Kodi Kupemphera Kungakuthandizeni Bwanji?

Munthu wina dzina lake Pamela anadwala kwambiri ndipo anapita kuchipatala. Koma anapempheranso kwa Mulungu kuti amupatse mphamvu yomuthandiza kupirira vutoli. Kodi kupempherako kunamuthandiza?

Pamela anapezeka ndi khansa ndipo anati: “Nthawi zambiri ndinkachita mantha ndikamalandira mankhwala a khansa. Koma ndikapemphera kwa Yehova Mulungu mtima unkakhala m’malo ndipo ndinkatha kuganiza bwino. Ndimavutikabe ndi ululu koma pemphero limandithandiza kuona zinthu moyenera. Anthu akandifunsa kuti, ‘Muli bwanji?’ ndimayankha kuti, ‘Sindikupeza bwino koma ndikusangalala.’”

Koma sitiyenera kudikira mpaka titakumana ndi vuto lalikulu kuti tipemphere. Tonsefe timakumana ndi mavuto, kaya aakulu kapena aang’ono, ndipo timafunika kuthandizidwa kuti tilimbane ndi mavutowo. Koma kodi kupemphera kungathandizedi?

Baibulo limanena kuti: “Umutulire Yehova nkhawa zako, ndipo iye adzakuchirikiza. Sadzalola kuti wolungama agwedezeke.” (Salimo 55:22) Lembali ndi lolimbikitsa kwambiri. Koma kodi kupemphera kungakuthandizeni bwanji? Mukamapemphera kwa Mulungu m’njira yovomerezeka, iye adzakupatsani zinthu zimene zingakuthandizeni kulimbana ndi mavuto anu.—Onani bokosi lakuti “Zimene Mungapeze Chifukwa Chopemphera.”

Zimene Mungapeze Chifukwa Chopemphera

Mtendere wamumtima

“Zopempha zanu zidziwike kwa Mulungu. Mukatero, mtendere wa Mulungu umene umaposa kuganiza mozama kulikonse, udzateteza mitima yanu ndi maganizo anu mwa Khristu Yesu.” (Afilipi 4:6, 7) Mukamafotokozera Mulungu nkhawa zanu iye adzakuthandizani kuti mtima wanu ukhale m’malo komanso kuti muzichita zinthu mwanzeru mukakumana ndi mavuto.

Nzeru yochokera kwa Mulungu

“Ngati wina akusowa nzeru, azipempha kwa Mulungu, ndipo adzamupatsa, popeza iye amapereka mowolowa manja kwa onse ndiponso amapereka mosatonza.” (Yakobo 1:5) Nthawi zina sitisankha zinthu mwanzeru tikapanikizika. Koma tikamapemphera kuti Mulungu atipatse nzeru, angatikumbutse mfundo zambiri zothandiza zopezeka m’Mawu ake Baibulo.

Mphamvu komanso chilimbikitso

“Pa zinthu zonse, ndimapeza mphamvu kuchokera kwa iye amene amandipatsa mphamvu.” (Afilipi 4:13) Popeza Yehova ndi Mulungu wamphamvuyonse, angakupatseni mphamvu zimene mumafunika kuti mulimbane ndi mavuto anu kapena kuwapirira. (Yesaya 40:29) Baibulo limatchulanso Yehova kuti ndi “Mulungu amene amatitonthoza m’njira iliyonse.” Iye angatilimbikitse “m’masautso athu onse.”—2 Akorinto 1:3, 4.