Watchtower OMBIMBILIYOTEKA
Omutala Womulavi
OMBIMBILIYOTEKA ONLNE
Nyaneka
  • OMBIMBILIYA
  • OMIKANDA
  • OMALIONGIYO
  • mwbr19 Tyitalale pp. 1-8
  • Omikanda Viokulilongesa Omukanda Wovilinga Omuenyo Wetu Woukilisitau

Naike ovindiu iyeemba ku otyo

Tala mukwe pena etyi tyahaendele movindiu

  • Omikanda Viokulilongesa Omukanda Wovilinga Omuenyo Wetu Woukilisitau
  • Omikanda Viokulilongesa Omukanda Wovilinga Omuenyo Wetu Woukilisitau (2019)
  • Onthele-kati
  • 4-10 YA MARÇO
  • 11-17 YA MARÇO
  • 18-24 YA MARÇO
  • 25-31 YA MARÇO
Omikanda Viokulilongesa Omukanda Wovilinga Omuenyo Wetu Woukilisitau (2019)
mwbr19 Tyitalale pp. 1-8

Omikanda Viokulilongesa Omukanda Wovilinga Omuenyo Wetu Woukilisitau

4-10 YA MARÇO

OLUMONO LUKAHI MONDAKA YA HUKU | OVA LOMA 12-14

“Oityi Tyihangununa Okukala Nohole Yotyotyili”

(Ova Loma 12:10) “Kalei nohole na vana mufenda navo, ngetyi vokulikwai velihole pokati. Kalei ovatete kokulekesa vakuenyi onthilo.”

Estudo Perspicaz, Volume 1 pefo 810

Ohole

(Mo Geleku elaka lio kotuko, phi·la·del·phiʹa, Ohole novakuatate ihangununa “okukala nohole yotyotyili novakuatate”) Ohole oyo ina okukala pokati kovakuatate aveho mewaneno. ( Loma 12:10; Ova Hebeleu 13:1; tupu tala 1 Petulu 3:8) Ohole yetu novakuatate mewaneno ina okutualako okupama opo tukale ngatyina tumbunga ike. Namphila ovakuatate venale ohole oyo, mahi tyesukisa okutualako okukala nohole yotyotyili novakuatate vetu. — 1 Tes. 4:9, 10.

2 Ondaka yo Geleku phi·loʹstor·gos ilekesa okukala “nohole yotyotyili,” yaundapeswa opo ipopie ohole omunthu akala nauna ehole unene. Ondaka sterʹgo, yaundapeswa opo ilekese ohole yotyotyili ilekeswa pokati kombunga. Apostolu Paulu walundile ovakuatate opo vatualeko okukala notyituwa otyo. (Loma 12:10) Paulu tupu wapopia okuti kononthiki mbahulilila ovanthu mavakakala “vehena ohole yotyotyili” (Mo Geleku, aʹstor·goi) ilekesa okuti ovanthu ovo vena okunkhia. — 2 Tim. 3:3; Loma 1:31, 32.

(Ova Loma 12:17-19) Muhakondolelei nawike otyivi notyivi. Sukei novipuka vikahi nawa komaiho ovanthu aveho. 18 Inkha tyitavela, lingei atyiho muvila, opo mukale nombembwa novanthu aveho. 19 Nonthyolwe, muhakondolelei vakuenyi ovivi, muene yekei Huku alekese onyengo yae, mokonda yovivi vikahi nokulingwa; tyetyi tyahonekwa okuti: “ ‘Tyokukondolela ovanthu otyange; ame mandyikondolela ovanthu ovivi valinga,’ otyo tyapopia Siovaa.”

Omutala Womulavi 10/1/2009 pefo 16 § 3

“Linga Ovipuka Oviwa”

3 Tanga Ova Loma 12:17. Paulu wahangununa okuti tyina tuyalwa, onthue katupondola okuvekondolela ovivi vetulinga. Okutavela onondonga ombo tyakolela, haunene tyina ombunga aiho yahafende Siovaa. Omukilisitau una okulityilika okukondolela omukai ine omulume onondaka onombi. ‘Okukondolela mukuavo otyivi notyivi,’ katyieta ouwa. Mahi, otyituwa otyo, tyieta vala ovitateka.

A Sentinela 1/7/2007 pefo 24 §§ 12-13

“Muhakondolelei nawike otyivi notyivi”

12 Elondolo liavali Paulu aavelele ovakuatate wevepopilile okuti: “Muhakondolelei nawike otyivi notyivi.” Onondaka ombu mbelikuata nombu apopia-le okuti: “Yalei otyivi.” Oñgeni omunthu apondola okupopia okuti uyele otyivi mahi otyo akondolela otyivi vakuavo? Okulinga ngotyo opo ukahi nokulekesa “ohole yomatutu.” Paulu wati: “Sukei novipuka vikahi nawa komaiho ovanthu aveho.” (Loma 12:9, 17) Oñgeni tupondola okuundapesa onondaka ombo?

13 Omukanda Paulu ahonekela ova kolindu wapopia konthele yononkhumbi Ono apositolu wamuene. Wati: Tuapakulwa kononkhia iya mouye auho, no noandyu, novanthu vetueete . . . . Tyina ovanthu vetuleva, onthue tuvekanena nawa; tyina tuhataikiswa, tukoleleya noumphua-lundo. (1 Kol. 4:9-13) Tyelifwa notyo ovaumbili va Huku hono navo vekahi nokutalwa novanthu vomouye. Tyina vana vekahi ponthele yetu vamona ovipuka oviwa tulinga vahambukwa, hamwe navo tyiveihama tyina tumoneswa ononkhumbi, otyo tyipondola okuvelunda okutavela onondaka tuvepopila. — 1 Pet. 2:12.

