Otyili Konthele Yetyi Matyikamoneka Komutwe Wandyila
Okuti nthiki imwe welipulile-ale oityi matyikamoneka komutwe wandyila? Ombimbiliya ipopia konthele yovipuka viakolela mavikamoneka komutwe wandyila iya maviendela ovanthu aveho kombanda yohi.
Sesusi wapopia ovipuka mavitukuatesako okunoñgonoka okuti “Ouhamba wa Huku ukahi popepi.” (Luka 21:31) Mongeleka, wapopile okuti makukakala ovilwa, novinimawe, nondyala, nomauvela elitambuliswa. Iya ovipuka ovio, ovio tuete hono. — Luka 21:10-17.
Tupu Ombimbiliya yapopia ovituwa ovivi ovanthu mavakakala navio konthyulilo youtumini wovanthu. Upondola okutanga ovituwa ovio momukanda wa 2 Timotiu 3:1-5. Tyina umona ovituwa ovio ovivi kovanthu, kukala nonthumbi yokuti eulo olio lyo Mbimbiliya likahi nokufuisuapo hono?
Otyo tyilekesa-tyi? Tyilekesa okuti apa katutu, Ouhamba wa Huku maukapilulula ovipuka pano pohi opo ovanthu vakale vali nawa. (Luka 21:36) Mo Mbimbiliya, Huku walaa okukalingila ovipuka oviwa ovanthu aveho mavakakala pano pohi. Tala onongeleka mbumwe.
OMUTUMINI OMUWA
“Iya [Sesusi] apewa outumini, nounene, nouhamba, opo ovanthu aveho, novilongo aviho, nomalaka aeho, vemuundapele. Outumini wae, maukatualako apeho, kamaukapwa, iya ouhamba wae, kamaukahanyuako” — DANIEL 7:14.
Otyo tyilekesa-tyi? Tyilekesa okuti ove mokakala nomuenyo omuwa, mokonda mokatuminwa Nouhamba waonganekua na Huku iya utuminwa Nomona wae.
EKONGOKO
“Nawike kombanda yohi makati: ‘Ame navela.’” — ISAÍAS 33:24.
Otyo tyilekesa-tyi? Tyilekesa okuti ove nalumwe mokavela nii okulemana. Alo umwe ovanthu kamavakankhia vali.
OMBEMBWA YOTYOTYILI
“Huku makamanako ovilwa alo kuna kuaoyela ohi.” — SALMO 46:9.
Otyo tyilekesa-tyi? Tyilekesa okuti nalumwe makukakala vali ovilwa, nononkhumbi mbuetwa novilwa.
MOUYE MAMUKAKALA VALA OVANTHU VEKAHI NAWA
“Ondingavivi kamaikakalako vali . . . Mahi ovaviuki mavakapiñgana ohi.” — SALMO 37:10, 11.
Otyo tyilekesa-tyi? Tyilekesa okuti kamakukakala vali ovanthu valinga ovipuka ovivi. Makukakala vala ovanthu vetavela Huku nomutima auho.
OHI AIHO MAIKAKALA OMPHANGU YOMBEMBWA
“Mavakatunga onondyuo avakala-mo, mavakatuika omiti avakalia ovinyango viavio.” — ISAÍAS 65:21, 22.
Otyo tyilekesa-tyi? Tyilekesa okuti ohi maikala omphangu imwe ongwa. Huku makakumbulula etyi tuhole okumuita okuti: “Ehando liove lilingwe pano pohi.” — Mateusi 6:10.