Malifalensi a Kabuku ka Msonkhano wa Utumiki Komanso Moyo Wathu Wachikhristu

JULY 5-11

CHUMA CHOPEZEKA M’MAWU A MULUNGU | DEUTERONOMO 11-12

“Kodi Yehova Amafuna Kuti Tizimulambira Bwanji?”

it-2 1007 ¶4

Moyo

Kutumikira Ndi Moyo Wonse. Monga mmene taonera, mawu akuti “moyo” amatanthauza munthu yense wathunthu. Komabe malemba ena amatilimbikitsa kuti tizifufuza, tizikonda komanso tizitumikira Mulungu ndi ‘mtima wathu wonse ndiponso moyo wathu wonse’ (De 4:29; 11:13, 18), pomwe lemba la Deuteronomo 6:5 limati: “Uzikonda Yehova Mulungu wako ndi mtima wako wonse, moyo wako wonse, ndi mphamvu zako zonse.” Yesu ananena kuti munthu ayenera kumatumikira ndi moyo wake wonse, mphamvu zake zonse, komanso ndi ‘maganizo ake onse.’ (Mko 12:30; Lu 10:27) Koma zimenezi zikungobweretsa funso lakuti, n’chifukwa chiyani zinthu zinazo zikutchulidwa limodzi ndi moyo chonsecho zinthuzo zili m’moyomo? Kuti timvetse bwino, tiyerekezere chonchi: Munthu akhoza kudzigulitsa (moyo wake) kuti akhale kapolo wa munthu wina ndipo akatero amakhala wa amene wamugulayo. Komabe iye akhoza kusatumikira mbuye wakeyo ndi mtima wonse kapena mofunitsitsa komanso sangafune kumusangalatsa, ndipo zimenezi zingachititse kuti asagwiritse ntchito mphamvu zake zonse kapena nzeru zake zonse kuti achite zimene mbuye wakeyo akufuna. (Yerekezerani ndi Aef 6:5; Akl 3:22.) Choncho zinthu zinazo zikutchulidwanso limodzi ndi moyo n‘cholinga choti tizizikumbukira komanso kuziganizira pamene tikutumikira Mulungu, yemwe ndife ake, komanso Mwana wake amene moyo wake unagwiritsidwa ntchito monga dipo potigula. Kutumikira Mulungu ndi “moyo wonse” kumafuna munthu yense wathunthu, popanda kusiyapo mbali ina yathupi, zochita, nzeru kapena zolakalaka za munthuyo.​—Yerekezerani ndi Mt 5:28-30; Lu 21:34-36; Aef 6:6-9; Afi 3:19; Akl 3:23, 24.

it-1 84 ¶3

Guwa la Nsembe

Aisiraeli anauzidwa kuti agwetse maguwa ansembe amene ankagwiritsidwa ntchito ndi mitundu ina, komanso kuti aphwanye zipilala zawo zopatulika pamodzi ndi mizati yake. (Eks 34:13; De 7:5, 6; 12:1-3) Iwo sankafunika kutengera zimenezi kapenanso kutentha ana awo pamoto monga nsembe ngati mmene Akanani ankachitira. (De 12:30, 31; 16:21) M’malo mokhala ndi maguwa ansembe ambirimbiri, Aisiraeli ankafunika kukhala ndi guwa la nsembe limodzi loti aziligwiritsa ntchito polambira Mulungu woona mmodzi yekha ndipo ankafunika kumanga guwalo pamalo amene Yehova wasankha. (De 12:2-6, 13, 14, 27; izi ndi zosiyana ndi mmene zinalili ku Babulo, komwe mulungu wamkazi Ishitara yekha anali ndi maguwa ansembe 180) Poyamba iwo anauzidwa kuti amange guwa la nsembe pogwiritsa ntchito miyala yosasema atangowoloka kumene Mtsinje wa Yorodano (De 27:4-8), ndipo Yoswa ndi amene anamanga guwali paphiri la Ebala. (Yos 8:30-32) Aisiraeli atagawana dziko la Kanani lomwe analanda, fuko la Rubeni, fuko la Gadi komanso hafu ya fuko la Manase anamanga guwa la nsembe lalikulu kwambiri m’mphepete mwa mtsinje wa Yorodano. Zimenezi zinakwiyitsa kwambiri mafuko enawo mpaka pamene anazindikira kuti guwalo silinali chizindikiro cha mpatuko koma chinali chikumbutso chosonyeza kuti anali okhulupirika kwa Yehova Mulungu woona.​—Yos 22:10-34.

