MFUNDO ZOTHANDIZA MABANJA | KULERA ANA

Mmene Mungathandizire Ana Anu kuti Asasokonezeke Ndi Nkhani Zoopsa

Masiku ano nkhani zoopsa zikumapezeka paliponse. Mwachitsanzo, zikumaonetsedwa pa TV, zikumapezeka pafoni, pamatabuleti komanso pakompyuta.

Nawonso ana amaonera nkhani zimenezi.

Ndiye kodi mungathandize bwanji ana anu kuti asasokonezeke ndi nkhani zimenezi?

Kodi nkhani zimenezi zimakhudza bwanji ana?

Ana ambiri amakhudzidwa kwambiri ndi nkhani zimene amva kapena kuonera. Komabe, pali ana ena amene sasonyeza mmene zawakhudzira.a Anawa angasokonezeke kwambiri akaona kuti makolo awo akumakhala ndi nkhawa kwambiri chifukwa cha nkhanizi.
Ana angamaganize zolakwika zokhudza nkhani zimene aonera. Mwachitsanzo, ena amaganiza kuti zimene aonazo zichitikira banja lawo. Komanso ana aang’ono omwe aonera vidiyo inayake yoopsa mobwerezabwereza, angayambe kumaganiza kuti zinthuzo zikungochitika mobwerezabwereza.
Ana ena sangadziwe kuti nthawi zina olemba nkhani amakokomeza. Iwo sangadziwe kuti makampani ofalitsa nkhani amapeza phindu lalikulu ngati anthu ambiri akuonera nkhani zawo. Choncho, akhoza kukokomeza nkhanizo n’cholinga choti akope anthu ambiri.

Kodi mungathandize bwanji ana anu ngati ayamba kuda nkhawa ndi nkhani zimene aonera?

Muzionetsetsa kuti ana anu sakuonera kwambiri nkhani zoopsa. Zimenezi sizikutanthauza kuti ana anu asamadziwe zomwe zikuchitika padzikoli. Choncho, muziteteza ana anu kuti asapitirize kuwonera kapena kumvetsera nkhani zoopsa zomwe zikuonetsedwa mobwerezabwereza chifukwa sizingawathandize.

“Nthawi zina ine ndi mwamuna wanga timakambirana zokhudza nkhani inayake yomwe yachitika osaganizira kuti zikhudza bwanji ana anthu omwe akutimvetsera.”—Maria.

Mfundo ya m’Baibulo: “Nkhawa mumtima mwa munthu ndi imene imauweramitsa.”—Miyambo 12:25.
Muziwamvetsera modekha komanso muziwayankha mogwirizana ndi msinkhu wawo. Ngati mwana wanu akuvutika kufotokoza zinthu zoopsa zimene zachitika, mungamuuze kuti ajambule zimene akufuna kunenazo. Ngati pali zinthu zimene zikumudetsa nkhawa, muzimufotokozera m’njira yoti amvetse. Komabe, muyenera kupewa kukambirana naye zinthu zimene sakufunikira kudziwa.

“Mwana wathu amayamba kumva bwino tikamuuza kuti atifotokozere zimene zachitika, n’kumamumvetsera. Ndimaona kuti sizimathandiza tikamuuza kuti, ‘Ndi mmene zinthu ziliri masiku ano, tikungofunika kuzizolowera basi.’”—Sarahi.

Mfundo ya m’Baibulo: “Munthu aliyense akhale wofulumira kumva, wodekha polankhula.”—Yakobo 1:19.
Muzithandiza mwana wanu kukhala ndi maganizo oyenera. Mwachitsanzo, lipoti lonena za anthu omwe agwidwa ndi zigawenga lingachititse kuti anthu ayambe kuganiza kuti zomwe aonazo zikhoza kuchitika. Choncho muzifotokozera ana anu zinthu zimene mwachita kuti iwo akhale otetezeka, komanso muzikumbukira kuti nkhani zoopsa zimaulutsidwa pa TV kapena pa wailesi chifukwa choti sizimachitikachitika osati chifukwa choti ndi zofala.

