हबकुक

१ भविष्यवक्‍ता हबकुकले* दर्शनमा* पाएको सन्देश:

 २ हे यहोवा, म कतिन्जेल तपाईँलाई गुहारूँ र कतिन्जेल तपाईँ सुन्‍नुहुन्‍न?+

हिंसाबाट जोगाउनुहोस्‌ भनेर म कतिन्जेल तपाईँलाई पुकारूँ र कतिन्जेल तपाईँ बचाउनुहुन्‍न?+

 ३ तपाईँ किन मलाई गलत काम हेर्न लगाउनुहुन्छ?

तपाईँ किन अत्याचार सहनुहुन्छ?

मेरै अगाडि किन विनाश र हिंसा भइरहेको छ?

किन जताततै झैझगडा र कलह मच्चिरहेको छ?

 ४ कानुन-व्यवस्था कमजोर भएको छ,

न्याय कतै पनि छैन।

दुष्टहरूले असल मानिसलाई घेरेका छन्‌,

त्यसैले त न्यायलाई टेढो पारिएको छ।+

 ५ “राष्ट्रहरूलाई हेर र ध्यान देओ!

चकित हुँदै हेर र छक्क पर।

किनकि तिमीहरूको पालामा यस्तो घटना घट्‌नेछ

कि कसैले तिमीहरूलाई त्यो सुनायो भने पनि तिमीहरूले पत्याउनेछैनौ।+

 ६ किनकि हेर, म कल्दियालीहरूलाई खडा गर्नेछु,+

जुन अत्यन्तै उग्र र क्रूर जाति हो।

तिनीहरू पृथ्वीको वल्लो छेउदेखि पल्लो छेउसम्म जान्छन्‌

र अरूको घर कब्जा गर्छन्‌।+

 ७ तिनीहरू भयानक र डरलाग्दा छन्‌।

तिनीहरू आफ्नो लागि आफै कानुन बनाउँछन्‌ र अख्तियार चलाउँछन्‌।+

 ८ तिनीहरूका घोडाहरू चितुवाभन्दा छिटो दगुर्छन्‌,

तिनीहरू राती निस्कने ब्वाँसाहरूभन्दा हिंस्रक छन्‌।+

तिनीहरूका युद्धका घोडाहरू सर्पट मार्दै आउँछन्‌।

तिनीहरूका घोडाहरू टाढा-टाढादेखि आउँछन्‌।

सिकार पक्रन चीलले जमिनतिर वेग हानेझैँ तिनीहरू वेग हान्छन्‌।+

 ९ तिनीहरू सबै हिंसा मच्चाउन तम्सिन्छन्‌।+

तिनीहरू एकसाथ भेला भएर पूर्वीय बतासझैँ आउँछन्‌।+

तिनीहरूले कैदीहरूलाई बालुवा बटुलेझैँ बटुल्छन्‌।

१० तिनीहरू राजाहरूलाई हाँसोमा उडाउँछन्‌

अनि उच्च अधिकारीहरूको खिसी गर्छन्‌।+

पर्खालले घेरिएका ठाउँहरू देख्दा तिनीहरूलाई हाँस उठ्‌छ।+

तिनीहरू माटोको ढिस्को बनाएर त्यसलाई कब्जा गर्छन्‌।

११ तिनीहरू बतासजस्तै हुइँकिन्छन्‌ र देश पार गरेर जान्छन्‌

तर तिनीहरू दोषी ठहरिनेछन्‌+

किनकि तिनीहरू आफ्नो शक्‍तिको श्रेय आफ्नो देवतालाई दिन्छन्‌।”*+

१२ हे यहोवा, के तपाईँ अनन्त कालदेखि हुनुहुन्‍न र?+

हे मेरा परमेश्‍वर, मेरा पवित्र परमेश्‍वर, तपाईँको अन्त कहिल्यै हुँदैन।*+

हे यहोवा, इन्साफ गर्न तपाईँले तिनीहरूलाई नियुक्‍त गर्नुभयो।

हे मेरा चट्टान,+ हामीलाई सजाय दिन* तपाईँले तिनीहरूलाई खडा गर्नुभयो।+

१३ तपाईँका आँखाले दुष्ट कुरा हेर्न सक्दैनन्‌ किनकि ती अत्यन्तै पवित्र छन्‌।

तपाईँ दुष्टता सहन सक्नुहुन्‍न।+

त्यसोभए छली मानिसहरूलाई तपाईँ किन सहनुहुन्छ?+

अनि दुष्ट मानिसले आफूभन्दा धर्मी मानिसलाई बरबाद पार्दा तपाईँ किन चुप लागिरहनुहुन्छ?+

१४ तपाईँ किन मानिसलाई समुद्रको माछाजस्तै तुल्याउनुहुन्छ,

कुनै शासक नभएको घस्रने जन्तुजस्तै तुल्याउनुहुन्छ?

