Omaulo Afuiswapo

Konthyimbi yomukanda ou tuapopia konthele ya Creso wayondyelwe na Delfos iya mokonda yotyo afindwa movilwa nohamba yo Pérsia. Mombimbiliya muna eulo limwe lipopia konthele yohamba yo ko Pérsia liafuiswapo umwe nawa-nawa.

Etyi nkhele kuakambela omanima 200 puetyi nkhele ohamba yo Pérsia ihenetyitwe, omuuli Isaías, watumbulile enyina lia Ciro iya ahangununa ñgeni ohamba oyo maifindi epundaumbo lyo Mbambilonia.

Isaías 44:24, 27, 28: “Jeova wapopia okuti, . . . ‘Una upopila omaande aya kohi: ‘Akukute-mo, mandyikukutisa onondongi mbatyo ambuho;’ Una upopia konthele ya Ciro okuti: ‘Oe munthita wange mandingila atyiho tyina ndyihanda;’ Una upopia konthele yo Jerusalei okuti: ‘Maikampindulwa-po,’ ondyuo ya Huku: “Maikalingilwa eliseso.”’”

Ngetyi tyapopia omuhipululi umwe omu gregu utiwa Heródoto, omafualali a Ciro atepulula omaande mondongi Eufrates, ilambela mepundaumbo Liombambilonia. Monkhalelo oyo, Ciro wakuatesako omafualali ae aetyivili okuyauka ondongi iya anyingila mepundaumbo lyo Mbambilonia. Pahe etyi vanyingila mepunda-mbo, Ciro ayovola ova Judeu ankho vekahi moukonde Mombambilonia, iya eveyeke vakondoke na vakapindulepo o Jerusalei, ankho yahanyuapo momanima 70 konyima.

Isaías 45:1: “Jeova wapopia omulembulwa wae Ciro, una ame nakuata mokuvoko opo afinde ovanthu vomalongo iya anumanesa onohamba veya komutwe wae, na aikule omapito avandekwa kumwe, mokonda omapito kamakaikwa.”

Ova Persa vanyingilile mepunda-umbo, avakuate pomapito omanene avandekwa evali, mokonda ankho valimbwako okueika. Inkha ova Mbambilonia vanoñgonokele etyi ankho Ciro ekahi nokulinga, omapito aeho ankho apilukila kondongi oyo ñgeno veikile. Mahi mokonda kavaikile omapito, epunda-umbo ankho likahi motyiponga.

Eulo olio enene o limwe vala pomaulo omanyingi ekahi Mombimbiliya, afuiswapo alo umwe moupuka oututu.a Ovanthu vamwe valinga omaulo, mahi atuka kovikahuku viavo viomatutu. Omaulo Ombimbiliya atunda ku Una wapopia okuti: “Una upopia onthyulilo tunde konthyimbi, ulekesa tunde kohale ovipuka nkhele vihenelingwe.” — Isaías 46:10.

O Huku yotyotyili vala, una enyina litiwa Jeova upondola okupopia ngotyo. Iya enyina liae lihangununa okuti: “Ulinga etyi matyiya.” Enyina olio lilekesa ounongo wae wokunoñgonoka etyi matyiya komutwe nokufuisapo etyi tyelikuata nehando liae. Otyo tyitukalesa nonthumbi yokuti Jeova makafuisapo atyiho alaa.

OMAULO EKAHI NOKUFUISWAPO HONO

Kuhande okunoñgonoka omaulo patyi Ombimbiliya ekahi nokufuiswapo mononthiki mbetu? Omanima 2.000 okualamba, Ombimbiliya yaulile okuti, “kononthiki mbahulilila makukeya omuvo wepuiya.” Ononthiki mbahulilila mbatyi? Ha-nonthiki mbahulila pala ohi, tupu hanonthiki mbahulilila mbovanthu, mahi o mbononkhumbi, nemone ovanthu vena. Tutalei omaulo amwe ehehi ekahi nokumoneka “kononthiki mbahulilila.”

