Ditodi Tsa Sepukwane sa Mogahlano wa Maphelelo le Matšhomayelelo
© 2024 Watch Tower Bible and Tract Society of Pennsylvania
MAY 6-12
MAKOLWANE KA TENG GA LENTSU LA MODIMO | PISALEMA 36-37
“O sa Kgongwetse ke Batho ba Dipelo Tse Diphifadu”
w17.04-SE 10 ¶4
Go Nyoko Tloga Ying mo Mmušo wa Modimo wo Segela?
4 Batho ba dipelo tse diphifadu ba re yama byang gana byalo? Ka nthago ga gore Pawulo wa lepostola a hlaye gore dinako tsowa go nyoko ba “dinako tsa go baba ka matla tso go thathafang go lebana natso,” o yye a hlaya le gore: “Mara batho ba go maka tsa go befa le ba go timakisa ba nyoko fo ya mahlong ba maka tsa go befa fote ba ro napa ba topela.” (2 Thim. 3:1-5, 13) Ayitsano o šele o bonne seporofeto sowa se makega? Ba bangwana ba rune re yye ra tshwariwa lešidi ke batho ba dipelo tsa go befa, ba go tshwana le batho ba go hlupegisa ba bangwana, batho ba go hlawolana ka taba la setšo le dikgohlane. Ba bangwana a ba yi wutametse taba ya gore ba na le dipelo tse diphifadu, ba bangwana ba timaka nkare ba lukiye, ba wutetsa so ba leng sona. Le mo nkare rune a di so re makegele, dilo tso batho bo ba dipelo tse diphifadu ba di makang di ya re yama. Re kwa go baba ka matla mo re kwa ka tso ba di makang. Ka mokgo batho bone ba hlaselang bana, bo ba gore ba tsofele, le ba gore a ba kgone go tiyemelela dya re tshosa. Bo ba dipelo tse diphifadu a ba titshwara nkare ke batho, ba titshwere nkare ke diphoolwane kela madimona. (Jak. 3:15) Sa go jabodisa ke gore, Lentsu la Jehova le re tshwarele ditaba tsa go bafala.
Jehova o Rufa ba Gore Baa Tshwarelana
10 Tsa go tshwarana ka pelo di nyoko re kwaletsisa. Phela Jehova o nyaka gore re kganele kgole le taba ya go tshwara ba bangwana ka pelo gore re thogo yimuluga. (Bala Maefeso 4:31, 32.) O re hlohletsela gore “re sa kwate ka matla fote re sa fufulele.” (Pis. 37:8) Phela mo re maka tsotsowa re ko ba re šupetsa gore re hlalefiye. Mo re tshwara ba bangwana ka pelo di nyoko maka gore re šigame fote re sa bo pate. (Diy. 14:30) Di nyaka re di tšibe tsa gore mo re tshwara ba bangwana ka dipelo a di kwaletse bona, go fo tshwana le mo re nwa tšhefu a yi kwaletse motho ye mongwana yi kwaletsa rune beng. Mara, mo re tshwarela ba bangwana tsotsone di rela gore re tikhutsisa tsa go tlala. (Diy. 11:17) Re nyoko dula re bebiye, re sa šekedisi ke selo fote re nyoko ya mahlong re kene re berekela Jehova.
w03-SE 12/1 13 ¶20
‘Jabodisa ke Jehova’
20 Ke mokane, “ba go loka go nyoko ko ba beng ba lefase.” (Pisalema 37:11a) Mara ke bo mang “bo ba go loka”? Lentsu lowa go “loka” le tšwa ga mantsu ya go rela “go kwa go baba, go tinyanafatsa, go tšebisiwa.” Eya, “bo ba go loka” ba yemela Jehova ba lefisiye pelo gore a lukise dilo ka moka tsa gore di ba kwisiye go baba. “Ba nyoko jabola ka taba la gore go ko ba go bebiye ka matla.” (Pisalema 37:11b) Le gana byalo re kraya go beba ga go sa hlayisegi ga pharadeyisi ya go tshwanisela yo yi leng ga phutego ya Sekreste ya mannete.
Tso di Wutammeng ka Bhayibeleng
it-2-E 445
Thaba
Yi tsikiye, yi nyoko dula yi le gona fote ke ye kgolo. Dithaba ke dilo tsa go tsika tsa gore di nyoko dula di le gona. (Jes 54:10; Hab 3:6; tshwanisa le Pis 46:2.) Byalo mo mopisalema a bolabola ka go loka ga Jehova o go tshwanisa le “dithaba tsa Modimo” (Pis 36:6) fote gwa kgonega gore ne a rela gore go loka ga Jehova a go tšhentšhe. Kela ka taba la gore dithaba ke tse di kgolo, ne a ka fo ba a rela gore go loka ga Jehova go go phala kgole go loka ga batho. (Tshwanisa le Jes 55:8, 9.) Mo go bolabodiwa ka mo ba tshollwa sitša sa bošupa sa go kwata ga Modimo, Kutullo 16:20 yi hlaya gore: “Dithaba dya nyamalala.” Tsowa di šupetsa gore le mong dilo tse dikgolo go tshwana le dithaba di ka sa tšhabele go kwata ga Modimo.—Tshwanisa le Jer 4:23-26.
MAY 13-19
MAKOLWANE KA TENG GA LENTSU LA MODIMO | PISALEMA 38-39
O sa fo Dulela go Tikwa Molato ga Tso o Yyeng wa Kekemisa ga Tsona
Nagana ka Tsa ku Mahlong
12 Bala 1 Johane 3:19, 20. Taba ya go kokona ke lekwalo a yi makatse. Mo re beyisa, ba bangwana ba kikita ke lekwalo ka taba la tso ba yye ba di maka mo ba soko bane ba tšhuta nnete. Ba bangwana le ba kokona ka taba la tsa go kekema tso ba yye ba di maka ka nthago ga mo ba šele ba kolobetsiwwe. A di makatse go tikwa ka mokgonone. (Mrm. 3:23) Nnete ke gore, re ya di nyaka go maka tsa gabutši. Mara “ka mokana ga rune re phiriketsega ga go tlala.” (Jak. 3:2; Mrm. 7:21-23) Le mo di sa natefe go kokona ke lekwalo, mara ka dinako tse dingwana go ka re gelepa. Ke ntaba? Ka taba la gore go kokona ke lekwalo go ka re gelepa gore re ghobolle mo go ghobegiyeng ke mokane re tikemisele go sa sa di boyelela.—Maheb. 12:12, 13.
