Himbika Etompho Nomukanda “Noñgonoka Etyi Tyikahi Mondaka ya Huku”
1. Otyiti patyi otyipe tuapewa pala okuivisa?
1 Ombimbiliya omphe Tradução do Novo Mundo ina onondaka mbumwe mbokuhimbika mbati: “Noñgonoka Etyi Tyikahi Mondaka ya Huku.” Oñgeni tupondola okuundapesa otyiti otyo otyipe tyina tulifuiika pala okukaivisa? Momapulo aeho muna onotestu Mbombimbiliya, mbukukuatesako pala okuhimbika etompho ngomukanda Raciocínio.
2. Oñgeni tupondola okuivisa nomukanda “Noñgonoka Etyi Tyikahi Mondaka ya Huku”?
2 Upondola okuundapesa epulo 8, oti: “Tukahi nokutalelapo ovomunthele yetu, ovanthu ovanyingi velipula okuti: ‘Okuti Huku uvelwa onombei mokonda yononkhumbi mbovanthu?’ [Kovilongo vimwe, otyiwa okulekesa omunthu wavasa epulo.] Oityi ove usoka? [Yeka omunthu akumbulule.] Ombimbiliya ikumbulula epulo olio.” Mutangela otestu ike ine onombali Mombimbiliya, ombuhangununa. Inkha omunthu walekesa esuko, upondola okumulekesa omapulo 20 ekahi momukanda oo, omuiti akoye-po epulo mamuya okutomphola onthiki onkhuavo. Upondola okumuavela omukanda wike wokulilongesa, uyawisa vali kuetyi muapopiale.
3. Oñgeni tupondola okuivisa nomukanda “Noñgonoka Etyi Tyikahi Mondaka ya Huku” potyilongo pakala ovanthu vonongeleya mbehe-Mbovakristau?
3 Epulo 4, no 13 alo 17 apondola okutukuatesako tyina tuivisa potyilongo pakala ovanthu vonongeleya mbehe-Mbovakristau. Mongeleka upondola okupopia onondaka mbukahi pepulo 17, oti: “Tukahi nokutalelapo onombunga tyihasete. Utavela okuti hono onombunga ononyingi mbuvasiwa novitateka? [Yeka omunthu akumbulule.] Ovalinepi ovanyingi vakuateswako nonondaka ombu mbati: “Omukai akale nonthilo onene nomulume wae.” [Kusikisa okupopia okuti onondaka ombu mbapolwa mu Efésios 5:33. Inkha ukahi nokupopia nomukai, upondola okupopia onondaka mbukahi mu Efésios 5:28.] Usoka okuti onondaka ombu mbupondola okukuatesako ovalinepi inkha vaendelemo?”
4. Oityi upondola okulinga tyina umanuhula etompho nomunthu wongeleya yehe-Yovakristau?
4 Tyina muamamane okutomphola, popia etyi mamuya vali okupopia onthiki onkhuavo. Ngotyo upondola okupopia otestu imwe ikahi pepulo muapopiale. Inkha tyitavela, mupopila okuti etyi ukahi nokupopia nae, tyikahi Mombimbiliya. Okuhimbikila kuetyi muapopile ine oñgeni atala Ombimbiliya, mumuavela omukanda utyii okuti maumukuatesako.—Tala etyi tyikahi Movilinga Vietu Viouhamba via Kayovo vio 2013.