ONTHELE YOKULILONGESWA 15
OTYIIMBO 30 Tate Yange, Huku Yange, Panga Liange
Kwoonthwe “Okufwena ku Huku, Otyo Otyiwa Vali”!
“Kwaame okufwena ku Huku, otyo otyiwa vali.” — OVII. 73:28.
ETYI MATYIPOPIWA-MO
Mamupopiwa etyi tuna okulinga tukale omapanga a Siovaa, noviwa tumona tyina tumapanga ae.
1-2. (a) Oityi tuna okulinga tukale epanga enene liomunthu umwe? (b) Oityi matulilongesa monthele ei?
OKUTI OVE una omunthu umwe uti epanga liange enene? Oupanga wenyi watuka-pi? Tyipondola ankho mukala unene amuho, ekupopila evi akondya-kondya navio, amutomphola evi ehole neevi eyele. Tupu mokutala wamona okuti omunthu ukahi nawa, una ovituwa oviwa, noove uhanda okukala navio. Okuhimbikila opo omuhumbu amukala umwe omapanga omanene.
2 Opo ukale epanga enene liomunthu umwe, usukisa okukala nae omuvo omuyingi otyo mutomphola, tupu usukisa okulikwatehila. Nokulinga oupanga na Siovaa haityo-ñgo. Monthele ei, matutale etyi tuna okulinga tukale omapanga omanene a Siovaa, noviwa vituka-ko. Mahi nkhele matutale, omokonda yatyi otyiwa okukala omapanga a Siovaa, Epanga ewa vali.
3. Omokonda yatyi otyiwa okusoka koviwa vituka kokukala omapanga a Siovaa? Tutyieleka natyi.
3 Tyipondola noove utyii umwe okuti okukala epanga lya Siovaa otyo otyipuka otyiwa vali. Okusoka koviwa vituka koupanga wetu na Siovaa, tyitwavela ondundo tutwaleko noupanga oo. (Ovii. 63:6-8) Onthwe tutyii okuti okulia, okulia kukongokesa, nokunana-nana monongolo, nokupululukwa-po umwe nawa, nokunwa omeva, olutu lwetu lukala nawa. No ngootyo vamwe kavesukile-ale nokulinga ovipuka ovio, kavesukile-ale nekongoko liavo. Mahi onthwe tyina tusoka koviwa vituka-ko, opo pahe apeho tuvilinga. Nokukala noupanga na Siovaa haityo-ñgo, tutyii okuti okulinga omapanga Ae tyikahi nawa, mahi okusoka koviwa vituka koupanga oo, opo tulikwatehila umwe oupanga wetu utwaleko. — Ovii. 119:27-30.
4. Oityi omwiimbi apopia m’Oviimbo 73:28?
4 Tanga Oviimbo 73:28. Otyiimbo 73 tyahonekwa na umwe womuhoko wa Levii, otyilinga tyae ankho okwiimba mondywo ya Siovaa. Mokutala apa ahimbika okufenda Siovaa ankho palamba-le omanima. Mahi, etyimono okuti hahe mwene elihinangelese, nokuhinangelesa vakwavo okuti, “okufwena ku Huku, otyo otyiwa vali.” Oviwa patyi vituka kokufwena ku Huku?
“OKUFWENA KU HUKU” KUTUKA EHAMBU
5. (a) Oityi tutila okufwena ku Siovaa tyituhambukiswa? (b) Okutalela kweetyi tyipopia Omihe 2:6-16, popia-po vimwe vilekesa okuti kounongo wa Siovaa ukopa-ko oviwa ya ukuyakulila.
5 Okufwena ku Siovaa atulingi omapanga ae, matukala nehambu. (Ovii. 65:4) Matukala nehambu mokonda, tete tukopa onondunge m’Ondaka yae Ombimbiliya atulingi ovanongo. Ounongo oo utukwatesako atwahalingi ovipuka eyele, tupu utukwatesako atwahalingi evi vitweetela. (Tanga Omihe 2:6-16.) Otyo Ombimbiliya yapopila okuti: “Uhambukwa oyou uvasa ounongo, uhambukwa oyouna uvasa ekungunyiko.” — Omih. 3:13.
