Mbiri ya Moyo Wanga

Ndine Wosangalala Kuti Ndagwira Nawo Ntchito ya Padziko Lonse Yophunzitsa Baibulo

YOSIMBIDWA NDI ANNA MATHEAKIS

Sitima inali kuyaka. Ngati sitima imeneyi ya mamita 171 ikanamira, moyo wanga ukanathera pamenepo. Mwamsanga ndinasambira, kwinaku ndikulimbana ndi mafunde amphamvu. Ndinagwira chovala cha mayi wina chothandiza munthu kuti asamire. Imeneyi inali njira yokhayo yomwe inandithandiza kuti ndisamire. Ndinapemphera kwa Mulungu kuti andipatse mphamvu ndi kundilimbitsa mtima. Sindikanachita zoposa pamenepa.

IZI zinachitika m’chaka cha 1971, pamene ndinali paulendo wobwerera ku gawo langa lachitatu la umishonale ku Italy. Pa ngozi ya sitima imeneyo, katundu wanga yense anatayika. Koma pali zinthu zina zofunika kwambiri zomwe sizinatayike, monga moyo wanga, ubale wachikondi wa Akristu, ndi mwayi wotumikira Yehova. Utumiki umenewu unali utandiyendetsa kale m’makontinenti atatu, ndipo ngozi ya sitimayi ndi chimodzi mwa zinthu zambiri zomwe zandichitikira m’moyo wanga.

Ine ndinabadwa mu 1922. Makolo anga anali kukhala ku Rām Allāh, pafupifupi makilomita 16 kumpoto kwa Yerusalemu. Makolo anga onse anali ochokera ku chilumba cha Kirete, koma bambo anga anakulira ku Nazareti. M’banja mwathu tinalipo ana asanu, anyamata atatu ndi atsikana awiri, ndipo ine ndinali womaliza pa onsewo. Banja lathu linali ndi chisoni chachikulu chifukwa cha imfa ya mchimwene wathu wachiwiri, amene anamwalira atamira mu mtsinje wa Yordano pa ulendo wa sukulu wokaona malo osiyanasiyana. Itachitika ngozi imeneyi, amayi anga anakaniratu kukhala ku Rām Allāh, choncho ine ndili ndi zaka zitatu, tinasamukira ku Atene, m’dziko la Girisi.

Choonadi cha M’Baibulo Chifika M’banja Mwathu

Titangofika ku Girisi, mchimwene wanga wamkulu Nikos, amene panthawiyo anali ndi zaka 22 za kubadwa, anakumana ndi Ophunzira Baibulo, dzina limene Mboni za Yehova zinkadziwika nalo panthawiyo. Kuphunzira choonadi cha m’Baibulo kunam’patsa chimwemwe chochuluka ndi changu chosaneneka mu utumiki wachikristu. Bambo anga anakwiya nazo kwambiri zimenezi ndipo anam’pitikitsa Nikos panyumbapo. Komabe, bambo akachoka kupita ku Palestina, amayi anga, mchemwali wanga, ndi ine tinali kutsagana ndi Nikos ku misonkhano yachikristu. Ndikukumbukira bwino kuti amayi anga anali kunyadira pofotokoza zimene amva pa misonkhano imeneyo. Komano posakhalitsa, anadwala khansa ndipo anamwalira ali ndi zaka 42. Panthawi yovuta imeneyo, mwachikondi mchemwali wanga Ariadne anatenga udindo wosamalira banja lathu. Ngakhale kuti anali wamng’ono, anakhala ngati mayi wanga kwa zaka zambiri.

Pamene ndinali ndi bambo anga ku Atene, nthawi zonse ankapita nane ku tchalitchi cha Orthodox, ndipo atamwalira, ndinapitiriza kupitabe kutchalitchi koma mwa kamodzikamodzi. Pambuyo pake, ndinasiya kupitako nditaona kuti anthu omwe amapezeka kutchalitchiko sanali odzipereka kwa Mulungu.

Pambuyo pa imfa ya bambo anga, ndinalowa ntchito m’boma mu unduna wa zachuma. Koma mchimwene wanga uja, anadzipereka ndi moyo wake wonse pa ntchito yolalikira za Ufumu, ndipo anatumikira m’dziko la Girisi kwa zaka zambiri. M’chaka cha 1934 anasamukira ku Cyprus. Panthawiyo, pa chilumbachi panalibe Mboni yobatizidwa ya Yehova, choncho anali ndi mwayi wopititsa patsogolo ntchito yolalikira kumeneko. Atakwatira, mkazi wake Galatia, anayambanso utumiki wa nthawi zonse, ndipo anachita utumiki umenewu kwa zaka zambiri.a Nthawi ndi nthawi Nikos anali kutitumizira mabuku ndi magazini ofotokoza Baibulo koma sitinkakonda kuwawerenga. Nikos anakhalabe ku Cyprus kufikira pamene anamwalira.

