Okuti Upondola Okunoñgonoka Huku Kenyina?

Okuitwa opo wihane omunthu umwe wakolela kenyina liae muene, tyikunkhimaneka. Ovatumini apeho vaihanwa komanyina enkhimano, nga “Presidente,” “Ohamba,” ine “Sekulu.” Moluotyo, inkha omunthu umwe ukahi koutumini, ekupopila okuti “mbambavo, ndyihane vala kenyina liange muene,” tyotyili tyilekesa okuti wekuhumba.

HUKU yotyotyili utupopila mondaka yae Ombimbiliya, okuti: “Ame, ame Jeova. Eli, olio enyina liange.” (Isaías 42:8) Namphila oe ena omanyina omanyingi enkhimano, ngo “Mupakeko,” “Wepondolo aliho,” no “Hamba Tatekulu,” oe apeho uhumba ovaumbili vae vekolelo, mokuveyeka vemuihane kenyina lia muene.

Mongeleka, omuuli Moisesi nthiki imwe wahimbikile okuita ku Huku okuti: “Ndyevele Jeova.” (Êxodo 4:10) Pokupakula ondyuo ya Huku mo Jelusalei, Ohamba Salomau wahimbika elikuambelo liae no nondaka ombu: “Ove Jeova.” (1 Reis 8:22, 23) Iya etyi omuuli Isaia elikuambela ku Jeova okuitilako ova Isilayeli, oe wati: “Ove Jeova, ove Tate yetu.” (Isaías 63:16) Tyayandyuluka nawa okuti Tate yetu keulu utukonga opo tumuihane kenyina liae.

Namphila okuihana Jeova kenyina tyakolela, tyotyili okumunoñgonoka kenyina, tyihanda vali unene. Jeova ulaa omunthu umuhole nokuemuyumba onthumbi, okuti: “Ame mandyimuamena, mokonda wanoñgonoka enyina liange.” (Salmo 91:14) Tyimoneka nawa okuti, okuiwa enyina lia Huku, tyesukisa okunoñgonoka etyi lihangununa, mokonda otyo tyakolela opo tuamenwe na Huku. Ngotyo, oityi tyesukisa opo ove unoñgonoke Huku kenyina?