१५ उसले* यी सबैलाई बल्छीले तान्छ।

उसले तिनीहरूलाई ठूलो जालमा पक्रन्छ।

माछा मार्ने आफ्नो जालमा उसले तिनीहरूलाई जम्मा गर्छ।

अनि ऊ निकै रमाउँछ।+

१६ त्यसैकारण उसले माछा मार्ने आफ्नो जालको लागि भेटी चढाउँछ

अनि जालको नाममा बलि चढाउँछ।*

किनकि ती जालहरूले गर्दा नै उसले पोसिलो* आहार पाउँछ

अनि उत्तम भोजन खान पाउँछ।

१७ के उसले आफ्नो जाल भर्ने र रित्याउने गरिरहन्छ?*

के उसले दयामाया नदेखाई जातिजातिका मानिसहरूलाई मारिरहन्छ?+

२ म आफ्नो चौकीमा उभिरहनेछु+

अनि म किल्लामा पर्खिरहनेछु।

उहाँले ममार्फत के भन्‍नुहुनेछ भनी थाह पाउन

अनि मलाई सुधारिँदा मैले के जवाफ दिनेछु भनी जान्‍न म उहाँको बाटो हेर्नेछु।

 २ तब यहोवाले मलाई यस्तो जवाफ दिनुभयो:

“त्यो दर्शन* लेख, त्यसलाई पाटीमा स्पष्टसित लेखिराख+

ताकि त्यो पढेर सुनाउनेले सजिलै* पढ्‌न सकोस्‌।+

 ३ किनकि त्यो दर्शन तोकिएको समयमा पूरा हुनेछ

अनि त्यो पूरा हुने समय नजिकै आउँदै छ र त्यो झूटो साबित हुनेछैन।

त्यसले ढिला गऱ्‍यो* भने पनि त्यसको बाटो हेर्दै बस*+

किनकि त्यो पक्कै पूरा हुनेछ।

त्यसले ढिला गर्नेछैन!

 ४ त्यस मानिसलाई हेर, जो घमन्डले फुलेको छ;

उसको मन सोझो छैन।

तर धर्मी मानिस आफ्नो विश्‍वासद्वारा जिउनेछ।+

 ५ साँच्चै, मद्यले मानिसलाई धोका दिन्छ,

त्यसैले घमन्डीले आफ्नो लक्ष्य हासिल गर्न सक्नेछैन।

त्यसले आफ्नो भोक चिहानजस्तै* बढाउँछ;

मृत्युलाई जस्तै त्यसलाई कहिल्यै तृप्त पार्न सकिँदैन।

त्यसले जातिजातिका सबै मानिसलाई जम्मा गरिरहन्छ

अनि सबै जातिका मानिसलाई आफ्नो लागि भेला गरिरहन्छ।+

 ६ के यी सबैले त्यसको विरुद्धमा आहान भन्‍नेछैनन्‌, अड्‌को थाप्नेछैनन्‌ अनि त्यसलाई व्यङ्‌ग्य हान्‍नेछैनन्‌?+

तिनीहरूले भन्‍नेछन्‌:

‘धिक्कार छ त्यसलाई, जसले अरूको सम्पत्ति थुपारेर त्यसलाई आफ्नो बनाउँछ

अनि आफ्नो ऋण बढाउँदै लैजान्छ।

तर कहिलेसम्म?

 ७ जो-जोसँग तैँले ऋण लिएको छस्‌, तिनीहरू तँविरुद्ध एक्कासि उठ्‌नेछैनन्‌ र?

