Okunepa Nokutyita Ovana Momuvo Uno Wonthyulilo
“Omuvo wahupako kauhi.”—1 CORÍNTIOS 7:29.
1. (a) Omapiluluko patyi ekahi nokumoneka hono akutikinyua povipuka “viepuiya okutetulula?” (b) Omokonda yatyi tusukalalela nepiluluko liovituwa viombunga?
ONDAKA ya Huku yapopia okuti “komuwo wonthyulilo” makukakala ovita, novinimawe, nomauvela. (Daniel 8:17, 19; Lucas 21:10, 11) Tupu, Ombimbiliya yapopia okuti momuvo watyo oo wokuepuiya unene, makukamoneka omapiluluko omanene. “Mononthiki ombo mbonthyulilo” mbokuepuiya, pokati kombunga mapakamoneka ovitateka ‘viepuiya okuvitetulula.’ (2 Timóteo 3:1-4) Omokonda yatyi omapiluluko oo etusukalalesa unene? Mokonda hono ovipuka ovio viakaka, tupu vina ononkhono, vipondola okuhongiliya Ovakristau okukala nolusoke luahaviukile konthele yokunepa nokutyita ovana. Monkhalelo patyi?
2. Oñgeni ovanthu mouye vatala okasamendo nokulihenga?
2 Hono, okulihenga tyapepuka unene, tupu tyeliyandyana. Movilongo ovinyingi hono okulihenga tyikahi nokuliyawisa unene. Mahi, onthue tuesukisa okuhinangela okuti olusoke lua Jeova Huku konthele yotyinepo nokulihenga, luelikalela unene no luovanthu. Oityi Jeova asoka konthele oyo?
3. Oñgeni Jeova na Jesus Kristu vatala okasamendo?
3 Jeova Huku ukevelela vokuelinepa vatualeko nomulao wavo valinga pokasamendo. Etyi Jeova anepesa omulume wotete nomukai wotete, wati, “omulume . . . melipake kumue nomukai wae iya avakala ohitu ike vala.” Jesus Kristu nae wapitulula onondaka ombo, ayawisako okuti: “Moluotyo, etyi Huku apaka kokanga ike, omunthu ehetyiyapule.” Tupu, Jesus wati: “Kese umue uhenga omukai wae wahalingile oumbalehi, akanepa omukuavo, omulume oo ukahi nokulinga oumbalehi.” (Gênesis 2:24; Mateus 19:3-6, 9) Komaiho a Jeova na Jesus, ovanthu velinepa vena okukala kumue omuenyo wavo auho, veliyapuka vala inkha umue amankhi. (1 Coríntios 7:39) Mokonda otyinepo tyakolela unene ku Huku, okulihenga tyapenga unene komaiho ae. Ondaka ya Huku ipopia okuti Jeova uyele vana velihenga, tyina nawike povalinepi walinga oumbalehi.a—Tanga Malaquias 2:13-16; 3:6.
Otyilinga Tyokunepa
4. Ovakuendye vamue Ovakristau vokuanepa liwa velivela mokonda yatyi?
4 Ovanthu vahafende Jeova mouye uno, vasukalala vala notyihola. Kese nthiki tulekeswa omalutalatu ovanthu velihanda. Tuhatombei ovipuka ovio, mokonda vina ononkhono ononene mbutuhongiliya, haunene ovakuendye vetu mewaneno. Oñgeni ovakuendye Ovakristau maveliamena kehongiliyo olio evi, lipondola okuveetela ehando liokulinga otyihola, namphila valinga ononkhono mbokulityilika otyituwa otyo? Vamue pala okutila ehongiliyo olio evi, vanepa liwa tyehekulile nawa. Ngotyo, velityilika okulinga oundalelapo. Mahi, momanima ehehi avelivele mokonda yetokolo olio valinga. Omokonda yatyi? Tyina omahando avo amatepuluka, pahe vaimbuka okuti omunthu velinepa nae, velikalela kovipuka vehole nevi veyele. Iya pahe ovalinepi ovo, vahimbika okukala novitateka ovinene.
5. Oityi matyivatela vokuelinepa opo vatualeko tyehelihenge ngetyi vapopile pokulinepa? (Tupu tala pokatoi keli pombuelo.)
