ETOMPHO KONTHELE YOMBIMBILIYA
Omokonda Yatyi Tuhinangelela Ononkhia mba Jesus?
Onthele ei, etompho Ombangi ya Jeova apondola okukala nalio konthele yo Mbimbiliya nomunthu avasa. Pahe soka ñgeno Ombangi ya Jeova utiwa o Megan weya peumbo liomukai utiwa o Shirley.
“TYILINGEI-LINGEI APEHO MEHINANGELO LIANGE”
Megan: Okamene Shirley. Nahambukwa unene etyi nekumona Pehinangelo liononkhia mba Jesus Kristu osimanu yokualamba.a Okuti eliongiyo lina welipanda?
Shirley: Enga nelipanda, mahi tyotyili pena ovipuka ovinyingi viapopiwa-mo nahanoñgonokele nawa. Ndyihole okuiiva ovanthu vati o Natale otyipito tyonthiki Jesus atyitwa, iya o Pasikwa otyipito tyonthiki atutiliswa, mahi hineive omunthu upopia ehinangelo liononkhia mbae.
Megan: Otyili, o Natale, no Pasikwa vihinangelwa novanthu ovanyingi mouye auho. Mahi, ko Nombangi mba Jeova, tyakolela vali okuhinangela ononkhia mba Jesus. Inkha tyitavela, ndyipondola okukulekesa omokonda yatyi.
Shirley: Tyitavela, ndyina omuvo.
Megan: Haunene, Onombangi mba Jeova vahinangela ononkhia mba Jesus mokonda otyo Jesus atumine ovalanduli vae. Tala etyi tyamonekele motyinthiki tyahulilila-ko puetyi Jesus eheneipawe. Okuti weivilia-le ondalelo yakolela unene Jesus alile novalanduli vae vekolelo?
Shirley: Upopia Ondalelo Yahulilila-ko novalongwa vae?
Megan: Enga, oyo umwe. Tupu iihanwa okuti Ondalelo ya Tatekulu. Mokueenda kuondalelo oyo, Jesus waavelele ovalanduli vae onondonga mbayandyuluka. Okuti upondola okutanga onondaka mbae mbahonekwa mu Lucas 22:19?
Shirley: Ewaa. “Tupu, oe wapola ombolo, apandula, eivembaula, iya eveavela, ati: ‘Etyi tyilekesa olutu luange mandyiave pala ouwa wenyi. Tyilingei-lingei apeho mehinangelo liange.’”
Megan: Napandula. Tala onondonga mba Jesus monondaka mbahulilila mbo versikulu ei. Wati: “Tyilingei-lingei apeho mehinangelo liange.” Iya puetyi ehenepopile ovalongwa vae opo vemuhinangele, Jesus wevepopilile oityi ankho vena okuhinangela konthele yae. Wapopile okuti maave omuenyo wae opo ayovole ovalanduli vae. Onondaka ombo mba Jesus, mbelifwa netyi apopia mu Mateus 20:28 etyi ati: “Omona womulume keile opo aumbilwe, anthi weya okuumbila, nokuava omuenyo wae ngofeto pala okuyovola ovanthu ovanyingi.” Otyo, otyo Onombangi mba Jeova veliongiyila otyikando tyike menima opo vahinangele ononkhia mba Jesus—otyilikutila tyeyovo aava. Ononkhia mbae mbupondola okukuatesako ovanthu aveho ovataveli okukala nomuenyo uhapu.
OMOKONDA YATYI OFETO YEYOVO ANKHO YESUKISILA?
Shirley: Ame ndyiiva ovanthu vapopia okuti Jesus wankhile opo tukale nomuenyo. Mahi, tyotyili, hinenoñgonoke nawa oñgeni otyipuka otyo tyaenda.
Megan: Have vala Shirley. Otyilikutila tyeyovo tya Jesus, elongeso liaya kohi unene. Mahi tupu o limwe pomalongeso otyili tyivasiwa Mondaka ya Huku. Okuti nkhele una omuvo?
Shirley: Enga, nkhele ndyina katutu omuvo.
Megan: Tyikahi nawa. Ame ndyihole vala okutanga konthele yofeto yeyovo, mahi, pahe mandyihetekela okutyihangununa monkhalelo yapepuka.
Shirley: Ewaa.
Megan: Opo tunoñgonoke nawa ofeto yeyovo, tete tuesukisa okunoñgonoka oityi onkhali ovo Andau na Eva valinga mo Endene, yaeta. Iya opo tutyivile okunoñgonoka nawa elongeso olio, tutange Romanos 6:23. Okuti upondola okuitanga?
