Ova Efesu
2 Tupu Huku wemukalesa nomuenyo, namphila ankho muankhia mokonda yoviponyo vienyi no nonkhali mbenyi, 2 omu ankho mukahi puetyi ankho muendela monkhalelo youye uno, yelikuata nomutumini womphepo, ononkhono mbukahi nokuhongiliya ovanthu vokuhetavela. 3 Po tete onthue atuho ankho tulinga ovipuka vielikuata nomahando etu olutu pokati kavo, okulinga ovipuka olutu luetu luhanda, nokulinga etyi tyelikuata nomalusoke etu muene, iya tunde pokuatyitwa ankho tuatokala onyengo ya Huku ngovanthu ovakuavo. 4 Mahi Huku una okankhenda okanene, iya mokonda wakala noluembia olunene no onthue, 5 wetuavela omuenyo kumwe na Kilisitu, no puetyi ankho tuankhia mokonda yoviponyo vietu — onwe muayovolwa mokonda yokankhenda okanene. 6 Tyihe-otyo vala, mokonda tuawanekwa kumwe na Kilisitu Sesusi, Huku wetupindula-po kumwe na Kilisitu iya etuavela omphangu yokupumphama kumwe nae keulu, 7 Huku walinga ngotyo opo mouye* omupe mauya alekese okankhenda kae okanene unene tyina amalingi ovipuka oviwa pala onthue vokukahi kumwe na Kilisitu Sesusi.
8 Mokonda yokankhenda oko okanene, onwe muayovolwa mokonda yekolelo, iya otyo katyitei ku onwe muene; mahi otyali tya Huku. 9 Eyovo olio ha mokonda yovipuka mulinga, opo pahakale nawike ulimphanda. 10 Onthue tuvilinga viomavoko a Huku, mokonda tuvalongwa va Kilisitu Sesusi tualingwa opo tulinge ovilinga oviwa, vina Huku atokola-le ponthyimbi opo tuvilinge.
11 Moluotyo, hinangelei okuti onwe kamu va Sundeu, iya vana “vokuapitiswa ekuendye” novanthu, vemuihana okuti muvanthu “vahapitile ekuendye.” 12 Pomuvo watyo oo, onwe ankho mutupu Kilisitu, ankho mukahi kokule nonkhalelo yo Isilayeli, ankho kamukahi monomphango mbomulao; ankho mutupu ekevelo iya onwe ankho mutupu Huku mouye. 13 Mahi pahe mokonda muvalongwa va Kilisitu Sesusi, onwe ankho vokukahi kokule mueya popepi mokonda yohonde ya Kilisitu. 14 Mokonda Kilisitu wetuetela ombembwa, una wawaneka kumwe ovikundyi vivali avikala tyike iya ateye-po otyimato ankho tyeviyapula pokati. 15 Notyilikutila tyolutu lwae wanyima-ko Ovitumino ankho vikahi Movitumino vya Moisesi, ankho viaeta oundyale pokati kovikundyi vivali. Iya ovikundyi ovio evilingi otyikundyi tyike otyipe. Ovikundyi ovio vivali pahe ovalongwa vae, iya Kilisitu evikalesa nombembwa pokati kavio. 16 Iya wawaneka ovikundyi ovio na Huku mokonda yomuti* wemone opo ovikundyi ovio vikale vala olutu lwike, mokonda waipaa oundyale menyina liae muene. 17 Iya ngwe weya apopi onondaka onongwa mbombembwa tyilinge ku onwe ankho muli kokule, tyilinge ku vana ankho veli popepi, 18 mokonda menyina liae, onthue ovikundyi ovio vivali, tufuena ku Tate mokonda yononkhono mbuike vala mba Huku.
19 Pahe onwe kamuvanthu vali veheiwe, ononthunda-vilongo, mahi onwe mukahi pokati kovasukuki, iya muvanthu vombunga ya Huku, 20 muatungwa kelisesu liono apositolu novauli, iya Kilisitu Sesusi oe emanya liopevindi lielisesu. 21 Ondyuo oyo ikahi nokutungwa iya ononthele mbayo ambuho mbelikuata kumwe nawa. Iya mokonda yokukahi kumwe na Kilisitu, ikahi nokukula opo ikale ondyuo yasukuka ya Siovaa. 22 Mokonda mukahi kumwe na Kilisitu, Huku wemuwaneka na vakuenyi amukala ondyuo omu akala, muna ononkhono mbae.