5 Okulinepa na umue, namphila Omukristau mahi pahe ahimbika okulekesa ovituwa vina ove ankho uhakevelela, tyipuiya unene. (1 Coríntios 7:28) Mahi, no ngotyo, Ovakristau votyotyili vetyii okuti okulihenga vala mokonda kavelivili nawa, pehena ehunga Liombimbiliya, ku Huku otyivi. Moluotyo, vana valinga ononkhono mbokutualako tyehelihenge ngetyi vapopile pokulinepa, vatokala okuhumbwa unene nokuvatelwa newaneno.b
6. Ovakuendye Ovakristau vesukisa okutala ñgeni otyinepo?
6 Okuti ove umukuendye nkhele uhenenepe? Iya oñgeni una okutala otyinepo? Upondola okulityilika okuliihamesa unene omutima, inkha ukevelela alo ukula nawa molutu, no konondunge no mopaspilitu. Tyina pahe wamafupo nawa, otaindya po Vakristau vakuenyi una mamulinepe nae. Ombimbiliya, kaipopi onomanima eñgapi omunthu ena okunepa.c Mahi, ilekesa okuti otyiwa okunepa tyina omuvo una omunthu akala nehando enene liotyihola wamalambe. (1 Coríntios 7:36) Omokonda yatyi? Omokonda ehando olio enene liotyihola, linguanguanesa omunthu okupunga nawa opo alinge etokolo ewa, lihekemuihamesa komutima. Hinangela okuti inkha utavela onondonga mba Jeova konthele yotyinepo mbukahi Mombimbiliya, mokala nomuenyo omuwa nehambu.—Tanga Isaías 48:17, 18.
Otyilinga Tyokutyita Ovana
7. Ovitateka patyi ovalinepi vamue ovakuendye vehole okuvasa? Ovitateka ovio, vipondola okukalesa ñgeni otyinepo?
7 Ovalinepi vamue vatyita ovana putyina nkhele navo ovatutu unene. Kavakala nomuvo wokulinoñgonoka nawa omulume namukai, tyina nkhele vehenetyite olukembe luavo, malusukisa okuyungwa nawa onoola ambuho kese nthiki. Moluotyo, tyina pahe omukai asukalala vali unene nolukembe, omulume omukuendye upondola okukala nounkhuelume. Tupu, okupita ovinthiki tyahalala mokonda yolukembe, pamue tyikalesa omunthu no nonyengo nokuihamesa omutwe. Otyo, tyipondola okueta ovitateka pokati komulume nomukai. Ngotyo, ovalinepi ovakuandye, vahimbika okuimbuka okuti vetupu vali omuvo wokulinga ovipuka vahanda. Kavapondola vali okuendaenda nokulinga ovipuka valingaile etyi ankho vehena ovana. Vesukisa okutala ñgeni epiluluko lionkhalelo yomuenyo wavo?
8. Okutyita ovana tuesukisa okutyitala ñgeni? Omokonda yatyi?
8 Ngetyi otyinepo tyesukisa okuendeswa nonondunge, tupu ovalinepi vesukisa okuimbuka okuti okutyita ovana otyilinga nelao vapewa na Huku. Tyina olukembe luatyitwa, tyesukisa okulinga omapiluluko amue. Ngotyo, ovalinepi Ovakristau vesukisa okulinga ononkhono opo valinge omapiluluko aviuka. Mokonda Jeova oe waavela ovanthu epondolo liokutyita, ovohe vesukisa okunoñgonoka okuti olukembe olo “epingo vapewa na Jeova.” (Salmo 127:3) He na ina Ovakristau vena okulinga ononkhono mbokutekula ‘ovana vavo tyelikuata kumue na Tatekulu.’—Efésios 6:1.
9. (a) Okutekula omona tyihanda tyi? (b) Oñgeni omulume makuatesako omukai wae opo atualeko tyapama mopaspilitu?
9 Okutekula omona, tyihanda okuundapa nomutima auho omanima omanyingi. Otyo, otyilinga otyinene tyesukisa omuvo nononkhono. Omulume Omukristau wesukisa okunoñgonoka okuti tyina olukembe luamatyitwa, mokueenda kuomanima omanyingi omukai wae upondola okutalukwa momaliongiyo. Tupu, upondola okukala nomuvo wehehi pala elilongeso liae lioulike Liombimbiliya nokusokolola nawa etyi elilongesa. Otyo, tyipondola okutepulula ekongoko liae mopaspilitu. Ngotyo, otyilinga tyokutyita, tyihanda omulume alinge ononkhono opo akuateseko omukai wae okuyunga omona. Iya mokonda pamue ononthele mbumue momaliongiyo mbumupita, omulume upondola okumuvatela, okutomphola nae ononthele mbumue mbo programa keumbo. Tupu, omulume upondola okumukuatesako okuyunga olukembe, opo omukai akale nomuvo wokuivisa Ouhamba wa Huku.—Tanga Filipenses 2:3, 4.