6. Ovipuka patyi viasoyesile omwiimbi?
6 Otyili, nomapanga a Siovaa pamwe asoya umwe. Omuhoneki w’Oviimbo 73, nae pena omuvo asoyele mokonda yokusoka evi viahai-na-mutwe. Watemeneko, alu onkhi ovanthu vehesukile novitumino vya Siovaa, mokonda tyina ankho evetala ñgaa ngoti vekahi vali nawa. Tupu ankho usoka okuti ovanthu vokulinga ovivi, no vomalityindailo, vamona, vena ekongoko, kavamono emone nga vakwavo. (Ovii. 73:3-7, 12) Omwiimbi oo asoyo umwe unene pahe ai vala mokusoka okuti etyi akoya-po tyokulingila Siovaa tyitupwa-le. Mokwasoya omo ati: “Naina etyi nalinga tyokusukukisa omutima wange, ononkhono-pwila vala, nepwila vala nokukoha omavoko ange, tyilekese okuti ndyitupu etyi nalinga.” — Ovii. 73:13.
7. Tyina twasoya oityi tupondola okulinga tukale vali nehambu? (Tala olutalatu lwo kondye.)
7 Namphila omwiimbi ankho asoya umwe unene, mahi alingi tyimwe opo apilulule olusoke ankho ena-lo. Anyingila “mondywo onene ya Huku,” Siovaa emukwatesako okupilulula olusoke ankho ena-lo. (Ovii. 73:17-19) Siovaa Epanga lietu enene, na tyina umwe twasoya utyimona. Ine tulikwambela, atutavela tyina etukwatesako n’Ondaka yae Ombimbiliya, tupu atutavela tyina vakwetu tufenda navo vetukwatesako, opo matumono ononkhono mbokutwalako okumufenda namphila ankho twasoya. Na tyina umwe tuna ovitateka atuhulilwa, atulingi otyiho, Siovaa metukwatesako atutulu omutima. — Ovii. 94:19.a
Omulume umwe womuhoko wa Levii wahoneka Oviimbo 73, utai “pondyuo onene ya Huku.” (Tala opalangalafu 7)
“OKUFWENA KU HUKU” TYITUKALESA NAWA PEHEPANO ATUKAMONA OVIWA
8. Oityi vali tutila okufwena ku Huku tyitukalesa nawa?
8 Okufwena ku Huku atulingi omapanga ae, tyitukalesa nawa mokonda yovipuka evi vivali. Tyo tete, tukala nomwenyo ukahi nawa, pehepano. Tya vali, tumona omphamekelo, komutwe wandyila atukamona oviwa. (Sele. 29:11) Pahe nkhele matutomphola-po ovipuka ovio vivali.
9. Okukala omapanga a Siovaa tyitukalesa ñgeni?
9 Okukala omapanga a Siovaa tyitukalesa nomwenyo ukahi nawa pehepano. Hono ovanthu ovanyingi vokusoka okuti kouye kutupu Huku, vetupu ehambu, tupu vasoka okuti komutwe wandyila kombanda yohi kamakukakala vali ovanthu. Mahi onthwe, mokonda twelilongesa umwe nawa Ondaka ya Huku, tutyii umwe okuti Huku oko ekahi, etyi tumulingila hanonkhono-pwila mokonda “uyamba ava vesuka umwe nokumwoovola.” (Hemb. 11:6) No pehepano, tuna-le ehambu mokonda tuli nokulinga etyi twatungilwa, okufenda Tate yetu wokeulu Siovaa. — Epal. 10:12, 13.
10. Omu mutyipopila Oviimbo 37:29, oityi Siovaa makaavela vana vemuyumba onthumbi?
10 Ovanthu ovanyingi mokonda kavei etyi Huku makalingila ovanthu, vetupu omphamekelo. Mokonda yootyo vesuka vala nokuundapa, nokunepa, nokukala novana, nokulipakela ovipuka haa velitekule tyina vamakulupa. Mahi onthwe ovafendi va Siovaa, twapamena mu Siovaa, tutyii okuti metutekula. (Ovii. 25:3-5; 1 Tim. 6:17) Onthwe tuyumba onthumbi mepanga lietu Siovaa, tutyii okuti evi etupopila mekevilinga umwe. Tyimwe etupopila, okuti matukemufenda pala apeho mouye Omupe. — Tanga Oviimbo 37:29.