“Muzithandiza ana anu kuona zinthu moyenera. Nthawi zambiri anthu amakhudzidwa ndi nkhani zimene aonera akaziganizira kwambiri.Choncho muzithandiza ana anu kuti aziganizira zinthu zabwino ndipo zimenezi zingawathandize kuti azisangalala.”—Lourdes.

Mfundo ya m’Baibulo: “Mtima wa munthu wanzeru umamuchititsa kuti asonyeze kuzindikira ndi pakamwa pake, ndipo umachititsa milomo yake kutulutsa mawu okopa.”—Miyambo 16:23.

a Ana aang’ono akakhala ndi nkhawa kwambiri amakodza pogona, amaopa kupita kusukulu komanso safuna kusiyana ndi makolo awo.

Kodi mungatani ngati mwana wanu waona zinthu zoopsa zikuchitika?

Pa 7 May 2019, anyamata awiri anaombera ndi kupha mwana wasukulu mmodzi komanso kuvulaza ana ena 8, pasukulu ina ku Highlands Ranch, Colorado, U.S.A. Jack wazaka 9, amene pa nthawiyo ankaphunzira pa sukuluyi, analipo pa tsiku limene zimenezi zinkachitika. Bambo ake a Ben ndi mayi ake a Casey, akufotokoza zimene anachita pothandiza mwana wawo Jack pambuyo pa zimenezi.

Kodi mwana wanu anakhudzidwa bwanji ndi zimenezi?

Casey: Kwa miyezi ingapo zimenezi zitachitika, Jack ankangoopa chilichonse.

Ben: Poyamba Jack anali mwana womasuka kwambiri, koma zimenezi zitangochitika anayamba kukhala ndi nkhawa moti sankafuna kusiyana ndi makolo akefe. Iye ankachita zimenezi makamaka pakachitika zinazake zomwe zamukumbutsa zomwe anaona zija. Jack anayamba kumangoganiza kuti zinazake zoipa zikhoza kuchitika ndipo zimenezi ndi zomveka tikaganizira zinthu zimene anaona.

Kodi munaonera nkhani yokhudza zimenezi?

Casey: Inde, poyamba tonse atatu tinkaonera nkhani zokhudza kuomberako kwa pafupifupi mlungu umodzi. Kenako ine ndi mwamuna wanga tinazindikira kuti kuonera nkhanizi sikukutithandiza kuiwala nkhaniyo. M’malomwake, kunkachititsa kuti Jack azingoganizira zimene zinachitikazo komanso tonse atatu sitinkasangalala.

Kodi ndi zinthu ziti zimene mumaona kuti zinathandiza Jack kuti asiye kuda nkhawa?

Casey: Timaona kuti kuchita masewera olimbitsa thupi kunathandiza Jack kuti asiye kuda nkhawa ndipo tinkayesetsa kuchita zimenezi tsiku lililonse. Chinthu chinanso chimene chinathandiza kwambiri, ndi kumumvetsera akamafuna kutilankhula. Ndinazindikira kuti tikangotsala pang’ono kukagona pa nthawi yomwe sikukhala phokoso lambiri, Jack ankatifotokozera zakukhosi kwake. Nthawi zina tinkatha kukambirana naye kwa ola lathunthu ndipo zimenezi zinkamuthandiza kuti ayambe kumva bwino. Jack ankadziwa kuti sangathane nazo payekha.

Ndi malangizo otani amene mungapereke kwa makolo amene ana awo akumana ndi zinthu zoopsa?

Ben: N’zofunikira kuti ana aziona kuti ndi otetezeka m’banja zinthu zoopsa zisanawachitikire, choncho akadzakumana ndi zinthu zoopsa simudzavutika kuwathandiza.

Casey: Mwana aliyense amasiyana ndi mnzake. Mwana wina angakhudzidwe kwambiri ndi zinthu zoopsa kusiyana ndi mnzake. Muziyesetsa kuchita zonse zomwe mungathe poteteza ana anu ngakhale kuti anthu ena angaganize kuti mukukokomeza. Muzikondana kwambiri m’banja lanu kuti ana anu aziona kuti ndi otetezeka akakhala pakhomo ngakhale kuti dzikoli ndi loopsa.