13 Dya makega gore re dulele go kokona ke lekwalo—le mo re šele re tisodiye ka tso re di makiyeng fote Jehova a šupetsiye gore o re tshwarele. Go kokona ke lekwalo ga mošaga wonone go ka re kwaletsa. (Pis. 31:10; 38:3, 4) Byang mara? Lebelela mošupetso wa mogageru ye mongwana wa mosadi wa gore o yye a kikita ke lekwalo ka taba la tso a di makiyeng ku botala. O yitseri: “Ke sa tihlupela ying ka go berekela Jehova ka taba la gore le mong go phona nka sa go bone.” Di ka makega gore ba go tlala ba rune re yye ra tikwa ka mokgonone. Di gabutši ka matla gore re kganele kgole le molabo wone wa go dulela go kokona ke lekwalo. O fo nagana nje gore Sathane o nyoko hlakela go segela kaye mo re lahla tewu—le mo Jehova a kene a re tshwarele!—Tshwanisa le 2 Makorente 2:5-7, 11.
w02-SE 11/15 20 ¶1-2
Re ka Phela ka Mokgo Mang Gore re Jabodise Jehova?
MATŠATŠI ya re phelang wona ke ya manyana fote ma yakgoswa ma fela. Mopisalema Dafita o yye a ghayela ka taba ya gore lephelo ke le le kopana fote di yye dya mo tšhofa gore a rapele a re “Barena Jehova, mmake gore ke tšibe mo ke nyoko felelang gona, fote o balele matšatši yaka—gore nka ma kaye, gore ke tšibe gore ke ya ma kopana go segela kaye. Bona! O makiye gore matšatši yaka go be ya manyana fote matšatši ya lephelo laka a yi selo mahlong gago.” Tso Dafita ne a hlupegiye ka matla ka tsona ne go le go phela ka mokgwa wa go jabodisa Modimo, ka tso a di bolabolang le ka tso a di makang. Mo a bolabola ka gore o tshepele ga Modimo, o yitseri: “Ke tshepele gago fela.” (Pisalema 39:4, 5, 7) Jehova o theetsele. Ka nnete o yye a balela tso Dafita a di makiyeng fote a mo rufa gabutši.
Di lula go tikraya o tshwaraganne ka moka matšatši fote wa tikraya o yye le lephelo lowa la gore la taboga fote le tlele ka mmereko. Tsotsone di ka maka gore re šekele, ka matlamatla mo di tlele tso go nyakang gore re di make ka nako ye nyana. Ayitsano le rune re hlupegiye ka matla ka taba ya go phela ka mokgwa wa gore Jehova a re yamogele go tshwana le Dafita? Re sa kamake gore Jehova o re lebelele fote o pombhola ye mongwana le ye mongwana. Ga 3 600 ya mengwaga ya go feta, Jobo monna wa go tšhaba Modimo, o di bonne tsa gore Jehova ne a lebelele ditsela tsage fote ne a balela tso ne a di maka. Jobo o yye a butsisa gore: “Nko mo fetola ke re king, mo a re ke hlatolle?” (Job 31:4-6, 14) Dya kgonega gore re phele ka mokgwa wa go jabodisa Modimo ka go yetisa tso tsage mahlong, go theetsela melawo yage fote re boya re berekisa nako ya rune gabutši. Taba yowa di nyaka re yi tseyele gedimo.
Tsosa Senghana Sago le Jehova
O sa lisetse go bolabola le Jehova. Papago wa ku legedimong wa di tšiba gore mo o dula o kokona ke tsa go kekema tso o yyeng wa di maka, di ka sa be lula gore o mo rapele. (Marom. 8:26) Le mo go le ka mokgonone, o “sa lisetse go rapela,” o botsa Jehova ka mokgo o di nyakang ka matla go nghanelana naye. (Marom. 12:12) Andrej mo a nagana ka taba yowa o re: “Ke mo ke dulela go kikita ke lekwalo ke boya ke ro tšeba. Mara nakwenngwana le ye nngwana mo ke fetsa go rapela, ke šala ke tikwa bokawone ka matla. Ke kwa ke bebiye.” Mo o sa tšibi gore o ka re king mo o rapela, lebelela tso Kgoši Dafita wa gore o sokologiye a di hlayyeng mo a rapela ga Pisalema 51 le 65.
Tso di Wutammeng ka Bhayibeleng
Tshepega
16 Go titshwara ke selo se segolo mo nkare re nyaka ba bangwana ba re tshepe. Mokgwa wowa wo re gelepa gore re dule re pasopiye maleme ya rune mo re kwa di re hlohlona re nyaka go ntsha taba ya gore a di nyake ba bangwana ba yi tšiba. (Bala Diyema 10:19.) O ka kraya re liketsega ga taba ya go titshwara mo re bolabola le ba bangwana ga tsa inthanete. Mo re sa pasope re nyoko ntsha ditaba tsa gore a di nyake ba bangwana ba di tšiba re di botsa batho ba go tlala. Mo taba yone yi šele yi sabalele ga tso tsa elekthroniki re ka sa sa ba le matšhika ya go yi thibelela ga taba ya gore batho ba nyoko yi berekisa byang kela yi nyoko sinya go segela kaye. Go titshwara fote go nyoko re gelepa gore re kgomolele re re tsee mo bo ba go phigisa ba re liketsa gore re hlaye dilo tsa gore di nyoko bolayisa magageru. Taba yowa yi ka makega mo maphodisa ma re hlorisa gore re ntshe ditaba ga dinaga tsa gore mmereko wa rune ba wo rakele. Ga seyemo sowa re ka berekisa tšhiko ya gore “re ko kgomolela re re tsee.” (Pis. 39:1) Ka moka nako di nyaka re tshepega mo re berekisana le ba mutši, mašaga ya rune, banghana, magageru le batho ba bangwana. Fote gore re tshepege di nyaka re titshwara.
MAY 20-26
MAKOLWANE KA TENG GA LENTSU LA MODIMO | PISALEMA 40-41
Ke Ntaba di Nyaka o Gelepe ba Bangwana?
Ba go sa Konane ba Jabola ka Matla
16 Batho ba go sa konane tsa mannete ho ba neya motho selo, a ba makele gore motho yene ka motshwana a neye bona. Jeso mo a šinya a tšhutisa ka taba yowa ke mo a bolabola taba ke yowa: “Mo o maka phathi, mema ba go hlopega, digole, ba go popela mahlo; ke mokane o nyoko jabola, ka taba la gore sa go go patela ka sona a ba naso.” (Luka 14:13, 14) Motho ye mongwana wa go ngwala puku ya Baebele o yitseri: “Motho wa go sa konane o nyoko rufiwa.” Ye mongwana o yitseri: “Go jabola ye a šupetsang ba bangwana gore o ba tseyela gedimo.” (Diy. 22:9; Pis. 41:1) Nnete di nyaka re neye batho ba bangwana ka taba la gore sosone se maka gore re jabole.