Mfundo Zothandiza

it-1 925-926

Phiri la Gerizimu

Mogwirizana ndi malangizo amene Mose anapereka, Yoswa anatsogolera mafuko a Isiraeli pamene anasonkhana paphiri la Gerizimu ndi la Ebala atangogonjetsa kumene mzinda wa Ai. Ali kumeneko, anthuwo anamva madalitso amene adzalandire ngati angakhalebe okhulupirika kwa Yehova akuwerengedwa, komanso matemberero amene adzakumane nawo ngati sangakhale okhulupirika. Mafuko a Simiyoni, Levi, Yuda, Isakara, Yosefe komanso Benjamini anaima kutsogolo kwa phiri la Gerizimu. Alevi komanso likasa la pangano anali ku chigwa, pomwe mafuko ena 6 anaima kutsogolo kwa phiri la Ebala. (De 11:29, 30; 27:11-13; Yos 8:28-35) Zikuoneka kuti mafuko amene anaima kutsogolo kwa phiri la Gerizimu ndi omwe anavomereza pamene madalitso anawerengedwa, pomwe mafuko enawo anavomereza pamene matemberero anawerengedwa pa phiri la Ebala. Ngakhale kuti anthu ena amanena kuti madalitso anawerengedwa pa phiri la Gerizimu chifukwa choti linali lokongola komanso lachonde, mosiyana ndi phiri la Ebala lomwe linali lamiyala komanso lopanda chonde, Baibulo silimafotokoza chilichonse pa nkhaniyi. Chilamulo chinawerengedwa “mokweza pamaso pa mpingo wonse wa Aisiraeli. Akazi ndi ana aang’ono, komanso alendo okhala pakati pawo anali pomwepo.” (Yos 8:35) Khamu la anthuli linamva mawu akuwerengedwa kuchokera kutsogolo kwa mapiri onse awiri. Zimenezi zinatheka chifukwa pamalowa mawu ankamveka bwino kwambiri.

JULY 12-18

CHUMA CHOPEZEKA M’MAWU A MULUNGU | DEUTERONOMO 13-15

“Kodi Chilamulo Chinkasonyeza Bwanji Kuti Yehova Amaganizira Anthu Osauka?”

it-2 1110 ¶3

Chakhumi

Zikuoneka kuti panalinso chakhumi china chachiwiri chimene chinkasungidwa chaka chilichonse kuti chizithandiza pa ntchito zina, osati ntchito za ansembe Achilevi, ngakhale kuti Aleviwo ankachigwiritsanso ntchito. Nthawi zambiri, gawo lalikulu la chakhumichi linkagwiritsidwa ntchito mtundu wonse wa Aisiraeli ukasonkhana pamodzi kuti uchite zikondwerero zikuluzikulu. Ngati banja silikwanitsa kunyamula chakhumi kupita nacho ku Yerusalemu chifukwa cha kutalika kwa mtunda, iwo ankachigulitsa ndipo ndalamazo ankakazigwiritsa ntchito ku Yerusalemuko kugulira chakudya ndiponso kuti asangalale pamsonkhano wopatulikawo. (De 12:4-7, 11, 17, 18; 14:22-27) Pambuyo pa zaka 7 zilizonse Aisiraeli ankachita chikondwerero cha chaka cha Sabata. Ndiye kumapeto kwa chaka chachitatu komanso chaka cha 6 m’zaka 7 zimenezi, m’malo mogwiritsa ntchito chakhumichi ku zikondwerero zikuluzikulu iwo ankachigwiritsa ntchito pothandizira Alevi, alendo, akazi amasiye komanso ana amasiye a m’dera lawo.​—De 14:28, 29; 26:12.

