Oñgeni Tupondola Okunoñgonoka Huku?

Ovanthu ovanyingi vapopia okuti vetavela Huku. Mahi inkha uvepula okuti Huku olie, vekukumbulula mononkhalelo mbelikalaila. Ku vamwe, Huku omukoyesi omukalavi uhanda okumonesa ononkhumbi ovanthu mokonda yovivi valinga. Ovakuavo vati, ngwe uvehole iya uveevela katyisukisa ovipuka patyi valinga. Nkhele vamwe vetavela okuti, Huku ukahi kokule navo iya kesukile-ale navo. Mokonda yomakumbululo oo elikalaila, ovanthu ovanyingi vasoka okuti katyitavela okunoñgonoka Huku.

Okuti tyesukisa umwe okunoñgonoka inkha Huku olie? Yoo, tyesukisa. Okunoñgonoka nawa Huku tyipondola okutukuatesako okukala nomuenyo omuwa. (Ovilinga 17:26-28) Tyina ufuena vali ku Huku, ngwe mekuhumbu vali unene iya ekukuatesako. (Tiaku 4:8) Tupu, okukala nenoñgonoko liotyotyili konthele ya Huku, matyikukuatesako okukamona omuenyo wokuahapu. — Suau 17:3.

Oñgeni upondola okunoñgonoka Huku? Nkhele soka kepanga liove wii nawa. Oñgeni wakala epanga liae? O puetyi wanoñgonoka enyina liae, novituwa viae, novipuka ehole, na vina eyele, netyi alinga, netyi ahanda okulinga, novikuavo vali. Ovipuka ovio, ovio viekukuatesako okumunoñgonoka vali nawa.

Tyelifwa notyo, nonthue matunoñgonoka nawa Huku tyina tulilongesa ovipuka evi:

• OKUTI HUKU UNA ENYINA?

• HUKU UKAHI ÑGENI?

• OITYI HUKU ALINGA?

• OITYI HUKU MAKALINGA?

• KUOVE OITYI TYIHANGUNUNA OUHAMBA WA HUKU?

Omukanda ou walingwa opo ukumbulule Nombimbiliya omapulo oo. Ononthele ombu, kamambukukuatesako vala okunoñgonoka etyi Huku ekahi, mahi tupu mambukukuatesako okutala ouwa mopoloko inkha ukala noupanga na Huku.