Kutenga Choonadi cha M’Baibulo Kukhala Changachanga

M’chaka cha 1940, George Douras, Mboni yachangu ya ku Atene komanso bwenzi la Nikos, anafika kwathu ndi kutipempha kuti tipite kwawo kukaphunzira Baibulo limodzi ndi kagulu kakang’ono ka ophunzira ena. Tinavomera pempho limeneli monyadira. Posakhalitsa tinayamba kuuza ena zomwe tinali kuphunzirazo. Zimene tinaphunzira m’Baibulo zinalimbikitsa ine ndi mchemwali wanga kupereka miyoyo yathu kwa Yehova. Ariadne anabatizidwa mu 1942, ndipo ine ndinabatizidwa mu 1943.

Nkhondo yachiwiri ya padziko lonse itatha, Nikos anatiitana kuti tipite ku Cyprus, choncho mu 1945 tinasamukira ku Nicosia. Mosiyana ndi ku Girisi, ntchito yolalikira ku Cyprus sinali yoletsedwa. Tinatenga nawo mbali pa utumiki wa kunyumba ndi nyumba komanso ulaliki wa mumsewu.

Patapita zaka ziwiri, Ariadne anabwerera ku Girisi. Kumeneko anapeza mbale wopembedza Yehova woti adzakwatirane naye m’tsogolo, choncho Ariadne anaganiza zokhazikika ku Atene. Posakhalitsa mlamu wanga ndi mchemwali wangayo anandilimbikitsa kuti ndibwerere ku Girisi ndi kukayamba utumiki wa nthawi zonse mu likulu la dzikoli. Popeza kuti nthawi zonse cholinga changa chinali kuchita upainiya, ndinabwerera ku Atene kumene ofalitsa anali kufunika kwambiri.

Makomo Atsopano a Utumiki Atseguka

Pa November 1, 1947, ndinayamba kuchita upainiya. Ndinkalalikira kwa maola 150 mwezi uliwonse. Mpingo wathu unali ndi gawo lalikulu, ndipo ndinafunika kuyenda maulendo ataliatali. Komabe, madalitso amene ndinasangalala nawo anali ochuluka. Kawirikawiri apolisi anali kumanga Mboni iliyonse yopezeka ikulalikira kapena kuchita misonkhano yachikristu, choncho posakhalitsa anandimanga.

Anali kundiimba mlandu wotembenuza anthu, womwe unali mlandu woopsa panthawiyo. Ndipo anandiweruza kuti ndikakhale m’ndende ya azimayi ya Averof mu Atene kwa miyezi iwiri. M’ndendemo munali kale mayi wina wa Mboni, chotero awirife tinali kusangalala ndi kulimbikitsana ndi macheza anthu achikristu ngakhale kuti tinali m’ndende. Nthawi imene anandilamula kugwira ukaidiwo itatha, ndinatuluka ndi kukapitiriza upainiya mwachimwemwe. Ambiri mwa anthu omwe ndinaphunzira nawo Baibulo panthawiyo akutumikirabe Yehova mokhulupirika, ndipo zimenezi zimandipatsa chimwemwe chochuluka.

Mu 1949, ndinalandira kalata yondiitana kuti ndikakhale nawo m’kalasi la 16 la Sukulu ya Gileadi Yophunzitsa Baibulo ku United States, kumene atumiki anthawi zonse amakaphunzira ntchito ya umishonale. Ine ndi achibale anga tinasangalala kwambiri. Ndinakonza zokakhala nawo pa msonkhano wa mayiko ku New York City m’chilimwe cha 1950, kuti pambuyo pake ndikapezeke ku Gileadi.

Nditafika ku United States, ndinali ndi mwayi wapadera wotumikira kwa miyezi ingapo ngati woyeretsa zipinda zogona pa likulu la dziko lonse la Mboni za Yehova ku New York City. Malo amenewa anali aukhondo, osangalatsa, komanso olimbikitsa, ndipo abale ndi alongo onse anali achimwemwe. Monyadira sindidzaiwala konse miyezi isanu ndi umodzi imene ndinakhala kumeneko. Tsopano nthawi yoyamba Sukulu ya Gileadi inakwana, ndipo miyezi isanu ya maphunziro ndi malangizo akuya inadutsa mofulumira kwabasi. Ophunzira tonse tinazindikira mmene maphunziro a m’Malemba alili amtengo wapatali ndi osangalatsa, ndipo zimenezi zinawonjezera chimwemwe chathu ndi kufunitsitsa kwathu kugawana ndi ena maphunziro opatsa moyo amenewo a choonadi.

