Omapulo Ovatangi

Omunthu wapopiwa mu 2 Ova Tesalonika 3:14 watiwa mulavesei nawa, ulaveswa vala nawa novakulu vewaneno ine o newaneno aliho?

Omutumwa Paulu wahonekelele Ovakwa-Kilisitu ova Tesalonika, ati: “Ou wehetavela ondaka twapopia momukanda ou, mulavesei nawa.” (2 Tes. 3:14) Pana ankho tupopia okuti ovakulu vewaneno vena okupopila ewaneno okuti, elowei komunthu oo. Ankho tuti ine omunthu upakailwa-mo ehimbwe otyo alingila umwe tyawina ahalandula onondunge mbuli m’Ombimbiliya, ovakulu vewaneno vena okulinga elongomona lilondola ewaneno. Ovaivisi ankho vapopilwa umwe okuti kavapondola okuliovaula nomunthu oo uli nokulaveswa. Nkhwali oputyina vala velivasa meliongiyo no movilinga viokwivisa.

Mahi etyi twatala nawa onovelesikulu ononkhwavo mbotesitu oyo, twetyimona okuti otyipuka otyo tyesukisa okupilululwa. Omu twanoñgonokela otesitu oyo, twetyimona okuti Paulu apa ankho uli nokupopia ovipuka pamwe munthu na munthu mewaneno alinga. Naina, katyisukisa-le ovakulu vewaneno valinge elongomona lilondola ewaneno. Oityi twapilululila etyi ankho tunoñgonoka tyiyemba komukanda wa 2 Ova Tesalonika 3:14? Tutyitalei.

Paulu wetyimwene okuti vamwe mewaneno, ‘veli nokweenda vala ombwandya.’ Vati umwe otyo vapakailwa-mo Nondaka ya Huku, otyo vehetavela. Potete, pweetyi aile-ko-ale wevepele otyitumino etyi, wevetile: “Ou wahahande okuundapa, nokulia ahalie.” Vamwe ankho kavahande okuundapa vamone-vo tyavo, ngwe vena umwe ononkhono mbokuundapa. Tupu ankho velipaka vala po viaamwene. Ovanthu ngoovo vaenda vala ombwandya, oñgeni vakwavo mewaneno ankho vena okuveenda? — 2 Tes. 3:​6, 10-12.

Paulu watile omunthu ulinga ngootyo “mulavesei nawa.” Ondaka oyo mo Ngeleku o ngokuti, una okutyimona okuti omunthu otyo ekahi ngootyo, pahe ove olunguka umwe wahayambule etyi ekahi. Otyipuka otyo Paulu wetyipopilile ewaneno aliho, ha vakulu vewaneno vala. (2 Tes. 1:1; 3:6) Naina, otyo ankho tyitei mwene komunthu na munthu. Ine umwe mewaneno umona mukwavo wehetavela etyi Ondaka ya Huku ipopia, ulinga vala viombwandya, mwene oe una okutala ine ‘metyiyeke-po tyokulihonyaika’ nomunthu oo.

Okuti otyo tyilekesa okuti omunthu oo ankho pahe vemutala ngatyina apolwa mewaneno? Au. Paulu wati: “Mwehemuyekei muviyulei mokonda o mutaveli mukwenyi.” Naina ovaivisi momawaneno ankho vapondola okulivasa nomunthu oo uya nokulaveswa nawa, momaliongiyo no movilinga viokwivisa, mahi povitalukiso valinga no povipuka ovikwavo vali, ankho vapondola okumuyeka-po avahakala nae. Opala-tyi vehemwihanena? Paulu wati: ‘Opala akunde.’ Omunthu oo wokweenda ombwandya, apa etyimona okuti uli nokulaveswa, tyipondola okumukundisa ayeke-po evi alinga. — 2 Tes. 3:​14, 15.

Oñgeni ovanthu va Huku hono matutyimono okuti omunthu ou una okulaveswa nawa? Tuna okutala nawa ine evi omunthu oo eli nokulinga uli umwe “nokweenda ombwandya” ngeetyi tyapopile Paulu. Paulu apa ankho keli nokupopia ovanthu valinga ovipuka vimwe onthwe ngoti komutima wetu viahaviukile, mahi viahailikilwe m’Ombimbiliya. Tupu ankho keli nokupopia ovanthu vehole evi onthwe twehehole. Nii ankho keli nokupopia ava vena etyi vetulinga tyetunumanesa. Mahi ava apopia apa, ovava vapakailwa-mo umwe Nondaka ya Huku, otyo valingila tyawina, vehetavela.

Hono ine tutala omwivisi mukwetu wehetavela etyi tyipopia Ombimbiliya,a mwene onthwe tuna okusoka ine matuliyeke-po nae povitalukiso no povipuka ovikwavo vali. Mokonda tyokuliyeka-po nomunthu oo mwene tyitei komunthu na munthu, katupondola okutyitomphola novanthu ovakwavo vali, tutyitomphola vala no vomeumbo lietu. Mahi komaliongiyo no movilinga viokwivisa, tupondola umwe okutomphola nawa nae. Ine upiluluka ayeke-po evi alinga, opo pahe tupondola okulikondokela vali povitalukiso, no povipuka ovikwavo vali.