OSAPI YO KONDYE | OMOKONDA YATYI NDYINA OKUTANGA OMBIMBILIYA
Omokonda Yatyi Tuna Okutanga Ombimbiliya?
“Ame ankho ndyisoka okuti Ombimbiliya ipuilisa okuinoñgonoka.”—Jovy
“Ame ankho ndyisoka okuti inkhisa onyengo.”—Queennie.
“Tyina ankho ndyitala oñgeni Ombimbiliya ikahi, ndyikala tyihena ehando liokuitanga.”—Ezequiel
Ove wasokale okutanga Ombimbiliya, mahi olitehelela ngo vanthu vapopiwa konthyimbi yonthele ei? Kovanthu ovanyingi, okutanga Ombimbiliya vetyitala ngatyina tyitilisa owoma. Mahi inkha ulilongesa Ombimbiliya, okuti ipondola okukukuatesako okukala nehambu enene momuenyo wove? Iya inkha wiimbuka okuti pena ononkhalelo mbumwe mbokutanga Ombimbiliya mbupondola okukukuatesako? Okuti upondola okukala tyafuapo opo utale etyi tyikahi Mombimbiliya?
Tala etyi ovanthu vamwe vapopia, etyi vavasa ouwa pokuahimbika okutanga Ombimbiliya.
Ezequiel, una omanima 20 wapopia okuti: “Kohale ame ankho ndyikahi ngo munthu utaha etukutu-kutu, mahi wehei oku enda nako. Mahi okutanga Ombimbiliya tyankhuatesako okukala nomuenyo ukahi nawa. Muna onondonga mbukahi nawa ame ndyipondola okuundapesa momuenyo wange ononthiki ambuho.”
Frieda, nae una omanima 20, wapopia okuti: “Ame ankho hisete okunumana. Mahi etyi nahimbika okutanga Ombimbiliya, andyililongesa okulikondola omutima. Otyo tyihole okunkhuatesako okutualako iya mokonda yotyo, pahetyino ndyina vali omapanga omanyingi.”
Omukai umwe una omanima 50 utiwa Eunice wapopia konthele yo Mbimbiliya okuti: “Ihole okunkhuatesako okukala omunthu umwe ukahi nawa iya tupu ihole okupilulula ovituwa viange.”
Ovatangi ovo novakuavo ovanyingi-nyingi velilongesila-ko unene. Okutanga Ombimbiliya tyipondola okutukuatesako okukala nehambu enene momuenyo wetu. (Isaías 48:17, 18) Tyihe-otyo vala, tupu tyipondola okutukuatesako, (1) okulinga omatokolo omawa, (2) okuovola omapanga omawa, (3) tyina tuvasiwa movitateka iya (4) tyakolela vali, matunoñgonoka otyili konthele ya Huku. Mombimbiliya muna omalondolo akolela atunda ku Huku, ngotyo, ove nalumwe molandula etyi tyapenga. Nalumwe Huku mekuavela omalondolo apenga.
Otyipuka tyakolela vali okutanga Ombimbiliya. Ovipuka patyi vipondola okukukuatesako okukala nehambu tyina ulilongesa Ombimbiliya?