it-2 833

Chaka cha Sabata

Chaka cha Sabata chinkadziwika kuti ‘chaka chopuma [hash·shemit·tahʹ].’ (De 15:9; 31:10) M’chaka chimenechi minda inkapumula ndipo siinkalimidwa. (Eks 23:11) M’chaka chimenechinso, anthu amene ali ndi ngongole ankakhala omasuka ku ngongoleyo. Chilengezo chowamasula ku ngongoleyo chinkaperekedwa “pamaso pa Yehova” posonyeza kumulemekeza. Ngakhale kuti anthu ambiri ali ndi maganizo osiyana pa nkhani imeneyi, ena amanena kuti ngongolezo sizinkathetsedwa, koma m’malomwake, obwereketsa sankafunika kukakamiza Mheberi mnzake kuti abweze ngongoleyo chifukwa m’chaka chimenecho sankakolola china chilichonse. Koma obwereketsa ankatha kukakamiza mlendo kuti abweze. (De 15:1-3) Arabi ena amanena kuti ngongole imene inkatengedwa n’cholinga chofuna kuthandizira anthu osauka inkathetsedwa, koma ngongole imene inkatengedwa kuti akachitire bizinezi inali m’gulu lina la ngongole. Iwo amanena kuti m’nthawi ya atumwi, Hillel anakhazikitsa njira yoti obwereketsa azitha kupita kukhoti kuti akateteze ngongole yakeyo n’cholinga choti adzamubwezere.​—The Pentateuch and Haftorahs, edited by J. Hertz, London, 1972, pp. 811, 812.

it-2 978 ¶6

Kapolo

Malamulo amene anali pakati pa kapolo ndi mbuye wake. M’nthawi ya Aisiraeli akapolo Achiheberi ankasiyana ndi akapolo ochokera ku mayiko ena. Akapolo omwe sanali Achiheberi ankakhalabe a mbuye wawo mpaka kalekale ndipo bambo ankatha kuwapereka kwa mwana wake wamwamuna (Le 25:44-46), pamene kapolo wa Chiheberi ankamasulidwa m’chaka cha 7 kapena m’Chaka cha Ufulu, potengera chaka chimene chayamba kufika. Pa nthawi imene kapolo wa Chiheberi amatumikira, ankayenera kumamuchitira zinthu ngati waganyu. (Eks 21:2; Le 25:10; De 15:12) Mheberi akadzigulitsa kuti akhale kapolo kwa mlendo kapena kwa wina wa m’banja la mlendoyo, ankakhala ndi ufulu wowomboledwa pa nthawi ina iliyonse. Iye ankatha kudziwombola yekha, kapena ndi mmodzi mwa abale ake amene akanatha kumuwombola. Kuchuluka kwa ndalama zomuwombolera kunkatengera pa kuchuluka kwa zaka zomwe zatsala kuti Chaka cha Ufulu chifike, kapena kuti afike chaka cha 7 cha ukapolo wake. (Le 25:47-52; De 15:12) Kapolo wa Chiheberi akamamasulidwa, mbuye wake ankafunika kumpatsa mphatso kuti zikamuthandize kupeza poyambira. (De 15:13-15) Ngati kapoloyo anabwera ndi mkazi, ankayenera kupita naye. Komabe ngati mbuye wakeyo anam’patsa mkazi (yemwe n’zodziwikiratu kuti anali mlendo, ndipo analibe ufulu womasulidwa ku ukapolo m’chaka cha 7 cha ukapolo wake), mkaziyo ndi ana ake ankakhalabe chuma cha mbuye wakeyo. Zikatere, kapolo wa Chiheberiyo ankatha kusankha kukhalabe ndi mbuye wakeyo. Mbuye wakeyo ankamuboola khutu ndi choboolera pofuna kusonyeza kuti adzamutumikirabe kwa moyo wake wonse.​—Eks 21:2-6; De 15:16, 17.

