Tualako Okuyawisa Ounongo Wokuivisa
1. Onongeleka patyi mbulekesa okuti tuesukisa okutualako okuyawisa ounongo wetu movilinga viokuivisa?
1 Ovakristau vena okuiyawisa ounongo wavo wokuivisa. Otyo Jesus alongesilile ovalanduli vae oñgeni mavaivisa. (Luc. 9:1-5; 10:1-11) Tupu Akila na Prisila vaile na Apolu iya “avemulongesa vali nawa ondyila ya Huku.” (Atos 18:24-26) Tupu, Paulu nae wavele ondundo omuivisi omunongo Timoteo, atualeko okuviukisa ondongeso yae, opo “aveho vetyimone okuti ukahi nokukula.” (1 Tim. 4:13-15) Namphila hamwe tuahimbikale kohale okuundapela Tatekulu, mokuivisa onondaka onongwa, mahi tuesukisa okutualako okuyawisa ounongo wetu wokuivisa.
2. Oñgeni tupondola okulilongesila kuvakuetu?
2 Lilongesila Kuvakuenyi: Onkhalelo imwe itukuatesako okuyawisa vali ounongo wetu wokuivisa, okulilongesila kuvakuetu. (Pro. 27:17) Ngotyo, tala nawa tyina vakuenyi vaivisa. Ita kovaivisi ovanongo vekukuateseko, iya tehelela nawa tyina vapopia. (Pro. 1:5) Okuti kutyivili okukatalelapo nawa ovanthu, okuhimbika okulongesa ovanthu Ombimbiliya, ine okulinga otyipuka otyikuavo movilinga viokuivisa? Ita komukulu wotyikundyi ine okomuivisi walongoka opo ekukuateseko. Tupu hinangela okuti, ospilitu sandu ya Jeova ipondola okutukuatesako okuyawisa ounongo wetu. Ngotyo likuambela apeho wite ospilitu oyo. —Luc. 11:13.
3. Oityi tupondola okulinga tyina tuamakuateswako namphila twahaitile?
3 Inkha wakuatesuako, namphila wahaitile, uhanumane. (Ecl. 7:9) Nga Apolu, tavela etyi wakuatesuako nomutima weliola nokupandula. Okulinga ngotyo mokala omunongo.—Pro. 12:15.
4. Oityi tyakolela Jesus apopila okuti, tuna okuyawisa ounongo wokuivisa?
4 Okuyawisa Ounongo Wokuivisa Tyinkhimaneka Huku: Jesus waavele onongeleka mbalundile ovalanduli vae okuyawisa ounongo wokuivisa. Welielekele nomuti wovinyu iya ovalanduli vae eveeleka no nompha mbao. Jesus wapopile okuti, He usukula onompha ambuho, “opo mbuime vali ovinyango.” (João 15:2) Ngetyi omunthu alombolola onompha mbomuvinyu wae opo mbuime vali ovinyango, na Jeova uhanda tutualeko okuyawisa ounongo wetu wokuivisa, opo tuave ‘ovinyango viomilungu.’ (Heb. 13:15) Oityi tyitundililako inkha tuyawisa ounongo wetu wokuivisa? Jesus wetukumbulula okuti: “Tyina onwe mutualako okuava ovinyango ovinyingi, tyinkhimaneka Tate yange.”—João15:8.