Omapulo Ovatangi

“Onoandyu mbaholovonwa” mbapopiwa mu 1 Timotiu 5:21 ombupi?

Paulu wahonekelele mukulu mukwavo wewaneno Timotiu, ati: “Ame ndyikupopila, mwene na Huku utyeete, aveho na Kilisitu Sesusi no noandyu mbaholovonwa, tavela onondunge ombo ohalingi okapungulula, hamwe olingi okaame.” — 1 Tim. 5:21.

Opo tutyinoñgonoke nawa, nkhele matupopi onoandyu mbupi tuti umwe ha-mboko mbapopiwa motesitu oyo. Onoandyu mbuli nokupopiwa apa hakuti ovo 144.000. Etyi Paulu ahonekela onondaka ombo Timotiu, nkhele ankho etutilo lyo vokwenda keulu kalinehimbike. Povatumwa novalembulwa ovakwavo vali, nkhele ankho petupu nawike uli-ale keulu. Opo naina “onoandyu mbaholovonwa” mbuli nokupopiwa apa havo-ko. — 1 Kol. 15:​50-54; 1 Tes. 4:​13-17; 1 Swau 3:2.

Tupu “onoandyu mbaholovonwa” mbuli nokupopiwa apa hambombuna-ko mbehetavelele ku Huku ambutundu keulu Pombila Onene pononthiki mba Nowee. Ombo mbahula ku Satanasi mbakala ovilulu, pahe onondyale mba Sesusi. (Ehim. 6:2; Luka 8:​30, 31; 2 Pet. 2:4) Apa kapii onoandyu ombo mambukakutwa, ambukala omanima 1.000 tyakutwa, haa pahe ambukanyiminwako kumwe n’Eliapu tyahakamonaika-ko vali. — Sunda 6; Ehol. 20:​1-3, 10.

“Onoandyu mbaholovonwa” Paulu apopia apa ombombu mbutavela ku “Huku noku Kilisitu.”

Keulu kuna onoandyu ononyingi-nyingi mbutavela ku Huku. (Hemb. 12:​22, 23) Mahi onoandyu ombo kambulingi vala otyilinga tyike. (Ehol. 14:​17, 18) Siovaa watumine oandyu ike vala, aiipaa ovalume vo monthanda yova Asilia vena 185.000. (2 Oha. 19:35) Onoandyu ononkhwavo tyipondola mbapewa otyilinga ‘tyokupola Mouhamba wa [Sesusi] ovipuka aviho vipundukisa, novanthu vakalela vala okulinga ovivi.’ (Mat. 13:​39-41) Nkhele onoandyu ononkhwavo tyipondola ‘mambukakongolola vana vokwaholovonwa’ vende keulu. (Mat. 24:31) Ombu ononkhwavo tyipondola mbapewa otyilinga tyokutuyakulila ‘monondyila mbetu ambuho.’ — Ovii. 91:11; Mat. 18:10; Tala Mateusi 4:11 na Luka 22:43.

“Onoandyu mbaholovonwa” mbapopiwa mu 1 Timotiu 5:​21, tyipondola ombombu mbapelwe otyilinga tyokukwatesako ovanthu momawaneno. Paulu wapopile etyi ovakulu vewaneno vena okulinga, ovanthu mewaneno vevelinge onthilo. Watile ovakulu vewaneno vena okusuka novilinga viewaneno, kavapondola okulinga okapungulula, tyina vena tyimwe vahanda okulinga vena umwe okusoka nawa. Ankho vena okulinga otyipuka otyo Paulu apopile, mokonda etyi valinga, “mwene na Huku utyeete, aveho na Kilisitu Sesusi no noandyu mbaholovonwa.” Naina, onoandyu mbuna ovilinga ovinyingi, mbati umwe ombo mbusukula ewaneno, ombo mbuyakulila ovanthu va Huku, ombo mbuvekwatesako movilinga viokwivisa, otyo mbupopila Siovaa evi mbumona. — Mat. 18:10; Ehol. 14:6.