Ayitsano o Šele o “Tšhutiye Sephiri” sa go Kgotsofala?

1. Mo ba re go kgotsofala ba ra ying, fote a go rele ying?

AYITSANO o fo kwa pelo yowa yitseri tswee? Motho wa gore o kgotsofele o jabodisa ke tso ba mo rufang ka tsona gana byalo fote o fo kwa pelo yowa yi kgehlemele. Aa kwe a kgongwele kela a kwatiye go le ka taba la dilo tso a di gayelang. Le mo go le ka mokgonone, taba ya gore re kgotsofele a yi rele gore di nyaka re sa be le taba le gore re phela byang. Mo re beyisa, Mokreste aa sinyi mo a kwa a nabela go yeketsa ga mmereko wage ga tso tsa Modimo. (Marom. 12:1; 1 Thim. 3:1) Le mo go le ka mokgone, aa kgongwele le mo nkare aa yakgoswi a kraya mebereko yo ne a yi yemele ga tso tsa Modimo ka mokgo ne a naganne ka gona.

2. Ke ntaba go sa kgotsofale go le kotsi?

² Phela mo re sa kgotsofatse ke tso re nang natso, re ka thomisa go maka dipheto tsa gore a yi tsona. Bo ba gore a ba kgotsofatse ke tso ba nang natso ba ka bereka diawara tsa go tlala gore ba thogo reka dilo tsa gore a ba nape ba di hloka. Sa go kwisa go baba ke gore, Makreste ya mangwana ma feleletsiye ma yetswa tšheleta le dilo tse dingwana tso ma di nabelang. Ma ka fo ba ma tiputsiye gore, ‘Selo sowa se ya ntshwanela,’ ‘Aah ye naa, phela ke botala ke se yemele,’ kela ma re ‘Nko boya ke yi patela tšheleta yowa.’ Mara mo go le gabutši, Jehova aa kwane le mošaga wo mongwana le wo mongwana wa go yetswa fote tsotsone di ya mo poyidisa. (Diy. 30:9) Ba bangwana ba kgongwetsiye ke gore a ba kraye mebereko ye mengwana ka mo ga tso tsa Modimo, tsa gore ba šinya ba lisetsa le go berekela Jehova. (Magal. 6:9) Ye barena, anthe ke mo go rorebeng mo lelata la Jehova la gore le tineyele le šinya le nagana go maka ka mokgonone? Di ka makega gore bothatha ke gore motho yene o yye a thomisa go sa sa kgotsofala.

3. Ke nnete yifeng ya go re tiyisa ya gore re yi kraya ga Mafilipi 4:11, 12?

³ Ka mokana ga rune re ka pholiša taba ya go kgotsofala. Pawulo wa lepostola o ngwadiye gore o ‘tšhutiye go kgotsofala ka tso a nang natso go se na taba gore o ga seyemo sa mošaga mang.’ (Bala Mafilipi 4:11, 12.) O ngwadiye mantsu yane a kene a le jele. Mara, ke mo a sa na a jabodiye. O “tšhutiye sephiri” sa go kgotsofala. Mo nkare ke ntshitshire ga rune gore re kgotsofale, mantsu ya Pawulo le tso a gahlanneng natso di re šupetsa gore le rune re ka kgotsofala le mo re le ga seyemo sa mošaga mang. A di nyake re tseya gore taba ya go kgotsofala ga seyemo so re leng ga sona yi nyoko fo titlela. Mara, di nyaka re tšhute go kgotsofala. Byang mara? Tla re petapeteneng ka mekgwa yo yi ka re gelepang gore re tšhute sephiri sa go kgona go kgotsofala.

TITŠHUTISE GO LEBOGA

4. Mo re le batho ba go kwana le go leboga, tsotsone di re gelepa byang gore re kgotsofale? (1 Mathesalonika 5:18)

⁴ Motho wa gore wa leboga, ga go tlala o kgotsofele. (Bala 1 Mathesalonika 5:18.) Mo re beyisa, mo re leboga dilo tso re nang natso tsa gore re ya di hloka, re ka sa nape re nagana ka matla ka dilo tsa gore re ya di nyaka tsa gore fote a re natso. Mo re leboga Jehova ka taba la mekgwa yo re kgonang go mmerekela ka yona gana byalo, tsotsone di nyoko re gelepa gore re nagane ka go maka so re ka se kgonang ga mmereko wonone re leng ga wona, ra sa dulele go nagana ka gore re ka wo kraya byang mmereko wo re wo nabelang. Phela nka taba lo Mangwalo ma re hlohletselang gore re leboge Jehova mo re rapela! Mo re leboga, tsotsone di nyoko maka gore re “bebe, batho ba bangwana ba šala ba sa kwisisi.”—Mafil. 4:6, 7.

