Kunola Luso Lathu mu Ulaliki—Kulalikila m’Gawo la Malonda

Cifukwa Cake Kuli Kofunika: Popeza kuti anthu amagwila nchito kwa maola ambili, tingacite bwino kulalikila ku malo amene io amaseŵenzela kuti uthenga wabwino wa Ufumu uwafike. Kulalikila ku malo a malonda kumakondweletsa ndipo kumabala zipatso, cifukwa anthu ambili amapezeka kunchito ndipo anchito amalankhula bwino ndi makasitomala. Kuti ulaliki ukhale wogwila mtima, ofalitsa ayenela kukhala ndi luso la kuzindikila ndipo afunika kuvala ndi kudzikongoletsa moyenela. (2 Akor. 6:3) Conco, woyang’anila nchito ayenela kuona mmene ulaliki ukucitikila m’gawo la malonda, ndi kudziŵa ofalitsa amene akulalikilamo.

Mmene Tingacitile:

Konzekelani ulaliki wacidule. Ngati tingatenge nthawi yaitali tikukambilana ndi munthu amene akugwila nchito, ulendo wotsatila sangatipatsenso mwai wokambilana naye.
Pezani nthawi yabwino yowalalikila makamaka pamene ogulitsawo sakhala otangwanika kwambili, monga akangoyamba nchito.
Muzipempha cilolezo kwa amene akuyang’anila nchito. Khalani waubwenzi. Mungakambe kuti: “Tikucezela anthu mwacidule kumalo ao a malonda cifukwa n’zovuta kuwapeza kunyumba.” Mukatelo, mulalikileni mwacidule kenako mpatseni kapepala ka uthenga kapena magazini kapena cofalitsa ciliconse. Kuti asatione ngati ogulitsa malonda, zingakhale bwino kusakamba za zopeleka pokhapokha ngati atifunsa za mmene timapezela ndalama zoyendetsela nchito yathu.
Ngati munthu amene akuyang’anila nchito ndi waubwenzi, m’pempheni kuti mukambilaneko ndi anchito ena mwacidule. Pa malo ena a malonda, zimakhala bwino kupempha ngati mungasiye zofalitsa pamalo odyela kapena opumulila.
Khalani ozindikila ndi ololela. Mwacitsanzo, ngati wanchito akulankhula ndi kasitomala kapena ndi wotangwanika, muyembekezeni kuti atsilize zimene akucita.

Yesani Kucita Izi Mwezi Uno:

Pa Kulambila kwanu kwa Pabanja, yesezani ulaliki wacitsanzo umene mufuna kudzagwilitsila nchito mukamalalikila m’gawo la malonda.