17 Nakwela Pawulo a bolabolela mantsu ya Jeso ya gore ‘go jabola ye a neyang go feta ye a yageletsang,’ ke mo a sa bolabole ka go neyana dilo tso re nang natso fela, ke mo a rela le go kgotatsana, go yetetsana le go gelepa bo ba nyakang go gelepiwa. (Meber. 20:31-35) Pawulo o tšhutisiye a boya a šupetsa gore ba bangwana re ka ba neya ying—nako ya rune, matšhika ya rune, go ba theetsela le go ba nyaka ka matla.
18 Bowa ba go fatisisa ditaba tsa maphelelo ya batho ba krayye gore go neyana go maka gore batho ba jabole. Hlogotaba ye nngwana yi re, “batho ba jabola ka matla ho ba fetsa go makela ba bangwana dilo tsa gabutši.” Bowa ba go fatisisa ba re go gelepa batho ba bangwana go maka gore “motho a nape a tikwa gore wa phela le gore o phelela ying” ka taba la gore “go maka gore motho a kwe a yenele ga tso a di nyakang.” Fote bo ba go tšiba tsa lephelo ba re di nyaka batho ba fele ba maka mebereko ya go berekela setšhaba gore ba thogo jabola le go phelega. Sosone a yi sa go makatsa ga batho bo ba tseyang Baebele go le Lentsu la Modimo wa go nyaka batho, Jehova.—2 Thim. 3:16, 17.
w15-SE 12/15 24 ¶7
Jehova o Nyoko go Pasopa
7 Mara, mo nkare re ya lwala, re ka kgopela gore Modimo a re kgomoletse, a re hlalefise, le go re pasopa, go tshwana le ka mokgo malata ya go tshepega ma makiyeng ka gona ku botala. Kgoši Dafita o ngwadiye gore: “Go jabola ye a kwelang bo ba go tinyanafatsa, Jehova o nyoko mo phonisa ka letšatši la go sasamela. Jehova o nyoko mo pasopa a boya a mo tšhireletsa gore a phele.” (Pis. 41:1, 2) Re ya di tšiba tsa gore motho wa gore ne a phela ka dinako tsa Dafita wa gore ne a šupetsa gore o kwela bo ba go tinyanafatsa aa phela go ya go yye. Byalo Dafita ne a sa rele gore Modimo o nyoko maka gore motho yene wa go kwelana go baba a phele go ya go yye ka mohlolo, a napa kraya lephelo la go ya go yye. Re tseya gore mantsu yane ya gore ba ma hlohletsele ne ma rela gore Modimo o nyoko gelepa bo ba go tshepega ba boya ba kwelana go baba. Ka mokgo mang? Dafita o hlatolliye gore: “Jehova o nyoko mpasopa ke le mpetong ke lwala; mo a kene a lwala o nyoko lukisa mpeto wage.” (Pis. 41:3) Eya, motho wa gore o yye a kwela bo ba go tinyanafatsa a sa di kamake gore Modimo wa mmona le go bona tso a di makang tsa go šupa gore wa tshepega. Fote Modimo o makiye gore mmele wo kgone go tifodisa, a be kawone ga bolwele byage.
w17.09-SE 12 ¶17
Jehova o Kwelana go Baba—Mo Yekisele
17 A di nyake o tšhuta go kwelana go baba ka taba la gore o nyaka gore di berekele wene. Taba ye kgolo yo di nyakang yi re tšhofa gore re kwelane go baba ke gore re nyaka go yekisela le go gadimisa Jehova, Modimo wa go nyakanana le go kwelana. (Diy. 14:31) Ke yene a re beyeleng mošupetso wa gabutši ka matla. Ka mokana ga rune di nyaka re mo yekisele—re šupetse magageru gore ra ma nyaka le go tshwara bayagelani ba rune gabutši re kene re šupetsa go kwelana go baba.—Gal. 6:10; 1 Joh. 4:16.
Tso di Wutammeng ka Bhayibeleng
it-2-E 16
Jehova
Ditaba tsa ka Bhayibeleng di tlalele ka matla ga taba ya bogoši bya Jehova, fote taba yone yi napa yi šupetsa so Modimo a nyakang go se segelela: go maka gore lebitso lage le hlawolege. Go maka gore lebitso lage le hlawolege di rela go yedisa lebitso lage. Mara gore tsotsone di thogo makega, go nyakega gore lebitso lone le hlompiwe ke batho ka moka le mangeloyi ka moka legedimong le lefaseng. Tsone di rela gore ba nyoko tšiba le go hlompa taba ya gore Jehova ke yene a lawolang, ba nyoko maka tsotsone ba sa tšhofe ke motho, ba nyake go mmerekela, le go jabodisa ke go maka so yene a se nyakang, ba tšhofa ke taba ya gore ba mo nyaka ka matla. Thapelo ya Dafita mo a rapela ga Jehova yo yi leng Pisalema 40:5-10 yi šupetsa ka mokgo ne a tikwa ka gona le taba ya gore ne a nyaka gore lebitso la modimo le hlawolege. (Bona ka mokgo lepostola le berekisiyeng dikopa tsa pisalema yone ga Jeso Kreste ga Heb 10:5-10.)
MAY 27–JUNE 2
MAKOLWANE KA TENG GA LENTSU LA MODIMO | PISALEMA 42-44
Berekisa Tso Jehova a re Tšhutisang Tsona
w06-SE 6/1 9 ¶4
Monopo wa Puku ya Bobedi ya Dipisalema
42:4, 5, 11; 43:3-5. Mo go ka tšhoga go makegiye tse dingwana tsa gore le rune a re kgone go di thibela, ra tikraya re sa sa kgona go tla megahlanong ya Sekreste, go nagana ka dinako tsa go jabodisa mo re na le magageru ku nthago di ka maka gore re tiyelele. Mathomisong re ka fo tikwa re le ntoši, mara tsotsone di nyoko re gopotsa gore ke Modimo ye re tšhabelang gage fote re yemela yene gore a re phonise.
w12-SE 1/15 15 ¶2
Maka Gore Nako ya go Tšhuta Bhayibele yi Jabodise Fote yi go Berekele
1 RAPELA: Sa mathomo so o ka se makang ke go rapela. (Pis. 42:8) Ke ntaba? Di nyaka re tseya taba ya go tšhuta Lentsu la Modimo yi wela ga morapelo wa rune. Byalo di nyaka re kgopele Jehova gore a make menagano ya rune yi kwisise le gore a re neye moya wage wa go hlawolega. (Luka 11:13) Barbara wa gore ke botala go le morumiwa o re: “Ke dula ke thomisa ka go rapela mo ke soko tšhuta kela go bala Bhayibele. Ka nthago ka tikwa gore Jehova o na le nna fote o jabodisa ke tso ke di makang.” Mo o rapela o soko thomisa go bala di maka gore monagano wago le pelo yago di kgone go yamogela tso o bang o di tšhuta.
w16.09-SE 5 ¶11-12
“O sa Khutsise Matsogo Yago”
11 Tse dingwana tso di re tiyisang ke tso re di tšhutang tsa go tšwa ga Modimo mo re le megahlanong ya Sekreste, megahlanong ye megolonyana, megahlanong ye mogolo le ga dikolo tsa rune tsa mmušo. Mo re ba gona ga megahlano yone, tsotsone di nyoko re gelepa gore go be le tso di re hlohletselang gore re tipeyele tso re nyakang go di segelela ga tso tsa Modimo, le gore re kgone go maka mebereko ya rune ka phutegong. (Pis. 119:32) Ayitsano o karakara ka matla gore o berekele ke tso o di tšhutang megahlanong?