तिनीहरू जाग्नेछन्‌ अनि तँलाई बेसरी हल्लाउनेछन्‌

अनि तँ तिनीहरूको लागि लुटको मालसरि हुनेछस्‌।+

 ८ तैँले धेरै राष्ट्रलाई लुटिस्‌।

त्यसैले तिनीहरूका बाँकी मानिसहरूले तँलाई लुट्‌नेछन्‌।+

किनकि तैँले मानिसहरूको रगत बगाइस्‌

अनि पृथ्वीमाथि, सहरहरूमाथि

र त्यहाँ रहनेहरूमाथि हिंसा मच्चाइस्‌।+

 ९ धिक्कार छ त्यसलाई, जसले बेइमानी गरेर आफ्नो घर भर्छ

अनि विपत्तिबाट जोगिन

आफ्नो गुँड अग्लो ठाउँमा बनाउँछ।

१० तैँले रचेको षड्‌यन्त्रले गर्दा तेरो घर लाजमा परेको छ।

थुप्रै मानिसको विनाश गरेर तैँले आफ्नै विरुद्धमा पाप गरेको छस्‌।+

११ भित्ताबाट ढुङ्‌गा कराउनेछ

अनि दलिनबाट काठले त्यसलाई जवाफ दिनेछ।

१२ धिक्कार छ त्यसलाई, जसले रक्‍तपात गरेर सहर निर्माण गर्छ

अनि दुष्ट काम गरेर नगर स्थापना गर्छ।

१३ हेर! आगोमा भस्म भएर जाने कुराको लागि मानिसहरू मरिमेटी काम गर्छन्‌।

जातिजातिका मानिसहरूले व्यर्थको कुराको लागि आफूलाई थकाउँछन्‌।

के सेनाहरूका यहोवाले गर्दा नै त्यसो भएको होइन र?+

१४ किनकि समुद्र पानीले भरिएझैँ

पृथ्वी यहोवाको महिमाको ज्ञानले भरिनेछ।+

१५ धिक्कार छ त्यसलाई, जसले आफ्ना साथीहरूलाई पिउने कुरा दिन्छ

अनि तिनीहरूलाई मत्ताउन त्यसमा रिस र क्रोध मिसाइदिन्छ।

त्यसले तिनीहरूको नग्नता हेर्न त्यसो गर्छ।

१६ तँ महिमाको साटो अनादरले भरिनेछस्‌।

तैँले पनि पिउनेछस्‌ र खतना नभएको आफ्नो अवस्था देखाउनेछस्‌।*

यहोवाको दायाँ हातमा भएको प्यालाबाट पिउने तेरो पालो आइसकेको छ+

अनि तेरो महिमालाई लाजले ढाक्नेछ।

१७ लेबनानमाथि तैँले गरेको हिंसाले तँलाई घेर्नेछ

अनि तैँले जनावरहरूलाई भयभीत पार्न जुन विनाश ल्याइस्‌, त्यही विनाश तँमाथि पनि आइपर्नेछ।

किनकि तैँले मानिसहरूको रगत बगाइस्‌

अनि पृथ्वीमा, सहरहरूमा

र त्यहाँ रहनेहरूमाझ हिंसा मच्चाइस्‌।+

१८ मूर्ति बनाउनेलाई त्यो मूर्तिबाट के फाइदा हुन्छ र,

जुन ऊ आफैले बनाएको हो?

धातुको मूर्तिबाट र झूटको शिक्षकबाट के लाभ हुन्छ र?

तैपनि त्यसलाई बनाउनेले त्यसमाथि भरोसा गर्छ

अनि बोल्न नसक्ने व्यर्थका देवताहरू बनाउँछ।+

१९ धिक्कार छ त्यसलाई, जसले काठको टुक्रालाई “जाग्नुहोस्‌!” भन्छ

अनि बोल्न नसक्ने ढुङ्‌गालाई “उठ्‌नुहोस्‌! हामीलाई सिकाउनुहोस्‌!” भन्छ।

हेर! त्यसलाई सुन र चाँदीले मोहोरिएको छ+

अनि त्यसमा सास छँदै छैन।+

२० तर यहोवा आफ्नो पवित्र मन्दिरमा हुनुहुन्छ।+

हे सारा पृथ्वी! उहाँको अगाडि चुपचाप रहो।’”+

३ भविष्यवक्‍ता हबकुकले शोकगीतको रूपमा चढाएको प्रार्थना:

 २ हे यहोवा, मैले तपाईँबारे एउटा कुरा सुनेको छु।

हे यहोवा, तपाईँका कामहरूले गर्दा ममा भय र श्रद्धा जागेको छ।

हाम्रो पालामा* ती पूरा गर्नुहोस्‌!

