Elongeso 2

Huku Olye?

Huku yotyili olye, ya enyina lyae olye? (1, 2)

Olutu patyi oe ena? (3)

Ovituwo vyae vyavilapo vali ovipi? (4)

Tuna okuundapesa ovilolo nomalekeso mefendelo lyetu ku Huku? (5)

Okononkhalo patyi onombali tupondola okulilongehila kombinga ya Huku? (6)

1. Ovanthu vafendela ovipuka ovinyingi. Anthi Ombimbiliya itutolela okuti kuna vala Huku YOTYILI wike. Oe watunga ovipuka aviho keulu nokombanda yoohi. Mokonda oe wetuavela omwenyo, oe vala tuna okufendela. ​—⁠ 1 Coríntios 8:​5, 6; Revelação (Apocalipse) 4:⁠11.

2. Huku una omanyina omanyingi enkhimaneko, anthi una vala enyina like. Enyina latyo o YEHOVA. Monombimbiliya ononyingi, enyina lya Huku lyapolwamo ya avapingiyapo omanyina enkhimaneko TATEKULU ine HUKU. Anthi pwetyi Ombimbiliya yahonekwa, enyina Yehova ankho livahiwamo 7.000 yovikando! ​—⁠ Êxodo 3:15; Salmo 83:⁠18.

3. Yehova una olutu, anthi kalwelifwile nolwetu. Ombimbiliya yati okuti, “Huku espilitu.” (João 4:24) Espilitu onkhalo yomwenyo umwe waponapo vali unene omwenyo wetu. Nawike omunthu wamwene Huku. Yehova ukala keulu, anthi oe upondola okumona ovipuka aviho. (Salmo 11:​4, 5; João 1:18) Ngotyo, espilitu sandu oityi? Hamunthuko welifwa na Huku. Anthi, ononkhono mba Huku mbuundapa. ​—⁠ Salmo 104:⁠30.

4. Ombimbiliya itulekesa ounthu wa Yehova. Oyo ilekesa okuti ovituwo vyae vyavilapo vali ohole, ouvyuki, ounongo, nepondolo. (Deuteronômio 32:4; Jó 12:13; Isaías 40:26; 1 João 4:⁠8) Ombimbiliya tupu itutolela okuti oe omukwankhenda, womutima omuwa, omweveli, omukwatyali, nokuapwa ounye . Onthwe ngovana vokutavela, tuna okuovola okumuhetekela. ​—⁠ Efésios 5:​1, 2.

5. Tupondola okupetamena molupala lwovilolo, nolwomalekeso, ine okulikwambela kuvyo mefendelo lyetu? Ahau! (Êxodo 20:​4, 5) Yehova wati okuti oe vala tuna okufendela. Oe kamaave pokati enkhimano lyae nakese umwe, ine nakese tyimwe. Ovilolo vitupu epondolo lyokutukwatesako. ​—⁠ Salmo 115:​4-8; Isaías 42:⁠8.

6. Oñgeni tupondola okuiwa nawa Huku? Onkhalo imwe yokuiwa Huku okutala ovipuka oe atunga nokusokolola nawa kombinga yetyi ovyo vitulekesa. Ovipuka Huku atunga vitulekesa okuti oe una epondolo enene nounongo. Tuete ohole yae kovipuka aviho oe alinga. (Salmo 19:​1-6; Romanos 1:20) Onkhalo onkhwavo tupondola okulilongehila kombinga ya Huku okulilongesa Ombimbiliya. Omo Huku ututolela vali unene kombinga yoñgeni oe atuwa. Tupu oe ututolela kombinga yevangelo lyae netyi oe ahanda tulinge. ​—⁠ Amós 3:7; 2 Timóteo 3:​16, 17.

[Elitalatu kemẽla 5]

Tulilongesa kombinga ya Huku Mombimbiliya nokovipuka oe atunga