Okunoñgonoka Enyina lia Huku Tyihanda Tyi?
OKUTI enyina liove lina etyi lihangununa? Kononthele mbumwe mbouye, ovanthu vena otyituwa tyokuluka omona enyina lina etyi lihangununa. Enyina vaholovona, pamwe lilekesa omatavelo, novituwa vio vohe, ine otyetyi vahandela omona wavo komutwe.
Otyituwa tyokuluka omanyina okuna ehangununo, hatyipe. Kohale, ovanthu ankho valukwa omanyina okutala kuetyi ahangununa. Omanyina apondola okulekesa etyi omunthu akevelela okukakala ine okukalinga momuenyo wae komutwe. Mongeleka, etyi Jeova apopila David konthele yotyilinga tyomona wae Salomau, Oe wati: “Enyina liae malitiwa, o Salomau [lihangununa okuti “Ombembwa”]. Iya mononthiki mbae, ame mandyiavela o Isilayeli ombembwa netuliyo.”—1 Crônicas 22:9.
Ovikando vimwe Jeova wavela enyina epe omunthu una makala notyilinga otyipe. Omukai wa Abraiau wapelue enyina epe Sara, lihangununa okuti “Omukai womunene” Omokonda yatyi? Jeova wahangununa okuti: “Ame mandyimupe ononkhano onongwa, tupu menyina liae mandyikuavela omona womulume. Iya mandyimupe ononkhano onongwa, oe makakala omalongo. Mwe mamukatunda onohamba mbomalongo.” (Gênesis 17:16) Tyotyili, okunoñgonoka oityi Sara apelwa enyina epe, tyihanda okunoñgonoka otyilinga tyae otyipe.
Iya Jeova—enyina liavilapo vali unene komanyina aeho? Lihangununa tyi? Etyi Moisesi apula Huku konthele yenyina Liae, Jeova wemukumbulula okuti: “Ame mandyikala etyi nahanda okukala.” (Êxodo 3:14) Ombimbiliya rotherham’s translation upitiya onondaka ombo okuti: “Ame Mandyikala etyi ame ndyihole.” Enyina lia Jeova lilekesa okuti Huku una ovilinga ovinyingi. Tala ongeleka ei: Ina yovana usukisa okulinga ovilinga ovinyingi kese nthiki, pala okutekula ovana vae. Ukala omuhakuli, nomuteleki, nomulongesi, tyitei komasukasuka maamoneka kese nthiki. Na Jeova otyipuka tyike, namphila oe etyilinga monkhalelo yavilapo vali. Opo afuisepo ehando liae lioluembia ena konthele yovanthu, oe upondola okukala etyi ahanda, okulinga kese tyimwe tyesukisa. Ngotyo, okuiwa Jeova kenyina, tyesukisa okunoñgonoka nokupanda ovilinga viae ovinyingi.
Anthi, ouwa wa Huku kaumoneka ku vana vahanoñgonokele enyina liae. Mahi, mokulilongesa Ombimbiliya, ove upondola okupanda ovilinga via Jeova. Okupopia po vala vimwe, Jeova Omulongi, no Muyovoli wepondolo, no Mukuatyali. Ehangununo lienyina lia Jeova lietesa onthilo onene.
Anthi, okunoñgonoka enyina lia Huku, hapeho tyapepuka. Onthele mailandulako mailekesa omokonda yatyi.