Abraiau Omulume Weliola Omutima

Abraiau ankho waumphama mokahi mekaka liae mokonda ankho omutenya watokota unene. Tyina atala kuna, umona ovalume vetatu vekahi nokuya.a Tyihatale konyima, wahateka ekelivase novaenda ovo, eveyakula nawa, eveiti vapululukuepo katutu. Oe weveihana eveavele ‘ombolo,’ mahi otyo evetelekela okulia, ombolo yatokota nawa, nomulela, nomahini, nohitu, novikuavo vali. Pokuavela okulia ovaenda vae, Abraiau kalekesile vala otyituwa tyokuyakula ovaenda mahi tupu walekesa okuti weliola omutima.​—⁠Gênesis 18:​1-8.

OKULIOLA OMUTIMA OITYI? Okuliola omutima okuhakala nomalityindailo ine okulipanda. Omunthu weliola omutima unoñgonoka okuti vakuavo ovanene vali kwe mononkhalelo mbumwe. (Filipenses 2:⁠3) Oe utavela onondonga vakuavo vaava, nokulinga ovilinga vimoneka ngoti kavisilivila opo akuateseko vakuavo.

OÑGENI ABRAIAU ALEKESILE OKUTI WELIOLA OMUTIMA? Abraiau ankho uundapela vakuavo nehambu. Ngetyi tyapopiwa konthyimbi, etyi Abraiau amona ovaenda vetatu, liwa-liwa ahimbika okuvetaindyila etyi vesukisa. Omukai wae Sara, liwa-liwa ahimbika okuteleka. Tupu tala olie walinga vali ovilinga ovinyingi: Abraiau wahateka okukayakula ovaenda, eveavela etyi vesukisa opo valie, wahatekela motyunda aholovona otyipako opo aipae, iya oe waavela ovaenda ovipuka aviho. Abraiau katumine ovaundapi vae valinge atyiho, mahi omulume oo womutima weliola walingile atyiho ovaenda ankho vesukisa. Oe kasokele okuti omunene unene pala okulingila vakuavo ovipuka ovio.

Abraiau watavelele onondonga mbovaumbili vae. Ombimbiliya ipopia vala omatompho ehehi a Abraiau na Sara. Mahi, ovikando vivali tutangamo okuti Abraiau watehelela etyi Sara emutolela iya etyilingi. (Gênesis 16:2; 21:​8-​14) Otyikando tyimwe, onondaka mba Sara “kambahambukisilwe Abraiau.” Mahi, etyi Jeova atolela Abraiau etavele onondaka mba Sara mokonda onongwa, Abraiau nomutima weliola etavela, alingi etyi emutolela.

OTYO TYITULONGESA TYI? Inkha tyotyili tueliola omutima, matuhambukilwa okuundapela vakuetu. Matukala nehambu liokulinga atyiho tuvila opo tukuateseko vakuetu okukala nehambu.

Tupu matulekesa okuti tueliola omutima monkhalelo tutavela onondonga tupewa navakuetu. Kamatuanye etyi vakuetu vetupopila mokonda vala katusoko ngotyo, mahi matutavela nawa etyi vakuetu vapopia. (Provérbios 15:​22) Okulinga ngotyo haunene tyikuatesako vana vahongolela vakuavo. John ankho una otyilinga tyokuhongolela vakuavo wati: “Omuhongoli omuwa oyouna uhakalesa ovanthu nowoma wokupopia etyi vahanda. Tyesukisa okuliola omutima pala okuimbuka okuti pamwe omunthu uhongolela una vali ounongo wokulinga nawa ovipuka tyipona ove. Tyotyili, kutupu nawike, alo umwe omuhongoleli, upopia vala evi viaviuka.”

Tyina tuhetekela Abraiau okutavela etyi vakuetu vapopia, nokulinga ovilinga vikuatesako vakuetu, matupandwa na Jeova. Mokonda “Huku uyele vokulipakako, mahi wavela vomutima weliola okankhenda vahatokalele.”​—⁠1 Pedro 5:⁠5.

[Onondaka Poutoi]