JULY 19-25

CHUMA CHOPEZEKA M’MAWU A MULUNGU | DEUTERONOMO 16-18

“Mfundo Zothandiza Kuweruza Milandu Mwachilungamo”

it-1 343 ¶5

Khungu

Mawu akuti khungu ankagwiritsidwa ntchito pofotokoza kukhotetsa chilungamo komwe kunkachitika mwachinyengo, ndipo Chilamulo chinkatsutsa mwamphamvu zinthu ngati ziphuphu, mphatso, komanso kukondera chifukwa zinkachititsa khungu woweruza kuti asachite zinthu mwachilungamo. “Chiphuphu chimachititsa khungu anthu amaso akuthwa.” (Eks 23:8) “Chiphuphu chimachititsa khungu maso a anthu anzeru.” (De 16:19) Woweruza ngakhale atakhala wachilungamo kapena wanzeru bwanji, ngati atalandira mphatso, modziwa kapena mosadziwa akhoza kupereka chiweruzo mopanda chilungamo. Sikuti Chilamulo cha Mulungu chimangonena kuti oweruza akhoza kukhotetsa chilungamo chifukwa choti wapatsidwa mphatso, koma chimanenanso kuti akhoza kuchita zimenezi chifukwa cha zoyankhula za oimbidwa mlandu. Chilamulochi chimati: “Musamakondere munthu wosauka, ndiponso musamakondere munthu wolemera.” (Le 19:15) Choncho chifukwa cha zoyankhula kapena kudziwika bwino kwa anthu, woweruza sankayenera kuweruza kuti munthu wolemera ndi wolakwa chabe chifukwa choti ndi wolemera basi.​—Eks 23:2, 3.

it-2 511 ¶7

Nambala

Nambala ya 2. Kawirikawiri nambala ya 2 imagwiritsidwa ntchito pa nkhani za malamulo. Ngati umboni wa anthu awiri uli wofanana, zimachititsa kuti umboniwo ukhale wamphamvu. Anthu awiri kapena atatu ankafunika kupereka umboni wawo pamaso pa oweruza. Mfundo imeneyi imagwiritsidwanso ntchito mumpingo wa Chikhristu. (De 17:6; 19:15; Mt 18:16; 2Ak 13:1; 1Ti 5:19; Ahe 10:28) Mulungu anagwiritsanso ntchito mfundo imeneyi pamene ankapereka Mwana wake ku mtundu wa anthu monga Mpulumutsi wawo. Yesu anati: “M’Chilamulo chanu chomwechi analembamo kuti, ‘Umboni wa anthu awiri ndi woona.’ Ineyo pandekha ndimadzichitira umboni, ndipo Atate amene anandituma amandichitiranso umboni.”​—Yoh 8:17, 18.

it-2 685 ¶6

Wansembe

Ansembe ndi amene anapatsidwa mwayi waukulu ofotokozera chilamulo cha Mulungu, komanso ankathandiza kwambiri m’makhoti a mu Isiraeli. M’mizinda imene ansembe anapatsidwa, iwo ankathandiza oweruza pa ntchito zawo, komanso nthawi zina ankagwira ntchito limodzi ndi oweruzawo pa milandu yovuta kwambiri yomwe makhoti sakanakwanitsa kupereka chigamulo. (De 17:8, 9) Iwo ankafunika kuthandizana ndi akulu a mumzinda pa milandu yokhudza munthu amene wapezeka atafa, kuti aonetsetse kuti achita zonse zofunika kuti achotse mlandu wa magazi mumzindamo. (De 21:1, 2, 5) Ngati mwamuna wansanje akuganiza kuti mkazi wake wachita chigololo, mkaziyo ankapita naye kumalo opatulika kumene wansembe ankachita mwambo umene Yehova ananena, ndipo Yehova ankapereka chigamulo ngati mkaziyo ali wolakwa kapena ayi. (Nu 5:11-31) Pa milandu yonse, chigamulo chimene chaperekedwa ndi ansembe kapena oweruza, chinkayenera kulemekezedwa ndipo ngati munthu sanalemekeze kapena kumvera chigamulocho ankayenera kuphedwa.​—Nu 15:30; De 17:10-13.

