2 Petulu

2 Mahi, ngetyi pokati kova Isilayeli pakalele ovauli vomatutu, no pokati kenyi mapakakala ovalongesi vomatutu. Ovalongesi ovo mavakayombeleka pokati kenyi omalongeso omatutu maanyono ekolelo lienyi alo umwe kamaveketavela hekulu yavo, una wevelanda, iya avelietela ehanyauno liwa-liwa. 2 Tyihe-otyo vala, ovanyingi mavakalandula ovituwa viavo vikundisa,* iya mokonda yavo ovanthu mavakapopia omapita ondyila yotyili. 3 Tupu, mokonda yelungavi mavekemuyondya nonondaka mbokukemba. Ngotyo, ehitiso liavo liatokolwa-le kohale, kalikahi nokuseta iya ehanyauno liavo tyotyili maliya.

4 Tyotyili, Huku kelityilikile okuhitisa onoandyu mbokualingile onkhali, mahi wembuyumba mokaleya katiwa Tartalu,* embukutila menthiki enene nomalienge* opo mbukevele okukoyeswa. 5 Iya Huku kelityilikile okuhitisa ouye wo kohale, mahi wahupisile Noe omuivisi wouviuki, kumwe na vakuavo epandu-vali puetyi aeta ombila onene mouye wovanthu onondingavivi. 6 Wahitisile omapunda-umbo o Sodoma no Gomola aakala etwe, iya otyo atyikala ongeleka kovanthu onondingavivi yovipuka maviya. 7 Mahi wahupisile Lote omuviuki, ankho weihamenua unene novituwa vikundisa* viovanthu vehesukile novitumino — 8 tyetyi nthiki na nthiki, omulume oo omuviuki ankho weihamenua unene mokonda yokutala nokuiva ovipuka ovivi ankho vilingwa pokati kovanthu ovo. 9 Ngotyo, Siovaa utyii oñgeni mayovola movitateka vana vemuumbila nombili, mahi ukevelesa ovanthu vehevaviuki na vahanyue-ko* monthiki yekoyeso, 10 haunene vana vaovola okusilisa olutu lwa vakuavo nokuatomba outumini.*

Vapiapiauka nokuna omalityindailo, vetupu owoma wokupopia omapita vana vapandwa na Huku, 11 mahi namphila onoandyu mbuna vali ononkhono ononene nepondolo, kambuvepopi omapita, mokonda mbuna onthilo na* Siovaa. 12 Mahi ovalume ovo vapopia omapita konthele yovipuka vehei, vekahi ngovinyama vilinga ovipuka tyihasoko, viatyitwa vala opo vikuatwe avihanyua-ko. Mokonda yovipuka ovivi valinga mavakahanyua-ko, 13 avakahitiswa mokonda yovituwa viavo ovivi.

Ngwe tyivehambukiswa okufuisapo omahando avo ohitu alo umwe komutenya watokota. Vekahi ngonkhako kotyikutu, nonombulu motyipala, vokuhambukilwa* ondongeso yokuyondya, tyina vekahi no onwe movipito. 14 Omaiho avo eyula oumbalehi, kavetyivili okuyekapo okulinga onkhali, iya vayondya vana* vahapamene. Vena omutima walongesua elungavi. Mavaka hitiswa na Huku. 15 Vayekapo ondyila yaviuka, avayapuka. Valandula ondyila ya Balaau omona wa Beole, una walingile etyi tyapenga mokonda ankho uhanda unene okuyambwa. 16 Mahi wavelelue onombei mokonda yokualinga etyi tyihaviukile. Iya otyimbulu tyihapopi, atyipopi ngatyina omunthu okutyilika omuuli oo mondyila yae youtyova.

17 Vekahi ngonondyivi-ndyivi mbahatundu omaande nomakaka atahua-tahua nomphepo onene, ngotyo vapakelwa enthiki limwe enene. 18 Vapopia ngatyina vena unene enoñgonoko mahi etyi vapopia katyisilivila. Valinga ovipuka vikundisa* avahindila vakuavo okukala vali nomahando apenga, nokuvelunda okulinga ovipuka viapenga vayekelepo-ale. 19 Namphila vevelaa eyovo, ngwe muene ovapika vonkhali; mokonda una ufindwa nomunthu umwe ukala omupika* womunthu oo. 20 Tyotyili, inkha vayovoka-le mesilo liouye mokonda yenoñgonoko liaviuka konthele ya Tatekulu Omuyovoli Sesusi Kilisitu, iya avelipake vali movipuka ovio, avivefindi, onkhalelo yavo yahulilila maivilipo vali okukala omapita tyipona yo tete. 21 Hahe vali inkha kavanoñgonokele nawa ondyila youviuki, tyipona okuinoñgonoka iya konyima avayapuka movitumino viasukuka vatambula. 22 Valekesa okuti onthengele-popia ei oyotyotyili, yokuati: “Otyimbwa tyakondoka monohandyo mbatyo, iya otyingulu tyakohua tyakaalangata vali monthata.”