11. Oityi vali tyituka kokukala omapanga a Siovaa, ya Siovaa ukala ñgeni?
11 Pena vali otyipuka otyikwavo, tutila okulinga omapanga a Huku otyo otyiwa vali. Siovaa wati maeevela vana valinga onkhali avelivele, avafwene vali kwe. (Isa. 1:18) Otyipuka otyo otyiwa, mokonda tyitukalesa nombungo ipumphi, atuhakalela vala okulivela onombei mokonda yovivi twalingaile. (Ovii. 32:1-5) Onthwe tuhambukiswa Siovaa tyina tufwena kwe, atulingi omapanga ae. (Omih. 23:15) Tyipondola wasoka koviwa ovikwavo vituka kokukala omapanga omanene a Huku. Pahe oityi una okulinga utwaleko okufwena ku Huku?
OITYI MOLINGI UTWALEKO “OKUFWENA KU HUKU”
12. Oityi walinga-le ufwene ku Huku?
12 Ine wambatisalwa-le, Umbangi ya Siovaa, opo walingako-ale ovipuka ovinyingi vikufweneka ku Siovaa. Welilongesa otyili tyiyemba ku Siovaa, na Sesusi, welivela ononkhali walingile, uyumba onthumbi mu Huku, ulikwatehila ulinge etyi Siovaa ahanda. Opo oupanga wetu na Huku upame vali, twesukisa okutwalako okulinga ovipuka ovio. — Kolo. 2:6.
13. Ovipuka patyi vitatu mavitukwatesako okutwalako okufwena ku Siovaa?
13 Oityi matulingi tutwaleko okufwena vali ku Siovaa? (1) Okutanga apeho Ombimbiliya, nokulilongesa-yo vali nawa. Pokutanga, etyi tuna okusuka vali natyo, okulilongesa ovipuka viaya kohi, viyemba ku Huku. Tuna okunoñgonoka umwe nawa etyi Huku etuhandela atutale etyi tupondola okulinga tweendele monondunge tuvasa m’Ondaka yae. (Efe. 5:15-17) (2) Twesukisa okupameka eyumba-nthumbi lietu mu Siovaa, mokusoka evi etulingila vilekesa okuti utuhole. (3) Twesukisa okuyala evi Siovaa eyele, atuhalingi oupanga na vana vevilinga. — Ovii. 1:1; 101:3.
14. Omu mutyipopila 1 Ova Kolindu 10:31, ovipuka patyi tuna okulinga nthiki-na-nthiki tuhambukiswe Siovaa? (Tala omalutalatu.)
14 Tanga 1 Ova Kolindu 10:31. Tyesukisa unene tutwaleko okulipaka movipuka vihambukiswa Siovaa. Ovipuka vihambukiswa Siovaa havievi vala tulinga movilinga viokwivisa no momaliongiyo. Mahi mwene neevi tulinga nthiki-na-nthiki vina okumuhambukiswa. Pwoovio, pati umwe nokukala omunthu uyumbwa onthumbi movipuka aviho, nokukwatesako vakwetu neetyi tuna. (2 Kol. 8:21; 9:7) Tupu Siovaa uhanda tukwate nomankhanya evali, omwenyo etwaavela. Tupu tufwena vali ku Huku tyina tuliteta kokulia unene, no kokunwa unene, na tyina tulinga nawa olutu lwetu tukale nekongoko likahi nawa. Tyina tulikwatehila tulinge evi vihambukiswa Siovaa, namphila hamwe omoupuka oututu vala, opo Siovaa utupanda vali. — Luka 16:10.