Gawo Langa Loyamba la Umishonale

Ku Sukulu ya Gileadi, anatilola kusankha mnzathu amene tikufuna kukatumikira naye limodzi asanatiuze kumene tikatumikire monga amishonale. Ine, mnzanga anali Ruth Hemmig (yemwe tsopano ndi Ruth Bosshard), mlongo wabwino kwambiri. Ine ndi Ruth tinasangalala kwambiri atatiuza kuti tikatumikira ku Istanbul, m’dziko la Turkey, m’malire mwa Asia ndi Ulaya. Tinkadziwa kuti m’dzikomo anali asanavomereze mwa lamulo ntchito yolalikira, koma sitinali kukayikira kuti Yehova akatithandiza.

Istanbul ndi mzinda wokongola womwe uli ndi anthu ochokera m’mayiko osiyanasiyana. Mu mzinda umenewu tinapezamo anthu ambiri amalonda, njira zosiyanasiyana zophikira chakudya zochokera m’mbali zosiyanasiyana za dziko lapansi, nyumba zosangalatsa zosungiramo zinthu zochititsa chidwi, malo okongola, ndi m’mbali mwa nyanja momwe nthawi zonse munali mosangalatsa. Koposa zonse, tinapezamo anthu oona mtima ofunitsitsa kuphunzira za Mulungu. Kagulu kakang’ono ka Mboni zomwe zinali mu Istanbul kanali ka abale a ku Armenia, ku Girisi, komanso achiyuda. Komabe, kunali anthu ambiri amitundu inanso, chotero kuphunzira zinenero zosiyanasiyana, kuphatikizapo Chiteki, kunali kothandiza kwambiri. Zinkatisangalatsa kwambiri kukumana ndi anthu aludzu la choonadi ochokera m’mayiko osiyanasiyana. Ambiri a iwo akupitiriza kutumikira Yehova mokhulupirika.

Mwachisoni, Ruth anam’kaniza chilolezo kuti apitirize kukhala m’dzikomo mwakuti anakakamizika kuchoka. Panopa akupitiriza utumiki wa nthawi zonse ku Switzerland. Pambuyo pa zaka zonsezi, ndikum’sowabe chifukwa anali kundisangalatsa ndi kundilimbikitsa.

Kusamukira ku Mbali Ina ya Dziko Lapansi

Mu 1963 boma la Turkey silinandilole kupitiriza kukhala m’dzikomo. Zinali zopweteka kusiya Akristu anzanga omwe ndinawaona akupita patsogolo mwauzimu, kwinaku akuyesetsa kuthana ndi mavuto ambiri. Pofuna kundilimbikitsa, mokoma mtima achibale anga anandilipirira ulendo wopita ku New York City kuti ndikapezeke pa msonkhano wachigawo kumeneko. Panthawiyi n’kuti asanandipatse gawo lina loti ndikatumikire.

Msonkhano wachigawo utatha, anandiuza kuti ndikatumikira ku Lima, m’dziko la Peru. Ine pamodzi ndi mlongo wina wachitsikana amene anali mnzanga woti ndizikatumikira naye limodzi, tinanyamuka ku New York ndi kupita ku gawo langa latsopanolo. Ndinaphunzira Chisipanya ndipo ndinali kukhala m’nyumba ya amishonale yomwe inali kumtunda kwa ofesi ya nthambi ya Mboni za Yehova. Zinali zosangalatsa kulalikira kumeneko ndi kudziwana ndi abale ndi alongo akomweko.

Gawo Lina, Chinenero China

Patapita nthawi, achibale anga ku Girisi anayamba kuvutika chifukwa cha ukalamba ndi kufooka kwa matupi awo. Koma iwo sanandikakamize kusiya utumiki wa nthawi zonse ndi kumakhala moyo umene ena amati ndiwo moyo weniweni n’cholinga choti ndiziwathandiza. Komabe, nditaganiza mofatsa ndi kupemphera, ndinaona kuti zingakhale bwino ngati nditapita kukatumikira kufupi ndi achibale angawo. Mwachikondi, abale a ku nthambi anavomereza ndipo ananditumiza ku Italy kuti ndizikatumikira kumeneko, ndipo achibale anga anadzipereka kuti andithandiza kulipirira ulendo umenewu. Ndipotu ku Italy, ofalitsa anali kufunikanso kwambiri.

