Jehova. Ye lune, mo re ka sa re tsowa ke go rufega, a re sa tšiba! (Pis. 5:12) Phela o sa lebale gore Abhrahama o yye a gahlana le dintshitshire ke mokane mo a tiyisela a kene a tshepega, Jehova o yye a mo yamogela. Jehova ke mo a tseya Abhrahama go le monghanage fote a lukiye. (Gen. 15:6; Marom. 4:13, 22) Le ga rune go ka ba ka mokgonone. Modimo aa fo re yamogela fela ka taba la gore mmereko wo re mmakelang wona wo tlele go segela kaye kela re mmerekela re le kaye. Mara Jehova o re yamogela mo re dula re tshepega le mo re kene re thuthana le dintshitshire. Fote a di yi ka gore re na le mengwaga ka mekaye, re ga seyemo sefeng kela re kgona go maka ying, mara ka mokana ga rune re ka di kgona go tiyisela. Ayitsano gana byalo go na le ntshitshire ya gore o yi tiyisele o kene o tshepega? Mo nkare go ka mokgonone, barena o ka kgomoletsa ke go tšiba gore Modimo wa go yamogela. Mo re di bona tsa gore Modimo wa re yamogela, tshepo ya rune ga dilo tso a nyoko re rufang ka tsona yi napa yi tiyelela. w23.12 11 ¶13-14

Monna wa gore ke Mokreste di nyaka a tšhute go bolabola gabutši. Tsotsone di rela gore di nyaka a theetsele a boye a kwisise ka mokgo ba bangwana ba naganang le ka mokgo ba tikwang. (Diy. 20:5) A ka kgona go kwa ka mokgo motho ye mongwana a bolabolang, a mmona le ho sefahlegong le ka mokgo a minikanang ka gona. Mara tsotsone o ka sa di tšhuti mo nkare a o fetse nako o na le batho ba bangwana. Mo nkare o dula o berekisa dithulusi tsa elekthroniki gore o bolabole le ba bangwana, tsa go tshwana le imeyili kela go romela melayetsa ka fowunu, tsotsone di ka maka gore di go thathafele gore o bolabodisane le ba bangwana mo le lebeletsanne ka difahlego. Byalo, liketsa go kraya mekgwa yo o ka bolabodisanang le ba bangwana le lebeletsanne ka difahlego. (2 Joh. 12) Monna wa gore ke Mokreste wa gore o butšwiye o tshwanele a tiyemayemele a boye a pasope le mutši wage. (1 Thim. 5:8) Di gabutši ka matla go tšhuta go maka mmereko wa gore wo nyoko go gelepa gore o thogo kraya sekoropo. (Meber. 18:2, 3; 20:34; Maef. 4:28) Bereka ka matla fote o dule o fetsa mmereko wo o wo thommeng ke mokane ba bangwana ba ko yi boneng taba yone fote ba nyoko tseyela mmereko wago gedimo ka matla. Mo o ka maka ka mokgonone, o nyoko kraya mmereko fote wa dula o le nawo. w23.12 27 ¶12-13

Bhayibele mo yi bolabola ka “letšatši la Jehova,” yi rela ka nako ya mo Jehova a fetsa ka manaba yage ke mokane a phonisa batho bage. Ku botala, Jehova ne a fela a yahlula ditšhaba tse dingwana. (Jes. 13:1, 6; Hezek. 13:5; Zef. 1:8) Ka dinako tso tsa rune, “letšatši la Jehova” le thomisa mo bo ba go yeta mahlong ba dipolotiki ba fetsa ka Bhabhilona ye Mogolo ke mokane la totometsa ka ntwa ya Aremaghedoni. Gore re thogo phona “letšatši” lone, di nyaka re tilukiselele go sa le gana byalo. Jeso o tšhutisiye gore a di nyake re fo tilukiselela “motšhatšhamelo wo mogolo” fela, mara di nyaka re ‘dule re ntshiye maahlo dikwakweng.’ (Mat. 24:21; Luk. 12:40) Pawulo wa lepostola mo a ngwalela Mathesalonika lengwalo la mathomo a tšhofa ke moya wa go hlawolega, o yye a berekisa mešupetso ya go tlalanyana gore a thogo gelepa Makreste gore ma dule ma ramele letšatši la Jehova le legolo la go yahlula. Pawulo ke mo a di tšiba gore letšatši lone le ka sa segele ka nako yonone. (2 Mathes. 2:1-3) Le mo go le ka mokgonone, o hlohletsele magagabo gore ma tilukiselele letšatši lone tsa nkare le segela ka motshwana wa gona, fote le rune re ka ma berekisa mayele yage. w23.06 8 ¶1-2