2 Timóteo 3:1-5: “Kononthiki mbahulilila, . . . ovanthu mavakakala vokulihole ovo muene, vokuhole onombongo, vokulipanda, vomalityindailo, vehena onthilo na Huku, vehetavela kovo he, vahapandula, ononkhembi. Vehena oluembia, vehetavela okulipakaila-mo, vokutendeleya, vehelikondola omutima, ovakalavi, no kuhehole otyiwa. Ovapakuli, vomphata, vokulipaka-ko, vehole vali omalia-alia tyipona Huku. Velilekesa ngatyina vena onthilo na Huku, mahi kavayeke ondaka ya Huku ihongolele omuenyo wavo.”

Okuti ovanthu hono kavekahi nokulekesa ovituwa ovio monkhalelo yavilapo? Okuti kueete ovanthu hono tukahi navo velihole ovo muene, vehole onombongo nokulipakako? Okuti kueete okuti ovanthu hono vena onkhango iya kavafuilepo pala okulitavela na vakuavo? Tyotyili tyimoneka nawa okuti ovana okuhetavela ko vohe tyikahi nokuliyawisa unene iya ovanthu vehole vali ovitalukiso tyipona Huku. Iya nthiki na nthiki ovipuka ovivi vivilapo vali.

Mateus 24:6, 7: “Mamukeiva ovita nomahipululo ovita, . . . Mokonda otyilongo matyikaluisa otyilongo otyikuavo Ouhamba maukaluisa ouhamba omukuavo.”

Vamwe vapopia okuti ombalulo yovanthu vankhila movilwa okutuka mo 1914, valamba ponomiliau 100, ovanthu ovo vankhia ovanyingi vali tyipona ombalulo yovanthu vakala movilongo vimwe. Soka pahe ononkhuka, nemone, nononkhumbi ovanthu vakala nambo okutalela kombalulo oyo. Okuti okutala ononkhumbi ombo, ovanthu pahe vayekapo ovilwa?

Mateus 24:7: “Makukakala ondyala.”

Ovaundapi Veongano Liokuava Okulia mouye auho vati: “Mouye onthue tuna atyiho pala okuavela okulia ovanthu aveho, ovanthu vatuuka onomiliau 815 valala nondyala, mouye auho wike povanthu etyive utupu etyi alia. Alo umwe ouye auho, wike povanthu vetatu umona ononkhumbi mokonda vetupu okulia kukahi nawa.” Vati mokutala, kese nima ovana vatuuka onomiliau 3 vankhia mokonda yondyala.

Lucas 21:11: “Makukamoneka ovinimawe ovinene.”

Kese nima ovinimawe onomili 50 vihole okulinga ovinene unene, avietela ovanthu ononkhumbi. Ovinimawe 100 viahanyauna onondyuo mbokuaya peulu, pamwe kuya otyinimawe tyimwe otyinene like menima. Ngetyi tyalekesa onombalulo mbumwe mbalingwa, pokati komanima 1975 alo 2000, ovinimawe viaipaa ovanthu 471.000.

Mateus 24:14: “Onondaka ombu onongwa Mbouhamba wa Huku, mambukaiviswa kombanda yohi aiho, okuava oumbangi movilongo aviho iya konyima onthyulilo aiya.”

Onombangi mba Jeova vena onomiliau etyinana, vekahi nokuivisa nokuaava oumbangi wonondaka onongwa Mbouhamba wa Huku kombanda yohi aiho movilongo 240. Onombangi vaivisa onondaka onongwa momapunda-umbo omanene no monohika mbo kokule, no monongole iya no monomphunda. Ombimbiliya ipopia okuti tyina ovilinga ovio viamalingwa alo Huku amati kwapwa, “onthyulilo aiya.” Otyo tyilekesa-tyi? Tyilekesa okuti outumini wovanthu mauhiki konthyulilo iya akuya outumini omukuavo, utuminwa Nouhamba wa Huku. Omilao patyi mavifuiswapo tyina Ouhamba wa Huku wamahimbika okutumina? Tanga vali opo utyinoñgonoke.