12 Jehova o gelepiye Maisrayele gore ma hlule Maamaleke le Maetopiya, a boya a neya Nehemiya le bo a berekang nabo matšhika ya gore ba fetse mmereko wa go yaga. Le rune Modimo o nyoko re neya matšhika ya gore re yeme re sa thogathoge mo re phigisiwa, le mo re tapega matšhika kela re šekela, gore re thogo ya mahlong ka mmereko wa go tšhomayela. (1 Pet. 5:10) A re ya yemela gore Jehova a re makele mehlolo. Mara rune re nyoko karakara gore re make se sengwana. Gana mone go kena go bala Lentsu la Modimo ka moka matšatši, go lukiselela megahlano re boya re ba gona megahlanong ka moka matšatši, go tiyisa dipelo tsa rune le menagano ya rune ka go titšhutisa Bhayibele re le ntoši le ka morapelo wa mutši, le go dula re tithegiye ka Jehova ka thapelo. Tla re sa tsoge re lisetsiye dilo tse dingwana di re šitisa gore re tšhutise ke Jehova, a re tiyise le go re kgomoletsa. Mo o bona nkare dilo tse dingwana mowa a wo sa di maka, kgopela Modimo gore a go gelepe. Ke mokane o ko bona ka mokgo moya wage wo makang gore o be le ‘matšato fote wo maka gore o nabele go maka mmereko, wa boya wa go neya le matšhika ya go wo maka.’ (Mafil. 2:13) Byalo, o ka maka ying gore o tiyise matsogo ya ba bangwana?
Tso di Wutammeng ka Bhayibeleng
it-1-E 1242
Jakalase
Ka ho Mangwalong, mo ba bolabola ka jakalase ba bolabola ka tsela ya go tshwanisela. Jobo, mo a hlatolla seyemo sage sa go kwisa go baba ka matla, o hlaya gore ke yene “bhuti wa dijakalase.” (Job 30:29) Mopisalema ne a tšebisiye ka matla ke gore batho ba Modimo ba ba hludiye, di ka makega gore ne a naganne gore mo batho ba lwelang gona ke mo dijakalase di bang gona gore di je ditopo (tshwanisa le Pis 68:23), o ngwadiye gore: “O re psyitlannye ga poleke ya dijakalase.” (Pis 44:19) Ka 607 B.C.E. mo Bhabhilona ba yi dukulugele, tsone di makiye gore ba bolaye ke tlala ye kgolo, tsotsone dya maka gore bo mmane ba tshware bana ba bona lešidi. Nka taba lo Jeremiya a yyeng a re lešidi la “batho bage” le phala la dijakalase.—Dil 4:3, 10.
JUNE 3-9
MAKOLWANE KA TENG GA LENTSU LA MODIMO | PISAMELA 45-47
Koša ya Mošadho wa Kgoši
w14-SE 2/15 9-10 ¶8-9
Hlakelaneng ka Taba la Mošadho wa Senkunyana!
8 Bala Pisalema 45:13, 14a. Mosadi ye wa gore wa šadha ba mo hlatolla a “bafele ka matla,” a tšhepele mošadho wage. Ga Kutullo 21:2, mosadi ye wa gore wa šadha ba mo tshwanisa le mutši, Jerusalema ya nyuwane, ba mo “tšhepisiye fote o yemele monnage.” Mutši wowa wa ku legedimong wo ‘gadimisiye ke Modimo’ fote wo “gadima go tshwana le letlapa la jaspere la gore le gadima nkare dlelase ya go bonabona.” (Kut. 21:10, 11) Go bafala ga Jerusalema ya nyuwane ba go hlatolliye gabutši ga puku ya Kutullo. (Kut. 21:18-21) A re makale mo mopisalema a re mosadi yene o “bafele ka matla”! Fote re sa lebale gore mošadho wowa wa bogoši wo makega legedimong.
9 Mosadi wa gore wa šadha ba mo leya ga Mokgwenyane—Kgoši Mesiya. Ne a kene a mo lukiselela, a mo ‘yedisa ka lentsu la Modimo go fo tshwana le mo a mo yedisa ka meetši.’ Mosadi yewa o ‘hlawolegiye fote aa sodiwi ka selo.’ (Maef. 5:26, 27) Di nyaka a yapare dikobo tso di tshwaneleng monyanya wone. Fote o yapere ka mokgonone! Eya, “dikobo tsage ba di kgabisiye ka gholdi,” fote “ba nyoko mo yisa ga kgoši a yapere kobo ya go tura.” Ka mošadho wa Senkunyana, “mosadi yene ba mo dumelele gore a yapare dikobo tsa go khanya, tsa go yela le tsa go tura tsa linene, ka gore linene yone yi yemela dilo tsa go loka tso ba go hlawolega ba di makiyeng.”—Kut. 19:8.
Puku ya Kutullo yi re o Yemele ke Tsa Mošaga Mang ku Mahlong
10Mara Jehova o nyoko re king mo a bona ba hlasela batho bage go baba? O re: “Ke nyoko kwata la go sa hlayisegi.” (Hezek. 38:18, 21-23) Kutullo tema 19 yi re botsa so se makegang ka nthago. Jehova o roma Morwayi wage gore a ye a lwele malata yage ga manaba ya bona. Jeso o ko ba a lwa a na le “masole ya ku legedimong”—go leng mangeloyi ya go tshepega le bo ba 144 000. (Kut. 17:14; 19:11-15) Ntwa yone yi nyoko fela ka mokgo mang? Go nyoko ro napa go fela ka batho le mekgahlo ya gore yi phigisa Jehova!—Bala Kutullo 19:19-21.
11 O fo nagana gore ba go tshepega bo ba leng ho lefaseng ba ko ba ba tikwa ka mokgo mang mo ba bona gore ba phonne nakwela Modimo a fetsa ka manaba yage! Ye lune, phela yone go ko ba go le nako ya go hlakela! Le mo yi le gore ka nako yonone ku legedimong ba ko ba ba jabodiye ka matla mo ba bona Bhabhilona ye Mogolo yi psyitlanyiwa, go na le se sengwana sa gore se nyoko maka gore ba nape ba jabole la go sa hlayisege. (Kut. 19:1-3) Gabutšibutši ke mo taba ya puku ya Kutullo yi felelang gona—go leng “mošadho wa Nku.”—Kut. 19:6-9.