Okutaha nawa, nokunana-nana monongolo, nokutekula nawa vakwetu, nokulia ovikulia vikongokesa, tyihambukiswa Siovaa. (Tala opalangalafu 14)
15. Siovaa uhanda ovanthu tuvetekule ñgeni?
15 Siovaa una okankhenda utekula nawa ovanthu vatyo aveho, ava vemufenda naava vehemufende. (Mat. 5:45) Uhanda noonthwe tutekule nawa ovanthu vatyo aveho. Onthwe ‘katupopi omapita omunthu nawike, katulingi ovanthu vonondyaya, twapepuka omutima, tuvanthu vomapole velivila novanthu aveho.’ (Titu 3:2) Mokonda yotyo, onthwe katupopi omapita ovanthu vahafende Siovaa, tupu katwevetombele. (2 Tim. 2:23-25) Tyina apeho tutekula nawa ovanthu vatyo aveho, opo tulinga omapanga omanene a Siovaa.
TYITAVELA “OKUFWENA KU HUKU” NAMPHILA TUPENGESA
16. Oityi omuhoneki w’Oviimbo 73 ankho asoka?
16 Pamwe upondola osoko oti, ame hatele-mo-ale vali mokulinga epanga lya Siovaa mokonda ndyipengesa. Ngeetyi twapopia-le, nomuhoneki w’Oviimbo 73 otyo asokele. Wapopia okuti: “Kwakambela vala katutu onomphai mbange maa mbusosonoka. Kwakambela vala kapii ñgeno mbasesunuka.” (Ovii. 73:2) Mwene wati, ‘aihamenwa’ asoko okuti ku Siovaa ulinga “ngotyinyama tyahasoko” ‘utupu onondunge.’ (Ovii. 73:21, 22) Ovipuka ovio asokele vihekahi nawa, avimutwala kokuti katele-mo mokulingwa olwembia na Siovaa.
17. (a) Namphila omwiimbi ankho asoya, oityi alingile? (b) Oityi tulilongesila-ko? (Tala omalutalatu.)
17 Mokutala omwiimbi ou, olusoke lwokuti katele-mo vali mokuhumbwa na Siovaa wakalele vala nalo omuvo wehehi. Namphila ankho asoya, mahi etyimono okuti una okufwena vali ku Huku. Otyo tutyitalela mweetyi apopia, wati: “Mahi pahe hikuyeke vali [Siovaa]; wakwata mokuvoko kwange kwo kokulio. Etyi undongesa otyo tyinthyongolela, haa onthwala apa pena omunkhima.” (Ovii. 73:23, 24) Noonthwe tyina twasoya, tutalei mu Siovaa onkhanda yetu ututulisa omutima. (Ovii. 73:26; 94:18) Na tyina umwe onomphai mbetu mbamasosonoka, tupondola okukondoka ku Siovaa tyityii okuti, ‘okupolela-po ovanthu oviponyo kasete.’ (Ovii. 86:5) Tyina twamatale ñgaa twasoya opo umwe vali tuna okufwena ku Huku yetu. — Ovii. 103:13, 14.
Tyina twamatale okuti twasoya, twesukisa okufwena ku Huku, atulipake vali unene movilinga viae. (Tala opalangalafu 17)
“FWENA KU HUKU” PALA APEHO
18. Oityi tutila tyokupameka oupanga wetu na Siovaa katyihikila?
18 Tyokupameka oupanga na Siovaa nokumunoñgonoka nawa, katyihikila, tyitwalako vala atee-tee. Ombimbiliya yati, onondyila mba Siovaa nounongo wae, nenoñgonoko liae “viaya kohi.” ( Loma 11:33) No mouye Omupe matukatwalako okulilongesa evi viayemba ku Siovaa.
19. Etyi tyapopiwa m’Oviimbo tyitukalesa nonthumbi yatyi?
19 Oviimbo 79:13 yati: “Pahe opo onthwe vanthu vove, onthwe nongi mbo motyunda tyove, matukekupandaula, atukaivisa omunkhima wove apeho, apeho.” Noove yumba-ko onthumbi, ine utwalako okufwena ku Siovaa mokapewa oviwa vihapu. Noove upondola okupopia ngomuhoneki w’Oviimbo, watile: “Huku onkhanda yomutima wange, oe vala ndyina-e apeho.” — Ovii. 73:26.
OTYIIMBO 32 Hula ku Jeova!
a Tyina omunthu eliunga-unga vala, alinga vala otyiho, nolumphoki kelumono, hahe ende kosipitali akatalwe oityi tyili nokumulingisisa ngootyo. Katange m’Omutala Womulavi No. 1 wo 2023.