Mfundo Zothandiza

it-1 787

Kuchotsa Munthu Woipa

M’Chilamulo munthu ankapatsidwa chilango chophedwa ngati pali mboni zosachepera ziwiri. (De 19:15) Mbonizi zinkayenera kukhala zoyambirira kum’ponya miyala wolakwayo. (De 17:7) Zimenezi zinkasonyeza kuti iwo amakonda kwambiri chilamulo cha Mulungu komanso amafuna kuti mtundu wa Aisiraeli ukhale woyera ndiponso zinkathandiza kuti anthu asamapereke umboni wabodza, mosasamala, komanso asanatsimikize kuti munthuyo walakwadi.

JULY 26–AUGUST 1

CHUMA CHOPEZEKA M’MAWU A MULUNGU | DEUTERONOMO 19-21

“Yehova Amaona Kuti Moyo wa Munthu Ndi Wamtengo Wapatali”

it-1 344

Magazi

Munthu ali ndi ufulu wokhala ndi moyo umene Mulungu anamupatsa, ndipo aliyense amene angachititse kuti munthuyo asakhale ndi moyo akuyenera kuyankha kwa Mulungu. Zimenezi zinaonekera pa zimene Mulungu anauza Kaini atapha kumene m’bale wake. Iye anati: “Magazi a m’bale wako akundilirira munthaka.” (Ge 4:10) Choncho ngati munthu amadana kwambiri ndi m’bale wake, moti mpaka amafuna m’bale wakeyo atafa, kapena kumunenera miseche n’cholinga chofuna kumuipitsira mbiri kapenanso kumuperekera umboni wabodza, n’kuika moyo wa m’bale wakeyo pangozi, akhoza kukhala ndi mlandu wa magazi a m’bale wakeyo.​—Le 19:16; De 19:18-21; 1Yo 3:15.

Mfundo Zothandiza

it-1 518 ¶1

Khoti

Khoti la mumzinda linkakhala kuchipata cha mzindawo. (De 16:18; 21:19; 22:15, 24; 25:7; Ru 4:1) “Kuchipata” kumene kukunenedwa apa ndi bwalo lalikulu limene linali mumzinda pafupi ndi chipata. Kuchipataku ndi komwe anthu ankasonkhana kuti amve Chilamulo chikuwerengedwa. (Ne 8:1-3) Pamalo amenewa zinali zosavuta kupeza mboni za nkhani zina ndi zina za mumzindawo, monga zogulitsana katundu ndi zina chifukwa pankadutsa anthu ambiri. Komanso chifukwa chakuti pamalopa pankapezeka anthu ambiri milandu ikamazengedwa, zinkathandiza oweruza kuti achite zinthu mosamala komanso mwachilungamo pa nthawi yozenga milanduyo komanso akamapereka chigamulo chawo. N’zodziwikiratu kuti panali malo amene anapatulidwa pafupi ndi chipata omwe oweruza ankakhalapo. (Yob 29:7) Samueli anali kuzungulira m’madera a Beteli, Giligala ndi Mizipa, ndipo anali “kuweruza Isiraeli m’malo onsewa,” komanso ku Rama kumene kunali nyumba yake.​—1Sa 7:16, 17.

AUGUST 2-8

CHUMA CHOPEZEKA M’MAWU A MULUNGU | DEUTERONOMO 22-23

“Kodi Chilamulo Chinkasonyeza Bwanji Kuti Yehova Amaganizira Zinyama?”

it-1 375-376

Katundu Wolemera

Kale nyama ndi zimene zinkagwiritsidwa ntchito ponyamula katundu, ndipo Aisiraeli anauzidwa kuti akaona munthu wodana nawo bulu wake atagona pansi chifukwa cholemedwa ndi katundu, m’malo mongomusiya, ankafunika kuthandizana ndi mwini buluyo kumasula katunduyo. (Eks 23:5) Kuchuluka kwa zinthu zimene nyama ingathe kunyamula kumadziwika kuti katundu, monga katundu wa “dothi lotha kunyamulidwa ndi nyulu ziwiri.”​—2Mf 5:17.