Apanso ndinafunikira kuphunzira chinenero chatsopano cha Chitaliyana. Gawo langa loyamba linali mu mzinda wa Foggia. Pambuyo pake, anandisintha ndi kunditumiza ku Naples, kumene ofalitsa anali kufunika kwambiri. Kumeneko gawo langa linali Posilipo, limodzi mwa madera okongola kwambiri ku Naples. Gawo langa linali lalikulu, ndipo kunali wolengeza Ufumu mmodzi yekha. Ndinasangalala kwambiri kugwira ntchito m’gawo limeneli, ndipo Yehova anandithandiza kuyambitsa maphunziro a Baibulo ambiri. Patapita nthawi, m’dera limeneli munakhala mpingo waukulu.

Ena mwa anthu oyambirira a komweko omwe ndinaphunzira nawo Baibulo anali mayi ndi ana ake anayi. Mayiyu ndi ana ake aakazi awiri akutumikirabe monga Mboni za Yehova. Ndinaphunziranso ndi banja lina limene linali ndi mwana wamng’ono wamkazi. Banja lonse linapita patsogolo m’choonadi ndipo linasonyeza kudzipereka kwawo mwa ubatizo wa m’madzi. Panopa mwana wawo wamkaziyo anakwatiwa ndi mtumiki wokhulupirika wa Yehova, ndipo onse awiri akutumikira Mulungu mwachangu. Pamene ndinali kuphunzira Baibulo ndi banja lina lalikulu, ndinachita chidwi ndi mphamvu ya Mawu a Mulungu. Titawerenga malemba angapo osonyeza kuti Mulungu savomereza kumulambira pogwiritsa ntchito mafano, mayi a m’nyumbamo sanayembekeze kuti phunziro lithe. Nthawi yomweyo, anachotsa mafano onse m’nyumba mwawo ndi kuwataya.

Ngozi Panyanja

M’maulendo anga onse apakati pa Italy ndi Girisi, nthawi zonse ndinkayenda pa sitima ya pamadzi. Nthawi zambiri maulendo amenewa anali osangalatsa kwambiri. Koma zinthu zinasintha pa ulendo umodzi, m’chilimwe mu 1971. Ndinali paulendo wobwerera ku Italy pa sitima ya pamadzi yotchedwa Heleanna. M’mawa kwambiri pa August 28, m’khitchini ya sitimayi munabuka moto. Moto umenewu unakula ndipo m’sitimayi munali chipwirikiti pakati pa anthu apaulendofe. Azimayi anali kukomoka, ana anali kulira, ndipo azibambo anali kukalipa mwaphamvu ndi kuopseza. Anthu anali kuthamangira mbali imodzi ya sitimayo kumene kunali maboti opulumutsa anthu pangozi. Komabe, zovala zothandiza anthu kuti asamire zinali zochepa, ndipo zingwe zotsitsira maboti opulumutsira anthu sizinkagwira ntchito bwinobwino. Ine ndinalibe chovala chondithandiza kuti ndisamire, koma malawi a moto anali kukulirakulira, choncho chinthu chokha cha nzeru chinali kulumphira m’nyanjamo.

Nditangolumphira m’nyanjamo, ndinaona mayi wina amene anali ndi chovala chomuthandiza kuti asamire akuyandama pafupi ndi ine. Ankaoneka kuti sadziwa kusambira, choncho ndinam’gwira dzanja ndi kumukokera kutali ndi sitima imene inali kumirayo. Mafunde anakula panyanjapo, ndipo ndinatopa kwambiri chifukwa choyesetsa kuti ndisamire. Ngozi imeneyi inali yotayitsa mtima, koma ndinali kupempha Yehova mosaleka kuti andilimbitse mtima, ndipo zimenezi zinandipatsa mphamvu. Ngozi imeneyi inandikumbutsa zimene zinamuonekera mtumwi Paulo chombo chimene anakwera chitasweka.​—Machitidwe, chaputala 27.

Ndinayesetsa kulimbana ndi mafunde kwa maola anayi, nditam’gwirabe mnzanga uja. Ndikapeza mphamvu ndinali kusambira ndipo ndinali kuitana Yehova kuti atithandize. Kenako, ndinaona boti laling’ono likutiyandikira. Ine ndinapulumutsidwa, koma mnzangayo anali atamwalira kale. Titafika m’tauni ya Bari, ku Italy, ananditengera ku chipatala kumene anandipatsa thandizo. Ndinakhala m’chipatalamo kwa masiku angapo, ndipo Mboni zambiri zinali kudzandiona. Mokoma mtima anali kundipatsa zonse zimene ndinali kufuna. Ena amene ndinali nawo m’chipinda chimodzi m’chipatalamo, anachita chidwi ndi chikondi chachikristu chimene abalewo anali kundisonyeza.b

Nditachila bwinobwino, ananditumiza kukatumikira ku Rome. Anandipempha kuti ndizilalikira m’gawo la malonda m’katikati mwa mzindawo, ndipo ndi thandizo la Yehova ndinachitadi zimenezi kwa zaka zisanu. Ndinasangalala kutumikira m’dziko la Italy kwa zaka 20, ndipo anthu achitaliyana ndinali kuwakonda kwambiri.