(Ova Loma 12:20, 21) Mahi, “inkha ondyale yove waliua nondyala, muavela tyokulia; inkha waliua nohunga, muavela tyokunwa; mokonda okulinga ngotyo ukahi nokuongiya omakala ena otupia pomutwe wae.” 21 Muhayekei ovivi vimufinde, mahi otyivi tyifindei notyiwa.

Omutala Womulavi 11/1/2012 pefo 31 § 13

Lievelei Tyahakuluminyua

14 Hamwe omunthu umwe uhelilongesa upondola okukulinga onya. Mahi upondola okumukuatesako opo esuke netyi Ombimbiliya ilongesa. Apositolu Paulu wahoneka okuti: “‘Inkha ondyale yove una ondyala, muavela okulia, inkha una ohunga, muavela tyokunwa, mokonda tyina ulinga ngotyo, wongiya omakala atema pomutwe wae.’ Uhayeke ovivi vikufinde, mahi, tualako okufinda ovivi noviwa.” (Loma 12:20, 21) Namphila ovanthu vapondola okukuleva mahi ove uhesuke, inkha utualako novituwa ovio oviwa vapondola okupiluluka. Inkha ukala nohole nokupopia nawa nomunthu wekuleva, motyivili okumukuatesako elilongese otyili Tyombimbiliya. Okukumbulula nokuahiliya tyiavela omunthu omphitilo yokusoka nawa kovituwa viove oviwa. — 1 Pet. 2:12; 3:16.

Ovola Olumono Lwa Huku

(Ova Loma 12:1) Moluotyo vakuatate, mokankhenda ka Huku ndyimuita okuti, avei omalutu enyi ngotyilikutila tyina omuenyo, tyasukuka, tyitavelwa na Huku, ngotyo mamuumbila Huku nonondunge mbenyi ambuho.

Oñgeni Motualako Okukala Mohole ya Huku? Pomafo 76-77 §§ 5-6

Oñgeni Matuholovona Ovitalukiso Vietu?

5 Ovipuka aviho tulinga vielikuata nefendelo tulingila Siovaa. Apostolu Paulu wetyihangununa etyi ati: “Pakulei omalutu enyi ngatyina otyilikutila tyina omuenyo, tyasukuka iya tyitavelwa na Huku.” (Loma 12:1) Sesusi wati: “Una okukala nohole na Siovaa Huku yove nomutima wove auho, nomuenyo wove auho, nonondunge mbove ambuho, nononkhono mbove ambuho.” (Malu. 12:30) Apeho tuhanda okuavela Siovaa etyi tuna tyakolela vali. Mo Isilayeli yokohale, tyina ovanthu ankho vaava ovilikutila viovinyama ku Siovaa, ankho vena okuava vina viakongoka nawa. Inkha otyinyama tyalemana, ankho Huku ketyitavela. (Lev. 22:18-20) Tupu, Siovaa upondola okuhetavela efendelo lietu. Ñgeni ngotyo?

6 Siovaa utupopila okuti: “Muna okukala tyasukuka, mokonda ame ndyimusukuki.” (1 Petulu. 1:14-16; 2 Petulu 3:11) Siovaa utavela vala efendelo lietu inkha liasukuka. (Deuteronômio 15:21) Efendelo lietu kamalikala tyasukuka inkha tulinga ovipuka Siovaa eyele, ngetyi oundalelapo, noungangala iya novipuka vielikuata noumbanda. (Loma 6:12-14; 8:13) Tupu, tupondola okunumanesa Siovaa inkha tuholovona ovitalukiso vielikuata novipuka ovio. Otyo tyipondola okusilisa efendelo lietu alihetavelwa na Siovaa ine okupaka motyiponga oupanga wetu nae.

(Ova Loma 13:1) Ovanthu aveho vena okutavela kovatumini, mokonda ounene wokutumina utunda ku Huku. Kese outumini ukahi-ko, wayekelua-ko na Huku.

Omutala Womulavi 6/1/2008 pefo 13 § 4

Ononthele Mbavilapo Mbomukanda Ova Loma

13:1 — Omonkhalelo patyi ovatumini “vapakwa na Huku ponomphangu mbavo”? Ovatumini vomouye “vapakwa na Huku ponomphangu mbavo,” okulekesa okuti Huku weveyeka vatumine. Huku ankho wetyimonale okuti makukesukisa ovatumini. Otyo, tyimoneka nawa kuetyi Ombimbiliya yaula konthele yovatumini vamwe.