5. Ke dilo difeng tso Maisrayele ne ma tshwanele ma di leboge? (Lebelela le sethombhe.)

⁵ Tseya ka tso di makegeleng Maisrayele. Ma yye ma kokolela Jehova ga tleletlele ka taba la gore ne ma nyaka tsa go ja tso ne ma di ja hala Egepita. (Dip. 11:4-6) Ke nnete gore lephelo ku mašahleng ne le thathafa. Mara ne ma nyoko gelepa king gore ma kgotsofale? Ne ma tshwanele ma ghayele ka dilo ka mokana ga tsona tso Jehova a šeleng a ma makele tsona fote ma di leboge. Ne ma tshwanele ma gopole gore nakwela ma le ku Egepita ga gore ne ba ma tshwara bošidi fote go le mabhantiti, Jehova o yye a ma phonisa ke mokane a leyela Maegepita lesome la dilo tsa go sasamela. Ka nthago ga gore Maisrayele ba ma lokolle, ma yye ma “tseya dilo tsa Maegepita” tsa go tshwana le silva, gholdi le dikobo. (Ek. 12:35, 36) Mo Maisrayele ba ma lelekisa go segela Lewatleng le Lekhubedu, Jehova o yye a yahluganya meetši yane ka mohlolo. Fote mo ma kene ma sepela hala mašahleng, Modimo ne a ma neya manna letšatši le lengwana le le lengwana. Byalo, anthe Maisrayele ne ma llela ying? Maisrayele ne ma sa kgotsofale go se ka taba la gore ma gayela tsa go ja, mara go le ka taba la gore ne ma sa leboge tso ne ma šele ma le natso.

6. Re ka gelepa king gore re be batho ba go leboga?

⁶ Byalo, wene o ka gelepa king gore o leboge? Sa mathomo, tipeyele nako ya gore o ghayele ka dilo tsa gabutši tso di makang gore o jabole. O ka boya o ro ngwala fase dilo ka dipedi kela ka ditharo tso o di lebogang. (Dillo. 3:22, 23) Sa mabedi, šupetsa gore wa leboga. Go be wene wa mathomo ye a lebogang ba bangwana ga tso ba go makeleng tsona. Sa go di phala ka moka, o dule o leboga Jehova. (Pis. 75:1) Sa kararo, kgeta banghana ba gore ba kwana le go leboga. Phela go leboga gwa tshelelana; go fo ba ka mokgonone le ga taba ya go sa kgotsofale. (Dot. 1:26-28; 2 Thim. 3:1, 2, 5) Mo re tiputsiye gore re nyaka go šupetsa gore re batho ba go leboga, tso tsa go sa kgotsofale di ka sa re tshelele lula.

7. Aci o gelepiye king gore a thomise go leboga, fote go yye gwa ba le maphomela mafeng?

⁷ Lebelela tso di makegeleng Aci, wa gore o dula hala Indonesia. O re: “Ka dinako tsa bolwele bya go sabalala bya COVID-19, ke yye ka thomisa go tshwanisa seyemo saka le sa magageru ya mangwana. Tsosone di makiye gore ke sa sa kgotsofala.” (Magal. 6:4) O gelepiye king gore a thogo tšhentšha ka mokgo ne a tseya dilo? Aci o re: “Ke yye ka thomisa go tseyela hlogong dilo tso ne ba nrufa ka tsona ka moka matšatši le go ghayela ka dilo tsa gabutši tso ke di krayyeng ka taba la gore ke ga mokgahlo wa Modimo. Ke mokane ka leboga Jehova. Tsotsone di n’gelepiye gore ke kgotsofale mong go kgotsofala.” Mo o kwa o sa kgotsofale ka taba la seyemo so o leng ga sona, ke ntaba o sa make ka mokgo Aci a makiyeng gore o thogo ba motho wa leboga?

