Ova Efesu
5 Ngotyo, kalei ovahetekeli va Huku, ngovana ononthyolwe, 2 iya amutualako okuendela moluembia, ngetyi Kilisitu akala noluembia no onthue,* muene eliave pala onthue* ngotyilikutila tyimwe tyina omuniko omuwa ku Huku.
3 Ouhayo wotyihola* novipuka aviho viasila ine elungavi, vihapopiwe pokati kenyi, mokonda otyo tyaviuka kovanthu ovasukuki; 4 alo umwe ovituwa vikundisa, nomatompho owova, ine okunyana omapita — okulinga ovipuka vihaviukile — mahi onwe pandulei Huku. 5 Mokonda onwe mutyii iya mutyiimbuka muene amuike okuti, nawike ulinga ouhayo wotyihola,* nawike ulinga etyi tyasila, nawike una elungavi, tyihangununa okufenda ovikahuku, makakala nepingo Mouhamba wa Huku, ukatuminwa na Kilisitu.
6 Muhayekei nawike emuyapule no ondaka mbahasilivila, tyetyi omokonda yovipuka ovio, onyengo ya Huku mayendela vana vehetavela. 7 Mahi onwe muhalingei ngetyi valinga, 8 mokonda muali menthiki, mahi mueya motyitei mu Tatekulu. Tualeiko okueenda ngovana votyitei, 9 mokonda ovinyango viotyitei vielikuata novipuka aviho oviwa, nouviuki, notyili. 10 Tualeiko okutala nawa otyipuka patyi tyitavelwa na Tatekulu; 11 yekei-po okulinga ovilinga vyo menthiki ngavo, vihaave ovinyango; mahi onwe viholololei okuti ovivi. 12 Mokonda ovipuka valingila pokamphengi, vikundisa alo umwe vala okuvipopia. 13 Ovipuka aviho viholololwa vimoneka mokonda yotyimimi, mokonda ovipuka aviho viholololwa notyimimi. 14 Moluotyo, otyo tyapopilwa okuti: “Pahuka-po, ove wokulala, pinduka-po povokuankhia iya Kilisitu mekumimikila.”
15 Tualeiko okutala nawa opo muhaende ngovahima, mahi amueende ngovanongo, 16 mokuundapesa nawa omuvo* wenyi, mokonda tukahi mononthiki mbepuiya. 17 Ngotyo yekei-po okukala ovityova, mahi tualeiko okuimbuka olipi ehando lya Siovaa. 18 Tupu muhakoluei novinyu, ituala kokulinga ovivi, mahi yulwei nononkhono mba Huku. 19 Lipamekei na vakuenyi* mokuimba ono salumu, amunkhimaneka Huku, nokuimba oviimbo viefendelo; imbilei Siovaa ngatyina mukahi nokuhika otyiimbo momitima vienyi. 20 Apeho pandulei Huku Tate yetu mokonda yovipuka aviho menyina lya Tatekulu yetu Sesusi Kilisitu.
21 Litavelei na vakuenyi mokonda yonthilo onene na Kilisitu. 22 Ovakai vetavele kovalume vavo, ngatyina oku Tatekulu, 23 mokonda omulume omutwe womukai wae ngetyi Kilisitu omutwe wewaneno, olutu lwae, iya omuyovoli wolutu olo. 24 Tyotyili, ngetyi ewaneno litavela ku Kilisitu, tupu novakai vena okutavela kovalume vavo movipuka aviho. 25 Valume, tualeiko okukala nohole novakai venyi, ngetyi tupu Kilisitu ehole ewaneno iya eliave mokonda yalio. 26 Walinga ngotyo opo asukukise ewaneno, mokulisukula nomeva, ondaka ya Huku. 27 Opo ewaneno elilekese kwe muene nomunkhima, tyihena esilo nii omaonya ine otyipuka otyikuavo pu ovio, mahi alikala tyasukuka komaiho a Huku tyihena apa liapenga.
28 Monkhalelo ngoyo, ovalume vena okukala nohole novakai vavo ngetyi vehole omalutu avo muene. Omulume uhole omukai wae ulihole, 29 mokonda kutupu omunthu uyele olutu* lwae muene, mahi ulutekula nokululinga nawa, ngetyi Kilisitu alinga ewaneno, 30 mokonda tunonthele mbolutu lwae. 31 “Mokonda yotyo omulume makasa-po he na ina iya elikuate-po* nomukai wae, iya aveho vevali avakala vala ohitu ike.” 32 Otyipuka otyo tyaholekwa tya Huku otyinene unene. Pahe ndyikahi nokupopia konthele ya Kilisitu newaneno. 33 Moluotyo, kese wike pu onwe una okukala nohole nomukai wae ngetyi elihole; tupu, omukai una okukala nonthilo onene nomulume wae.