Okutanga Ombimbiliya

(Ova Loma 13:1-14) Ovanthu aveho vena okutavela kovatumini, mokonda ounene wokutumina utunda ku Huku. Kese outumini ukahi-ko, wayekelua-ko na Huku. 2 Ngotyo, una uhetavela kovatumini ketavela epongiyo lya Huku; vana vehetavela kepongiyo olio vekahi nokulietela ekoyeso ovo muene. 3 Tyetyi ovatumini kavatilwa owoma na vana valinga ovipuka oviwa, vatilwa owoma na vana valinga ovivi. Okuti ove uhanda okukala tyihena owoma novatumini? Tualako okulinga ovipuka oviwa iya ovatumini mavekupande. 4 Mokonda ovatumini ovaundapi va Huku pala ouwa wove. Mahi inkha ulinga ovivi, kala nowoma, mokonda omutunga vatyinda kaveutyindile vala pohi ya huku. Ovaundapi va Huku iya vapakwa-ko opo vahitise vana valinga ovivi. 5 Moluotyo, onwe muesukisa okutavela, ha mokonda vala yonyengo oyo, mahi tupu omokonda yomutima wenyi. 6 Tupu, otyo mufetela elilimu; mokonda ovatumini ovaumbili va Huku opo vaundapele ovanthu apeho motyilinga otyo. 7 Avelei kese umwe etyi atokala: una wiita elilimu, muavelei elilimu, una wiita okufetwa, mufetei, una wiita okutilwa owoma, mutilei, wiita ehumbilo, muhumbei. 8 Muhalevalei na wike otyipuka natyike, kalei nohole kese umwe na mukuavo; mokonda una uhole vakuavo ukahi nokufuisapo ovitumino. 9 Tyetyi ovitumino viati: “Uhalinge oumbalehi, uhaipae, uhavake, uhakale notyipululu.” Ovitumino ovio novikuavo, vihonyena vala motyitumino etyi tyokuati: “Kala nohole na munthele yove ngetyi ulihole ove muene.” 10 Ohole kailingi otyivi mukuavo, mokonda omunthu uhole vakuavo ukahi nokufuisapo ovitumino. 11 Iya lingei ngotyo mokonda omuvo tukahi muwii, ei oola yokupahuka kolumphoki, mokonda eyovo lietu likahi vali popepi tyipona pomuvo tuahimbika okukala nekolelo mu Sesusi. 12 Otyinthiki tyikahi nokulamba, otyitenya tyikahi popepi. Tuyekei-po ovilinga vienthiki, tuundapesei oviti viotyitei. 13 Tuendei monkhalelo yaviuka ngatyina okomutenya, atuhelipake movipito ovivi, no mounkholwa, no mouhayo wotyihola, no movituwa vikundisa, no mokulwa, no momaunkhuelume. 14 Landulei ongeleka ya Tatekulu Sesusi Kilisitu, muhakalei nokusoka oñgeni mamulingi omahando olutu.

11-17 YA MARÇO

OLUMONO LUKAHI MONDAKA YA HUKU | OVA LOMA 15-16

“Yumba onthumbi mu Siovaa oe mekukuatesako nokukupameka”

(Ova Loma 15:4) Mokonda ovipuka aviho vyo kuahonekwa kohale, viahonekwa opo vitulongese, na tukale nekevelelo mokonda yokukoleleya kuetu nepameko litunda Movihonekwa.

Omutala Womulavi 17.07 pefo 14 § 11

“Lila na Vana Valila”

11 Ehipululo konthele yetyi Sesusi alila etyi Lasalu ankhia, o limwe lipameka unene livasiwa Mombimbiliya, Ondaka ya Huku. Ombimbiliya ilekesa nawa okuti, “ovipuka aviho viahonekwa kohale, viahonekwa pala okutulongesa, opo tukale nekevelelo, mokonda yekoleleyo lietu neungumaneso lyo Vihonekwa.” (Loma 15:4) Inkha una ovitateka, noove movasi ekuateso lili mo notestu mbulandula-ko mbati:

▪ “Siovaa ukahi popepi na vana veihamenwa. Uyovola vana vekahi nokumona ononkhumbi.” — Sal. 34:18, 19.

▪ “Tyina omalusoke ange anthyukalalesa, alinga omanyingi momutima wange, ove [Siovaa] uungumanesa nokunkhalesa nawa.” — Sal. 94:19.   

▪ “Tatekulu yetu Sesusi Kilisitu, na Huku Tate yetu, wokuna oluembia nonthue nokuetuavela eungumaneso liahapu nekevelelo ewa menyina liokankhenda tuhatokalele, aungumanese omitima vienyi nokumupameka.” — 2 Tes. 2:16, 17.

(Ova Loma 15:5) Pahe Huku, una waava ekoleleyo nepameko, emuavele onkhalelo yokusoka ngei Kilisitu Sesusi ali nayo,

Omutala Womulavi 6.04 pefo 14 § 5

“Yeka Ekoleleyo Likale Notyilinga Tyalio Tyafuapo”

5 Likuambela ku Siovaa ekukuateseko. Siovaa “o Huku wokuaava ekoleleyo nepameko.” (Loma 15:5) Siovaa oe vala wii nawa oñgeni tuatuwa, nomaluihamo etu, nonkhalelo tuatungwa. Moluotyo wii nawa-nawa etyi tuesukisa opo tutyivile okukoleleya. Ombimbiliya ipopia okuti: Huku “ufuisapo ehando lia vana vena onthilo nae. Utehelela tyina veliyava okuita ekuateso, eveyovola.” (Sal. 145:19) Mahi oñgeni Huku akumbulula omalikuambelo etu, tyina tumuita ononkhono opo tukoleleye?

(Ova Loma 15:13) Huku una waava ekevelo, emuavele ehambu enene nombembwa mokonda muyumba onthumbi mwe, opo ekevelo lienyi lipamekwe vali nawa nepondolo liononkhono mba Huku.

Omutala Womulavi 6/1/2014 pefo 14 § 11

“Una Okukala Nohole na Siovaa Huku Yove”

11 Siovaa ‘wetuavela ekevelo liokukakala-ko apeho.’ (Loma 15:13) Ekevelelo olio litukuatesako okukoleleya tyina ekolelo lietu lilolwa. Ovalembulwa vekolelo vena ekevelo liokukakala apeho keulu. (Ehol. 2:10) Ovanthu ovakuavo vekolelo vena ekevelelo liokukakala apeho Momphangu Yombembwa pano pohi. (Luka. 23:43) Ekevelelo olio litukalesa ñgeni? Litukalesa nehambu, nombembwa, nohole na Huku utuavela “kese otyiawa otyiwa notyali tyafuapo.” — Tia. 1:17.