Shirley: Yoo. Yati: “Ofeto yonkhali ononkhia, mahi otyali tuapewa na Huku omuenyo wahapu, menyina lia Kristu Jesus Tatekulu yetu.”
Megan: Napandula. Pahe tutale nawa onondaka ombu. Tete, tala oñgeni oversikulu yahimbika, yati: “Ofeto yonkhali ononkhia.” Otyo otyitumino Huku aava tunde konthyimbi. Ondyambi yonkhali—ononkhia. Tyotyili, konthyimbi, ankho petupu omunthu una onkhali. Andau na Eva ankho vatungwa tyihena onkhali, iya ovana vavo aveho ankho navo vapondola okutyitwa tyihena onkhali. Ngotyo, ankho petupu omunthu upondola okunkhia. Andau na Eva, novana vavo aveho ankho vena ekevelelo liokukalako apeho, nehambu. Mahi, ngetyi twii, ovipuka kaviaendele ngotyo, ine hatyo?
Shirley: Otyo yatyo. Andau na Eva valia kotyinyango ankho vailikwa.
Megan: Otyo umwe. Iya—etyi Andau na Eva vaholovona okuanya ku Huku—valinga onkhali. Ngotyo, vaholovona okukala ovakuankhali. Iya otyo vaholovona, ankho katyietela vala Andau na Eva ovitateka ovinene, mahi tupu novana vavo.
Shirley: Ñgeni ngotyo?
Megan: Oñgaa, mandyipopi ongeleka imwe. Nkhele ndyikupule, okuhukula onombuloku utyivila?
Shirley: Yoo! Otyo otyilinga tyange.
Megan: Pahe soka ñgeno una ofoloma ikahi nawa yokuhukula onombuloku. Mahi tyina nkhele uhenehukule nayo, aitoko iya ailiomo. Oñgeni onomboloku ambuho ulingila-mo mambukala? Kamambukala nenyingilikilo liofoloma yelioma?
Shirley: Mambukala nalio.
Megan: Tupu, etyi Andau na Eva vaholovona okuanya ku Huku, vakala ngatyina “vaomwa,” nonkhali. Iya mokonda vakala ovakuankhali puetyi nkhele vehenetyite omona na wike, ovana vavo aveho ankho mavatyitwa “nenyingilikilo” olio. Aveho ankho mavatyitwa nonkhali vapiñgana. Mo Mbimbiliya ondaka “onkhali,” kailekesa vala otyivi omunthu alinga, mahi tupu ilekesa onkhalelo tuapiñgana. Ngotyo, ame nove kuatualingile natyike tyapenga, mokonda puetyi Andau na Eva valinga onkhali ankho katunetyitwe. Mahi, ovana vavo aveho ankho mavatyitwa—kumwe nonthue novana vetu—ankho tuapakulwa-le momuenyo wonkhali uhulila mononkhia. Ngetyi tuatanga mu Romanos 6:23, ofeto yonkhali ononkhia.
Shirley: Otyo ngoti katyaviukile. Omokonda yatyi ovanthu aveho vamonena ononkhumbi apeho, tyina onkhali o ya Andau na Eva?
Megan: Una ehunga—otyo ngoti katyaviukile. Mahi, otyo hatyo vala. Mokonda youviuki wae, Huku watolelele Andau na Eva okuti vena okunkhia, mokonda yo nonkhali mbavo. Mahi, onthue ovana vavo, Huku wetuavela ekevelelo. Waovola onkhalelo imwe yokutuyovola mononkhumbi. Onkhalelo oyo, otyilikutila tyeyovo Jesus aava. Tala vali Romanos 6:23. Etyi oversikulu yapopia okuti “ofeto yonkhali ononkhia,” aiyawisako okuti: “Mahi otyali tuapewa na Huku omuenyo wahapu, menyina lia Kristu Jesus Tatekulu yetu.” Ngotyo, ononkhia mba Jesus, ombo mbaikula ondyila pala okuyovola ovanthu konkhali no kononkhia.b
OFETO YEYOVO OTYIPUKA—TYAVILAPO HUKU AAVA
Megan: Mo versikulu ei, muna otyipuka otyikuavo nahanda unoñgonoke.
Shirley: Otyipuka patyi?
