Kodi Tingatani Kuti Mabanja Athu Akhale Olimba Mwauzimu?

¹ Tikuyamikira mabanja achikristu chifukwa ‘chosonyeza kudzipereka kwaumulungu m’mabanja awo.’ (1 Tim. 5:4, NW) Koma chifukwa chakuti zinthu zoipa zimene zingafooketse chikhulupiriro chathu zachuluka, mabanja akufunika kuyesetsa kuti akhale olimba mwauzimu. Kodi tingachite motani zimenezi?

² Tsanzirani Kristu Monga Mutu: Mitu ya mabanja ifunika kutsanzira Yesu Kristu posamalira ntchito yawo yolimbitsa mabanja awo. Yesu atasonyeza kutikonda mwa imfa yake ya nsembe, anapitiriza ‘kudyetsa ndi kusamalira mpingo. (Aef. 5:25-29, NW) Makolo achikondi amatsatira chitsanzo cha chikondi chimenechi mwa kusamalira zinthu zauzimu zimene mabanja awo amafuna. Zimenezi ndi zinthu monga kuchita phunziro la Baibulo la banja mlungu uliwonse, kukambirana zinthu zauzimu mozama ngati n’kotheka, ndiponso kuthetsa mavuto akabuka.—Deut. 6:6, 7.

³ Mu Utumiki wa Kumunda: Anthu onse m’banja ayenera kudziŵa kuti kukhalira mboni Yehova ndi zolinga zake mwa kulalikira kwa ena ndi mbali yofunika kwambiri pa kulambira kwawo. (Yes. 43:10-12) Makolonu ngati mukufuna ana anu kukhala Mboni za Yehova zokhulupirika, yambirirani kukonzekeretsa mitima yawo kukonda utumiki. Kambiranani chifukwa chake kudzimana ndiponso kupita mu utumiki mlungu uliwonse kuli kofunika. (Mat. 22:37-39) Ndiyeno konzani zoti anawo azipita nanu nthaŵi zonse mu utumiki wa kumunda.

⁴ Kuti muthandize banja lanu kuzindikira kuti ntchito yolalikira n’njofunika kwambiri, muzipatula nthaŵi yochita phunziro la banja mlungu ndi mlungu kukonzekera ndi kuyeserera ulaliki wogwira mtima. Phunzitsani ana anu utumiki payekhapayekha, kuwathandiza kupita patsogolo malinga ndi msinkhu wawo ndi nzeru zawo. Mukachoka mu utumiki ndi ana anu, afunseni momwe aonera paokha kuti Yehova ndi wabwino. Simbani zinthu zimene akumana nazo zolimbitsa chikhulupiriro. Mabanja akamapitirizabe ‘kulaŵa kuti Ambuye ali wokoma mtima’ amayandikana kwambiri ndi Yehova, ndipo amawalimbitsa kukana “choipa chonse.”—1 Pet. 2:1-3.

⁵ Pamisonkhano: Zimakhala bwino zedi anthu pabanja akamalimbikitsana kupezeka pamisonkhano yonse ya mpingo, makamaka wina akatopa, akakhumudwa, kapena akakhala ndi mavuto osautsa. Mlongo wina mtsikana ananena kuti: “Bambo anga amabwera kuntchito, atatopa. Koma ndimawauza mfundo yabwino imene tikaphunzire kumsonkhano madzulo tsiku limenelo, ndipo zimawalimbikitsa kupitako. Inenso ndikatopa, amandilimbikitsa kuti ndipite.”—Aheb. 10:24, 25.

⁶ Kuchitira Zinthu Pamodzi: Mabanja azichitira zinthu pamodzi, monga kuthandizana ntchito za panyumba. Azikhalanso ndi nthaŵi yosangalala atasankha bwino zosangalatsazo. Kukacheza kumalo ena, kukawongola miyendo, kuchita maseŵero, ndi kuyendera achibale kapena anzawo kumapereka mpata wabwino wosangalala ndiponso azisangalala akamakumbukira zimenezi.—Mlal. 3:4.

⁷ Mabanja olimba achikristu tsiku lililonse amagonjetsa mavuto amene angasokoneze khalidwe lawo lauzimu. Pokhala ogwirizana kwambiri ndi Yehova, amapeza mphamvu imene iye amawapatsa.—Aef. 6:10.

Lipoti la Utumiki la December

Av. Av. Av. Av.

Chiŵerengero cha: Maola Mag. M.O. Maph.

Apai. Apad. 49 123.6 87.5 65.0 9.1

Apainiya 3,725 69.2 13.3 26.3 3.0

Apai. Otha. 2,277 47.8 10.9 16.4 2.1

Ofalitsa 43,003 10.3 3.0 3.7 0.6

PAMODZI 49,054 Obatizidwa: 109

Zomwe Munganene Pogaŵira Magazini

Nsanja ya Olonda Apr. 15

“Kulikonse anthu amafuna moyo wabwino, monga kupeza ntchito yabwino ndi kukhalabe pantchitoyo. Koma kodi mumadziŵa kuti kulipo kumene mungapeze moyo wabwino, umene mungakhale nawo kwamuyaya? [Ŵerengani Salmo 16:8, 9.] Nsanja ya Olonda iyi ifotokoza kumene tingapeze moyo wabwino weniweni.”

Galamukani! May 8

“Anthu ambiri masiku ano akuchoka m’zipembedzo zodziŵika n’kumalambira Mulungu m’njira yawoyawo. Kodi mukuganiza bwanji za nkhani imeneyi? [Muyembekezeni ayankhe.] Baibulo limasonyeza kuti kalambiridwe kathu ndi nkhani yofunika kwambiri kwa Mulungu. [Ŵerengani Yohane 4:24.] Galamukani! iyi ikufotokoza njira yabwino yopezera zosoŵa zanu zauzimu.”

Nsanja ya Olonda May 1

“Kodi mukudziŵa munthu wina amene akudwala kwambiri kapena wolumala? Anthu ngati ameneŵa amafunika kuwalimbikitsa si choncho nanga? Koma kodi tinganene chiyani powalimbikitsa? Baibulo lili ndi mawu olimbikitsa. [Ŵerengani Yesaya 35:5, 6.] Nsanja ya Olonda iyi ikufotokoza chifukwa chake tiyenera kukhulupirira kuti ulosi umenewu udzakwaniritsidwa.”

Galamukani! May 8

“Chaka chathachi, anthu asokoneza mtendere kwambiri kusiyana ndi zaka za m’mbuyomo. Kodi mukuganiza kuti maboma a anthu angabweretse mtendere padziko lonse? [Akayankha, ŵerengani Yesaya 2:4.] Galamukani! iyi ikufotokoza chifukwa chake tiyenera kukhulupirira kuti posachedwapa padzakhala mtendere padziko lonse.”