हाम्रो पालामा* त्यसबारे थाह दिनुहोस्‌।

विपत्तिको बेलामा कृपा देखाउन नभुल्नुहोस्‌।+

 ३ परमेश्‍वर तेमानबाट आउनुभयो,

पवित्र परमेश्‍वर पारान डाँडाबाट आउनुभयो।+ (सेला)*

उहाँको वैभवले आकाशलाई ढाक्यो+

अनि पृथ्वीचाहिँ उहाँको प्रशंसाले भरियो।

 ४ उहाँको चमक दिनको उज्यालोजस्तै थियो।+

उहाँको हातबाट दुई वटा किरण निस्कियो,

जसमा उहाँको शक्‍ति लुकेको थियो।

 ५ महामारी उहाँको अघिअघि गइरहेको थियो+

अनि निस्लोट ज्वरो उहाँको पछिपछि आइरहेको थियो।

 ६ उहाँ टक्क अडिनुभयो र पृथ्वीलाई हल्लाउनुभयो।+

उहाँको एक हेराइले राष्ट्रहरू डरले उफ्रिए।+

अनन्त कालका पहाडहरू चकनाचुर भए

अनि प्राचीनकालका डाँडाहरू निहुरिए।+

पहिलेदेखि नै उहाँका मार्गहरू यस्तै छन्‌।

 ७ कुसानको पालमा विपत्ति आएको मैले देखेँ।

मिद्यानको पालका कपडाहरू काँपिरहेका थिए।+

 ८ हे यहोवा, के तपाईँको रिस नदीहरूविरुद्ध हो?

के तपाईँको क्रोध नदीहरूविरुद्ध दन्किएको हो?

वा तपाईँ समुद्रदेखि क्रोधित हुनुभएको हो?+

किनकि तपाईँ आफ्ना घोडाहरूमा सवार हुनुभयो;+

तपाईँका रथहरू विजयी भए।*+

 ९ तपाईँले आफ्नो धनु निकाल्नुभएको छ र तपाईँ काँड हान्‍न तयार हुनुहुन्छ।

शपथ पूरा गर्नलाई छडी* तयार छ।* (सेला)

तपाईँले पृथ्वीलाई नदीहरूले चिर्नुभयो।

१० तपाईँलाई देखेर पहाडहरू पीडाले छटपटाए।+

मुसलधारे पानी परेर भल बग्यो।

जमिनमुनि पानीको मूल ठूलो स्वरले गर्जियो।+

त्यसले आफ्नो हात माथि उचाल्यो।

११ सूर्य र चन्द्रमा आफ्नो उच्च ठाउँमा टक्क अडिरहे।+

तपाईँका काँडहरू प्रकाशजस्तै अघि बढे।+

तपाईँको भालाको चमक बिजुलीको चमकजस्तै तेजिलो थियो।

१२ क्रोधित हुँदै तपाईँ धर्तीमा पाइला टेक्दै जानुभयो।

आफ्नो रिसमा तपाईँले राष्ट्रहरूलाई कुल्चनुभयो।*

१३ तपाईँ आफ्ना मानिसहरूको उद्धार गर्न, आफूले अभिषेक गरेको जनलाई बचाउन निस्कनुभयो।

दुष्टको घरानाको शासकलाई तपाईँले कुल्चीमिल्ची पार्नुभयो।

तपाईँले त्यसलाई जगदेखि टुप्पोसम्मै* उदाङ्‌ग पार्नुभयो। (सेला)

१४ त्यसका योद्धाहरू मलाई तितरबितर पार्न आँधीहुरीजस्तै आउँदा

तपाईँले तिनीहरूको हतियार* तिनीहरूकै टाउकोमा रोपिदिनुभयो।

दुःखमा परेकाहरूलाई सुटुक्क नाश गर्न पाउँदा तिनीहरू साह्रै रमाउँथे।

१५ तपाईँ समुद्रमाथि, उर्लिरहेको विशाल सागरमाथि

आफ्ना घोडाहरूमा सवार भएर आउनुभयो।

१६ त्यो सुनेर म काँप्न थालेँ।*

मैले सुनेको आवाजले गर्दा मेरा ओठ थरथराए।

मेरा हड्डीहरू मक्किए;+

मेरा खुट्टाहरू काँप्न थाले।

तर म विनाशको दिनलाई चुपचाप पर्खिरहन्छु+

किनकि त्यो विनाश हामीलाई आक्रमण गर्नेहरूमाथि आइपर्नेछ।

१७ अन्जिरको रूखमा फूल नलागे पनि,

अङ्‌गुरको बोटमा फल नलागे पनि,

जैतुनको रूखले फल नदिए पनि

अनि खेतले* उब्जनी नदिए पनि,

खोरमा एउटै भेडाबाख्रा बाँकी नरहे पनि

अनि गोठमा कुनै वस्तुभाउ बाँकी नरहे पनि

१८ म भने यहोवालाई सम्झेर रमाउनेछु;

मेरो उद्धार गर्नुहुने परमेश्‍वरलाई सम्झेर म आनन्दित हुनेछु।+

१९ ब्रह्‍माण्डका मालिक यहोवा नै मेरो बल हुनुहुन्छ;+

उहाँले मेरो खुट्टालाई हरिणको खुट्टाजस्तै बनाउनुहुनेछ

र मलाई अग्ला-अग्ला ठाउँहरूमा हिँडाउनुहुनेछ।+

निर्देशकलाई: मेरो तारे बाजा बजाएर गाउने।