Ekolelo Oityi?

OÑGENI ove uhangununa ekolelo? Vamue vapopia okuti ekolelo okutavela kotyipuka vala walongesua, ohalingi omapulo. Omuhoneki umue woko Amelika H. L. Mencken, wapopia okuti ekolelo “okutavela kotyipuka tyimue tyipuiya okulinga.”

Mahi, Ombimbiliya ihangununa ekolelo monkhalelo yelikalela. Ondaka ya Huku ipopia okuti: “Ekolelo onthumbi yotyotyili yovipuka vikevelelwa, elekeso liotyotyili liovipuka namphila kavimoneka.”—Hebreus 11:1.

Mokonda ovanthu vena omalusoke elikalaila konthele yekolelo, tutalei omakumbululo omapulo aa alandulako:

• Oñgeni onkhalelo omu Ombimbiliya ihangununa ekolelo yelikalela netyi ovanthu ovanyingi vapopia konthele yekolelo?

• Omokonda yatyi tyakolela okukala nekolelo liapopiwa Mombimbiliya?

• Oñgeni upondola okupameka ekolelo liove?

Omukanda Ukuavela Onthumbi Yokuti Mopewa Etyi Walanda, Nelekeso Liapama

Omuvo omukanda wa Hebreu wahonekua, ondaka yo Gregu yapitiyua “onthumbi yotyotyili,” ankho yundapeswa unene. Ovikando ovinyingi, ankho imoneka momikanda viovitanda, iya ankho tyivatela omunthu okukala nonthumbi yokuti komutue wandyila matambula otyipuka. Mahi, omukanda umue wapopia okuti Hebreus 11:1 ñgeno yapitiyua ngetyi: “Ekolelo o ngomukanda utuavela onthumbi yovipuka tukevelela.”

Inkha ulanda otyipuka tyimue mondyuo imue yovitanda, iya pahe ukevelela opo vekuaveletyo, ukahi nokulekesa ekolelo. Omukanda mopewa maukuavela ehunga opo ukale nekolelo ine onthumbi mondyuo oyo walanda otyipuka tyove namphila nkhele uhenetyipewe. Ngotyo, omukanda oo, ukuavela onthumbi yokuti mopewa etyi walanda. Inkha uvombesa omukanda oo ine okuuyumbahi, otyipuka walanda kumetyipewa vali mokonda utupu omukanda ulekesa okuti una etyi walanda. Tupu, aveho vena ekolelo liokuti Huku makafuisapo omilao viae, vena onthumbi yokukapewa etyi vakevelela. Ngotyo, aveho vehena ekolelo, ine velivombesa, kamavapewa ovipuka Huku alaa.—Tiago 1:5-8.

Ondaka onkhuavo ikahi mu Hebreus 11:1, yapitiyua “elekeso liotyotyili,” ipopia konthele yokulekesa otyipuka tyimue, haunene otyipuka tyelikalela netyi tyimoneka okuti otyo yatyo. Mongeleka, ekumbi limoneka ngoti likahi nokuliseta vala noohi. Litunda koutundilo, okukuata peulu, alikanyingila koutakelo. Mahi, ovanongo vokulilongesa konthele yekumbi na vakuavo vali, vapopia okuti ekumbi kalikahi popepi no ohi. Namphila wanoñgonoka elekeso olio, nokutavela okuti otyili, ove una ekolelo liokuti o ohi iliseta nekumbi, namphila omaiho ove ekutolela tyityatyo. Ekolelo katyihangununa vala okutavela kotyipuka tyimue ohetyinoñgonokele nawa. Mahi, ekolelo likuavela ounongo wokunoñgonoka ovipuka ngetyi tyili vikahi.

Omokonda Yatyi Tyakolela Okukala Nekolelo Liapama?

Ombimbiliya itulunda opo tukale nekolelo liapama, namphila pamue tyesukisa okupilulula omatavelo etu. Ekolelo liatyo olio liakolela. Apostolu Paulu wahoneka okuti: “tyihena ekolelo tyipuiya okuhambukiswa Huku. Ou wahanda okufuena ku Huku, una yokutavela okuti kuna Huku, nokuti oe makaavela ondyambi vana vemuumbila tyotyili.”—Hebreus 11:6.

Kuna ovipuka ovinyingi vipondola okututyilika okukala nekolelo. Mahi, inkha utanga etyi tyikahi mononthele mbulandulako, motyivili okukala nekolelo.