10, 11. (a) Oñgeni ovana valongwa “onondonga mba Jeova nonkhalelo yae yokusoka”? (b) Ovo he ovanyingi Ovakristau vatokala okupandwa mokonda yatyi?
10 Otyilinga tyokutyita otyinene unene, hakuvetekula vala nokulia, nomuvalo, nokuveamena, nokutala nawa ekongoko liavo. Haunene momuvo uno ukahi omapita wonthyulilo, tyesukisa okulongesa ovana tunde poututu ovituwa oviwa. Ovana vesukisa okulongeswa ‘onondonga mba Jeova nonkhalelo yae yokusoka.’ (Efésios 6:4) ‘Onkhalelo oyo yokusoka’ yakutikinya okulongesa omona tunde poututu oñgeni Jeova asoka, no mokueenda kuomanima ana okuepuiya tyina omona ahimbika okukala omukulu.—2 Timóteo 3:14, 15.
11 Etyi Jesus apopila ovalongwa vae okuti vesukisa “okulongesa ovanthu vomalongo aeho opo vakale ovalongwa,” ankho ukahi nokulekesa nawa okuti ovohe vena okuvatela ovana vavo, opo vakale ovalongwa. (Mateus 28:19, 20) Otyo katyapepukile, mokonda ouye ou ukahi nokuhongiliya unene ovakuendye. Moluotyo, ovo he vokuatekula nawa ovana vavo alo vakala Ovakristau, tyotyili vatokala okupandwa novakuatate aveho mewaneno. Ovakristau ovo, “vafinda” ehongiliyo liouye mokonda yekolelo liavo, nokuafwisapo nawa, otyilinga tyavo tyokulonga ovana.—1 João 5:4.
Okuhanepe ine Okuhatyiti pala Ovilinga Viakolela
12. Omokonda yatyi Ovakristau vamue vatokolela okukala omanima amue nkhele tyahanepele?
12 Mokonda “omuvo wahupako kauhi,” iya “onkhalelo youye uno ikahi nokupiluluka,” Ondaka ya Huku itulondola opo tunoñgonoke nawa ouwa wokukala tyahanepele. (1 Coríntios 7:29-31) Moluotyo, Ovakristau vamue vaholovona okuhanepe ine okukala omanima omanyingi nkhele tyihanepele. Kavatokola okukala ngotyo, opo vaovole omalumono. Ovanyingi vakala tyahanepele opo vaumbile Jeova “tyahatalukwa.” (Tanga 1 Coríntios 7:32-35.) Ovakristau vamue vahanepele vekahi movilinga vioukokoli-ndyila, ovakuavo vauundapa ko Mbetele. Ovanyingi vakala nkhele tyahanepele opo vapite Mosikola Yovilinga Viokuivisa, avakala tyafuapo vali nawa pala okuundapa unene meongano lia Jeova. Vamue vauumbila Jeova tyahanepele mokueenda kuomanima amue, konyima avatokola pahe okunepa. Tyotyili, Ovakristau ovo vaimbuka okuti, etyi velilongesa momanima oo tyikahi nokuveetela ouwa motyinepo tyavo.
13. Omokonda yatyi ovalinepi vamue Ovakristau vatokolela okuhatyiti ovana?
13 Kovilongo vimue, ovakuavo valinga omatokolo amue monkhalelo yomuenyo wombunga. Ovalinepi ovanyingi vatokola okutualako tyihatyiti. Vamue vatokola ngotyo, mokonda vetupu etyi mavatekula natyo ovana. Ovakuavo vetyilinga opo vakale nomuvo wokuovola omalumono. Tupu, pokati ko Vakristau pena ovalinepi vatokola okuhatyiti. Anthi Ovakristau ovo, vatokola ngotyo opo vakale nomuvo wokuumbila nawa Jeova. Mahi, ovalinepi ovo vena omuenyo omuwa motyinepo tyavo. Anthi, velityilika ovipuka vimue vieta ehambu motyinepo, opo vapake ovilinga Viouhamba wa Huku tete momuenyo wavo. (1 Coríntios 7:3-5) Ovalinepi vamue vauumbila Jeova, novakuatate vavo movilinga viokutalelapo omawaneno, ine okuundapa ko Mbetele. Ovakuavo ovakokoli-ndyila, vamue onomisionaliu. Jeova kamalimbwa ovilinga viavo nohole valekesa mokonda yenyina liae.—Hebreus 6:10.
‘Vakala Nononkhumbi Molutu’
14, 15. “Ononkhumbi patyi molutu” ovohe Ovakristau vapondola okuvasa?