12 Mošadho wowa wo makega leng? Ka mokana ga bona bo ba 144 000 ba ko ba ba šele ba le legedimong mo go šele ka gonyana gore ntwa ya Aremaghedoni yi thomise. Mara mošadho wone wa Nku wo ka sa thomisi ka nako yonone. (Bala Kutullo 21:1, 2.) Wo nyoko thomisa ka nthago ga ntwa ya Aremaghedoni fote mo go fediye ka manaba ka mokana ga wona ya Modimo.—Pis. 45:3, 4, 13-17.
it-2-E 1169
Ntwa
Mo ntwa yowa yi segela mafelelong, go nyoko fela sekete sa mengwaga go bebiye mo lefaseng. Pisalema ya go hlaya gore “[Jehova] o maka gore go fele ka dintwa go segela mafelelong ya lefase. O robanya mosefo fote o kuna lerumo la ba ditlopotlopo; o tšhubanya dikotšikara tsa ntwa,” yi makegiye la mathomo mo Modimo a maka gore go bebe nageng ya Israyele ka go robanya tso manaba ya bona ma lwang ka tsona. Ka nthago ga mo Kreste a hludiye bo ba makang gore go be le ntwa ka Aremaghedoni, lefase ka mokana ga lona le nyoko jabolela go beba ga ma nnete. (Pis 46:8-10) Batho ba gore ba nyoko kraya lephelo la go ya go yye ke ba gore “ba ko ba ba robiye disabola tsa bona gore go be matsepe le marumo ya bona gore go be disikila” fote go nyoko ko ba ba gore “a ba sa tšhuta go lwa.” “Ka taba la gore go bolabodiye Jehova wa masole.”—Jes 2:4; Mmk 4:3, 4.
Tso di Wutammeng ka Bhayibeleng
w17.04-SE 11 ¶9
Go Nyoko Tloga Ying mo Mmušo wa Modimo o Segela?
9 Mo go fela ka mekgahlo ya bošakašakane go nyoko tla mokgahlo wa mošaga mang? Ka nthago ga Aremaghedoni, ayitsano go nyoko ba go sana le mokgahlo wo mongwana ho lefaseng? Bhayibele yi re botsa gore: “O re tshepisiye magedimo ya nyuwane le lefase la nyuwane tsa gore ga tsona go nyoko beba.” (2 Pet. 3:13) Magedimo le lefase tsa botala, memmušo ya go ba le bošakašakane le batho ba go lawola ke memmušo yone ba nyoko ba ba sa sa le šiyo. Byalo go nyoko tla ying? Mantsu yawa ya gore “magedimo ya nyuwane le lefase la nyuwane” ma rela gore go nyoko ba le mmušo wa nyuwane le batho ba nyuwane bo ba nyoko lawolang ke mmušo wone. Mmušo wa gore wo nyoko lawola ke Jeso Kreste wo nyoko šupetsa ka mokgo Jehova a leng, Modimo wa go maka dilo ka letheto. (1 Kor. 14:33) Byalo ga “lefase la nyuwane” dilo di ko ba di sepela ka letheto. Go nyoko ba le banna ba go loka ba gore ba nyoko yeta ditaba mahlong. (Pis. 45:16) Ba nyoko yetetsa ke Kreste le ba 144 000 bo a ko bang a lawola nabo. O fo nagana mekgahlo ka mokana ga yona ya bošakašakane yi sa sa le šiyo, sekgaleng sa yona go na le mokgahlo wa gore ke selo ka ssoši, wa gore fote wo ka sa tsoge wo makiye tsa bošakašakane!
JUNE 10-16
MAKOLWANE KA TENG GA LENTSU LA MODIMO | PISALEMA 48-50
Lune Babelegi—Gelepaneng Mutši wa Lune Gore wo Tshepe Mokgahlo wa Jehova
Morapelo Wa Mannete wo Nyoko Maka Gore o Jabole
11 Re ba re maka morapelo ga Jehova mo re tšhuta Lentsu lage re boya re tšhutisa bana ba rune ka yene. Letšatši la Sabatha ne le thulela Maisrayele lešuba la gore ba beyele ka thoko mebereko ya bona ya ka moka matšatši ke mokane ba thogo tiyisa senghana sa bona le Jehova. (Ek. 31:16, 17) Ba gore ne ba kwana le Jehova ka matla, ka letšatši lolone ne ba tšhutisa bana ba bona ka yene ba boya ba ba tšhutisa gore o lukiye. Le rune di nyaka re timakele letheto gore re thogo kraya nako ya go bala le go tšhuta ka Lentsu la Modimo. Mo re maka tsotsone re ba re maka morapelo ga Jehova, fote di re gelepa gore re šutele thina naye. (Pis. 73:28) Fote mo re tšhuta re le mutši re nyoko gelepa bana ba rune gore ba thogo tiyisa senghana sa bona le Papa wa rune wa legedimong.—Bala Pisalema 48:13.
w11-SE 3/15 19 ¶5-7
Le na le so se Makang Gore le Jabole
“Lune batho, dukuluganeng Siyone, le sepelasepele ga yona le balele diwokamelo tsa yona. Le lebelele mapharo ya yona. Pombholaneng mapharo ya gona ya go tiya, gore le tle le hlayisele ditlogolwane tsa lune.” (Pis. 48:12, 13) Mopisalema o hlohletsele Maisrayele gore ma pombhole Jerusalema. Nagana ka Maisrayele ma sepela ma kene ma ya ga mutši wa go hlawolega mongwaga wo mongwana le wo mongwana gore ma ye jabolela monyanya ma boya ma bona tempele ya go bafala. Gwa kgonega gore ba tšhofiye ke tsotsone gore ba tle ba ‘hlayisele ditlogolwane tsa bona.’
Nagana ka kgoši ya mosadi ya Šebha ya gore ne yi kamaka tso yi di kweleleng ka Solomoni le taba ya gore o hlalefiye. King tso di makiyeng gore a sa kamake gore tso a di kweleleng ke nnete? O hlayye gore “A ka tshepa tso ba di hlayyeng, go segela ke bona ka maahlo yaka.” (2 Dikor. 9:6) Phela tso re di bonang ka ‘maahlo ya rune’ beng di ka re tikisa ka matla.