it-1 621 ¶1

Deuteronomo

Buku la Deuteronomo limasonyeza kuti nyama zinkasonyezedwa chikondi. Mbalame yaikazi imene yafungatira mazira kapena ana ake m’chisa, kumakhala kosavuta kuigwira chifukwa imafuna kuteteza mazira kapena anawo, choncho Aisiraeli ankaletsedwa kugwira mbalame yotereyi. Iwo ankafunika kuithamangitsa kenako n’kutenga anawo. Zimenezi zinkathandiza mbalame yaikaziyo kukhalanso ndi ana ena. (De 22:6, 7) Mlimi sankaloledwa kumangirira bulu ndi ng’ombe pa goli limodzi kuopera kuti nyama yochepa mphamvu ingavutike. (22:10) Ng’ombe sinkayenera kumangidwa pakamwa ikamapuntha mbewu kuti isavutike ndi njala chakudya chili pompo chonsecho ikugwiritsa ntchito mphamvu zake kupuntha mbewuzo.​—25:4.

Mfundo Zothandiza

it-1 600

Ngongole, Wotenga Ngongole

Ngongole ndi ndalama zimene munthu watenga kwa munthu wina ndipo akuyenera kudzabweza. M’nthawi ya Aisiraeli, anthu ankatenga ngongole chifukwa cha mavuto azachuma. Mwisiraeli akatenga ngongole ankakhala pamavuto aakulu chifukwa ankakhala kapolo wa wobwereketsayo. (Miy 22:7) Choncho anthu a Mulungu analamulidwa kuti azikhala owolowa manja komanso osadzikonda pa nkhani yokongoza ndalama kwa Aisiraeli ena omwe anali osauka, ndiponso kuti asamapezerepo mwayi wopanga phindu powalipiritsa chiwongoladzanja. (Eks 22:25; De 15:7, 8; Sl 37:26; 112:5) Koma alendo ankatha kuwalipiritsa chiwongoladzanja. (De 23:20) Anthu omwe amayankhulapo pa nkhani zokhudza Ayuda amanena kuti zimenezi zinkagwira ntchito ngati munthu watenga ngongole kuti akachitire bizinezi, osati ngati watenga ngongoleyo chifukwa chovutika. Nthawi zambiri alendo sankakhazikika mu Isiraeli chifukwa ankangopitamo kukachita malonda, choncho ankayenera kupereka chiwongoladzanja chifukwa nawonso ankabwereketsa ndalama zawo pa chiwongoladzanja.

AUGUST 9-15

CHUMA CHOPEZEKA M’MAWU A MULUNGU | DEUTERONOMO 24-26

“Kodi Chilamulo Chinkasonyeza Bwanji Kuti Yehova Amaganizira Akazi?”

it-2 1196 ¶4

Mkazi

Ngakhale malamulo ausilikali anali okomera mwamuna ndi mkazi omwe angokwatirana kumene pomulola mwamunayo kuti asapite kunkhondo kwa chaka chonse choyamba cha ukwati wawo. Zimenezi zinkapereka mwayi kwa banjalo kuti likhale ndi mwana woti mayiyo azisangalala naye mwamuna wake akachoka, komanso makamaka ngati mwamunayo atakafera ku nkhondo.​—De 20:7; 24:5.

it-1 963 ¶2

Kukunkha

N’zodziwikiratu kuti dongosolo limeneli lomwe linkakhudza anthu osauka a m’dzikolo, ngakhale kuti linkalimbikitsa mtima wopatsa, kusadzikonda, komanso kudalira madalitso a Yehova, silinkalimbikitsa anthu kukhala aulesi. Dongosololi likugwirizana ndi mawu a Davide akuti: “Sindinaonepo munthu aliyense wolungama atasiyidwa, Kapena ana ake akupemphapempha chakudya.” (Sl 37:25) Pogwiritsa ntchito dongosolo limeneli lomwe linali m’Chilamulo, anthu osauka chifukwa cha khama lawo, sankavutika ndi njala ndipo iwowo komanso ana awo sankapemphapempha chakudya.

