PHUNZIRO 7

Kulankhula Zoona Komanso Zofika Pamtima

Luka 1:3

MFUNDO YAIKULU: Muzigwiritsa ntchito maumboni odalirika kuti anthu amene mukukambirana nawo adziwe zoona.

Muzigwiritsa ntchito maumboni odalirika. Zolankhula zanu zizikhala zochokera m’Mawu a Mulungu ndipo ngati n’zotheka muzichita kuwerenga m’Baibulo. Ngati mukufuna kupereka umboni wochokera kwa asayansi, nyuzi, kapena zinthu zina muzitsimikizira kuti n’zodalirika komanso zolondola.
Muzigwiritsa ntchito bwino maumboniwo. Zimene mukufotokoza pa lemba zizikhala zogwirizana ndi nkhani yonse ya lembalo, Baibulo lonse komanso zimene “kapolo wokhulupirika ndi wanzeru” wafalitsa. (Mat. 24:45) Ngati mukugwiritsa ntchito umboni wina muzionetsetsa kuti ukugwirizana ndi nkhani yonse komanso cholinga cha wolembayo.

Musamakokomeze mfundo kapena kuwonjezera manambala. Mwachitsanzo mawu oti “anthu ena” musawasinthanitse ndi oti “anthu ambiri.” Mawu oti “nthawi zina” musawasinthanitse ndi oti “nthawi zambiri” komanso mawu oti “n’kutheka kuti” musawasinthanitse ndi oti “zikuoneka kuti.”
Fotokozani m’njira yogwira mtima. Mukawerenga lemba kapena kutchula umboni winawake, muzifunsa mafunso abwino kapena kupereka chitsanzo chothandiza anthu kuzindikira zimene mukutanthauza.