Kubwerera Kumene Ndinayambira

M’kupita kwa nthawi, zinthu zinayamba kuipa m’moyo wa Ariadne ndi mwamuna wake chifukwa cha kufooka kwa matupi awo. Ndinaona kuti ngati nditakhala nawo pafupi, pamlingo winawake ndidzatha kuwabwezera zimene iwo anandichitira mwachikondi. Kunena zoona, zinandiwawa kwambiri kuchoka ku Italy. Komabe, abale amene anali kuyang’anira utumiki wanga anandilola, ndipo kuyambira m’chilimwe cha 1985, ndakhala ndikuchita upainiya mu Atene, kumene ndinayambira utumiki wa nthawi zonse kalelo mu 1947.

Ndinali kulalikira m’gawo la mpingo wathu, ndipo ndinapempha abale kuofesi ya nthambi kuti ndizilalikiranso m’gawo la malonda m’katikati mwa mzindawo. Ndinachita zimenezi kwa zaka zitatu limodzi ndi mlongo wina amenenso anali mpainiya. Tinachitira umboni mokwanira kwa anthu amene kawirikawiri sapezeka panyumba.

Pamene zaka zikudutsa, chilakolako changa chotumikira chikukulirakulira, koma mphamvu zikundithera. Panopa mlamu wanga uja anamwalira. Ariadne, amene anali ngati mayi wanga tsopano sakuthanso kuona. Kunena za ine, ndinali ndi mphamvu m’zaka zimene ndinali kuchita utumiki wa nthawi zonse. Koma posachedwapa, ndinagwa pa masitepe oterera ndipo dzanja langa lamanja linathyoka. Pambuyo pake ndinagwanso ndi kuthyoka fupa la mmunsi mwa chiuno. Anandichita opaleshoni ndipo ndinakhala ndili chigonere kwa nthawi yaitali. Panopa sindikuthanso kuyenda bwinobwino. Ndimagwiritsa ntchito ndodo koma sindingathe kutuluka panja pokhapokha wina atanditulutsa. Ngakhale zili choncho, ndimachita zonse zimene ndingathe, ndi chikhulupiriro chakuti ndidzapeza bwino. Ndikupitiriza kupeza chimwemwe ndipo ndine wokhutira potenga mbali pa ntchito yophunzitsa Baibulo, ngakhale kuti panopa ndikuchita zochepa.

Ndikakumbukira zaka zosangalatsa zomwe ndathera mu utumiki wa nthawi zonse, ndimayamikira Yehova kwambiri kuchokera pansi pa mtima. Iye komanso mbali ya padziko lapansi ya gulu lake andipatsa malangizo odalirika nthawi zonse ndiponso thandizo la mtengo wapatali. Zimenezi zandithandiza kugwiritsa ntchito luso langa mokwanira pa nthawi yonse ya moyo wanga imene ndakhala ndikum’tumikira. Chimene ndikufunitsitsa ndi mtima wonse n’chakuti Yehova andilimbikitse kuti ndipitirize kumutumikira. Ndine wachimwemwe chifukwa cha mbali yochepa imene ndachita pa ntchito ya padziko lonse yophunzitsa Baibulo imene Mulungu akuitsogolera.​—Malaki 3:10.

Kufalitsa “Uthenga Wabwino wa Zinthu Zabwino”

“Ha, akongolatu pamapiri mapazi a iye amene . . . adza ndi uthenga wabwino wa zinthu zabwino.”​—YESAYA 52:7.

1, 2. (a) Ndi zinthu zoopsa zotani zimene zikuchitika tsiku lililonse? (b) Kodi anthu ambiri zimawakhudza bwanji akamamva nkhani zoipa nthawi zonse?

ANTHU pa dziko lonse lapansi masiku ano, atopa ndi kumangomva nkhani zoipa zokhazokha. Akatsegula wailesi, zomwe akumva ndi nkhani zochititsa mantha za matenda oopsa amene akusowetsa anthu mtendere padziko lonse. Akamamvetsera nkhani pa wailesi yakanema akungoona zithunzi zosachoka m’maganizo za ana ovutika ndi njala omwe akupempha thandizo. Akafuna kuwerenga nyuzipepala akumva za kuphulika kwa mabomba amene amagwetsa nyumba ndi kupha anthu ambirimbiri osalakwa.