Ovola Olumono Lwa Huku

(Ova Loma 15:27) Tyotyili, vena ehambu liokulinga ngotyo iya ankho vekahi ngatyina vena ongele navo. Mokonda inkha vana veheva Sundeu vapewa ovipuka viatunda ku Huku, navo vena okuveavela ovipuka vesukisa.

A Sentinela 1/2/1989 Pefo 24 § 3

“Onkhalelo Ongwa Yokulekesa Ohole”

Ovakuatate vana ankho vehe Vakilisitau ankho vesukisa okukuatesuako. Mahi, nongotyo ankho vena “ongele” onene Novakilisitau mo Selusalei. Mo Selusalei hamo otyili tyehimbika okuliyandyana Kovakilisitau vana veheva Sundeu? Paulu wati: “Mokonda inkha vana veheva Sundeu vapewa ovipuka viatunda ku Huku, navo vena okuveavela ovipuka vesukisa.” — Ova Loma 15:27. Ombimbiliya omphe yo Ingelesi.

(Ova Loma 16:25) Pahe Huku una upondola okumukalesa tyitai nonondaka onongwa ame ndyipopia, nokuivisa konthele ya Sesusi Kilisitu, ngetyi tyilekesa emonekelo liovipuka viaholekwa vya Huku, ankho vihapopiwa mokueenda kuomuvo omunyingi,

Estudo Perspicaz, Volume 3 pefo 319 § 5

Kala tyafuapo, Noumphua-lundo

Mesiya ine Kilisitu ombuto yalaelwe ina maikayovola ovanthu aveho ovaviuki vekahi kombanda yohi. (Gal. 3:8, 14) Omulao oo wehimbika puetyi Andau atyitukilapo Huku mo motyikunino tyo Endene puetyi nkhele Abele ehenetyitwe. (Gên. 3:15) Palamba omanima 4.000 otyo onondaka ombo “mbehene fuiswepo nawa,” okuti mesiya “ombuto” yalaelwe. Ngotyo, palamba omuvo omunyingi otyo “ovipuka viapopiwa mokueenda kuomuvo omunyingi viaholekwa.” — Loma 16:25-27; Efesu 1:8-10; 3:4-11.   

Okutanga Ombimbiliya

(Ova Loma 15:1-16) Mahi onthue vokuapama, tukuateseiko vana vahapamene iya atuhelihambukiswa vala onthue muene. 2 Kese umwe pu onthue ahambukiswe mukuavo pala ouwa wae opo emupameke. 3 Mokonda alo umwe Kilisitu kelihambukisilwe, mahi tyahonekwa okuti: “Omupenyo wa vana vekupenya weya no ku ame.”4 Mokonda ovipuka aviho viokuahonekwa kohale, viahonekwa opo vitulongese, na tukale nekevelelo mokonda yokukoleleya kuetu nepameko litunda Movihonekwa. 5 Pahe Huku, una waava ekoleleyo nepameko, emuavele onkhalelo yokusoka ngei Kilisitu Sesusi ali nayo, 6 opo atuho kumwe nondaka ike vala tunkhimaneke Huku, Tate ya Tatekulu yetu Sesusi Kilisitu. 7 Moluotyo, litambulei na vakuenyi ngetyi Kilisitu nae emutambula pala enkhimano lya Huku. 8 Mokonda ame ndyimupopila okuti Kilisitu wakala omuundapi wa vana vapita ekuendye opo alekese okuti Huku upopia otyili, nokulekesa okuti omilao Huku alingile ovakuaukulu vavo oviotyotyili, 9 opo ovanthu veheva Sundeu vankhimaneke Huku mokonda yokankhenda kae. Ngetyi tyahonekwa okuti: “Ame mandyikekunkhimaneka pokati kovanthu veheva Sundeu iya andyikahilivika enyina liove noviimbo.” 10 Tupu wati: “Hambukuei, onwe muheva Sundeu kumwe novanthu va Huku.” 11 Apopi vali okuti: “Nkhimanekei Siovaa onwe amuho muheva Sundeu, iya ovanthu aveho vemunkhimaneke.” 12 Isaiya nae wati: “Makukeya omwii wa Sesee, una mekeya okutumina ovanthu iya mwe ovanthu omo mavakapaka ekevelo liavo.” 13 Huku una waava ekevelo, emuavele ehambu enene nombembwa mokonda muyumba onthumbi mwe, opo ekevelo lienyi lipamekwa vali nawa nepondolo liononkhono mba Huku. 14 Vakuatate vange, pahe ame muene ndyityii nawa, okuti no onwe muna ovipuka ovinyingi oviwa, muna enoñgonoko enyingi iya mutyivila okulilondola pokati na vakuenyi. 15 Moluotyo, ame nemuhonekela etyi tyayandyuluka nawa konthele yovipuka vimwe opo ndyimuhinangelese. Ame ndyimuhinangelesa ovipuka ovio mokonda Huku wakala nokankhenda na ame. 16 Wakala nokankhenda na ame opo ndyikale omuundapi wa Kilisitu Sesusi, na ndyipopie onondaka onongwa kovanthu vomalongo iya ovilinga ovio viasukuka. Ame ndyilinga ovilinga ovio, opo ovanthu ovo vakale tyasukukiswa nononkhono mba Huku iya avaawa kwe ngotyilikutila tyetavelwa.

18-24 YA MARÇO

OLUMONO LUKAHI MONDAKA YA HUKU | 1 OVA Kolindu 1-3

“Ove una omalusoke ovanthu ine o a Huku?”

