2 Petulu
3 Nonthyolwe, ou pahe omukanda wa vali nemuhonekela, ngetyi nalinga-le momukanda wo tete, ndyilunda onkhalelo yenyi yokusoka yayandyuluka nawa, mokumuhinangelesa, 2 okuti muna okuhinangela etyi tyapopilwe* kohale novauli ovasukuki, notyitumino tya Tatekulu, Omuyovoli menyina liono apositolu mbenyi. 3 Tyotete muna okunoñgonoka otyetyi, kononthiki mbonthyulilo vomukuele mavekeya nomukuele wavo, avakalinga ovipuka vielikuata nomahando avo muene 4 iya avakapopia okuti: “Etyi apopilwe okuti meya, pahe ulipi? Tunde pomuvo ovakuaukulu vetu valala mononkhia, ovipuka aviho vitualako vala ngetyi ankho vikahi tunde ponthyimbi youye.”
5 Mokonda ngwe valingila umwe tyawina okuhahinangela okuti omaulu ekahi-ko tunde kohale, iya mokonda yondaka ya Huku, ohi yayapulwa komaande otyo ikahi pokati komaande; 6 iya ovipuka ovio viahanyene-ko ovanthu vo pomuvo opo, otyo tyaendele-ko puetyi ohi aiho yepuila momaande. 7 Mahi nondaka ñgo ya Huku, omaulu nohi vikahi-ko pehepano viapakelwa otupia iya vitualako tyapakwa alo onthiki yekoyeso nehanyauno liovanthu onondingavivi.
8 Mahi, muhalimbwei otyili etyi nonthyolwe, okuti onthiki ike ku Siovaa omanima 1.000, iya omanima 1.000 onthiki ike. 9 Siovaa kekahi nokuseta konthele yomulao wae, ngetyi ovanthu vamwe vasoka okuti useta, mahi ngwe wapua elundo no onwe mokonda kahande nawike eye okuhanyua-ko, mahi uhanda aveho velivele. 10 Mahi onthiki ya Siovaa maiya ngotyimphulu, iya omaulu maakalamba nomutetanena omunene, mahi ovipuka komaulu no pohi mavikatokota unene avisenguluka, iya ohi novilinga viayo mavikaholololwa.
11 Mokonda ovipuka ovio aviho mavikasengululwa monkhalelo oyo, muna okutala nawa ovituwa vienyi netyi muna okulinga. Muna okukala ovasukuki nokulinga ovipuka vilekesa okuti muvakuatyili ku Huku, 12 putyina mukevelela nokuhinangela apeho okuya kuonthiki ya Siovaa, muna omaulu maakahanyua-ko notupia iya ovipuka mavikasenguluka nomutokotwe omunene! 13 Mahi kuna omaulu omape nohi omphe onthue tukevelela ngetyi alaa, iya omo mamukakala ouviuki.
14 Ngotyo, nonthyolwe mokonda mukahi nokukevelela ovipuka ovio, lingei ononkhono opo konthyulilo emuvase tyihena onkhako, tyasukuka no kuna ombembwa. 15 Tyihe-otyo vala, talei oumphua-lundo wa Tatekulu ngatyina eyovo, ngetyi tupu omukuatate wetu onthyolwe Paulu emuhonekela nounongo apewa, 16 okupopia konthele yovipuka ovio ngetyi alinga momikanda viae aviho. Mahi, ovipuka vimwe momikanda ovio vialema okuvinoñgonoka, iya vana vokuhanoñgonoka* nawa no vokuhapamene vekahi nokuvipengesa, ngetyi valinga Ovihonekwa ovikuavo pala ehanyauno liavo.
17 Mahi onwe nonthyolwe, mokonda muetyinoñgonoka-le tete, lungukei opo muhayapulwe nomalongeso omatutu ovanthu onondingavivi iya opo muhayekepo onkhalelo yenyi yapama.* 18 Mahi, tualeiko okutambula vali okankhenda okanene ka Tatekulu yetu Omuyovoli Sesusi Kilisitu. Iya apewe omunkhima pehepano alo komuvo uhapu. Amem.