Mfundo Zothandiza

it-1 640 ¶5

Kuthetsa Ukwati

Kalata Yothetsera Ukwati. Mose atavomereza amuna kuti akhoza kuthetsa ukwati, amuna ambiri anayamba kugwiritsa ntchito mwayi umenewu molakwika. Komabe, zimenezi zisatipangitse kuganiza kuti zinali zophweka kwa amuna a Chiisiraeli kuthetsa mabanja awo. Kuti iwo achite zimenezi ankafunika kutsatira dongosolo loyenera. Mwamunayo ankayenera kulembera mkaziyo “kalata yothetsera ukwati,” ndipo ankafunika kum’patsa kalatayo “m’manja mwake, n’kumuchotsa panyumba pake.” (De 24:1) Ngakhale kuti Malemba safotokoza zambiri zokhudza njira imeneyi yothetsera ukwati, zikuoneka kuti njirayi inkaphatikizapo kufunsa maganizo kwa amuna oyenerera amene anasankhidwa, omwe choyamba ankayesetsa kuthandiza banjalo kuti likonze zinthu. Nthawi imene mwamunayo ankathera kulemba kalata komanso kuchita zinthu zonse zimene malamulo ankafuna, inkamupatsa mpata woganiziranso zimene akufuna kuchitazo. Pankafunika kukhala chifukwa chomveka chothetsera ukwati, ndipo ngati zinthu zonse zoyenera zatsatiridwa, zinkathandiza kuti amuna asamangothamangira kuthetsa mabanja awo. Zimenezi zinkathandiza kuti ufulu wa mkaziyo utetezedwa komanso kuti asamavutike. Malemba safotokoza zimene zinkalembedwa mu “kalata yothetsera ukwati.”

AUGUST 16-22

CHUMA CHOPEZEKA M’MAWU A MULUNGU | DEUTERONOMO 27-28

Mfundo Zothandiza

it-1 360

Chizindikiro cha Malire

Chilamulo cha Yehova chinkaletsa kusuntha chizindikiro cha malire. (De 19:14; onaninso Miy 22:28.) Ndipotu, “munthu wosuntha chizindikiro cha malire a mnzake” ankakhala wotembereredwa. (De 27:17) Munthu yemwe ali ndi malo ankadalira zokolola zomwe angapeze kuchokera pamalo akewo, choncho kusuntha chizindikiro cha malire ake kunali ngati kumulanda zinthu zomwe zingamuthandize pa moyo wake. Kuchita zimenezi kunali ngati kuba ndipo ndi mmene kale anthu ankakuonera. (Yob 24:2) Koma panali anthu ena oipa mtima omwe ankasuntha malire a anzawo, ndipo m’nthawi ya Hoseya akalonga a Yuda anawayerekezera ndi anthu amenewa.​—Ho 5:10.

AUGUST 23-29

CHUMA CHOPEZEKA M’MAWU A MULUNGU | DEUTERONOMO 29-30

Mfundo Zothandiza

it-1 665 ¶3

Khutu

Yehova anagwiritsa ntchito atumiki ake pofotokoza za mtundu wa Aisiraeli osamvera kuti “makutu awo sanawachite mdulidwe.” (Yer 6:10; Mac 7:51) Zinali ngati atchingidwa ndi chinachake chomwe chimawapangitsa kuti asamamve. Awa ndi makutu omwe sanatsegulidwe ndi Yehova yemwe amathandiza anthu omufunafuna kuti makutu awo azimva, koma amalola kuti anthu omwe samumvera, makutu awo asamamve zinthu zauzimu. (De 29:4; Aro 11:8) Mtumwi Paulo analosera za nthawi imene anthu ena omwe amati ndi Akhristu adzasiya kukhala okhulupirika, ndipo sadzafuna kumva choonadi cha m’Mawu a Mulungu, koma adzalakalaka kumvetsera aphunzitsi onyenga kuti amve zowakomera m’khutu. (2Ti 4:3, 4; 1Ti 4:1) Komanso, makutu a munthu akhoza ‘kulira’ chifukwa chomva nkhani yodabwitsa, makamaka yomwe ndi yoopsa.​—1Sa 3:11; 2Mf 21:12; Yer 19:3.