Zimene Anthu Achita Poyesa Kukondweretsa Mulungu

“SIPANAKHALEPO gulu la anthu limene likamachita zinthu siliganizira n’komwe za Mulungu, koma nthaŵi zambiri amam’ganizira kuti Mulunguyo ndiye woyendetsa zinthu ndipo ndiye analenga zinthuzo. Izi zili choncho ngakhale pakati pa magulu a anthu amene safuna kulimbikitsa anthu kukhulupirira Mulungu.” Anatero John Bowker m’buku lake lakuti God​—A Brief History (Mbiri Yachidule ya Kukhulupirira Mulungu). Nthaŵi zonse anthu akhala akuyesayesa kuti azindikire Mulungu ndi kumukondweretsa, ndipo akhala akuchita zimenezi m’njira zosiyanasiyana. Anthu ambiri padziko lonse amafuna ndi mtima wonse kukondweretsa Mulungu. Ndipo ndi zoona kuti iwo akuchita izi mosiyanasiyana malinga ndi zikhulupiriro zawo.

Anthu ena amakhulupirira kuti chinthu chofunika kuti munthu akondweretse Mulungu ndicho kukhala ndi makhalidwe abwino basi. Enanso amaganiza kuti amakondweretsa Mulungu mwa kuchitira osauka zinthu zachifundo. Palinso anthu ambiri amene amaona miyambo ya chipembedzo kukhala yofunika kwambiri.

Ndiyeno pali anthu ena amene amakhulupirira kuti Mulungu n’ngosatheka kum’dziŵa kapena n’ngotanganidwa kwambiri ndi zinthu zina moti sangapeze nthaŵi yoganizira anthu wamba. Epicurus wa ku Greece wakale, amene anaphunzira kwambiri nzeru za anthu, akuti ankakhulupirira kuti ‘milungu sikhudzidwa ndi zimene anthu amachita ndipo singathandize kapena kuvulaza munthu m’njira iliyonse.’ Komabe, anthu ambiri amaganizo ameneŵa ndi opembedza. Ndipo ena amafika mpaka popereka nsembe ndiponso kuchita miyambo ina n’cholinga chokondweretsa makolo awo amene anafa.

Kodi inu maganizo anu ndi otani? Kodi Mulungu amaonadi zimene tikuyesetsa kuchita pofuna kuti tim’kondweretse? Kodi n’zotheka kuti tichite zinthu zom’khudza mtima Mulungu ndi kum’kondweretsa?

[Mawu a Chithunzi patsamba 2]

COVER: Courtesy of ROE/​Anglo-Australian Observatory, photograph by David Malin