(1 Ova Kolindu 2:14) Mahi omunthu una omalusoke ovanthu, ketavela ovipuka viononkhono mba Huku, mokonda kwe owova, kapondola okuvinoñgonoka, mokonda vinoñgonokwa vala kononkhono mba Huku.

Omutala Womulavi 18.02 pefo 19 §§ 4-5

Oityi Tyihangununa Okukala Omunthu Wapama motyili?

4 Tete matutale oñgeni omunthu wopahitu asoka. Omunthu wopahitu ulinga ovipuka ngovanthu vo mouye, ine usoka vala komahando ae muene. Paulu wahangununa otyituwa otyo okuti, “eyembelo likahi nokuhongiliya ovanthu vokuhetavela.” (Efe. 2:2) Otyituwa otyo, tyihongiliya ovanthu ovanyingi okulinga ovipuka vana vakala navo valinga. Ovanthu ovo valinga vala etyi vasoka okuti otyiwa, avehesuku novitumino vya Huku. Omunthu wopahitu, usoka vala kovipuka apondola okukala navio iya usoka okuti ovilinga viae, no nombongo ine etyi asoka okuti tyaviuka tyakolela vali unene tyipona ovipuka ovikuavo.

5 Omunthu wopahitu apeho ulinga ovipuka Ombimbiliya iihana okuti “ovilinga violutu.” (Gal. 5:19-21) Momukanda wo tete Paulu ahonekela Ovakilisitau mo Kolindu, wapopia konthele yovipuka ovikuavo ovanthu ovo valinga. Omunthu wopahitu ulinga okapungulula tyina pokati kovakuatate pamamoneka otyitateka, uhindila vakuavo okuhetavela, utuala vakuavo monombonge, utupu onthilo noutumini iya okulia nokunwa otyipuka tyakolela vali momuenyo wae. Omunthu wopahitu kaanye tyina ahongiliyua okulinga otyipuka tyapenga. (Prov. 7:21, 22) Sunda wapopia okuti ovanthu vamwe mokonda yokulinga ovipuka ovio, “vetupu ononkhono mba Huku.” — Sunda 18, 19.

(1 Ova Kolindu 2:15, 16) Mahi omunthu una omalusoke a Huku, wovolola ovipuka aviho, mahi ngwe petupu ou upondola okumukoyesa. 16 Mokonda “olie wanoñgonoka omalusoke a Siovaa, opo emulongese?” Mahi onthue tuna omalusoke a Kilisitu.

Omutala Womulavi 18.02 pefo 19 § 6

Oityi Tyihangununa Okukala Omunthu Wapama Motyili?

6 Mahi, omunthu wapama motyili usukalala unene noupanga wae na Huku. Uhongolelwa nospilitu sandu ya Huku iya ulinga ononkhono mbokuhetekela Siovaa. (Efe. 5:1) Tupu, ulinga ononkhono mbokunoñgonoka oñgeni Siovaa asoka iya utala ovipuka monkhalelo Siovaa evitala. Kwe, Huku omunthu wotyotyili. Tyelikalela nomunthu wopahitu, omunthu wapama motyili una onthilo novitumino vya Siovaa mononkhalelo ambuho mbomuenyo wae. (Sal. 119:33; 143:10) Omunthu wapama motyili kalingi “ovilinga violutu,” mahi wovola okukala “novinyango viospilitu.” (Gal. 5:22, 23) Opo tunoñgonoke vali nawa oityi tyihangununa okukala omunthu wapama motyili, soka kuetyi: Omunthu wokutyivila okulinga nawa ovitanda, wihanwa okuti una omutwe kokulinga ovitanda, iya omunthu usukalala unene nefendelo alingila Huku wihanwa okuti omunthu wapama motyili.

Omutala Womulavi 18.02 pefo 22 § 15

Oityi Tyihangununa Okukala Omunthu Wapama motyili?

15 Oñgeni tupondola okuhetekela Kilisitu? Omukanda wa 1 Ova Kolindu 2:16 upopia etyi tuesukisa okulinga opo “tukale nolusoke lwa Kilisitu.” Omukanda Ova Loma 15:5 utuhinangelesa opo “tukale nolusoke lwa Kilisitu Sesusi.” Opo tukale nga Kilisitu, tuesukisa okunoñgonoka oñgeni Sesusi ankho asoka, noñgeni elitehelela iya nokulinga ovipuka monkhalelo alinga. Sesusi ankho usukalala vali unene noupanga wae na Huku tyipona otyipuka otyikuavo. Ngotyo, okukala nga Sesusi tyitukuatesako okukala nga Siovaa. Moluotyo, tyakolela unene okulilongesa okusoka nga Sesusi.

Ovola Olumono Lwa Huku

(1 Ova Kolindu 1:20) Omunthu omunongo ulipi? Omuhoneki wovitumino ulipi? Wokupopia konthele yovipuka viouye uno ulipi? Huku kalekesile okuti ounongo wouye ou owova?

Estudo Perspicaz, Volume 3 pefo 479 § 1

Ounongo

Ovatumini vomouye vayumbile onthumbi mounongo wavo avaanye omulao wa Huku konthele ya Kilisitu, namphila ovatumini vekahi nawa mahi nongotyo, “vaipaele Tatekulu yetu omunene Sesusi.” (1 Kolindu 1:18; 2:7, 8) Mahi Huku uundapesa ovanthu vana ovatumini vatala okuti vetupu ounongo opo afuisepo ehando liae. (1 Kolindu 1:19-28) Paulu wahinangelesile Ovakilisitau mo Kolindu okuti “ounongo woutumini wouye ou maukahanyuako apa katutu” ounongo oo kaulingi onthele yetyi Ono apositolu mbulongesa.” (1 Kolindu 2:6, 13) Tupu apopila Ovakilisitau wo mo Kolosu opo vehelipake momalusoke omatutu [phi·lo·so·phiʹas, mondaka yokonthuko, okukala nohole nounongo wouye] iya tupu apopi oviso viovanthu novipuka viouye. — Ova Kolosu 2:8 tupu tyieleka no noversikulu 20-23.