TINYANAFATSE

8. Bharuke o yye a tikraya a wele molabong wa mošaga mang?

⁸ Go yye gwa ba le nako ya gore Bharuke wa gore ke mo go le mabhalane wa Jeremiya wa go porofeta, a tikraye a wele molabong. Bharuke ke mo a na le mmereko wa go thathafa, wa go thega Jeremiya mo a kene a botsa setšhaba sa go sa leboge molayetsa wo mongwana wo mogolo. Mara Bharuke aa lebelela tso Jehova ne a nyaka a di maka, o yye a thomisa go nagana ka matla ka tso yene ne a nyaka go di maka. Jehova o berekisiye Jeremiya gore a botse Bharuke gore: “Wene o tinyakela dilo tsa go tlala. Lisetsa go nyakana le dilo tsa mošaga wonone.” (Jer. 45:3-5) Ka mantsu ya mangwana, ke mo a re: “Kgotsofala ka tso o nang natso gana byalo.” Bharuke o yye a yamogela mo ba mo wolola fote o yye mahlong a berekela Jehova a jabodiye.

9. Re tšhuta ying ga 1 Makorente 4:6, 7? (Lebelela le dithombhe.)

⁹ Ka dinako tse dingwana Mokreste a ka kwa nkare yene o tshwanele go kraya mmereko wo mongwana ka ho phutegong kela ka mo mokgahlong. A ka fo ba a tikwa ka mokgonone ka taba la gore ke segele ga dilo tse dingwana, wa karakara kela o šele a na le mengwaga ya go tlala a berekela Jehova. Mara o kraya ba bangwana ba tla ba kraya mmereko wo ne a wo nyaka. A ka gelepa king gore a sa kgongwetsi ke taba yone? A ka ghayela ka tso Pawulo wa lepostola a di ngwadiyeng ga 1 Makorente 4:6, 7. (Bala.) Mebereko ka moka yo re yi krayang ka ho mokgahlong le tso re kgonang go di maka, re ro di neya ke Jehova. Phela Jehova aa re neye dilo tsowa ka taba la gore rune re hlawolegiye go phala ba bangwana. Dilo tsowa ka mokana ga tsona, Jehova o re neya tsona ka taba la gore o re kwela go baba.—Marom. 12:3, 6; Maef. 2:8, 9.

10. Re ka gelepa king gore re thogo tinyanafatsa?

¹⁰ Re ka titšhutisa go ba le mokgwa wa go tinyanafatsa mo re ghayela ka mošupetso wo Jeso a re beyeleng wona. Lebelela tso di makegiyeng bošego byela Jeso a hlapisiyeng mapostola yage mawoto. Johane wa lepostola o ngwadiye gore: “Jeso ke mo a di tšiba [1] gore Papage o beyye dilo ka mokana ga tsona matsogong yage, le gore [2] ke mo a tšwa ga Modimo fote [3] o ya ga Modimo, . . . a thomisa go hlapisa malata yage mawoto.” (Joh. 13:3-5) Phela Jeso nke a tsere gore mapostola yage ke wona ma tshwaneleng ma hlapise yene mawoto, hayi gore yene a hlapise wona. Mara nakwela a le ho lefaseng, a sanka a kwa nkare yene o tshwanele go kraya lephelo la mabešebeše. (Lluk. 9:58) Jeso ke mo a tinyanafatsiye; a kgotsofele. O re beyele mong mošupetso wa gabutši.—Joh. 13:15.

11. Taba ya go tinyanafatsa yi gelepiye Dennis ka mokgo mang gore a tikwe a kgotsofele?

¹¹ Dennis, wa go tšwa Netherlands, o yye a liketsa ka matla gore a latelele mošupetso wa Jeso wa go tinyanafatsa, mara ke mo di sa fefoge. O re: “Mo ye mongwana ba mo neya mmereko wa gore ne ke wo nyaka ga tso tsa Modimo, ke ya kgongwela ka dinako tse dingwana ka taba la gore ke tseya gore ke nna ye ke tshwaneleng ke kraye mmereko wone. Byalo, mo tsotsone di makega, ke bala hlogotaba ya go bolabola ka go tinyanafatsa. Ga JW Library^®, ke merekiye mangwalo ya mangwana ya go bolabola ka go tinyanafatsa gore ke thogo ma kraya ka go yakgoswa ke mokane ke ma bale. Fote ke dawonelowudiye dipolabolo tsa go bolabola ka go tinyanafatsa ho fowunung yaka fote ke dula ke di theetsela. Ke tšhutiye gore re maka mmereko wowa ka taba la gore re nyaka go gadimisa Jehova, hayi rune. Ye mongwana le ye mongwana wa rune o tšhela letsogo ga tso Jehova a nyakang go di segelela.” Mo o thomisa go sa sa kgotsofatsa ke seyemo so o leng ga sona, maka se sengwana gore o thogo ba le mokgwa wa go tinyanafatsa. Tsotsone di nyoko tiyisa senghana sago le Jehova fote dya go gepela gore o tikwe o yitseri tswee.—Jak. 4:6, 8.