O ka gelepa bana bago byang gore ba bone tsa go jabodisa ka mokgahlo wa Jehova ka ‘maahlo ya bona’ beng? Mo nkare go na le ofisi ya lekala ya Dihlatse Tsa Jehova thina le mo o dulang gona, karakara ka matla gore o fele o vakaša. Mo re beyisa Mandy le Bethany, mo ba dulang gona gore ba segele Bhethele ne di nyaka ba sepele 1 500 km. Babelegi ba bona ne ba dula ba vakašela Bhethele, ka matlamatla nakwela barwediya ba bona ba sa le ba banyana. Ba hlatolla gore “Ne re nagana gore Bhethele a go jabodise fote ke ga batho ba bagolo. Mara re gahlanne le bo ba gore ba sa gola ba gore ba berekela Jehova fote ba jabodisa ke tsotsone! Re napiye re di bona gore mokgahlo wa Jehova ke wo mogolo ka matla go phala ka mokgo ne re naganne, fote ka moka nako mo re vakašela Bhethele ne re kwa re tiyelela ga tso tsa Modimo.” Go bona ka mokgo mokgahlo wa Modimo o berekang ka gona go hlohletsele Mandy le Bethany gore go be mašupatsela, fote ba yye ba bereka Bhethele tsa senakonyana.
w12-SE 8/15 12 ¶5
Ariyeneng Mahlong le Thega Mmušo!
5 Tšhuta tsa botala. Motho wa go nyaka go ba ga mmušo wo mongwana di nyaka a tšhute ka mmušo wone le gore wo thomisiye kaye. Go fo ba ka mokgonone ga bo ba nyakang go thega mmušo wa Modimo, di nyaka ba tšhute dilo ka moka ka Mmušo wone. Lebelela mošupetso wo barwayi ba Kora ba re beyeleng wona ga mmereko wo ne ba wo maka ga Israyele ya ku botala. Ne ba jabodisa ke Jerusalema le poleke ya go rapela ga yona le go botsa ba bangwana ka ditaba tsa mutši wone. Ne ba sa jabodisi ke ka mokgo mutši wone ne ba wo yagiye ka gona, mara ne ba jabodisa ke tso mutši wone le poleke ya gona ya go rapela ne di yemela tsona. Jerusalema ne go le “poleke ya Kgoši ya go diphala ka moka,” Jehova, ka taba la gore ne go le mo morapelo wa mannete ne wo krayega gona. Ke mo Molawo wa Jehova ne wo tšhutisiwa gona. Jehova o šupetsiye batho bo ba lawolang ke Kgoši ya Jerusalema gore o hlupegiye ka matla ka bona. (Bala Pisalema 48:1, 2, 9, 12, 13.) Go fo tshwana nabo, ayitsano le wene o nabela go tšhuta le go botsa ba bangwana gore mokgahlo wa Jehova wa mo lefaseng wo thomisiye kaye? Mo o ya mahlong o tšhuta ka mokgahlo wa Modimo le ka mokgo Jehova a thegang batho bage, ke mo o nyoko di bonang gore Mmušo wa Modimo ke selo sa mannete. Taba ya go nabela go tšhomayela ditaba tsa go bafala tsa Mmušo wa Modimo yi nyoko fo ya yi hluhlutela ho gago.—Jer. 9:24; Luk. 4:43.
Tso di Wutammeng ka Bhayibeleng
it-2-E 805
Go Ghanya
Israyele ne go le setšhaba sa gore se ghannye, fote se jabolela tsa go ja le tsa go nwa (1Mg 4:20; Mmo 5:18, 19), fote taba ya gore ba ghannye ne yi ba pasopa gore ba sa wele ke tlala. (Diy 10:15; Mmo 7:12) Mara, le mo nkare ke so Jehova ne a nyaka go se segelela, gore Israyele yi phomelele le gore yi jabolele maphomela ya mmereko wa yona (tshwanisa le Diy 6:6-11; 20:13; 24:33, 34), o yye a ba pasopisa ka kotsi yo yi ka bang gona mo ba ka lebala gore ke yene a makiyeng gore ba ghanye le mo ba ka thomisa go tithega ka tso ba ghannyeng ka tsona. (Dot 8:7-17; Pis 49:6-9; Diy 11:4; 18:10, 11; Jer 9:23, 24) Ba ba gopotsiye gore go ghanya ke tsa senakonyana (Diy 23:4, 5), fote ne o ka sa berekisi go ghanya mone gore o patele Modimo gore a go lepolle ga likgu (Pis 49:6, 7), fote go ghanya a go na mokgola ga bo ba gore ba kgwile (Pis 49:16, 17; Mmo 5:15). Ba yye ba ba šupetsa gore mo ba ka tseyela go ghanya gedimo ka matla, tsotsone di nyoko maka gore ba sa sa maka dilo gabutši le go maka gore Jehova a sa sa ba thega. (Diy 28:20; tshwanisa le Jer 5:26-28; 17:9-11.) Fote ba yye ba ba hlohletsela gore ba “thanake Jehova ka dilo [tsa bona] tso ba di tseyelang gedimo.”—Diy 3:9.
JUNE 17-23
MAKOLWANE KA TENG GA LENTSU LA MODIMO | PISALEMA 51-53
Kganela Kgole le Tso di ka Makang Gore o Sinye
O ka Maka Byang Gore o Tšhireletse Pelo Yago?
4 Lentsu lowa la gore “pelo” ga Diyema 4:23, le rela “so motho a leng sona ka ho teng gage” kela “so a leng sona ka makhukhung.” (Bala Pisalema 51:6) Ka mantsu ya mangwana, “pelo” yi rela tso re di naganang re ntoši, ka mokgo re tikwang, tso re nyakang go di maka le tso re nabelang go di segelela. Gabutšibutši a yi rele so re leng sona ka ho tawong, mara yi ra so ka nnete-nnete re leng sona ka ho teng.
5 Bona gore ho mmeleng re šupetsa ka ying gore ke rune ba mohlobo mang ka ho teng. Sa mathomo ke gore mo re nyaka go dula re philegiye, di nyaka re je tsa go ja tsa gore di ya re yaga fote re dule re jima gore re thogo wolologa. Byalo, di nyaka re bale Baebele ka moka matšatši le dipuku tsa mokgahlo fote re ye mahlong re tshepegela Jehova gore re thogo dula re philegiye ga tso tsa Modimo. Mo re berekisa tso re di balang re boya re botsa batho ba bangwana ka tso re di dumelang, re šupetsa gore re na le tumelo. (Maroma 10:8-10; Jak. 2:26) Sa bobedi ke gore mo re tilebelela, re ka fo tseya nkare re philegiye, mara wa kraya gore ka ho teng re fehliye. Le mo ga tsa Modimo go ka mokgonone, re ka fo tipotsa gore tumelo ya rune yi tiyelele mara wa kraya dipelo tsa rune di nagana dilo tsa go kekema. (1 Makor. 10:12; Jak. 1:14, 15) A di nyake re lebala gore Sathane o nyaka go maka gore re fokoge. Mara a ka berekisa selo sa mošaga mang gore a re lobe ka sona? Re ka tipasopa ka mokgo mang?
