Watchtower LAIBULALE YA PA INTANETI

“Atumwi ndi Akulu Anasonkhana”

‘Kuchitira Umboni Mokwanira za Ufumu wa Mulungu’
- GAWO 5 • MACHITIDWE 15:1-35
  
  “Atumwi ndi Akulu Anasonkhana”
  
  MACHITIDWE 15:6
  
  Mumpingo munayambika nkhani yovuta imene ikanasokoneza mtendere komanso mgwirizano wa Akhristu. Kodi malangizo othetsera nkhani imeneyi anachokera kuti? M’gawoli, tiona mmene mpingo wa m’nthawi ya atumwi unkayendera, ndipo anthu a Mulungu masiku ano amatsanzira chitsanzo chimenechi.

“Sanagwirizane Nazo”

‘Kuchitira Umboni Mokwanira za Ufumu wa Mulungu’
- ZIPHUNZITSO ZA AYUDA OLIMBIKITSA KWAMBIRI MIYAMBO YAWO
  
  Anthu ena amene ankadziona kuti ndi Akhristu anapitirizabe kulimbikitsa mdulidwe ngakhale kuti bungwe lolamulira la m’nthawi ya atumwi linali litathetsa nkhaniyo. Mtumwi Paulo ananena kuti iwo anali “abale achinyengo” amene ankafuna “kupotoza uthenga wabwino wonena za Khristu.”—Agal. 1:7; 2:4; Tito 1:10.
  
  Zikuoneka kuti cholinga cha gulu la Ayuda amenewa, omwe ankalimbikitsa kwambiri miyambo yawo, chinali chakuti asangalatse Ayuda ena kuti asamatsutse Akhristu ndiponso asamawazunze. (Agal. 6:12, 13) Gulu la Ayuda limeneli linkanena kuti munthu sangakhale wolungama ngati sakutsatira Chilamulo cha Mose pa nkhani ya chakudya, mdulidwe komanso zikondwerero za Ayuda.—Akol. 2:16.
  
  M’pake kuti Akhristu a Chiyuda amene ankakhulupirira mfundo zimenezi sankamasuka kukhala ndi Akhristu anzawo amene sanali Ayuda. Ndipo n’zomvetsa chisoni kuti ngakhale Akhristu ena a Chiyuda odziwika bwino ankasonyezanso khalidwe limeneli. Mwachitsanzo, Akhristu amene anatumizidwa ku Antiokeya kuchokera ku Yerusalemu, anadzipatula ndipo sankachita zinthu limodzi ndi abale awo a mitundu ina. Ngakhale Petulo, amene poyamba ankacheza momasuka ndi anthu a mitundu ina, anadzipatula ndipo anasiya kudya nawo. Apatu Petulo anachita zinthu zosemphana ndi mfundo zimene iye poyamba ankalimbikitsa. Chifukwa cha zimenezi, Paulo anam’patsa uphungu wamphamvu kwambiri.—Agal. 2:11-14.