“Kunola Luso Lathu mu Ulaliki—Kupeza Anthu Owapelekela Magazini”

Cifukwa Cake Kuli Kofunika: Anthu ambili amene amakonda kuŵelenga magazini athu safuna kuphunzila nafe Baibulo. Ena amakana cifukwa cokonda kwambili cipembezo cao, kapena amaona kuti alibe nthawi yophunzila. Komabe, pamene akuŵelenga magazini athu nthawi zonse, angayambe kulakalaka kuphunzila Mau a Mulungu. (1 Pet. 2:2) Nkhani inayake ya m’magazini ingawakhudze kwambili, kapena zocitika pa umoyo wao zingasinthe. Tikamawacezela mwacidule nthawi zonse, angayambe kumasuka nafe ndipo tingadziŵe zokonda zao ndi zimene zimawadetsa nkhawa. M’kupita kwa nthawi tingayambe kuphunzila nao Baibulo.

Mmene Tingacitile:

Tizipatula nthawi mwezi uliwonse yopelekela munthu magazini atsopano a Nsanja ya Mlonda ndi Galamukani! Mwina mkati mwa mwezi tingamucezele n’colinga cokulitsa cidwi cake pa nkhani inayake m’magazini imene tinam’siila kapena kum’patsa cofalitsa cimene tikugaŵila mweziwo. Tizilemba zofunikila monga dzina la munthuyo ndi zofalitsa zimene tawapatsa.—Onani Utumiki Wathu wa Ufumu wa January 2014, tsa. 3.
Tizikonzekela ulendo uliwonse. M’malo mongosiya magazini, tiziyesetsa kupanga ubwenzi wabwino ndi mwininyumba n’colinga cokulitsa cidwi cake.
Khalani wokonzeka kuyambitsa phunzilo pa mpata ulionse umene ungapezeke. Ngati winawake amene mumapelekela magazini wafunsa zimene Baibulo limanena pa nkhani inayake, mupatseni cofalitsa cimene timagwilitsila nchito pophunzila Baibulo cimene cili ndi yankho ndiyeno kambilanani naye. Musanacoke, mungamufunse funso logwilizana ndi nkhani imene mwakambilana kuti mudzayankhe ulendo wotsatila. Ngati mumakambilana nthawi zonse ngakhale mwacidule cabe pogwilitsila nchito Baibulo kapena buku lophunzilila Baibulo, ndiye kuti mukucititsa phunzilo la Baibulo. Kodi munapatsapo mwininyumba kabuku ka Uthenga Wabwino ndi kumusonyeza mmene timaphunzilila Baibulo? Kodi munamuonetsapo vidiyo yakuti N’cifukwa Ciani Muyenela Kuphunzila Baibulo? ndi yakuti Kodi Phunzilo la Baibulo Limacitika Bwanji? Ngakhale kuti munthu wakhala akukana kuphunzila Baibulo, tiyenela kuzindikila kuti zocitika pa umoyo zimasintha. Conco, nthawi ina mungacite bwino kumupemphanso kuti muziphunzila naye Baibulo.

Yesani Kucita Izi Mwezi Uno:

Lembani maina a anthu amene afuna kuti muziwapelekela magazini. Apatseni magazini atsopano ndi kuwauza kuti mudzawabweletsela ena mwezi wotsatila.