w15-SE 6/15 14 ¶5-6
Re ka Kgona go Dula re Titshwere Gabutši
5 Mokgwa wo mongwana wa go šupetsa gore re tshepele ga Jehova ka go felegelela ke gore mo re nagana dilo tsa go sa yela, re rapele. Mo re šutela ga Jehova ka thapelo, le yene o nyoko šutela thina ga rune. Modimo aa konane moya wage wa go hlawolega, fote tsotsone di maka gore re nape re tikemisela go gana go nagana dilo tsa go kekema le go dula re titshwere gabutši. Byalo tla re botseneng Modimo, re mo kgopele gore a re gelepe re thogo ghayela ka dilo tsa gore dya mo jabodisa. (Pis. 19:14) Ayitsano re kgopela re tinyanafatsiye gore a re pombhole gore re thogo bona “tsela yo yi ka re kwaletsang”—go ka ba go nabela go gongwana le go gongwana ga gore a gwa loka kela go tlalela ga tsa go sa loka—mo go ka makang gore mafelelong re tikraye re sinnye? (Pis. 139:23, 24) Ayitsano re dula re mo kgopela gore a re gelepe gore re thogo dula re tshepega mo re liketsiwa?—Mat. 6:13.
6 Dilo tso ne re di maka botala kela ka mokgo re gudisiwweng ka gona go ka maka gore re kwane le mekgwa ya gore Jehova o yi hloyye. Le mo go le ka mokgonone, Jehova a ka re gelepa gore re thogo ghobolla hala le hala gore re thogo mmerekela gabutši. Kgoši Dafita o di bonne tsotsone. Ka nthago ga mo Dafita a yetsele le Bhathi-šeba, o yye a fawa Jehova a re: “Maka gore ke be le pelo ya gabutši, . . . fote o nneye moya wa nyuwane, wa gore wa tshepega.” (Pis. 51:10, 12) Re fo dulela go sinya ka taba la gore a ra yenela, mara Jehova a ka re gelepa gore re kwe re nabela go mo theetsela. Le mo nkare go nabela go maka tsa go befa di midiye ho ga rune fote menagano ya rune yi tlele ka dilo tsa go sa loka, Jehova a ka re yetetsa ga tso re di makang gore re thogo phela ka melawo yage fote re nyoko phomelela mo re phela ka yona. A ka re tšhireletsa ga se sengwana le se sengwana sa gore se ka re kwaletsa le ga tso di ka makang gore re topele ga go maka tsa go befa.—Pis. 119:133.
Tso di Wutammeng ka Bhayibeleng
it-1-E 644
Dowege
Ne go le Leedomo la gore ne le bereka go le ndhuna ya malata ya Kgoši Sawulo ya go disa, ne a bereka go le wa go wokamela. (1Sa 21:7; 22:9) Dowege o yye a sokologela ga sedumedi sa Sejuda. Ka taba la gore o yye a “gapeletsega go ba mahlong ga Jehova” mo a le Nobe, di ka makega ka taba la kano, taba ya go sa yela, kela ba naganela lephera, Dowege o yye a bona Moprista ye Mogolo Ahimeleke a neya Dafita sekgwa sa go hlawolega a boya a mo neya le sabola ya Gholiyate. Ka nthago, mo Sawulo a bolabola le malata yage, o yye a hlaya gore malata yage ma mo jikele, ke mokane Dowege a napa a hlaya tso a di bonneng ku Nobe. Ka nthago ga go bitsa moprista ye mogolo le maprista ya mangwana ya ku Nobe a boya a hlaba Ahimeleke ka diputsiso, Sawulo o yye a re bomatšinghelane bage ba bolaye maprista yane. Mo ba gana, Sawulo a re Dowege a ba bolaye, Dowege a sanka a jikajika, a bolaya 85 ya maprista. Ka nthago ga go maka dilo tso tsa go tshosa, Dowege a napa a hlasela Nobe, a bolaya batho ba poleke yone ka moka, ba banyana le ba bagolo, le merape ya gona ka moka.—1Sa 22:6-20.
Go fo ya ka mokgo mantsu ya mathomo ga Pisalema 52, Dafita o ngwadiye taba yowa ka Dowege: “Leleme lago le leya mathatha, le lokotšegiye go tshwana le legare, le bereka go bolabola matsaka. O kwana le dilo tsa go befa go phala tsa gabutši, go bolabola matsaka go phala go bolabola tsa go loka. O kwana le mantsu ka moka ya go kwisana go baba, Wene leleme la go bolabola matsaka.”—Pis 52:2-4.
JUNE 24-30
MAKOLWANE KA TENG GA LENTSU LA MODIMO | PISALEMA 54-56
Modimo o Nago
w06-SE 8/1 22 ¶10-11
Hlalefa—Tšhaba Modimo!
10 Tšatši le lengwana, Dafita o yye a tšhabela ga Akhiši kgoši ya Mafilisita ga naga ya Ghathe, mo Gholiyate ne a tšwa gona. (1 Samuwele 21:10-15) Malata ya kgoši ne ma tseya Dafita go le lenaba hone nageng. Dafita o yye a maka byang ga mayemo yane ya kotsi? O yye a botsa Jehova tso ne di mo hlupa ka thapelo. (Pisalema 56:1-4, 11-13) O yye a timaka nkare a di tseyi gabutši gore a thogo tšhaba, fote Dafita ne a tšiba gore ke Jehova a mo phonisiyeng ka go rufa polane yone. Dafita ne a tshepela ga Jehova ka pelo yage ka mokana ga yona, fote taba ya gore ne a mo tshepa yi šupetsiye gore Dafita ne tšhaba Modimo.—Pisalema 34:4-6, 9-11.
