Oñgeni Ndyipondola Okuhimbika Okutanga Ombimbiliya?

Oityi matyitukuatesako okukala nehambu tyina tutanga Ombimbiliya iya atupolo-ko ouwa? Tala ovipuka vitano viakuatesako-ale ovanthu ovanyingi.

Taindya omphangu ikahi nawa. Holovona omphangu ihaviele. Lipola ovipuka vipondola okukutalukiswa tyina ukahi nokutanga. Otyimimi nomphepo ikahi nawa, vipondola okukuatesako tyina ukahi nokutanga.

Fuiika omalusoke ove. Mokonda Ombimbiliya yatunda ku Tate yetu wo keulu, onthue matupoloko vala esilivilo inkha tuna otyituwa ngo tyomona ukala tyafuapo opo atehelele tate yae. Inkha una olusoke luapenga konthele Yombimbiliya, linga ononkhono mbo kulityilika-lo iya o tavela etyi Huku apondola okukulongesa.​—Salmo 25:4.

Tyina wehenetange likuambela. Mombimbiliya muna omalusoke a Huku, ngotyo tuesukisa okuita kwe etukuateseko opo tuinoñgonoke. Huku walaa okuavela “ospilitu sandu kuvana vemuita.” (Lucas 11:13) Ospilitu sandu ipondola okukukuatesako okunoñgonoka omalusoke a Huku. Mokueenda kuomuvo, ipondola okuikula omutima wove iya onoñgonoka “alo umwe ovipuka viokuaya kohi via Huku.”​—1 Coríntios 2:10.

Tanga opo unoñgonoke nawa. Wahatange vala okuhatekesa opo umane liwa. Taindya omuvo wokuendela muetyi watanga. Lilinga omapulo ngaa: ‘Ovituwa patyi oviwa navasa mehipululo lio munthu ou natanga? Oñgeni ndyipondola okuundapesa momuenyo wange etyi natanga?’

Linga omphango. Opo upoleko ouwa tyina utanga Ombimbiliya, ovola okunoñgonoka otyipuka wii okuti matyikukuatesako momuenyo wove. Linga onomphango ngombu: ‘Ndyihanda okunoñgonoka vali konthele ya Huku.’ ‘Ndyihanda okukala omunthu ukahi vali nawa, omulume wanepa ine omukai wanepua ukahi vali nawa.’ Konyima oholovona o testu Mombimbiliya maikukuatesako okufuisapo etyi wapanga okulinga.

Ovipuka ovio vitano mavikukuatesako okuhimbika okutanga Ombimbiliya. Oityi una okulinga opo etyi utanga tyikuhambukiswe? Onthele mailandulako maipopi ononkhalelo ononkhuavo.a