Ka bo 1978 go yye gwa yagiwa moyago wa go lefa ka matla ku Tokyo, Japan. Batho ke mo ba tiputsisa gore ayitsano moyago wone wo ka sa khwešogane ka taba la gore hone toropong ke mo go dula go tekateka lefase. Ba yye ba maka byang mara? Bo ba go tšhutela tsa go yaga ba yye ba maka moyago wone gore wo tiyelele mara ka ho nthoko ba maka gore wo thogo wobega-wobega gore le mo go ka thomisa go roromela ka taba la go tekateka ga lefase go ka sa ro makega selo. Makreste le wona ma tshwana le moyago wone. Ka mokgo mang? Mokreste ye mongwana le ye mongwana di nyaka a likanisele ga taba ya go yema a sa thogathoge le ga taba ya go wobega-wobega. Di nyaka a tiyelele fote a sa tekateki mo di tla ga taba ya go tikemisela go dula a theetsela melawo ya Jehova. A “tikemisele go theetsela” fote a sa jikajiki. Se sengwana ke gore di nyaka a “naganelana” kela a temateme mo seyemo se dumela kela le mo go hlokega. (Jak. 3:17) Mokreste wa gore o yi kwisisa gabutši taba ya go likanisela a ka sa nape a tiyisa letsogo ga se sengwana le se sengwana kela a loke tsela tsa go napa a ro fetelela. w23.07 14 ¶1-2

Jeso ke mo di nyaka a yeme a tiyye mo Sathane Diyabolo a liketsa go mo fokola, ka gore yenewa le yene ke mo a sa tšebe le go tšeba mo a hlaya gore Jeso a lahle Modimo. (Mat. 4:1-11) Sathane ke mo a tiputsiye gore o nyoko mo sinyisa ga Jeso gore a šašise taba yo ya go lepolla kela go tlemolla batho. Mo Jeso a kene a bereka ho lefaseng, o yye a tiyisela le ga tse dingwana tsa go mo liketsa. Ke mo ba mo phigisa ba boya ba ro mo tshepisa likgu. (Luk. 4:28, 29; 13:31) Ke mo di nyaka gore a tiyisele malata yage ya gore ke mo ma fela ma kekemisa ka taba la go sa yenela. (Mar. 9:33, 34) Mo ba mo sekisa nakwela ba nyaka go mmolaya, ba yye ba mo hlupegisa ba boya ba ro mo poyilanya. Ba yye ba šinya ba mmolaya tse dingwana tsa lešidi le tsa go tšebisa. (Maheb. 12:1-3) Tsa mafelelo tsa go mo liketsa ke mo di nyaka a di tiyisele a ntoši, a sa pasopa ke Jehova. (Mat. 27:46) Di fo ba lekgwaying gore Jeso o kwile go baba ka matla gore a thogo re lepolla. Ayitsano a re kwi re mo nyaka ka matla ga Jeso mo re nagana ka mokgo a yyeng a tikemisela go tikona tsa go tlala ka taba la rune? w24.01 10-11 ¶7-9

