Nthinda Uhinangelele-ko

Ovanyingi pamwe tyitupwiya unene okuhinangela ovipuka twelilongesa, hamwe noove tyikupwiya. Mahi ovipuka Sesusi alongesile kavipwiya okuvihinangela mokonda pokulongesa ankho upopia omihe. Evi Sesusi alongesile kavipwiya okuvipaka momutwe, mokonda omihe apopile vina kweetyi vitusokesa. Noove opo utyivila okuhinangela vali nawa evi ulilongesa, uti tyina wamelilongesa, pahe olingi etyi matyikuhinangelesa. Oityi tyipondola okukuhinangailisa? Okunthinda omalutalatu apopia etyi welilongesa.

Ovanyingi vokuti tyina velilongesa otyipuka, avanthindi omalutalatu apopia etyi velilongesa, vahinangela vali nawa evi velilongesa. Otyipuka otyo tyati umwe otyo tyivekwatesako okuhinangela onondaka mbatyo, otyo tupu tyivekwatesako okuhinangela ovipuka ovinene velilongesa. Katyisukisa​-le okunthinda olutalatu lwehiwa nawa, mahi ololu vala malukuhinangelesa etyi welilongesa. Otyipuka otyo tyihole okukwatesako unene vokwakulupa.

Onthiki onkhwavo ulilongesa, nkhele hetekela vala okunthinda omalutalatu apopia etyi welilongesa. Ine otyo ulinga, mohinangela ovipuka ovinyingi welilongesa.