Swau
9 Puetyi ankho ekahi nokulamba, amono omulume umwe watyitua omumphoki. 2 Ovalongwa vae avemupulu okuti: “Mulongesi,* olie walinga onkhali, omulume ou ine ovo he, etyi atyitwa omumphoki?” 3 Sesusi ati: “Nii omulume ou nii ovo he petupu ou walinga onkhali, mahi etyi tyamoneka opo ovanthu vamone etyi Huku apondola okulinga konthele yae. 4 Tuna yokulinga ovilinga vya Una wanthuma tyina nkhele omutenya, mokonda makunthikovela iya petupu omunthu maundapa. 5 Tyina ame nkhele ndyili mouye, ndyityimimi tyouye.” 6 Etyi amana okupopia ngotyo, anthili omate pohi alingi onthata nomate, awaveka onthata komaiho omulume oo, 7 iya emupopila okuti: “Enda kelikohe meiva lyo Siloe” (tyihangununa okuti “Watumua”). Aende, ekelikoha tyina akondoka weetepo.
8 Pahe ovomunthele yae na vana ankho vemumona tyina aita osimola avahimbika okuti: “Omulume ou hayouna ankho ukala lupumphi otyo aita osimola?” 9 Vamwe ankho vati: “Oe umwe.” Ovakuavo ankho vati: “Au, velifwa nae.” Omulume oo ankho uti: “Ame umwe.” 10 Ngotyo, avemupulu okuti: “Oñgeni omaiho ove apatuka?” 11 Akumbulula okuti: “Omulume umwe utiwa o Sesusi walinga onthata awaveka komaiho ange amphopila okuti: ‘Enda ko Siloee, olikoho.’ Moluotyo, andyiende, andyikelikoha andyihimbika okumonapo.” 12 Avemupulu okuti: “Omulume oo ulipi?” Ngwe ati: “Ame hityii.”
13 Iya avatuala omulume ankho omumphoki kova Faliseu. 14 Monthiki Sesusi alinga onthata apatula omaiho omulume oo, ankho Omotyasapalo. 15 Moluotyo ova Faliseu tupu avahimbika okupula omulume oo, oñgeni ahimbika okumonapo. Omulume evekumbulula okuti: “Wapaka onthata komaiho ange, iya andyikelikoha, pahe ndyietepo.” 16 Iya ova Faliseu vamwe avahimbika okupopia okuti: “Oo hamunthu-ko wa Huku, mokonda kalandula otyitumino Tyotyasapalo.” Ovakuavo avati: “Okuti inkha omunthu wokulinga ononkhali, ñgeno ulinga omahuviso ngoo?” Moluotyo, ankho veliyapuka pokati. 17 Avapulu vali omulume ankho omumphoki okuti: “Ove usoka okuti omunthu patyi, etyi apatula omaiho ove?” Omulume ati: “Omuuli.”
18 Mahi ova Sundeu ankho kavetavela okuti ankho omumphoki, pahe weetepo. Avaihana ovo he, 19 iya avevepulu okuti: “Omona wenyi muti watyitua omumphoki oyou? Iya oñgeni pahe eetepo?” 20 Ovo he avakumbulula okuti: “Tutyii okuti ou omona wetu, iya ankho watyitua omumphoki. 21 Mahi oñgeni pahe eetepo, onthue katutyii; ine olie wapatula omaiho ae, katumwii. Pulei kwe. Muene pahe omukulu. Muene oe una okupopia.” 22 Ovo he vapopia ovipuka ovio, mokonda ankho vena owoma nova Sundeu, tyetyi ova Sundeu ankho vatokola okuti omunthu utavela okuti Sesusi o Kilisitu, mataatwa mongeleya. 23 Otyo ovo he vapopila okuti: “Muene pahe omukulu. Pulei kwe.”
24 Moluotyo, avaihana otyikando tya vali omulume ankho omumphoki, avemupopila okuti: “Tupopile otyili mokonda Huku ukueete, onthue tutyii okuti omulume oo ulinga ononkhali.” 25 Evekumbulula okuti: “Inkha ulinga ononkhali ame hityii. Etyi ndyii, otyokuti ame ankho ndyimumphoki, mahi pahe ndyietepo.” 26 Iya avemupulu okuti: “Wekulinga ñgeni? Oñgeni apatula omaiho ove?” 27 Iya evekumbulula okuti: “Ame nemupopila-tyo-ale, mahi onwe amuhenthavela. Omokonda yatyi muhandela vali okutyitehelela? Okuti no onwe muhanda okukala ovalongwa vae?” 28 Moluotyo, avemulingi omukuele, avati: “Ove umulongwa womulume oo, mahi onthue tuvalongwa va Moisesi. 29 Onthue tutyii okuti Huku wapopile na Moisesi, mahi omulume oo, oku atunda onthue katukwii.” 30 Omulume oo evekumbulula okuti: “Otyo tyihuvisa, okuti onwe kamwii opi atunda, mahi ngwe waikula omaiho ange. 31 Onthue tutyii okuti Huku katehelela ovanthu vokulinga onkhali, mahi inkha omunthu umwe una onthilo nae, alingi ehando liae, Huku umutehelela. 32 Tunde kohale, nalumwe kueivalele nawike wapatulile omaiho omunthu watyitua omumphoki. 33 Inkha omunthu oo ha wa Huku-ko, ñgeno kevili okulinga natyike.” 34 Avemukumbulula okuti: “Watyitilua mononkhali, pahe uhanda okutulongesa?” Avemutaatela pondye!
35 Sesusi eivi okuti vemutaatela pondye, iya etyi emuvasa, emuti: “Ove una ekolelo mo Mona womulume?” 36 Omulume akumbulula okuti: “Olie tatekulu, opo ndyikale nekolelo mwe?” 37 Sesusi emupopila okuti: “Ove umueete, oe ukahi nokupopia no ove.” 38 Iya ngwe ati: “Ndyina ekolelo mwe Tatekulu.” Iya aikila konongolo komutwe wae. 39 Sesusi ati: “Ame neya mouye pala ekoyeso, opo vana vahamonopo vamonepo iya vana vamonapo avakala ovamphoki.” 40 Ova Faliseu vamwe ankho ena-vo aveivi ovipuka ovio, avemupulu okuti: “Okuti no onthwe tuvamphoki?” 41 Sesusi evepopila okuti: “Inkha muali ovamphoki ñgeno kamuvelwa onombei mokonda yonkhali. Mahi onwe muti: ‘Tueetepo.’ Iya onkhali yenyi itualako.”