Omapulo Ovatangi
Oityi vamwe vatila onondaka mbuli m’Oviimbo 12:7, mbokwati “Ove moveyakulila,” kambupopi “vokwehulilwa” vapopiwa ovelesikulu 5, mahi mbupopia “Evi Siovaa apopia” viapopiwa movelesikulu 6?
Onovelesikulu ononkhwavo, mbulekesa umwe nawa okuti ovelesikulu 7 ipopia ovanthu.
Oviimbo 12:1-4, ipopia okuti: “Pokati kovanthu aveho petupu vali ovakwatyili.” Pahe movelesikulu ya 5 atee 7 wati:
“‘Mokonda vokwehulilwa valingwa onya,
Mokonda vokwahepa vekahi nokukema,
Ame mandyikatuka andyilingi etyi ndyilinga,” o Siovaa watola.
‘Ame mandyiveyovola ku vana vekahi nokuvelinga onya.’
Evi Siovaa apopia viasukuka;
Vikahi ngopalata yakangulwa mofolono yatungwa nonthata yasukukiswa, aipalekwa vali atee tyihika pepandu-vali.
Siovaa, ove moveyakulila;
Moyakulila munthu na munthu kovanthu vononthiki mbuno, okeveyakulila apeho-apeho.”
Ovelesikulu 5 yapopia umwe etyi Huku makalingila “vokwehulilwa.” Mekeveyovola.
Ovelesikulu 6 yapopia okuti: “Evi Siovaa apopia viasukuka, vikahi ngopalata yakangulwa.” Onondaka ombo mbupopia umwe etyi tukala tyina tusoka Kondaka ya Siovaa. — Ovii. 18:30; 119:140.
Pahe tala etyi tyapopiwa m’Oviimbo 12:7 yati: “Siovaa, ove moveyakulila. Moyakulila munthu na munthu kovanthu vononthiki mbuno, okeveyakulila apeho-apeho.” Oityi tutila mo Hembeleu ovelesikulu oyo ipopia ovanthu vokwehulilwa valingwa onya, kaipopi evi Siovaa apopia?
Mokonda ovelesikulu 7 yalandula konondaka mbati “Evi Siovaa apopia,” ovanthu vamwe vasoka okuti hamwe ovelesikulu oyo ipopia okuti Siovaa ‘uyakulila’ evi apopia. Otyili, onthwe tutyii okuti Siovaa wayakulila-le Ombimbiliya kovanthu ovanyingi ankho veiyele vahanda okwiihanya-ko. — Isa. 40:8; 1 Pet. 1:25.
Mahi tupu tutyii okuti Siovaa uyakulila ovanthu vokwapopiwa m’Oviimbo 12:5. Siovaa wakwataisako-ale “vokwehulilwa” no ‘vokulingwa onya,’ ya matwalako okuvekwatesako, nokuveyovola. — Som. 36:15; Ovii. 6:4; 31:1, 2; 54:7; 145:20.
Oityi tutila ovelesikulu 7 ipopia ovanthu?
Tupopia ngootyo mokonda yeetyi tyipopia onovelesikulu mbatyo ambuho mb’Oviimbo 12.
M’Oviimbo 12:1 mwapopiwa okuti ovanthu va Huku vakembwa nonondingavivi. Pahe ononkhwavo ambupopi okuti Siovaa makatukila vana vaselula vakwavo. Onondaka ombo mbutuyumbisa-ko umwe onthumbi yokuti Siovaa maamena ovanthu vae, mokonda evi apopia viasukuka.
Naina, ovelesikulu 7, ikahi nokupopia okuti Siovaa mayakulila, maamena vokwehulilwa vokulingwa onya mouye ou wovivi.
Movelesikulu 7, Ombimbiliya yetu yapopia-mo umwe ngeetyi tyapopia ovihonekwa vyo Masorético mo Hembeleu. Mo Septuaginta mo Ngeleku, ovelesikulu 7 yati: Moyovola “onthwe.” Otyo tyitala umwe movanthu va Huku vokwehulilwa, valingwa onya vapopiwa-le movelesikulu 5. Ovelesikulu 7, pahe yamanuhula nonondaka mbokwati: “Moyakulila munthu na munthu kovanthu vononthiki mbuno,” ovanthu onondingavivi. (Ovii. 12:7, 8) Ombimbiliya imwe yo Alamaiku movelesikulu 7 yati: “Ove Tatekulu moyakulila onondingaviwa. Moveamena apeho kovanthu onondingavivi.” Otyo tyilekesa umwe nawa okuti Oviimbo 12:7, kaipopi evi Siovaa apopia vili movelesikulu 6. Mahi ipopia ovanthu vokwehulilwa vapopiwa movelesikulu 5.
Etyi tyipopia ovelesikulu oyo, tyipameka ovanthu va Huku vokwehemuyeke-po, mokonda ilekesa okuti Huku mevekwatesako.