(1 Ova Kolindu 2:3-5) Iya ame neya ku onwe tyihapamene, nowoma, nokuteketa unene; 4 iya onkhalelo napopia nonkhalelo naivisa, hapopile onondaka ononene mbupopiwa novanongo, mahi onondaka mbange mbalekesa epondolo liononkhono mba Huku, 5 opo ekolelo lienyi lihapamene mounongo wovanthu, mahi lipamene mepondolo lya Huku.

Omutala Womulavi 1/7/2008 pefo 30 § 6

Ononthele Mbavilapo Mbo Mukanda ova Kolindu

2:3-5. Puetyi ankho Paulu aivisa mo Kolindu, wasukalalele unene mokonda ankho muna osikola onene younongo wo va Geleku. Moluotyo, ankho Paulu usoka okuti kametyivili okukuatesako vana vemutehelela. Mahi, kayekele otyitateka natyike ine owoma vimutyilike kovilinga viae viokuivisa apelwe na Huku. Tupu, nonthue tuhayekei otyitateka natyike tyitutyilike okuivisa onondaka onongwa Mbouhamba wa Huku. Nonthue tuna onthumbi yokuti Siovaa metukuatesako ngetyi akuatesileko Paulu.

Okutanga Ombimbiliya

(1 Ova Kolindu 1:1-17) Ame Paulu, una Kilisitu Sesusi aihana opo akale o apositolu kehando lya Huku, kumwe nomukuatate wetu Sositene, 2 tutuma omukanda ou ku onwe mukahi mewaneno lya Huku ko Kolindu, onwe vokuasukukiswa kumwe na Kilisitu Sesusi, amuihanwa opo mukale ovasukuki, kumwe novo konomphangu ambuho vekahi nokunoñgonoka Tatekulu Sesusi Kilisitu, Tatekulu yetu atuho: 3 Kalei nokankhenda okanene ka Huku, nombembwa itunda ku Huku Tate yetu, tupu Tate ya Tatekulu Sesusi Kilisitu. 4 Ame apeho ndyimupandulila-ko ku Huku yange, mokonda yokankhenda okanene ka Huku muapewa menyina lya Kilisitu Sesusi; 5 mokonda movipuka aviho onwe muakaleswa ovahona mwe, mounongo omunene wokupopia, no menoñgonoko enene, 6 mokonda oumbangi konthele ya Kilisitu wapamekua pokati kenyi. 7 Moluotyo, onwe muna ovipuka aviho viesukisa putyina mukevela Tatekulu yetu Sesusi Kilisitu aholololwe. 8 Tupu memukalesa tyapama alo konthyulilo opo muhahungwe otyipuka natyike monthiki ya Tatekulu yetu Sesusi Kilisitu. 9 Huku omukuatyili, una wemuihana opo mukale kumwe Nomona wae, Sesusi Kilisitu Tatekulu yetu. 10 Pahe ndyimulondola vakuatate, okuti menyina lya Tatekulu yetu Sesusi Kilisitu, onwe amuho muna okupopia otyipuka tyike, pokati kenyi pahakale omaliyapauko, mahi kalei tyelikuata okapandi nomutima wike, nokusoka monkhalelo ike. 11 Mokonda vamwe vomeumbo lya Koloe vamphopila okuti pokati kenyi vakuatate vange, pena onondyaya. 12 Etyi nahanda okupopia okuti, kese umwe pu onwe, tyiti ou uti: “Ame ndyiwa Paulu,” “ou uti ame ndyiwa Apolu,” “ou uti ame ndyiwa Sefa,” “omukuavo uti ame ndyiwa Kilisitu.” 13 Okuti Kilisitu weliyapuka? Okuti Paulu wapapelelue momuti pala onwe? Ine onwe muambatisalwa menyina lya Paulu? 14 Ame ndyipandula Huku mokonda pu onwe hambatisalele-po vali nawike, o Kilisipu vala na Gaiu, 15 ngotyo nawike mapopi okuti onwe muambatisalwa menyina liange. 16 Tupu nambatisala vomeumbo lya Sitefana. Mahi po vakuavo hityii inkha ndyina vali ou nambatisala. 17 Mokonda Kilisitu kanthumine opo ndyimbatisale, mahi wanthuma opo ndyiivise onondaka onongwa; kanthumine opo ndyipopie onondaka mbovanthu vokualongeswa unene, opo omuti wemone wa Kilisitu uhakale tyihena esilivilo.

25-31 YA MARÇO

OLUMONO LUKAHI MONDAKA YA HUKU | 1 Ova Kolindu 4-6

“Onkhiso Ihehi Itutumukisa Omasa Aeho”

(1 Ova Kolindu 5:1, 2) Tyatiwa pokati kenyi pekahi nokulingwa ouhayo wotyihola, ouhayo umwe uhalingwa-le alo umwe novanthu veheva Kilisitau — omulume umwe ukahi nokulala nomukai wa tate yae. 2 Onwe mulimphandela otyipuka otyo? Ñgeno katyimunumanesa iya omunthu wokualinga otyipuka otyo apolwa pokati kenyi?

