PHUNZIRO 4

Kunena Mawu Oyenera Musanayambe Kuwerenga Lemba

Mateyu 22:41-45

MFUNDO YAIKULU: Muzithandiza anthu kuti akonzekere kumva mfundo inayake pa lemba limene mukufuna kuwerenga.

Ganizirani chifukwa chimene mukuwerengera lemba. Pouza anthu lemba limene mukufuna kuliwerenga, muzinena mawu amene angawathandize kuzindikira mfundo yofunika imene angaiphunzire palembalo.

Muziganizira nkhani yonse yokhudza lembalo. Mwachitsanzo, musanatchule munthu amene ananena kapena kulemba mawu a m’Baibulo amene mukufuna kuwerenga, muzitsimikizira kuti munthuyo ndi wolondola.
Sonyezani kuti Baibulo ndi lothandiza. Ngati mukukambirana ndi anthu amene amakhulupirira zoti kuli Mulungu, muziwathandiza kuona kuti Baibulo ndi “Mawu a Mulungu” ndipo lingatipatse nzeru yapamwamba kwambiri.
Muzithandiza anthu kuti akhale ndi chidwi chofuna kumva mfundo yapalembalo. Funsani funso limene yankho lake lili palembalo, tchulani vuto limene njira yolithetsera ikupezeka palembalo kapena tchulani mfundo imene chitsanzo chake chili palembalo.

Muziganizira zimene anthu akudziwa kale zokhudza lembalo komanso nkhaniyo. Ngakhale lemba litakhala lodziwika, muzilitchula m’njira imene ingachititse anthu kuyembekezera kuti aphunzirapo mfundo yatsopano.