Tate Yove Keulu Okuti Umwii Umue?

OKUTI ho umwii umue nawa? Tyipondola kuove epulo olio kaliivala nawa, mokonda wekulila mombunga yokuna oluembia. Ove upondola okukumbulula okuti, ‘Enga, ndyimwii nawa!’ Ovanthu ovanyingi vei oñgeni he atuwa netyi ahatuwile. Vei oñgeni alinga mononkhalelo mbumue, no ñgeni atekula ombunga yae.

Mahi, pamue omivo vimue wahuvile okutala onkhalelo yelikalela unene ya ho. Pamue, omona wii vala okuti he omunthu omutendi nokuapoleya, tyina pehenetumbuke natyimue otyivi. Mahi, tyina patumbuka tyimue, utala oñgeni he yae atokola okuamena ombunga yae.

Iya Omupakeko wetu okuti umwii? Tupopilwa konthele yae okuti: “Tuna omuenyo, tuendaenda nokukahiko mokonda yae.” (Atos 17:​28) Onthue tuna ongele omuenyo wetu ku Huku. Moluotyo, oe Tate ya aveho vena omuenyo. (Isaías 64:⁠8) Pamue ove ongotyo ulitehelela konthele ya Huku, iya otyo tyaviuka. Mahi, kuna ovipuka ovinyingi unene tuesukisa okunoñgonoka, pala ouwa wetu nehambu.

Tyina wii nawa ho wekutyita, mokala nohole onene nonthilo nae. Tupu, okunoñgonoka nawa Huku, oupanga wove nae maukala omunene. Inkha unoñgonoka nawa Huku nokulinga ehando liae, mekukuatesako okukoleleya movitateka viomuenyo.

Huku omunthu ukahi ñgeni? Ovituwa viae vikulongesa tyi konthele yae? Okuti okunoñgonoka Huku, tyikuavela otyilinga tyimue? Omakumbululo omapulo oo, mokevasa monthele mailandulako.

[Ehangununo liolutalatu pefo 3]

Ohole yove na vakuenyi ipondola okuliyawisa tyina wamevenoñgonoka nawa