11 Go fo tshwana le Dafita, le rune re ka šupetsa gore re tšhaba Modimo ka go tshepa gore o nyoko re gelepa gore re thogo tiyisela mo re lebanne le mathatha. Dafita o hlayye gore “Tisamele ka Jehova ga tso o di makang, tshepela gage, fote yene o nyoko go gelepa.” (Pisalema 37:5) Mara tsotsone a di rele gore re fo botsa Jehova mathatha ya rune ke mokane ra fo phuta matsogo re yemela gore a re gelepe. Dafita aa f’lo rapela ga Modimo gore a mo gelepe ke mokane a phuta matsogo. O berekisiye matšhika le go hlalefa gage ga gore o go neyye ke Jehova gore a thogo lukisa mathatha yage. Dafita ke mo a di tšiba tsa gore ka matšhika yage a ntoši ke mo a ka sa kgone go phomelela. Le ga rune go fo ba ka mokgonone. Mo re šele re makiye ka moka tso re ka di kgonang, re di šiyela Jehova. Ga go tlala, a se šiyo so re ka se makang mara re ka tshepela ga Jehova. Fote ke mo o nyoko bonang gore taba ya go tšhaba Modimo yi nyoko go berekela. Re ka kgomoletsa ke tso Dafita a di hlayyeng di mmaba mo a re: “Bo ba nang le senghana sa thina le Jehova ke bo ba mo tšhabang.”—Pisalema 25:14.
cl-SE 243 ¶9
A se Šiyo so se ka re “Yahluganyang le Modimo”
9 Jehova o di tseyela gedimo mo re tiyisela. (Matewu 24:13) O sa di lebale gore Sathane o nyaka re jikela Jehova. Letšatši le lengwana le le lengwana mo re tshepega ga Jehova re ba re mo gelepa gore a thogo fetola ye a mo kwerang. (Diyema 27:11) Ka dinako tse dingwana go tiyisela a yi moroba. Go lwala, mathatha ya di tšheleta, go kgahleletsega monaganong le mathatha ya mangwana ma ka maka gore letšatši le lengwana le le lengwana le gakge. Mo o sa kraye tso ne o di letele, tsotsone le tsona di ka go tapa matšhika. (Diyema 13:12) Go tiyisela mo re lebanne le mathatha ya mošaga wonone di jabodisa Jehova ka matla. Nka taba lo Kgoši Dafita a kgopeleng Jehova gore a tšhele dinepedi tsage ga “lepotlela la go makiwa ka mokgopa,” a tokegela ka gore: “Ayitsano a dya ngwadiwa pukung yago?” (Pisalema 56:8) Eya, Jehova o re tseyela gedimo fote o gopola dinepedi tsa rune le mehlupego yo re yyeng ra yi tiyisela mo re kene re tshepega gage. Tsotsone o di tseyela gedimo ka matla.
A re Tšhabe Selo ka Taba la Gore Modimo o re Nyaka ka Matla
16 Sathane wa di tšiba tsa gore lephelo re le tseyela gedimo. Le mo go le ka mokgonone o re hlayela matsaka a re rune re ka maka se sengwana le se sengwana le mong taba ya go lahla senghana sa rune le Jehova re makela go fo re re tšhireletse lephelo la rune. (Jobo 2:4, 5) Mo go le ga yowa taba Sathane o pumutsiye wa tšiba! Ke “wa gore o na le matšhika ya go baka likgu,” Sathane o berekisa taba yowa ya gore re tšhaba likgu gore a thogo re tlosa ga Jehova. (Maheb. 2:14, 15) Ka dinako tse dingwana malata ya Sathane ma tshosetsa batho ba Jehova ka gore ma nyoko ba bolaya mo ba sa lisetse tumelo ya bona. Fote go gongwana, Sathane a ka berekisa seyemo sa mo motho a lwala go liketsa gore a šepise go gongwana. Ditogotela kela mašaga ya rune ya gore a yi Makreste ma ka re gapeletsa gore re dumele ba re tšhela madi mola yi le gore tsotsone di nyoko maka gore re tshile molawo wa Modimo. Kela ye mongwana a ka liketsa go re kutšetsela gore re yamogele gore ba re yalafe ka mokgwa wo mongwana wa gore a wo dumelelane le ditšhiko tsa Bhayibele.
17 Le mo re di tšhaba tsa go kgwa re ya tšiba gore Jehova a ka sa lisetse go re nyaka ka matla le mo re kgwile. (Bala Maroma 8:37-39.) Mo banghana ba Jehova ba kgwa aa ba lebale o fo dula a ba gopola tsa nkare ba sa phela. (Luk. 20:37, 38) O nabela go ba tsosa gore ba tle ba phele fote. (Jobo 14:15) Jehova o yye a patela ka matla gore re “kraye lephelo la go ya go yye.” (Joh. 3:16) Re ya di tšiba tsa gore Jehova o re nyaka ka matla fote wa re pasopa. Byalo, a re fo tabogela go mo lahla mo re lwala kela re nkgela ke likgu re tšhabela gage gore a re kgomoletse, a re hlalefise a boye a re tiyise. Valérie le monnage ba makiye ka mokgonone.—Pis. 41:3.
Tso di Wutammeng ka Bhayibeleng
it-1-E 857-858
Go Tšiba Tso di Nyoko Makegang ku Mahlong
Taba ya gore Judase Iskariyoti o yye a rekisa Jeso yi makiye gore go makege seporofeto fote di šupetsiye gore Jehova le Jeso ba tšiba tso di nyoko makegang ku mahlong. (Pis 41:9; 55:12, 13; 109:8; Meb 1:16-20) Mara re ka sa hlaye gore ke Modimo ye a makiyeng kela a polanneng gore Judase a feleletse a makiye tso a di makiyeng. Diporofeto di hlayye botala gore ye mongwana ga malata ya Jeso ne a nyoko mo rekisa, mara a dya hlaya gore ne go nyoko ba mang. Fote ditšhiko tsa Bhayibele a di dumelelane nayo taba ya gore Modimo ne a polanne gore Judase a feleletse a makiye ka mokgonone. Molawo wa go tseyediwa gedimo wo wo hlayyeng ke lepostola ne wo re: “O sa yakgoswele go kgeta motho gore a make mmereko fote o kganele kgole le bo ba go sinya, o dule o yediye.” (1Tm 5:22; tshwanisa le 3:6.) Go šupetsa gore ne a hlupegiye ka go kgeta 12 ya mapostola yage gabutši, Jeso o yye a fetsa bošego ka moka a kene a rapela ga papage mo a soko segelela sepheto sa gabutši. (Lu 6:12-16) Hala le gore ke Modimo ye ne a polanne gore Judase a rekise Jeso, tsone ne di nyoko rela gore tso Modimo a re yetetsang ka tsona le melawo yage dya tšhentšhatšhentšha fote go ya ka molawo wone, tsotsone ne di ka rela gore Modimo o tšhediye letsogo ga tso Judase a di sinnyeng.
Di šupetsa nkare nakwela Judase ba mo kgeta gore go be lepostola, pelo yage ne yi sa šupetse gore go ka ba motho wa go sepelana ka fase. O dumelele gore go mile ‘mudu wa gore wo na le tšhefu’ wa boya wa mo thilafatsa, tsotsone di makiye gore a tšwe pateng le gore a sa sa phela ka ditšhiko tsa Modimo, mara o yye a dumelela Diyabolo gore a mo berekise, a feleletsa a yetswa fote a jikela le Jeso. (Heb 12:14, 15; Joh 13:2; Meb 1:24, 25; Jak 1:14, 15; bona JUDASE wa bo 4.) Nakwela Judase a tšwa pateng, Jeso o di bonne gore Judase ke yene ye ne a nyoko ko mo rekisa.—Joh 13:10, 11.