Mo re lefisa pelo di re gelepa gore re berekisane le ba bangwana gabutši. Di re gelepa gore re theetsele mo ba bangwana ba bolabola. (Jak. 1:19) Fote go lefisa pelo go maka gore go dule go bebiye. Mo re lefisa pelo, re ka sa gate mapotlela ra boya ra fo phahluga mo re bolabola ka taba la gore di re kgahleletsiye. Fote mo re lefisa pelo re ka sa yakgoswele go kwata mo ye mongwana a re kwisa go baba. Mara re ko fo ya ‘mahlong re lefiselana pelo fote re tshwarelana re sa kokole.’ (Makol. 3:12, 13) Phela mo re lefisa pelo, tsotsone di ka re gelepa gore re segelele dipheto tsa gabutši. A re fo tabogelanya dilo kela go maka re sa thomisa ka go nagana, mara re fetsa nako ya rune re nyakolla re boya re pombhola gabutši tso re di kgetiyeng. Mo re beyisa, mo re nyaka mmereko, o ka kraya mmereko wa mathomo wo ba re neyang wona re fo wo yamogela. Mara, mo nkare nnete re lefisa pelo, re nyoko lebelela gore mmereko wone wo nyoko yama ba ka ho mutšing le senghana sa rune le Jehova ka mokgo mang. Mo re ka lefisa pelo, a go jiki re ka sa pumutsi ga taba ya go segelela sepheto. w23.08 22 ¶8-9

Mo nkare o kgongwetsa ke taba ya gore di nyaka o lwe le go nabela dilo tsa go kekema. Go fo nagana ka tso o di tshepisiyeng Jehova nakwela o tineyela gage di nyoko go neya matšhika gore o thogo lwa le dilo tsone. Byang mara? Mo o tineyela ga Jehova, a o sa tiphilela. Tsowa di rela gore o nyoko gana go maka tso di nabelang ke wene mong le tso o nyakang go di segelela tsa gore ga Jehova di ka sa mo jabodisi. (Mat. 16:24) Byalo, mo o tlela ke tsa go go phika, o ka sa fetse nako o kene o sa nagana gore di nyaka o maka ying. O nyoko ba o šele o segelele sepheto sa gore o nyoko maka ying, o nyoko ba o di tšiba gore o nyaka go tshepega ga Jehova. O nyoko dula o tikemisele gore o jabodise Jehova. Ka mokgonone o nyoko ba o tshwana le Jobo. O gahlanne le dintshitshire tsa go baba ka matla, mara o hlayye a sa kamake gore: “Ke nyoko dula ke tshepega!”—Jobo 27:5. w24.03 9 ¶6-7

Jehova, “Modimo wa go re nyaka ka matla,” o na le rune! (2 Makor. 13:11) Ye mongwana le ye mongwana wa rune o mo jabodisa ka matla. A re kamake gore o re “dukulugiye go šupetsa gore aa tšhentšhi mo a re wa [re] nyaka.” (Pis. 32:10) Mo re fo ya mahlong re ghayela ka taba yo ya gore o re šupetsiye gore wa re nyaka, re nyoko napa re mo tseya go le mong wa mannete, ra napa re šutela thina naye. Re ka sa tšhabe go hlaya gore a re šupetse a sa fetsi barena gore o re nyaka ka matla. Re ka mmotsa mešekelo ya rune ka mokana ga yona, re sa kamake gore wa re kwisisa fote o di yemele ka maahlo ya makhubedu go re gelepa. (Pis. 145:18, 19) Mo go bata, re kwa re nyaka go ba thina le mollo; mo re mmona ga Jehova gore o re nyaka ka matla, re kwa re nabela go ba thina naye. Taba yo ya gore Jehova o re nyaka tsa mannete yi na le matšhika ka matla, mara fote ya bešabeša. Byalo ho lephelong lago, yamogela ka matsogo ka mabedi gore Jehova o go nyaka tsa nkare ke moka. Fote nkare ka mokana ga rune re ka šupetsa gore le rune re mo nyaka ka matla, re hlaye gore: “Nnete ga Jehova ke mo nyaka re sa timakisi”!—Pis. 116:1. w24.01 31 ¶19-20

