Oityi Tuesukisila Okulandula Ovitumino Viombimbiliya?
OKUTI etyi Ombimbiliya ipopia konthele yotyihola otyikulu nokutyilika ovanthu okulinga etyi vahanda? Au. Mahi etyi Ombimbiliya ipopia tyipondola okutukuatesako okulityilika:
▪ Okukala nomauvela elitambuliswa pokulinga otyihola
▪ Okutumba omaimo tyihahandele
▪ Okukala noluihamo luokulihenga
▪ Okuihamesa omutima
▪ Okukala nolukundo luetyi vakuenyi vanyana nolutu luove
Omupakeko wetu Jeova Huku,a uhanda tuhambukwe nokupola ouwa kovipuka etuavela. Huku ‘Oe utulongesa etyi tyituetela ouwa.’ (Isaías 48:17) Omunthu ulandula onondonga Mbombimbiliya konthele yotyihola:
▪ Upandwa na Huku
▪ Una ombembwa momutima
▪ Una oupanga wapama nombunga
▪ Upopiwa nawa novanthu
▪ Ulihumba oe muene
Mahi, inkha kulandula ovitumino Viombimbiliya konthele yovituwa oviwa? Okuti upondola okupilulula onkhalelo yomuenyo wove? Okuti Huku mekukoyesa mokonda yovipuka walingile kohale?
Tala otyili etyi: Vamwe ankho vekahi mewaneno lio Vakristau kohale, ankho valingile oundalelapo, noumbalehi, novalume valala poyavo. Mahi, vaholovona okupilulula onkhalelo yavo yomuenyo, iya avapoloko ouwa omunene. (1 Coríntios 6:9-11) Hono ovanthu ovanyingi mouye otyo valinga. Vayekapo omuenyo wasila avakala nouwa utundilila kokulandula ovitumino vio Mbimbiliya. Tala ongeleka ya Sarah yapopiwa monthele yotete.
“Nelitehelela Liwa-liwa Okuti Nayovoka”
Sarah waimbuka okuti onkhalelo yae yomuenyo kayemuetele eyovo nehambu oe ankho ahandele. Oe wati: “Nelitehelela okuti omutima wange ankho kaunkhuatesako vali. Ankho ndyina owoma wokutumba eimo ine okutambula ouvela. Nalumwe nalimbuileko okuti Huku okuekahi, iya ankho ndyityii okuti ondyila naholovona ankho kaihambukiswa Huku. Ankho ndyilitehelela okuti nasila, iya otyo ankho tyikahi nokundia mokati.”
Konyima, Sarah wavasa ononkhono opo apilulule onkhalelo yae yomuenyo. Waovola ombatelo kovohe Onombangi mba Jeova. Tupu, waita ombatelo yovakuatate Ovakristau ovakulu vewaneno liae. Sarah wati: “Ame nahuva nokankhenda nohole yovotate, novakulu vewaneno. Nelitehelela liwa-liwa okuti nayovoka.”
Pahe Sarah utekula aike ovana vevali. Oe wati: “Ame ndyitupu ohonyi yokupopila ovana vange konthele yetyi nalinga. Nahanda ovo vanoñgonoke oñgeni okuhalandula ovitumino via Huku tyankhalesile. Ndyihanda okuvekuatesako okunoñgonoka ouwa utundilila kokulandula ovitumino via Huku konthele yotyihola. Ndyina onthumbi yokuti Huku utuavela ovitumino oviwa mokonda kahande tumone ononkhumbi.”
Nove upondola okupola ouwa kokulandula ehongolelo ewa lia Huku. Ombimbiliya itulaa okuti: “Ovitumino via Jeova viaviuka, vihambukiswa omutima. Otyitumino tya Jeova tyasukuka, tyiliaimisa omaiho. . . . Okuvitavela tyina ondyambi onene.”—Salmo 19:8, 11.b
[Onondaka Poutoi]
a Ombimbiliya ipopia okuti enyina lia Huku o Jeova.
b Opo ulilongese vali konthele yonondonga Mbombimbiliya, ovola Onombangi mba Jeova potyilongo tyove. Ine upondola okuhonekela komanyina ekahi pefo 4, ine okukatala mo site www.watchtower.org.
[Onondaka Mbavilapo pefo 8]
Vana vatomba ovitumino Viombimbiliya ovikando ovinyingi vakala noluihamo
[Onondaka Mbavilapo pefo 9]
Vana valandula ovitumino Viombimbiliya vena omutima wasukuka noupanga wapama mombunga