“Uhelikondole Okuava Oumbangi”
1. Oityi tyesukisila omutima wakola? Omokonda yatyi?
1 Okuti pamwe uhole okulikondola okuava oumbangi kosikola mokonda yowoma wokuti vakuenyi mavekukuele? Tyotyili tyesukisa omutima wakola pala okupopia, hanunene tyina una ohonyi. Oityi matyikukuatesako?
2. Onalupi upondola okuhimbika okuava oumbangi kosikola? Oityi tyesukisila okupunga nawa?
2 Punga Nawa: Namphila osikola ipondola okutalwa ngatyina otelitoliu yove, hinangela okuti kumahimbika okupopia na kese omunthu konthele ya Huku ngetyi ulinga movilinga viokuivisa umbo na umbo. Punga nawa opo utale onalupi mopopi. (Ecl. 3:1, 7) Etyi mualongeswa mosikola ine muatumwa okukalinga, tyipondola okukuavela omphitilo yokupopia konthele yekolelo liove. Ine umwe mulongeswa nae pamwe ukupula oityi uhalingila ovipuka vimwe valinga. Ovakristau vamwe tyina osikola ihimbika, vapopila ovalongesi vavo okuti Onombangi mba Jeova, nokuveavela omikanda vihangununa omatavelo avo. Vamwe vehole okusa omikanda kombanda yovipundi viavo, opo vakuavo vakale nolumbwe luokuvepula.
3. Oñgeni molipongiya opo wave oumbangi kosikola?
3 Lipongiya: Inkha ulipongiya onthumbi yove mailiyawisa. (1 Ped. 3:15) Soka komapulo ovanthu vapondola okulinga, iya otale oñgeni upondola okuekumbulula. (Pro. 15:28) Inkha tyitavela, tyinda Ombimbiliya yove nomikanda vimwe, ngo mukanda Raciocínios, Os Jovens Perguntam, na vina vipopia konthele yovipuka Huku aetako, opo uviundapesa tyina wesukisa. Ita ovoho opo mukutikinye melilongeso lienyi liombunga ononthele mambukukuatesako.
4. Omokonda yatyi wesukisila okutualako okuava oumbangi kosikola?
4 Soka Kovipuka Oviwa: Uhasoke okuti vakuenyi kosikola apeho mavekulingi omukuele tyina upopia konthele yotyili. Vamwe mavekupande mokonda wakola omutima, iya avekutehelela. Anthi, uhasoye inkha petupu ou wekutavela. Jeova mahambukwa mokonda welikuatehila. (Heb. 13:15, 16) Tualako okumuita ekukuateseko opo ‘utualako okuivisa tyihena owoma.’ (Atos 4:29; 2 Tim. 1:7, 8) Nkhele soka ehambu mokala nalio tyina umwe amekutehelela. Omunthu oo upondola alo umwe okukala omuumbili wa Jeova!