Jeso ke mo a sa kgere ga taba ya go fo botsa batho gore lebitso la Modimo ke Jehova. Majuda ya Jeso a ma tšhutisiyeng ke mo ma na ma le tšiba lebitso la Modimo. Mara Jeso ke yene ‘ye a hlatolliyeng Modimo.’ (Joh. 1:17, 18) Mo re beyisa, Mangwalo ya Seheberu ma re thuletsela gore Jehova o kwelana go baba fote aa na lešidi. (Ek. 34:5-7) Jeso o napiye a yedisa nnete yone mo a bolabola ka mošupetso wa papa le morwayi wa go fo tiwomisa hlogo. Mo re bala ka papa yewa nakwela a bona morwayi wage wa gore wa tisola “a sa le ku kgole,” a taboga a ye mo gahlanetseng, a mo tlaparela ke mokane a mo tshwarela ka pelo ka moka, re napa re ro di bona gabutši tsa gore Jehova o kwelana go baba go segela kaye. (Luk. 15:11-32) Jeso o napiye a šupetsa gabutši gore Papage o byang. w24.02 10 ¶8-9

Le bo ba gore di ba kgahleletsiye, Jehova wa ba timula fote wa ba kgomoletsa. Re ka mo yekisela byang ga Jehova ga taba ya go kwelana go baba le go kgomoletsa ba bangwana? Se sengwana so re ka ga se maka ke go tšhuta gore ka ho dipelong re be le mekgwa ya go yelana le go kgomoletsana. Ke yifeng mekgwa ya gona? Re ka gelepa king gore re dule re nyakanana gore re thogo ‘ya mahlong re kgomoletsana’ ka moka matšatši? (1 Mathes. 4:18) Di nyaka re tšhute go ba le mekgwa ya go jabodisa ya go tshwana le go kwelana, go šupetsa magageru gore re kwana nabo ka matla le go makelana tsa gabutši. (Makol. 3:12; 1 Pet. 3:8) Di nyoko re gelepa ka ying tsotsone? Mo taba yo ya go kwelana le mekgwa ya go yelana nayo yi thomisa go mila ho ga rune, re nyoko fo kwa di re tšhofa go kgomoletsa ba gore ba bona nkare tsa lephelo a di gahlane. Jeso o hlayye gore “molomo wo bolabola tso di tšwang ka pelong. Motho wa go loka o sabalatsa dilo tsa gabutši, a di ntsha ga dilo tsa gabutši tso a nang natso.” (Mat. 12:34, 35) Nnete ke gore go kgomoletsa magageru ya ma hlokang go kgomoletsiwa ke mokgwa wa gabutši wa go ba šupetsa gore re ba nyaka ka matla. w23.11 10 ¶10-11

Mo re nyaka go kwisisa seporofeto sa Bhayibele di sa re tšebisi go kgopela gore ba re gelepe. Lebelela mošupetso ke wowa. O fo nagana o vakašela poleke ya gore a o yi tšibi mara monghanago ye o sepelang naye o yi tšiba gabutši poleke yone. O go tšiba gabutši mo o leng gona le gore pata ye nngwana le ye nngwana yi sobelela le lefeng. Wa tšiba, a re kamake gore taba ya gore monghanago o dumele go sepela nago yi nyoko go jabodisa ka matla! Phela Jehova o fo tshwana le monghana yenene wa gore wa gelepana, o tšiba tsa gabutši tso di re yemeleng ku mahlong. Byalo, gore re thogo kwisisa seporofeto sa Bhayibele di nyaka re tinyanafatse re kgopele Jehova gore a re gelepe. (Dan. 2:28; 2 Pet. 1:19, 20) Go fo tshwana le mmelegi ye mongwana le ye mongwana wa gabutši, Jehova o nyaka bana bage ba jabolele tsa ku mahlong. (Jer. 29:11) Mara Jehova o fapana kgole le babelegi ka taba la gore o re botsa tsa ku mahlong fote aa pumutsi. O makiye gore diporofeto di ngwadiwe ka Lentsung lage gore re thogo tšiba tsa ku mahlong di soko makega.—Jes. 46:10. w23.08 8 ¶3-4