Elongeso 3
Yesu Kristu Olye?
Omokonda yatyi Yesu aihanenwa Omona wa Huku “wotyiveli” (1)
Omokonda yatyi oe aihanenwa “Ondaka”? (1)
Omokonda yatyi Yesu eilile pano pohi ngomunthu wopahitu? (2-4)
Omokonda yatyi oe ankho alingila omahuviso? (5)
Oityi Yesu makalinga komutwe wandyila ukahi pahe popepi? (6)
1. Yesu ankho ukala keulu ngomunthu wespilitu etyi nkhele eheneye pano pohi. Oe etungo lyotete lya Huku, ya otyo aihanenwa Omona wa Huku “wotyiveli”. (Colossenses 1:15; Revelação 3:14) Yesu oe vala Omona Huku atunga oe mwene. Yesu etyi eheneye pano pohi Yehova wemuundapesa “ngomesene yovilinga” pokutunga ovipuka aviho ovikwavo keulu nopohi. (Provérbios 8:22-31; Colossenses 1:16, 17) Huku tupu wemuundapesa ngo mutumwa-ndaka Wae wokwavilapo. Otyo Yesu aihanenwa “Ondaka”. — João 1:1-3; Revelação 19:13.
2. Huku watuma Omona Wae pano pohi moku hondovolela omwenyo wae meimo lya Malia. Molwotyo Yesu ankho ketupu he umwe wopahitu. Otyo, oe kapiñganenene onkhali naike ine onkhalo yokuhelipwile. Huku watuma Yesu pano pohi mokonda yomahunga etatu: (1) Opo etulongese otyili kombinga ya Huku (João 18:37), (2) opo atwaleko nekolelo lyokwelipwa, okutwavela ngotyo ongeleka opo tuilandule (1 Pedro 2:21), (3) nokuava omwenyo wae ngotyilikutila, opo etuyovole konkhali nokononkhia. Omokonda yatyi ankho etyi tyasukisila? — Mateus 20:28.
3. Mokuhatavelele otyitumino tya Huku, omulume wotete, Andau, walinga etyi Ombimbiliya iihana okuti “onkhali.” Molwotyo Huku wemuhitisa kononkhia. (Gênesis 3:17-19) Oe ankho kafwile vali movitumino vya Huku, mokonda ankho kelipwile vali. Katutu katutu oe wahimbika okukulupa nokunkhia. Andau wayambulisa onkhali kovana vae aveho. Otyo nonthwe tupu tukulupila, tuvelela, nokunkhia. Oñgeni ovanthu vapondola okuyovolwa? — Romanos 3:23; 5:12.
4. Yesu wali omulume wokwelipwa ngetyi tyali Andau. Tyokwelikalela na Andau, Yesu watavela nokwelipwa ku Huku, namphila ankho ekahi mombwelo yomahetaiko omanene. Ngotyo oe wapondola okuavela omwenyo wae wokwelipwa wopahitu ngotyilikutila opo afete ononkhali mba Andau. Etyi otyo Ombimbiliya ipopia okuti “eyovolwa.” Ovana va Andau vapondola ngotyo okuyovolwa kehitiso lyononkhia. Aveho vana vapaka ekolelo lyavo mu Yesu vapondola okwevelwa ononkhali mbavo nokutambula omwenyo waapeho. — 1 Timóteo 2:5, 6; João 3:16; Romanos 5:18, 19.
5. Pwetyi Yesu ankho ekahi pano pohi wahakula ovavei, waavela okulia vokwankhia ondyala, nokutulisa omapukupuku omanene. Oe aló umwe watutilisa vana vokwankhia. Omokonda yatyi oe alingila omahuviso? (1) Oe ankho una onkhenda novanthu vana vamona emone, ya oe wahandele okuvekwatesako. (2) Omahuviso ae ankho alekesa okuti oe Omona wa Huku. (3) Omahuviso ó alekesa etyi oe makalingila ovanthu vokutavela putyino eia okuvyala ngo Hamba kombanda yoohi aiho. — Mateus 14:14; Marcos 2:10-12; João 5:28, 29.
6. Yesu wankhia ya atutiliswa na Huku ngomunthu wopaspilitu, ya ngoe akondoka keulu. (1 Pedro 3:18) Okutundilila opo, Huku wemulinga Ohamba. Apa katutu Yesu makanyimako ouvi, nemone aliho kombanda yoohi ino. — Salmo 37:9-11; Provérbios 2:21, 22.
[Elitalatu kemẽla 7]
Ovilinga vyokuivisa vya Yesu ankho vyakutikinya okulongesa, okulinga omahuviso, ya aló umwe okuava omwenyo wae mokonda yetu