Caka ca 2023 Cacititsa Anthu Ambili Kukhala na Nkhawa—Kodi Baibo Ikutipo Ciyani?

Zocitika za padziko lonse mu 2023 zapeleka umboni wosatsutsika wakuti tikukhala m’nthawi imene Baibo imacha “masiku otsiliza.” (2 Timoteyo 3:1) Onani kuti zimene zikucitika padziko lonse n’zimenenso Baibo inakambilatu kuti zidzacitika m’nthawi yathu ino.

Baibo inakambilatu zocitika za padziko lonse

“Nkhondo ndi malipoti a nkhondo.”—Mateyu 24:6.

• “Zaciwawa zikuwonjezeka m’malo ambili padziko lapansi.”a

“Zivomelezi mʼmalo osiyanasiyana.”—Maliko 13:8.

• “Kucokela ku ciyambi ca caka ca 2023, padziko lonse pacitika zivomezi zamphamvu kwambili zokwana 13. Ici ni caka cimene kwacitika zivomezi zambili zamphamvu zedi.”b

“Zinthu zoopsa.”—Luka 21:11.

• Dziko lapansi likutentha kwambili, moti tsopano likutentha koopsa kuposa kale lonse.—António Guterres, Kalembela Wamkulu wa Bungwe la Untied Nations.c

“Njala.”—Mateyu 24:7.

• “Caka ca 2023 cakhala covuta kwambili kwa anthu amene amavutikila kupeza cakudya ca banja lawo.”d

“Nthawi yapadela komanso yovuta.”—2 Timoteyo 3:1.

• “Padziko lonse, munthu mmodzi pa anthu 8 alionse akudwala matenda a maganizo.”e

Kodi tiyembekezela zotani mu 2024?

Palibe amene adziŵa zimene zidzacitika mu 2024. Koma zocitika za padzikoli zionetsa kuti posacedwa Ufumu wa Mulungu, kapena kuti boma lakumwamba, udzaloŵa m’malo maboma onse a anthu ndipo udzacotsapo zonse zimene zimayambitsa mavuto na nkhawa.—Danieli 2:44; Chivumbulutso 21:4.

Koma pamene tikuyembekezela nthawiyo, tiyenela kudalila Mulungu kuti azitithandiza tikakhala na nkhawa. Baibo imati:

“Ndikamacita mantha, ndimadalila inu.”—Salimo 56:3.

Kodi tingaonetse bwanji kuti timamudalila Mulungu? Tikupemphani kuti muphunzile zambili za lonjezo la m’Baibo la tsogolo lopanda mavuto. Yambani maphunzilo a Baibo okambilana aulele kuti muone mmene malonjezo a m’Baibo angakuthandizileni limodzi na banja lanu.