(1 Ova Kolindu 5:5-8) omulume oo mupakulei ku Satanasi opo ovituwa viae ovivi aeta mewaneno vipolwe-mo, opo onkhalelo ongwa yewaneno iyovolwe monthiki ya Tatekulu. 6 Etyi mulimphandela katyikahi nawa. Kamutyii okuti onkhiso ihehi itutumukisa enthapi aliho? 7 Polei pokati kenyi onkhiso onkhulu opo mukale enthapi epe, amukala tyihena onkhiso. Mokonda Kilisitu ondyona yetu Yopasikwa walingua-le otyilikutila. 8 Ngotyo, tuhinangelei otyipito, ha-nonkhiso onkhulu, nii onkhiso ilekesa onkhali novivi. Mahi tuliei vala onombolo mbuhena onkhiso, mbulekesa otyiwa notyili.(1 Ova Kolindu 5:13) putyina Huku akoyesa vo kondye? Polei omunthu ondingavivi pokati kenyi.

Estudo Perspicaz, Volume 2 pefo 116

Onkhiso

Apositolu Paulu waundapesa ondaka onkhiso opo akuateseko ovakuatate mo Kolindu okupola mewaneno omulume walinga oundalelapo etyi evepopila okuti: “Kamutyii okuti onkhiso ihehi itutumukisa enthapi aliho? Polei pokati kenyi onkhiso onkhulu opo mukale enthapi epe, amukala tyihena onkhiso. Mokonda Kilisitu ondyona yetu Yopasikwa walingua-le otyilikutila.” Tyotyili oityi ankho ahanda okupopia etyi ati “onkhiso.” Ngotyo, tuhinangelei otyipito, ha-nonkhiso onkhulu, nii onkhiso ilekesa onkhali novivi. Mahi tuliei vala onombolo mbuhena onkhiso, mbulekesa otyiwa notyili.” (1 Kol. 5:6-8). Paulu wapopia onkhiso opo apopie Opasikwa yova Sundeu Yonombolo Mbehena Onkhiso pokulinga Opasikwa. Ngetyi onkhiso yehehi ikatula Omasa aeho, nomewaneno inkha mukala omunthu ulinga oundalelapo ewaneno aliho likala tyasila komaiho a Siovaa inkha kavemupolo-mo. Ankho vena okupola “onkhiso onkhulu” pokati kavo ngetyi ova Isilayeli ankho vahapondola okukala nonkhiso ponthele yavo tyina valinga onombolo Mbopasikwa.

Estudo Perspicaz, Volume 3 pefo 544

Satanasi

Oityi tyihangununa ‘okuavela omunthu Satanasi opo ahanyueko mohitu’?

Ankho ukahi nokupameka ewaneno lyo mo Kolindu opo vetyivile okukuatesako una ankho walalele nomukai wa Tate yae, Paulu wati: “Omulume oo mupakulei ku Satanasi opo ovituwa viae ovivi aeta mewaneno vipolwe-mo.” (1 Kol. 5:5) Otyo ankho otyitumino tyokupola omunthu oo mewaneno nokulityilika oupanga nae. (1 Kol. 5:13) Okumuavela Satanasi tyilekesa okumupola mewaneno aakala wa Satanasi omutumini wouye. Omulume oo weelekua “nonkhiso yehehi” momasa aeho ine “ohitu.” Omulume walinga oundalelapo iya apolwa mewaneno ngotyo mopaspilitu wahanyua “mohitu.” (1 Kol. 5:6, 7) Tyilifwa notyo, Paulu wapakulile Himineu na Alesandele ku Satanasi mokonda valinga etyi tyapenga tyehelikuatele nekolelo liavo. — 1 Tim. 1:20.

(1 Ova Kolindu 5:9-11) Ame nemuhonekela momukanda wange okuti, yekeipo okulihonyaika novanthu vokulinga omaundalelapo. 10 Hikahi nokupopia ovanthu vomouye vokulinga omaundalelapo, ine hamwe ovanthu vokuna elungavi novokupunda, ine hamwe ovanthu vokufenda ovikahuku. Inkha ongotyo, tyili ñgeno ankho muna okutunda mouye. 11 Mahi, pahe ame ndyimuhonekela okuti, yekeipo okulihonyaika na kese munthu utiwa omukuatate, mahi ulinga oundalelapo, ine una elungavi, ine omunthu ufenda ovikahuku, ine omunthu utukana, ine onkholwa, ine wokupunda viaamuene. Muhaliei nomunthu watyo oo.

Oñgeni Motualako Okukala Mohole ya Huku? okatoi pefo 241

Okupolwa Mewaneno

Tyina omunthu alinga onkhali, ehelivele iya aanye okulandula ovitumino vya Siovaa, kapondola vali okutualako okukala Ombangi ya Siovaa. Una okupolwa mewaneno. Tyina omunthu apolwa mewaneno, onthue katukala vali noupanga nae, tupu katupopi vali nae. (1 Kolindu 5:11; 2 Suau. 9-11) Epongiyo olio, liyakulila enyina lya Siovaa iya newaneno. (1 Kolindu 5:6) Okupola omunthu mewaneno tupu onkhalelo yokuviyula ipondola okukuatesako omunthu okulivela opo akondoke ku Siovaa. — Luka 15:17.

▸ Okapitulu 3, opalagrafu 19

Ovola Olumono Lwa Huku

(1 Ova Kolindu 4:9) Tyina ndyitala ngoti onthue otyikundyi tyono apositolu, onthue Huku ahulilila okunyingiya motyila opo tumoneke kovanthu aveho, mokonda tuapakulwa kononkhia. Iya mouye auho, no noandyu, novanthu vetueete.

