Swau
10 “Ame ndyimupopila otyili okuti, una uhanyingilila pombundi motyinyongo tyonongi, mahi aulula, omunthu oo wati oe otyimphulu oe otyifuanga. 2 Mahi una unyingilila pombundi, omunthu oo, oe omunthita wonongi. 3 Wokuyelula ombundi umuyelulila-po, iya onongi ambuivi ondaka yae. Ngwe aihana onongi mbae komanyina, embulupula-mo. 4 Tyina amembulupula-mo ambuho, ukala komutwe wambo, iya onongi ambumulandula, mokonda mbwii ondaka yae. 5 Kamambulandula omunthu mbehei, mahi mambukemuhateka, mokonda kambwii ondaka yovanthu mbehei.” 6 Sesusi wevepopila onthengele-popia oyo, mahi avahanoñgonoka etyi ekahi nokuvepopila.
7 Ngotyo Sesusi evepopila vali okuti: “Ame ndyimupopila otyili okuti, ame mbundi yonongi. 8 Aveho vana veya okulipaka pomphangu yange, ovimphulu, mahi onongi kambuvetehelela. 9 Ame, ame mbundi; una unyingilila mu ame makayovoka, manyingila alupuka iya avasi okulia. 10 Otyimphulu tyiya vala okuvaka, nokuipaa, nokuhanya. Ame neya opo mukale nomuenyo, amukala nao omunyingi. 11 Ame ndyimunthita omuwa; omunthita omuwa waava omuenyo* wae opo ayovole onongi mbae. 12 Omuundapi, uhemunthita, mokonda onongi hambae-ko tyina amona ehunyu liya usa-po onongi akahateka iya ehunyu aliipaa-po mbumwe ononkhuavo ambuliyandyana 13 mokonda ngwe omuundapi iya kesukile nonongi. 14 Ame ndyimunthita omuwa. Ame ndyii onongi mbange, iya onongi mbange mbundyi, 15 ngetyi Tate endyi iya ame ndyii Tate, ame ndyipakula omuenyo* wange pala ouwa wonongi.
16 “Iya ame ndyina onongi ononkhuavo mbehe mbotyunda etyi; nambo ndyina okumbueta, ambutehelela ondaka yange, iya ambukala otyunda tyike vala, nomunthita wike vala. 17 Otyo Tate enthyolele, mokonda ndyiava omuenyo* wange, opo ndyiutambule vali. 18 Kutupu omunthu nawike uumphola, mahi ame muene ndyiwaava. Ame ndyina epondolo liokuwaava, nepondolo liokuutambula vali. Otyitumino otyo netyipewa na Tate.”
19 Mokonda yonondaka ombo, ova Sundeu aveliyapuka vali pokati. 20 Ovanyingi puvo ankho vati: “Ou una otyilulu, walinga otyova. Mumutehelela mokonda yatyi?” 21 Ovakuavo avati: “Ombu ha nondaka mbomunthu una otyilulu. Otyilulu tyipondola okupatula omaiho ovamphoki?”
22 Pomuvo opo, ankho mo Selusalei mukahi nokulingwa Otyipito Tyokupakula Ondyuo ya Huku. Ankho omuvo woutalala. 23 Sesusi ankho ukahi nokueenda-enda mondyuo ya Huku, momuvanda wa Salomau. 24 Iya ova Sundeu avelisete nae, avahimbika okumupula okuti: “Alo nalupi matukala* tyihekwii ovelie? Inkha ove Kilisitu, tupopile umwe nawa.” 25 Sesusi evekumbulula okuti: “Ame nemupopila-le, mahi onwe amuhetavela. Ovilinga ndyikahi nokulinga menyina lya Tate, viaava oumbangi konthele yange. 26 Mahi onwe kamutavela, mokonda kamunongi mbange. 27 Onongi mbange mbutehelela ondaka yange, iya ame ndyimbwii, iya ngwe mbundandula. 28 Ame ndyimbuavela omuenyo uhapu, iya kamambukanyimwa-ko nalumwe, tupu nawike mekembupola peke liange. 29 Etyi Tate ampha otyinene vali kovipuka ovikuavo aviho iya nawike upondola okutyipola peke lya Tate. 30 Ame na Tate tuna ewaneko muevi tulinga.”
31 Ova Sundeu avakoyo vali omamanya na vemuvete. 32 Sesusi evepopila okuti: “Ame nalinga ovilinga ovinyingi oviwa natumwa na Tate. Ovipi povilinga nalinga mumbetela nomamanya?” 33 Ova Sundeu avemukumbulula okuti: “Onthue katukuvete nomamanya mokonda yovilinga oviwa, mahi omokonda ukahi nokupopia omapita Huku, tyetyi ove umunthu, mahi ukahi nokulipaka kou-huku.” 34 Sesusi evepulu okuti: “Movitumino vienyi kamuahonekelwe okuti, ‘Ame nati: “Onwe muno huku”’?* 35 Inkha Huku wapopia okuti “onohuku vana ondaka yae yaendela” iya ovihonekwa avihapilululwa — 36 onwe mupopila una Tate ankhimaneka, emutumu mouye, okuti: ‘Upopia omapita Huku,’ mokonda yetyi ame nati: ‘Ndyimona wa Huku’? 37 Inkha ame hikahi nokulinga ovilinga vya Tate yange, muhenthavelei. 38 Mahi inkha ovio ndyikahi nokulinga, muhetavelei etyi ndyipopia, tavelei etyi ndyilinga opo munoñgonoke iya amutualako okunoñgonoka okuti Tate ukahi kumwe na ame iya ame ndyikahi kumwe na Tate.” 39 Ngotyo, avahande vali okumukuata, mahi ngwe akalomboka, avehemuvasi.
40 Ayauka vali o Solondau, aende komphangu imwe ankho Suau ambatisalelele po tete, ngako akala. 41 Iya akuya ovanthu ovanyingi, avahimbika okupopia okuti: “Suau kalingile ehuviso nalike, mahi ovipuka aviho Suau apopile konthele yomulume ou ankho oviotyotyili.” 42 Ovanyingi avakala nekolelo mwe.