14 Apostolu Paulu wapopilile Ovakristau vokuanepa okuti “mavakala nononkhumbi molutu.” (1 Coríntios 7:28) Otyo, tyilekesa okuti pamue ovalinepi mavakala novitateka viokuvela, no viovana vavo, ine ovo he vekahi nokukulupa. Pamue vakala novitateka ovikuavo viihamesa komutima, ngo viokutekula nokulonga nawa ovana vavo. Ngetyi tyapopiwa konthyimbi yonthele ei, Ombimbiliya yapopia okuti “kononthiki mbonthyulilo” makukakala “omuvo wepuiya.” Pokati kovipuka viepuiya tupu papopiwa ovana “vehetavela kovohe.”—2 Timóteo 3:1-3.
15 Okutekula nokulonga ovana otyilinga otyinene pala ovohe Ovakristau. Nonthue tukahi nokumona ovitateka “viononthiki mbokuepuiya.” Moluotyo, Ovakristau vena okutualako okulwisa omahongiliyo omavi “ouye uno” apondola okunyona ovana vavo. (Efésios 2:2, 3) Pamue kavetyivili okufinda ovilwa ovio! Tyina omona umue omukuendye ine omuhikuena ayekapo okuumbila Jeova, tyietela ovohe Ovakristau “ononkhumbi,” mokonda ankho vahanda okumulongesa opo atualeko okuendela motyili tya Huku.—Provérbios 17:25.
“Makukakala Ononkhumbi Ononene”
16. “Ononkhumbi” patyi Jesus apopile?
16 Anthi, makukeya ‘ononkhumbi’ mbavilapo unene, tyipona mbokunepa no mbokutekula ovana. Jesus wapopile konthele yomuvo wae tyina ameya, no wokumanuhuka kuouye uno okuti: “Makukakala ononkhumbi ononene, mbehenekaleko tunde konthyimbi youye alo pahe. Tupu, kamambukamoneka otyikando tyavali.” (Mateus 24:3, 21) Konyima, Jesus walekesa okuti ovanthu ovanyingi mavakahupa “kononkhumbi ombo ononene.” Mahi, ouye wa Satanasi maukatualako okulwisa Onombangi mba Jeova movita viahulililako. Tyotyili, maukakala omuvo wepuiya pala onthue atuho, ovakulu novana.
17. (a) Onthue tukevelela nonthumbi etyi matyiya komutue mokonda yatyi? (b) Oityi tyipondola okuhongiliya onkhalelo yetu yokutala otyinepo nokutyita ovana?
17 Mahi, onthue katusukisa okukala nowoma omunene konthele yetyi matyikeya komutue. Ovohe vokuna ekolelo mu Jeova, vapondola okukala nonthumbi yokuti mavakaamenwa kumue novana vavo. (Tanga Isaías 26:20, 21; Sofonias 2:2, 3; 1 Coríntios 7:14) Mahi, nkhele pahe mononthiki ombu mbonthyulilo nokuepuiya tukahi, tuna okulunguka unene opo tuhahongiliyue okukala nolusoke luahaviukile konthele yotyinepo nokutyita ovana. (2 Pedro 3:10-13) Inkha tulinga ngotyo, tyilinge tuanepa ine katuanepele, tyilinge tuna ovana ine tutupu, omuenyo wetu mauhivilika nokunkhimaneka Jeova newaneno lio Vakristau.
[Onondaka Poutoi]
a Tala momukanda Viva Tendo em Mente o Dia de Jeová pefo 125 pokasapi kati “Ele Tem Odiado o Divórcio.”
b Vana vokuna ovitateka motyinepo, mavapamekwa inkha vapitulula ononthele mbupopia konthele yotyinepo mo Sentinela 15 ya Setembro yo 2003, no mo Despertai! 8 ya Janeiro yo 2001.
c Tala okapitulu 30 komukanda Os Jovens Perguntam — Respostas Práticas, kati “Estou Preparado para o Casamento?”
Okupitulula
• Omokonda yatyi ovakuendye Ovakristau vahanepela tyina ovatutu unene?
• Okutekula ovana muakutikinya tyi?
• Omokonda yatyi Ovakristau ovanyingi vatualelako tyahanepele, ine okunepa avahatyiti ovana?
• “Ononkhumbi” patyi ovohe Ovakristau vehole okuvasa?
[Olutalatu pefo 25]
Omokonda yatyi ovakuendye Ovakristau ovanandunge vakevelela okunepa tyina vamekulu nawa?
[Olutalatu pefo 26]
Omulume upondola okuvatela unene omukai wae opo akale nomuvo wokuundapa nawa movilinga via Huku