GHAYELA KA DILO TSO JEHOVA A DI TSHEPISANG

12. Ke dilo difeng tsa ku mahlong tso ba re tshepisang tsa gore di re gelepa gore re thogo kgotsofala? (Jesaya 65:21-25)

¹² Re fo tikwa re kgotsofele mo re ghayela ka tshepo ya go bafala yo Jehova a re tshepisang yona. Mantsu ya Jehova yaa ma ngwadiyeng ke Jesaya wa go porofeta, ma šupetsa ka mokgo lephelo lekgono le thathafang ka gona, fote ma re tshepisa gore Jehova o nyoko tlosa mathatha yawa ka mokana ga wona. (Bala Jesaya 65:21-25.) Phela re nyoko teya ka dintlo tsa go bafala. Re nyoko jabolela mmereko wa rune, fote re nyoko ja tsa go ja tsa go yaga mmele tsa gore manetefelo ya gona o ma kwa le ka ho sekoding. Re ka sa sa šekela ka gore rune kela bana ba rune ba ka makegela ke se sengwana. (Jes. 32:17, 18; Hezek. 34:25) Tso re di yemeleng tsa ku mahlong di bafele ka matla fote a go jiki, di nyoko segela.

13. Ke ga mayemo ya mošaga mang ya gore di ko nyaka re ghayela ka tshepo ya rune ya tsa ku mahlong?

¹³ Gana byalo lowa, ke mong yona nako ya gore re ghayele ka tso ba re tshepisang. Ke ntaba? Ka taba la gore re phela ga “dinako tsa mafelelo” fote ka mokana ga rune re na le mathatha ya gore maa ‘thathafa go lebana nawo.’ (2 Thim. 3:1) Jehova o dula a re gelepa gore re tiyisele ka go re yetetsa, a re tiyisa a boya a re thega. (Pis. 145:14) Tshepo ya rune yi re gelepa ka matlamatla mo go na le tsa go re ghula. Nakwenngwana o goga go baba gore o pasope ba mutši wago ka tso ba di gayelang. Ayitsano tsotsone di rela gore wene o nyoko fo phela ka go phetša-phetša? Dho! Jehova o go tshepisa gore o nyoko go neya tso o di gayelang—fote o nyoko neya tsona a kgotolela—Pharadeyising. (Pis. 9:18; 72:12-14) Di ka makega gore o na le bolwele bya go baba ka matla, kela o kgahlaletsegiye monaganong, kela o lwala lela la gore a o kgone le go maka selo. Ayitsano ke lephelo la gona lolowa? Awwa barena. Ga lefase la nyuwane la Modimo, tso tsa go lwala le likgu di nyoko nyamalala nkare a sanka dya ba gona. (Kut. 21:3, 4) Tshepo yone yi re gelepa gore re kgotsofale—ra sa kwate kela go kgongwela ka taba la tso di re makegelang gana byalo. Re ka tikwa re kgotsofele le mo ba kene ba sa tshware gabutši kela ra hlokofalela ke ye mongwana, re kene re kikirisana le bolwele kela le mo re gahlana le ntshitshire ya mošaga wa yona. Ke ntaba? Ka taba la gore le mo dintshitshire tso re gahlanang natso gana byalo di ka thathafa byang, re ya di tšiba tsa gore ‘tso di re hlorisang a di tseyi nako’ fote lefaseng la nyuwane, re ka sa sa hlupega ka selo.—2 Makor. 4:17, 18.