Omutala Womulavi 1/5/2009 pefo 25 § 16

Onoandyu “Mbuna Otyilinga Tyokukuatesako Ovanthu”

16 Ovakilisitau tyina valolwa vakala ‘otyitalukiso komaiho onoandyu.’ (1 Kol. 4:9) Nolupandu olunene onoandyu mbutala ovituwa vietu viekolelo, nokuhambukwa tyina umwe walinga onkhali elivela. (Luka 15:10) Ovituwa viapandwa na Huku vyo vakai Ovakilisitau vietwe no noandyu. Ombimbiliya ilekesa okuti “omukai una okukala nenyingilikilo komutwe wae mokonda yonoandyu.” (1 Kol. 11:3, 10) Tyotyili, onoandyu mbuhambukwa unene tyina ovakai Ovakilisitau novaumbili aveho va Huku kombanda yohi, vetavela ovilinga vya Huku nefendelo liae. Okutavela oko ehinangeleso ewa pala ovana va Huku keulu.

(1 Ova Kolindu 6:3) Onwe kamutyii okuti onthue matukakoyesa onoandyu? Iya omokonda yatyi tuhakoyesila ovitateka vimoneka pehepano?

Estudo Perspicaz, Volume 2 pefo 674

Otyitumino

Otyitumino tyapewa onoandyu. Onoandyu mbapewa otyitumino tyokutavela Huku, ngwe mbakolela vali kovanthu. (Heb. 1:7, 14; Sal. 104:4) Siovaa alo umwe waavelele otyitumino ondyale yae Satanasi, alihetyitavela. (Jó 1:12; 2:6) Mingeli Alakandyu waimbuka okuti Siovaa omukoyesi Wavilapo etyi apopila Eliapu okuti: “Siovaa ekukoyese.” (Sunda 9; tupu tyieleka na Zac. 3:2) Omunkhimanekwa Sesusi Kilisitu wapewa outumini na Siovaa Huku opo atumine onoandyu ambuho. (Heb. 1:6; 1 Pet. 3:22; Mat. 13:41; 25:31; Fil. 2:9-11) Ngotyo, Sesusi atumu oandyu opo ikapopile onondaka mbumwe Suau. (Eho. 1:1) Momukanda 1 Ova Kolindu 6:3 apostolu Paulu wapopila ovakuatate ovalembulwa vana vaholovonwa opo vakatumine onoandyu, mokonda ovo mavakakoyesa onondingavivi.

Okutanga Ombimbiliya

(1 Ova Kolindu 6:1-14) Tyina umwe pu onwe ena otyitateka na mukuavo, wenda kovakoyesi vehevaviuki, ahaende kovasukuki? 2 Ine kamutyii okuti ovasukuki mavakakoyesa ouye? Iya inkha ouye maukoyeswa no onwe, okuti opo kamutyivili okukoyesa ovitateka ovitutu ngovio? 3 Onwe kamutyii okuti onthue matukakoyesa onoandyu? Iya omokonda yatyi tuhakoyesila ovitateka vimoneka pehepano? 4 Inkha onwe muna ovitateka pehepano vina okukoyeswa, omokonda yatyi muholovonena vana vehetavelwa newaneno opo vakale ovakoyesi venyi? 5 Ndyimupopila ngotyo opo tyimukundise. Okuti pu onwe petupu omulume omunongo upondola okukoyesa pokati kovakuatate vae? 6 Soka onwe kamulingi ngotyo, mahi omukuatate utuala omukuatate wae kombonge kovanthu veheva Kilisitau! 7 Tyotyili tyina onomphela muna na vakuenyi mumbutuala kombonge, ngotyo muafindwa-le. Omokonda yatyi muhayekela mulingwe otyivi? Ha hahe vali muyeke okuvakelwa momatutu? 8 No onwe muhole okulinga ovivi, nokuvakela vakuenyi momatutu, ngwe ovakuatate venyi! 9 Ine kamutyii okuti vokulinga evi vihaviukile kavakapiñgana Ouhamba wa Huku? Muhayekei vakuenyi vemukembe. Vana valinga ouhayo wotyihola, vokufenda ovikahuku, vokulinga omaumbalehi, ovalume vahanda okulalwa novalume vakuavo, ovalume valala novalume vakuavo, 10 ovimphulu, ovanthu velungavi, ononkholwa, vokutukana, no vokupunda vya vakuavo, kavakapiñgana Ouhamba wa Huku. 11 Iya vamwe pu onwe ankho ongotyo vekahi. Mahi onwe muakohua; onwe muasukukiswa; muatalwa okuti muvaviuki menyina lya Tatekulu Sesusi Kilisitu no kononkhono mba Huku yetu. 12 Ku ame ovipuka aviho viaviuka, mahi haviho visilivila. Ku ame ovipuka aviho viaviuka, mahi ame himayeke ndyituminwe notyipuka natyike. 13 Okulia opala eimo iya eimo opala okulia, mahi ovipuka ovio Huku mekevinyimako. Olutu ha luouhayo wotyihola mahi opala Tatekulu, iya Tatekulu opala olutu. 14 Mahi Huku wapindula-po Tatekulu, no onthue meketupindula-po kononkhia kepondolo liae.

    Nyaneka Publications (1998-2026)
    Lupukamo
    Nyingila
    • Nyaneka
    • Tuma
    • Likoyela
    • Copyright © 2025 Watch Tower Bible and Tract Society of Pennsylvania
    • Etyi Tyilingwa Pokunyingilamo
    • Etyi Munyingilwa
    • Etyi Tyilingwa Pokunyingilamo
    • JW.ORG
    • Nyingila
    Okutuma