² Inde, tsiku lililonse kukuchitika zinthu zoopsa. Kunena zoona, zinthu zikuipiraipira chifukwa maonekedwe adzikoli akusintha. (1 Akorinto 7:31) Magazini ina ya kummawa kwa Ulaya inanena kuti nthawi zina zimaoneka ngati dziko lonseli “lili pafupi kuwonongeka kotheratu.” N’zosadabwitsa kuti anthu ovutika m’maganizo akuchulukirachulukira. Mosakayikira, munthu wina amene anagwidwa mawu pa kafukufuku wa nkhani za pa wailesi yakanema ku United States anafotokoza maganizo ofanana ndi omwe anthu mamiliyoni ambiri ali nawo. Iye anati: ‘Ndikatha kuonerera nkhani pa TV, nkhawa imandigwira. Nkhani zonse zimakhala zoipa zokhazokha ndi zothetsa nzeru.’

Nkhani Imene Aliyense Afunikira Kumva

3. (a) Kodi Baibulo likufalitsa uthenga wabwino wotani? (b) N’chifukwa chiyani mumaona uthenga wabwino wa Ufumu kukhala wofunika?

³ Kodi nkhani yabwino ingapezeke m’dziko lodzaza ndi mavutoli? Inde ingapezeke. N’zolimbikitsa kudziwa kuti Baibulo likufalitsa uthenga wabwino. Umenewu ndi uthenga wakuti Ufumu wa Mulungu udzathetsa matenda, njala, uchigawenga, nkhondo, ndi kuponderezana kwa mtundu uliwonse. (Salmo 46:9; 72:12) Kodi imeneyi si nkhani imene aliyense akufunikira kumva? Mboni za Yehova zikuganiza choncho. Chotero, zikudziwika kulikonse chifukwa zikuyesetsa mosaleka kuuza anthu a mitundu yonse uthenga wabwino wa Ufumu wa Mulungu.​—Mateyu 24:14.

4. Kodi m’nkhani ino tikambirana mbali ziti za utumiki wathu, nanga m’nkhani yotsatira tidzakambirana mbali iti?

⁴ Koma kodi tingatani kuti tipitirize kulalikira uthenga wabwinowu mogwira mtima komanso mokhutiritsa, ngakhale m’madera omwe anthu salabadira kwenikweni? (Luka 8:15) Mosakayikira, kupenda mwachidule mbali zitatu zofunika za ntchito yathu yolalikira kutithandiza. Tipenda (1) zolinga zathu, kapena kuti chifukwa chake timalalikira; (2) uthenga wathu, kapena kuti zimene timalalikira; ndiponso (3) njira zathu, kapena kuti mmene timalalikirira. Zolinga zathu zikakhala zabwino, uthenga wathu ukakhala womveka bwino, ndipo njira zathu zolalikirira zikakhala zogwira mtima, tidzapatsa anthu ochuluka mwayi wakumva nkhani yosangalatsa koposa, yomwe ndi uthenga wabwino wa Ufumu wa Mulungu.a

Chifukwa Chimene Timalalikirira Uthenga Wabwino

5. (a) Kuposa china chilichonse, n’chiyani chimene chimatilimbikitsa kutenga nawo mbali mu utumiki? (b) N’chifukwa chiyani tinganene kuti timasonyeza chikondi kwa Mulungu mwa kumvera lamulo la m’Baibulo lakuti tizilalikira?

⁵ Tiyeni tikambirane mbali yoyamba, zolinga zathu. N’chifukwa chiyani timalalikira uthenga wabwino? Chifukwa chake n’chofanana ndi cha Yesu. Iye anati: “Ndikonda Atate.” (Yohane 14:31; Salmo 40:8) Kuposa china chilichonse, chikondi chathu pa Mulungu ndi chimene chimatilimbikitsa kulalikira. (Mateyu 22:37, 38) Baibulo limagwirizanitsa kukonda Mulungu ndi utumiki, pamene limati: “Ichi ndi chikondi cha Mulungu, kuti tisunge malamulo ake.” (1 Yohane 5:3; Yohane 14:21) Kodi malamulo a Mulungu amenewa akuphatikizapo lamulo lakuti “mukani, phunzitsani anthu”? (Mateyu 28:19) Inde. N’zoona kuti mawu amenewa ananena ndi Yesu, koma kwenikweni anachokera kwa Yehova. Chifukwa chiyani tikutero? Yesu anafotokoza kuti: “Sindichita kanthu kwa Ine ndekha, koma monga anandiphunzitsa Atate, ndilankhula izi.” (Yohane 8:28; Mateyu 17:5) Chotero, mwa kumvera lamulo lakuti tizilalikira, timam’sonyeza Yehova kuti timam’konda.