14. Re ka yi tiyisa ka mokgo mang tshepo ya rune?

¹⁴ Ka taba la gore tshepo ya rune ya tsa ku mahlong yi re gelepa gore re kgotsofale, re ka gelepa king gore re sa kamake gore tso Jehova a re tshepisang tsona ka nnete di nyoko makega? Go fo tshwana le mo di ka nyaka gore motho a yapare mafoayisi gore a thogo bona dilo tsa ku kgole gabutši, le rune di ka nyaka gore re make se sengwana gore re tiyise tshepo ya rune gore re thogo yi bona gabutši Pharadeyisi ya gore yi ku mahlong. Mo re beyisa, mo re šekela ka taba la gore a di lula go ba le tšheleta ya go lekanela gore re thogo phela, re ka nagana ka mokgo lephelo le ko bang mo re ko bang re sa sa hloka sekwetše fote go sa sa na motho wa gore wa tihlupegela. Mo nkare re šekedisa ke gore a re ya kraya mmereko wo mongwana ga tso tsa Modimo, re ka nagana ka gore dilo tsowa a yi tsona tsa gore di ka šinya di re šitisa le go yetsela mo re di lekanisa le ka mokgo lephelo le ko bang le bafele ka gona mo re šele re yenele fote re berekele Jehova sekiti sa mengwaga. (1 Thim. 6:19) Di ka makega gore mathomisong go be ntshitshire gore re ghayele ka dilo tsa ku mahlong, ke mokane ra sa šekele ka mathatha ya gana byalo. Mara mo nako yi kene yi ya, go nagana ka tso Jehova a re tshepisang tsona ku mahlong go nyoko fo ba mowalawala.

15. O tšhuta ying ga tso di hlayyeng ke Christa?

¹⁵ Re ka tšhuta se sengwana ga tso di makegeleng Christa, wa gore ke mosadi wa Dennis ye re bolabodiyeng ka yene. O re: “Ke na le bolwele bya gore bo maka gore ke lelemele. A ke kgone go sepela, di nyaka ke berekise wheelchair fote ke fetsa nako ya go tlala ke le mpetong. Ke dula ke kwa go baba ho mmeleng ka moka matšatši. Togotela yaka yi mputsiye gore a di šupetsi nkare ke nyoko fola. Mara ke tipotsa gore, ‘Motho ye aa boni tsa ku mahlong go tshwana le ka mokgo nna ke di bonang.’ Taba ya gore ke dula ke ghayela ka tshepo yaka, yi maka gore ke bebe. Lekgono, di ka nyaka gore ke tiyisele ga lefase lowa, mara ke nyoko napa ke tikwisa ka lephelo lefaseng la nyuwane!”

“BO BA TŠHABANG MODIMO A BA GAYELE SELO”

16. Ke ntaba Kgoši Dafita a ngwadiye gore bo ba tšhabang Jehova a ba “gayele selo”?

¹⁶ Phela le mo re kene re kgotsofele, re sa na re nyoko gahlana le tsa go re ghula. Bhayibele yi hlaya gore Kgoši Dafita o yye a kgwela ke kararo ya bana. Ba yye ba mo hlayela matsaka, ba mo sepela ka fase fote gwa feta mengwaga ya go tlalanyana ba mo nyaka fase ba nyaka go mmolaya. Mara, le mo a kene a tiyisele dintshitshire tsone, o yye a bolabola ka Jehova a re: “Bo ba tšhabang Modimo a ba gayele selo.” (Pis. 34:9, 10) Ke ntaba a hlayye tsotsone? Ka taba la gore, le mo re kene re le batho ba Jehova, a re ya yemela gore le phelo le fo tshwirra, mara a re kamake le ka gonyana gore re ka sa hloke tso re di gayelang. (Pis. 145:16) Fote go fo tshwana le Dafita, a re kamake gore Jehova o nyoko re gelepa gore re tiyisele mo re kene re lebanne le dintshitshire ka mokana ga tsona. Re ka dula re bebiye fote ra jabola le mo re le ga seyemo sa mošaga mang.

17. Ke ntaba o tikemisele go tšhuta sephiri sa go kgotsofala?

¹⁷ Wa tšiba, Jehova o di nyaka ka pelo yage ka moka gore o kgotsofale. (Pis. 131:1, 2) Byalo, maka so o ka se kgonang gore o tšhute sephiri sa go kgotsofala. Mo o karakara ka matla gore o titlwayetse go šupetsa gore wa leboga, o dula o tinyanafatsiye, o boya o tiyisa tshepo yago, o ko thogo hlaya o sa nghanghamele gore: “Eya, ke kgotsofele.”—Pis. 16:5, 6.