Moyo ndi Uminisitala za Yesu

Fanizo la Matalente

MWINAMWAKE Yesu adakali kunyumba ya Zakeyu, kumene waimirira pa ulendo wake wopita ku Yerusalemu. Ophunzira ake akhulupirira kuti pamene afika ku Yerusalemu, iye adzalengeza kuti ali Mesiyayo ndi kukhazikitsa Ufumu wake. Kuti awongolere lingaliro limeneli ndi kusonyeza kuti Ufumuwo udakali kutali, Yesu akupereka fanizo.

“Munthu wa fuko lomveka,” iye akufotokoza motero, “ananka ku dziko lakutali, kudzilandirira yekha ufumu, ndi kubwerako.” Yesu ndiye ‘munthu wa fuko lomvekayo,’ ndipo kumwamba ndiko “dziko lakutali.” Pamene afika kumeneko, Atate wake adzampatsa mphamvu ya kuchita ufumu.

Komabe, asananyamuke, munthu wa fuko lomvekayo akuitana akapolo khumi ndi kupatsa yense wa iwo ndalama ya siliva, akumati: “Chita nazoni malonda kufikira ndibweranso.” Akapolo khumiwo m’kukwaniritsidwa koyambirira amaimira ophunzira oyambirira a Yesu. M’kukwaniritsidwa kokulirapo, iwo amachitira chithunzi onse oyembekezera kukhala oloŵa nyumba limodzi naye mu Ufumu wakumwamba.

Matalente ndiwo ndalama za siliva zamtengo wapatali, lirilonse limakwanira chifupifupi malipiro a miyezi itatu a wogwira ntchito pa fama. Koma kodi matelente amaimira chiyani? Ndipo ndi malonda a mtundu wanji amene akapolowo afunikira kuchita nawo?

Matalentewo amaimira zinthu zofunika zimene ophunzira obadwa ndi mzimu angagwiritsire ntchito kutulutsa oloŵa nyumba owonjezereka a Ufumu wakumwamba kufikira kudza kwa Yesu monga Mfumu mu Ufumu wolonjezedwawo. Pambuyo pa chiukiriro chake ndi kuwonekera kwa ophunzira ake, iye anawapatsa matalente ophiphiritsira opangira ophunzira owonjezereka ndipo motero kuwonjezera ku kagulu ka Ufumu wakumwamba.

“Koma,” Yesu akupitiriza, “mfulu za pamudzi pake zinamuda [munthu wa fuko lomvekayo], nizituma akazembe amtsate m’mbuyo ndi kunena, Ife sitifuna munthuyu akhale mfumu yathu.” Mfulu za pamudzizo ndizo Aisrayeli, kapena Ayuda, kusaphatikizapo ophunzira ake. Pambuyo pa kunyamuka kwa Yesu kupita kumwamba, Ayuda amenewa mwakuzunza ophunzira ake anadziŵitsa kuti sanamfune iye kukhala mfumu yawo. M’njira imeneyi iwo anali kuchita ngati mfulu za pamudzizo zimene zinatuma akazembe.

Kodi akapolo khumiwo akugwiritsira ntchito motani matalente awo? Yesu akulongosola: “Ndipo kunali, pakubwera iye, atalandira ufumuwo, anati aitanidwe kwa iye akapolo aja, amene adawapatsa ndalamazo, kuti adziŵe umo anapindulira pochita malonda. Ndipo anafika woyamba, nanena, Mbuye ndalama yanu inachita niwonjeza ndalama khumi. Ndipo anati kwa iye, chabwino, kapolo wabwino iwe; popeza unakhala wokhulupirika m’chaching’onong’ono, khala nawo ulamuliro pa midzi khumi. Ndipo anadza wachiŵiri, nanena, Mbuye, ndalama yanu yapindula ndalama zisanu. Ndipo anati kwa iyenso, khala iwenso woweruza midzi isanu.”

Kapolo wokhala ndi matalente khumi amachitira chithunzi bungwe, kapena kagulu, ka ophunzira kuyambira pa Pentekoste wa 33 C.E. kufikira tsopano lino kamene kamaphatikizapo atumwi. Awo amene anapindula matalente asanu nawonso amaimira kagulu kena mkati mwa nyengo imodzimodziyo kamene, malinga ndi mwaŵi ndi maluso awo, amawonjezera chuma cha mfumu yawo pa dziko lapansi. Magulu onse aŵiriwo amalalikira mbiri yabwino mwachangu, ndipo monga chotulukapo, anthu ambiri owona mtima amakhala Akristu. Asanu ndi anayi a akapolowo anachita malonda achipambano ndi kuchulukitsa chuma chawo.

“Ndipo,” Yesu akupitirizabe, “wina anadza, nanena, Mbuye, tawonani, siyi ndalama yanu, ndaisunga m’kansalu; pakuti ndinakuwopani, popeza inu ndinu munthu wowuma mtima: Munyamula chimene simunachiika pansi, mututa chimene simunachifesa. Ananena kwa iye, pakamwa pako ndikuweruza, kapolo woipa iwe. Unadziŵa kuti ine ndine munthu wowuma mtima, wonyamula chimene sindinachiika, ndi wotuta chimene sindinachifesa; ndipo sunapereka bwanji ndalama yanga pokongoletsa, ndipo ine pakudza ndikadaitenga ndi phindu lake? Ndipo anati kwa iwo akuimirirapo, mchotsereni ndalamayo, nimuipatse kwa iye wakukhala nazo ndalama khumi.”

Kutayikiridwa talente lophiphiritsiralo kumatanthauza kutayikiridwa malo mu Ufumu wakumwamba kwa kapolo woipayo. Inde, iye watayikiridwa mwaŵi wa kulamulira, kunena kwake titero, pa mizinda khumi kapena isanu. Tawonaninso, kuti kapoloyo sakutchedwa woipa chifukwa cha kuchita choipa chirichonse koma, m’malomwake, chifukwa cha kulephera kugwira ntchito kuti awonjezere chuma cha ufumu wa mbuye wake.

Pamene talente la kapolo woipayo  lipatsidwa  kwa kapolo woyambirira, chitsutso chikuperekedwa: “Mbuye, ali nazo ndalama khumi.” Komabe, Yesu akuyankha kuti: “Kwa yense wakukhala nacho kudzapatsidwa; koma kwa iye amene alibe kanthu, chingakhale chimene ali nacho chidzachotsedwa. Koma adani anga aja osafuna kuti ndidzakhale mfumu yawo, bwerani nawo kuno, nimuwaphe pamaso panga.” Luka 19:11-27; Mateyu 28:19, 20.

◆ Kodi nchiyani chimene chichititsa Yesu kupereka fanizo la matalente?

◆ Kodi munthu wa fuko lomvekayo ndani, ndipo ndi dziko liti lomwe iye akupitako?

◆ Kodi mfulu za pamudzizo ndani, ndipo ndimotani mmene iwo akusonyezera udani wawo?

◆ Kodi akapolowo ndani, ndipo matalente akuimira chiyani?

◆ Nchifukwa ninji kapolo mmodzi akutchedwa woipa, ndipo kutayikiridwa kwa talente lake kumatanthauzanji?