6. Kodi kukonda Mulungu kumatilimbikitsa motani kulalikira?

⁶ Kuwonjezera pamenepo, chikondi chathu pa Yehova chimatilimbikitsa kulalikira chifukwa chakuti tikufuna kutsutsa mabodza amene Satana akunenera Mulungu. (2 Akorinto 4:4) Satana anayambitsa kukayikira zoti ulamuliro wa Mulungu ndi wolungama. (Genesis 3:1-5) Monga Mboni za Yehova, ndife ofunitsitsa kutenga nawo mbali povumbula mabodza a Satana ndi kuyeretsa dzina la Mulungu pamaso pa anthu onse. (Yesaya 43:10-12) Komanso, timalalikira chifukwa chakuti tadziwa makhalidwe ndi njira za Yehova. Tikuona kuti tayandikana naye ndipo ndife ofunitsitsa kwambiri kuuzako ena za Mulungu wathu. Ndipotu, ubwino wa Yehova ndi njira zake zolungama zimatipatsa chimwemwe mwakuti sitingaleke kulankhula za iye. (Salmo 145:7-12) Timakakamizika kumutamanda ndi kulankhula za “zoposazo za Iye” kwa amene angamvetsere.​—1 Petro 2:9; Yesaya 43:21.

7. Kuwonjezera pa kukonda Mulungu, kodi timalalikira pa chifukwa china chofunika chiti?

⁷ Pali chifukwa china chofunika chopitirizira kutenga nawo mbali mu utumiki: Timafunitsitsa kulimbikitsa anthu amene atopa ndi kumangomva nkhani zoipa zokhazokha, komanso anthu amene akuvutika pa zifukwa zina. Pantchito imeneyi, timayesetsa kutsanzira Yesu. Mwachitsanzo, onani zimene zikufotokozedwa pa Marko chaputala 6.

8. Kodi nkhani ya pa Marko chaputala 6 ikusonyeza kuti Yesu anali kuwaona motani anthu?

⁸ Atumwi atafika kuchokera kuulaliki anauza Yesu zonse zimene anachita ndi kuphunzitsa. Yesu anaona kuti atumwiwo atopa, ndipo anawauza kuti amutsatire kuti ‘akapumule kamphindi.’ Choncho anakwera ngalawa ndi kunyamuka kupita kumalo abata. Anthu anawalondola, anawathamangira m’mphepete mwa nyanja, ndipo posakhalitsa anawapeza. Kodi Yesu anachitanji? Nkhaniyi imati: ‘Anaona khamu lalikulu la anthu, nagwidwa chifundo ndi iwo, chifukwa anali ngati nkhosa zopanda mbusa; ndipo anayamba kuwaphunzitsa zinthu zambiri.’ (Marko 6:31-34) Chifukwa cha chifundo chake, Yesu anapitiriza kulengeza uthenga wabwino ngakhale kuti anali wotopa. Mwachionekere, Yesu anawamvera chisoni kwambiri anthu amenewa.

9. Kodi tikuphunzira chiyani m’nkhani ya pa Marko chaputala 6 ponena za cholinga chabwino cholalikirira?

⁹ Kodi tikuphunzira chiyani m’nkhani imeneyi? Monga Akristu tili ndi udindo wolalikira uthenga wabwino ndi kupanga ophunzira. Timazindikira udindo umene tili nawowu wolengeza uthenga wabwino, chifukwa chifuniro cha Mulungu n’chakuti “anthu onse apulumuke.” (1 Timoteo 2:4) Komabe, sikuti timachita utumiki wathu pongofuna kukwaniritsa chabe ntchito imene tapatsidwa, koma timauchita chifukwa cha chifundo. Ngati timachitira chifundo anthu monga momwe Yesu anachitira, mtima wathu udzatilimbikitsa kuchita chilichonse chimene tingathe kuti tipitirizebe kuwauza uthenga wabwino. (Mateyu 22:39) Utumiki wathu tikamauchita ndi zolinga zabwino zoterezi, zidzatilimbikitsa kulalikira uthenga wabwino mosaleka.

Tikulengeza Uthenga Wabwino wa Ufumu wa Mulungu

10, 11. (a) Kodi Yesaya anaufotokoza motani uthenga umene timalalikira? (b) Kodi Yesu anadza motani ndi uthenga wabwino wa zinthu zabwino, nanga atumiki amakono a Mulungu atengera motani chitsanzo cha Yesu?

¹⁰ Bwanji za uthenga wathu, yomwe ndi mbali yachiwiri ya utumiki wathu? Kodi timalalikira chiyani? Mneneri Yesaya anafotokoza momveka bwino uthenga umene tikufalitsa, anati: “Ha, akongolatu pamapiri mapazi a iye amene adza ndi uthenga wabwino, amene abukitsa mtendere, amene adza ndi uthenga wabwino wa zinthu zabwino, amene abukitsa chipulumutso; amene ati kwa Ziyoni, Mulungu wako ndi mfumu.”​—Yesaya 52:7.

