Kala “Nokankhenda Okanene”
1. Oityi ovanthu vesukisa unene hono?
1 Tunde kohale kakunekale ovanthu ovanyingi vesukisa okukuatesiwako nokankhenda ngo hono. Mokonda yovivi vilingwa mouye, ovanthu vetupu vali ehambu, veliunga, nokuhena ekevelelo. Ovanthu ovanyingi vesukisa ombatelo, iya onthue Ovakristau tuafwapo pala okulekesa esuko liotyotyili no omunthele yetu. (Mat. 22:39; Gál. 6:10) Oñgeni matulekesa okuti tuasukalala?
2. Onkhalelo patyi ongwa pala onthue tulekese okankhenda?
2 Ovilinga Vimwe Viokankhenda: Huku oe vala ondyivi-ndyivi yotyili utuavela eungumaneso liahapu. (2 Cor. 1:3, 4) Jeova utulondola tumuhetekele okukala “nokankhenda okanene” nokutuavela otyilinga tyokutalelapo omunthele yetu nonondaka onongwa Mbouhamba. (1 Ped. 3:8) Okuundapa nombili movilinga evi onkhalelo ongwa pala onthue tuungumanese vana vena “omutima wateyua-teyua,” mokonda Ouhamba wa Huku oo vala maukamanako ovitateka viovanthu. (Isa. 61:1) Apa katutu Jeova, mokonda yokankhenda ena novanthu vae, makamanako ovivi iya aetako ouye omupe wouviuki.—2 Ped. 3:13.
3. Oñgeni matutale ovanthu ngetyi Jesus alingile?
3 Okutala Ovanthu Ngetyi Ankho Jesus Evetala: Etyi ankho Jesus aivisa otyinyingi tyovanthu, ankho kasokele vala konthumbo yovanthu. Ankho utyii okuti kese munthu wesukisa ombatelo opo apameke oupanga omuwa na Huku. Ovo ankho vekahi ngatyina onongi mbuhena omunthita. Etyi Jesus amona tyemuhika komutima, akala nokankhenda ahimbika okuvelongesa nokuapwa-elundo. (Mar. 6:34) Okutala ovanthu ngetyi Jesus ankho evetala, matyituavela ondundo yokuvelekesa okankhenda ko tyotyili. Otyo matyitalelwa monkhalelo yetu yokupopia. Ovilinga viokuivisa matuvipake tete momuenyo wetu, nokuholovona etyi matupopi opo tuvatele omasuko a kese munthu. —1 Cor. 9:19-23.
4. Omokonda yatyi tuesukisila okulivaleka okankhenda?
4 Otyinyingi tyovanthu vovilongo aviho vekahi nokutavela onondaka Mbouhamba, nondundo vekahi nokupewa. Putyina tutualako okulivaleka okankhenda, matunkhimaneka nokuhambukiswa Jeova, Huku yetu wokankhenda.—Col. 3:12.