Megan: Tala okuti oversikulu yati: “Otyali tuapewa na Huku omuenyo wahapu, menyina lia Kristu Jesus Tatekulu yetu.” Jesus oe wamona ononkhumbi, nokuetunkhila, mokuaava omuenyo wae mokonda yetu. Omokonda yatyi oversikulu yatila ofeto yeyovo “otyali tuapewa na Huku, aihati otyali tuapewa na Jesus”?c
Shirley: Hummm. Ame hityii.
Megan: Oñgaa, Huku watunga Andau na Eva, iya etyi valinga oumphuki motyikunino tyo Endene, valinga onkhali kwe. Tyemuihama unene etyi ovana vae ovo votete vemutyitukilapo. Mahi liwa-liwa Jeova aovola oñgeni matetulula otyitateka otyo.d Alae okuti matumu umwe povana vae keulu, eye okukala omunthu uhena onkhali pano pohi, iya konyima aave omuenyo wae otyilikutila tyeyovo. Ngotyo, otyilikutila tyeyovo otyiawa tuapewa na Huku. Tupu, otyilikutila tyeyovo otyali tuapewa na Huku monkhalelo onkhuavo vali. Wasokelia-le oñgeni Huku akalele etyi amona Jesus wiipawa?
Shirley: Hinetyisoke.
Megan: Ndyeete ovimphundepu ine ovilolo pepata opo. Tyilekesa okuti una ovana.
Shirley: Yoo, ndyina ovana vevali—okamukuendye nokamukainthu.
Megan: Mokonda ove una ovana, nkhele soka oñgeni Tate ya Jesus keulu, Jeova Huku, akalele monthiki Jesus aipawa. Oñgeni akalele okutala Omona wae ehole, ukokwa-kokwa, nokupenyua, nokuvetwa no nonyongo ine onosoko? Iya oñgeni He akalele etyi Omona wae apapelwa momuti, asiwa-mo, ngamo ankhila ononkhia mbumwe onombi?
Shirley: Tyafuile tyemukalesile unene omapita. Hinesoke ngotyo!
Megan: Tyotyili, onthue katutyivili okupopia umwe nawa oñgeni Huku akalele monthiki omo. Mahi, tutyii okuti katyemukalesile nawa. Tupu tutyii omokonda yatyi ayekela ovipuka ovio aviho vimoneke. Tuetyihangununinwa nawa motestu ei iiwe unene, João 3:16. Upondola okuitanga mbambavo?
Shirley: Ewaa. Yati: “Mokonda Huku una oluembia olunene novanthu, waava Omona wae wongunga, opo kese omunthu ukala nekolelo mwe ahakanyimueko, mahi akakale nomuenyo wahapu.”
Ofeto yeyovo, tyotyili, otyilekeso tyoluembia olunene
Megan: Napandula. Tala vali konthyimbi yoversikulu ei. Yati: “Mokonda Huku una oluembia olunene novanthu.” Otyipuka tyakolela oversikulu ei yapopia—oluembia. Oluembia, lualunda Huku, atumu Omona wae pano poho opo etunkhile. Ofeto yeyovo, tyotyili, otyilekeso tyoluembia olunene. Otyo, otyo Onombangi mba Jeova veliongiyila nima na nima opo vahinangele ononkhia mba Jesus. Okuti etyi tuahipulula apa tyekukuatesako?
Shirley: Enga, tyankhuatesako unene. Napandula etyi waovola omuvo opo uhipulule na ame.
Okuti pena vali otyipuka otyikuavo konthele Yombimbiliya uhole okulipula? Uhanda okunoñgonoka omatavelo, novilinga vio Nombangi mba Jeova? Inkha uhanda, uhankhie ohonyi yokuita ko Nombangi mba Jeova opo vekukuateseko. Ombangi ya Jeova, makala nehambu liokutomphola nove konthele Yombimbiliya.
a Onombangi mba Jeova veliongiya otyikando tyike menima, opo vahinangele ononkhia mba Jesus. Enima lino, ehinangelo olio, malilingwa Mutano 3 ya Tyikukutu.
b Onthele onkhuavo ngei, maiya Momutala Womulavi omukuavo, maipopi oñgeni otyilikutila tyeyovo tya Jesus, tyiyovola monkhali, netyi tuna okulinga opo tupole ouwa kofeto oyo yeyovo.
c Ngetyi tyipopia Ombimbiliya, Huku na Jesus, ovanthu vevali velikalela. Opo unoñgonoke vali konthele yotyo, tala okapitulu 4 komukanda Oityi Ombimbiliya Tyili Ilongesa? walingua no Nombangi mba Jeova.
d Tala Gênesis 3:15.