¹¹ Mawu ofunika kwambiri pa lemba limeneli akuti, “Mulungu wako ndi mfumu,” akutikumbutsa uthenga umene tikuyenera kulengeza, womwe ndi uthenga wabwino wa Ufumu wa Mulungu. (Marko 13:10) Onaninso kuti vesi limeneli likusonyeza ubwino wa uthenga wathu. Yesaya anatchula mawu ngati “chipulumutso,” “uthenga wabwino,” “mtendere,” ndi “zinthu zabwino.” Patapita zaka zambiri kuchokera m’nthawi ya Yesaya, m’zaka 100 zoyambirira, Yesu Kristu anakwaniritsa ulosi umenewu mwapadera kwambiri mwa kutiikira chitsanzo polalikira mwachangu uthenga wa zinthu zabwino, Ufumu wa Mulungu umene ukubwerawo. (Luka 4:43) M’nthawi yathu ino, makamaka kuyambira 1919, Mboni za Yehova zatengera chitsanzo cha Yesu mwa kulengeza mwachangu uthenga wabwino wa Ufumu wa Mulungu wokhazikitsidwawo ndi madalitso amene udzadzetsa.

12. Kodi anthu amene amalabadira uthenga wabwino wa Ufumu umawakhudza motani?

¹² Kodi uthenga wabwino wa Ufumu umawakhudza motani anthu amene amaulandira? Lerolino, monga momwe zinalili m’masiku a Yesu, uthenga wabwino umapatsa anthu chiyembekezo ndiponso kuwalimbikitsa. (Aroma 12:12; 15:4) Umapereka chiyembekezo kwa anthu oona mtima chifukwa chakuti amaphunzira kuti pali zifukwa zamphamvu zokhulupirira kuti kutsogoloku kuli zabwino. (Mateyu 6:9, 10; 2 Petro 3:13) Chiyembekezo choterechi chimathandiza kwambiri anthu oopa Mulungu kukhala osatekeseka akamaganizira za m’tsogolo. Wamasalmo ananena kuti anthu oterewa “sadzaopa mbiri yoipa.”​—Salmo 112:1, 7.

Uthenga Womwe ‘Umamanga Osweka Mtima’

13. Kodi mneneri Yesaya anafotokoza motani madalitso amene anthu omwe akulabadira uthenga wabwino akupeza panopa?

¹³ Chinanso, amene amamvetsera uthenga wabwino amalimbikitsidwa ndi kupeza madalitso panopa. Motani? Yesaya mneneri anatchula ena mwa madalitso amenewa pamene analosera kuti: “Mzimu wa Ambuye Yehova uli pa ine; pakuti Yehova wandidzoza ine ndilalikire mawu abwino kwa ofatsa; Iye wanditumiza ndikamange osweka mtima, ndikalalikire kwa am’nsinga mamasulidwe, ndi kwa omangidwa kutsegulidwa kwa m’ndende; ndikalalikire chaka chokomera Yehova, ndi tsiku lakubwezera la Mulungu wathu; ndikatonthoze mtima wa onse amene akulira maliro.”​—Yesaya 61:1, 2; Luka 4:16-21.

14. (a) Kodi mawu akuti “ndikamange osweka mtima” akusonyeza chiyani za uthenga wa Ufumu? (b) Kodi timasonyeza bwanji mmene Yehova amamvera akaona anthu osweka mtima?

¹⁴ Malinga ndi ulosi umenewu, Yesu ‘anamanga osweka mtima’ mwa kulalikira uthenga wabwino. Apatu Yesaya anagwiritsa ntchito fanizo lofotokoza zinthu momveka bwino. Malinga ndi dikishonale ina ya Baibulo, mawu a Chihebri omwe anawamasulira kuti ‘kumanga’ “kawirikawiri amagwiritsidwa ntchito kunena za ‘kumanga’ bandeji, ndipo malinga ndi zimenezi akunena za kupereka mankhwala ndi kuchiritsa munthu wovulala.” Nesi wachifundo angakulunge bandeji, mbali yovulala ya thupi pofuna kuziziritsa malo opwetekawo. Mofananamo, mwa kulalikira uthenga wa Ufumu, ofalitsa achifundo amalimbikitsa onse omvetsera uthenga wawo amene akuvutika m’njira iliyonse. Ndipo pothandiza anthu amene akufunikiradi thandizo, amasonyeza mmene Yehova akuwadera nkhawa. (Ezekieli 34:15, 16) Ponena za Mulungu, wamasalmo anati: “Achiritsa osweka mtima, namanga mabala awo.”​—Salmo 147:3.